ថ្ងៃទី៣កញ្ញានេះ តំណាងត្រីភាគីបន្តកិច្ចប្រជុំចរចាកំណត់ប្រាក់ឈ្នួលកម្មករឆ្នាំ២០២៦

ការចរចាប្រាក់ឈ្នួលកម្មករនិយោជិតក្នុងឧស្សាហកម្មវាយនភ័ណ្ឌកាត់ដេរ សម្រាប់ឆ្នាំ២០២៦ បានចាប់ផ្ដើមកិច្ចប្រជុំត្រីភាគី លើកទី២ នៅវេលាម៉ោង១១:៣០នាទីព្រឹក ថ្ងៃទី៣ ខែកញ្ញា ឆ្នាំ២០២៥នេះ ក្រោមវត្តមានដឹកនាំរបស់លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ។​

មុនដំណើរការកិច្ចប្រជុំត្រីភាគីដែលមានតំណាងរាជរដ្ឋាភិបាល ភាគីតំណាងកម្មករនិយោជិត (សហជីព) និងតំណាងភាគីនិយោជក ថ្ងៃនេះ តំណាងភាគីកម្មករនិយោជិត និងតំណាងភាគីនិយោជក ក៏បានជួបប្រជុំផ្ទៃក្នុងសម្ងាត់រៀងៗខ្លួនផងដែរ​ ដើម្បីសម្រេចនូវកិច្ចការផ្ទៃក្នុងមួយចំនួនរបស់ខ្លួន។

នេះជាលើកទី២ ដែលក្រុមប្រឹក្សាជាតិប្រាក់ឈ្នួលអប្បបរមា អាណត្ដិទី៤ បានបើកកិច្ចប្រជុំត្រីភាគី ដើម្បីកំណត់ប្រាក់ឈ្នួលកម្មករនិយោជិត បន្ទាប់ពីបានបើកកិច្ចប្រជុំលើកទី១ កាលពីរសៀលថ្ងៃទី២០​ ខែសីហា ឆ្នាំ២០២៥។ នៅក្នុងកិច្ចប្រជុំលើកទី១ សម្រេចបានលទ្ធផលមួយចំនួន ដោយភាគីទាំង៣ បានឯកភាពលើទិន្នន័យ និងស្ថិតិសំខាន់ៗនៃលក្ខណវិនិច្ឆ័យទាំង៧ សម្រាប់ភាគីពាក់ព័ន្ធធ្វើជាមូលដ្ឋានប្រើប្រាស់ក្នុងការចរចាប្រាក់ឈ្នួល។

គោលការណ៍​លក្ខណ​វិនិច្ឆ័យ​ចំនួន២ ដែលកិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមា នៅបន្តយកធ្វើជាមូលដ្ឋានក្នុងការពិភាក្សាប្រាក់ឈ្នួលសម្រាប់កម្មករនិយោជិតក្នុងវិស័យវាយនភ័ណ្ឌកាត់ដេរនៅកម្ពុជា សម្រាប់ឆ្នាំ២០២៦ គឺលក្ខណវិនិច្ឆ័យបែបសង្គម ផ្ដោតទៅលើកត្តាស្ថានភាពគ្រួសារ អត្រាអតិផរណា និងការចំណាយក្នុងការរស់នៅ។ ខណៈលក្ខណវិនិច្ឆ័យបែបសេដ្ឋកិច្ច គឺលើកត្តាផលិតភាព ភាពប្រកួតប្រជែងរបស់ប្រទេស ស្ថានភាពទីផ្សារការងារ និងកម្រិតចំណេញរបស់វិស័យ។ ការវិនិច្ឆ័យទាំងនេះ គឺជាមូលដ្ឋានគ្រឹះមុនឈានដល់ការកំណត់តួលេខដំឡើងក្នុងកម្រិតណាមួយនោះ។

ជាការរំលឹក ឆ្នាំ២០២៥នេះ ​ប្រាក់​ឈ្នួល​ទាបបំផុតរបស់កម្មករ-និយោជិត មានចំនួន២០៨ដុល្លារក្នុងមួយខែ បើធៀបនឹងឆ្នាំ២០២៤ មានត្រឹម២០៤ដុល្លារ ពោលគឺកើនឡើង៤ដុល្លារ ក្រោយមានការបោះឆ្នោតដោយកិច្ចប្រជុំត្រីភាគី ដោយបានឯកភាពដំឡើង២ដុល្លារ និងការបន្ថែម២ដុល្លារទៀតពីសម្ដេចធិបតីនាយករដ្ឋមន្ត្រី ហ៊ុន ម៉ាណែត។

សម្រាប់ដំណើរការប្រជុំចរចាប្រាក់ឈ្នួលពេលនេះ ត្រូវបានភាគីពាក់ព័ន្ធរំពឹងថា នឹងប្រព្រឹត្តទៅដោយរលូន និងទទួលបានលទ្ធផលល្អប្រសើរឡើង យោងតាមបទពិសោធជាច្រើនឆ្នាំកន្លងមក ដើម្បី​ប្រយោជន៍​កម្មករ​ដោយ​អាច​ទទួលយកបាន​ទាំងអស់គ្នា​៕

ដោយ៖ ធឿន វ៉ាន់សុង