សភាស៊ុយអែតទទួល​យក​ញត្តិ​របស់ពលរដ្ឋ​ខ្មែរតវ៉ា​រឿង​លក់​យន្ត​ហោះ​ចម្បាំង​ឱ្យថៃ

សភាជាតិ​ប្រទេសស៊ុយ​អែត​បាន​ទទួល​យក​ញត្តិ​របស់​ពលរដ្ឋ​ខ្មែរ​ដែល​តវ៉ា​ចំពោះការ​សម្រេច​របស់​រដ្ឋាភិបាល​ស៊ុយ​អែត​លក់​យន្ត​ហោះ​ចម្បាំង​ឱ្យ​ថៃ។ ញត្តិ​នេះ​ត្រូវ​បាន​បញ្ជូន​ទៅ​កាន់​សមាជិក​គណៈកម្មការ​កិច្ច​ការ​ការ​ពារ​ជាតិ​របស់​សភា​ស៊ុយ​អែត​ ទោះ​ជាយ៉ាង​ណាការ​យក​ទៅពិភាក្សា​យ៉ាង​ណា​គឺ​អាស្រ័យ​លើ​សមាជិករបស់​គណៈកម្មការ​ទាំង​នោះ​។

ការ​សម្រេច​ទទួល​នេះ​គឺ​នៅ​ថ្ងៃទី​១៨ ខែក​ញ្ញា ម្សិលមិញ បន្ទាប់ពី​តំណាង​ពលរដ្ឋ​ខ្មែរ​លោក Moon Pich បាន​ផ្ញើញតិ្តទៅ​កាន់សភាស៊ុយ​អែត​កាលពីថ្ងៃទី​៨ ខែ​កញ្ញា។

លើកឡើងលើហ្វេសបុកផេករបស់ខ្លួននៅថ្ងៃទី១៩ ខែកញ្ញានេះលោក Moon Pich បានលើកឡើងថា ការទទួលយកនេះគឺជាការបើកផ្លូវឱ្យអាចបន្តបញ្ចុះបញ្ចូលសមាជិកសភានីមួយៗនៃសមាជិកគណៈកម្មាធិការទទួលបន្ទុកកិច្ចការពារជាតិនៃសភាស៊ុយ​អែតបន្តទៀត។

លោក​ថា៖ «នៅក្នុងទំនាក់ទំនងអន្តរជាតិ គេតែងឲ្យតម្លៃដល់ផលប្រយោជន៍របស់ជាតិគេ​ ជាជាងបញ្ហារបស់ពួកយើង។ ទោះជាយ៉ាងណា​ ពួកយើងមិនអាចបោះបង់ឡើយ ព្រោះវាទាក់ទងដល់សន្តិសុខជាតិ សេចក្ដីសុខរបស់ប្រជាជន និងអនាគតរបស់ជាតិយើង។ ពេលនេះ ដោយកម្លាំងនៃសាមគ្គីភាព សំឡេងរបស់ពួកយើងបានឮទៅដល់សភាជាតិស៊ុយអែត ហើយកង្វល់របស់ពួកយើងអាចនឹងត្រូវយកទៅពិភាក្សា និងដោះស្រាយ»។

គួរឱ្យ​ដឹង​ផងដែរ​ថាពលរដ្ឋ​ខ្មែរ​ជាង​២ម៉ឺន៦ពាន់​នាក់​បានចុះឈ្មោះ​ចូលរួម​ក្នុងការ​ទាមទារតាម​អន​ឡាញ​ទៅ​ប្រធាន​សភាស៊ុយ​អែតលោក Emilsson ដើម្បីជំរុញ​ដល់​សភាស៊ុយ​អែតពិចារណាឡើង​វិញលើ​ទំនាក់ទំនង​យោធាជាមួយ​ថៃ រួម​ទាំង​ការ​លក់​យន្ត​ហោះ​ចម្បាំង Gripen អំឡុង​ពេល​ដែល​ជម្លោះព្រំដែន​ថៃ​និង​កម្ពុជា​នៅ​មិន​ទាន់​ដោះស្រាយ​នោះ។

ក្នុង​លិខិត​ដែល​ដាក់​ទៅ​នោះ​បាន​សរសេរ​ថា៖ «ការចូលទៅក្នុងកិច្ចព្រមព្រៀងថ្មីបែបនេះ គឺមិនត្រឹមតែមិនសមរម្យប៉ុណ្ណោះទេ ប៉ុន្តែវាក៏ផ្ទុយស្រឡះពីការប្ដេជ្ញាចិត្តយូរអង្វែងរបស់ស៊ុយអែតចំពោះសន្តិភាព និងសិទ្ធិមនុស្សផងដែរ។ ក្នុងន័យនេះ យើងខ្ញុំសូមអំពាវនាវយ៉ាងទទូចដល់សភាស៊ុយអែតកុំឱ្យគាំទ្រការលក់អាវុធ ឬពង្រីកកិច្ចព្រមព្រៀងប្រតិបត្តិការយោធាបន្ថែមទៀតជាមួយប្រទេសថៃ»។

ការ​ផ្ដល់អាវុធ ឬពង្រីក​កិច្ចសហប្រតិបត្តិការយោធាជាមួយ​រដ្ឋាភិបាលដែល​មាន​ទំនោ​ឈ្លាន​ពាន​ដែនដី នឹង​ធ្វើ​ឱ្យ​តម្លៃ​របស់​ស៊ុយ​អែតចុះ​អន់​ថយទៅ​វិញ​ទេ។ នេះ​ជា​ការ​បញ្ជាក់​បន្ថែម​ក្នុង​លិខិត​នោះ។

កាលពី​ចុង​ខែ​សីហា ប្រទេស​ស៊ុយ​អែត​បាន​ចុះ​ហត្ថលេខា​លក់​យន្ត​ហោះ​ចម្បាំង​ស៊េរី Saab Gripen ចំនួន​៤​គ្រឿង​ទៅ​ឱ្យ​ថៃ​ក្នុង​តម្លៃ ៥៥៦លានដុល្លារអាមេរិក បន្ថែម​លើ​យន្ត​ហោះចម្បាំង​ Gripen C/D ដែល​ថៃ​កំពុង​មាន​១២​គ្រឿង។ ក្នុង​ការ​ប៉ះទង្គិច​ប្រដាប់​អាវុធជាមួយ​កម្ពុជាកាលពីចុង​ខែ​កក្កដា ថែក៏​បានប្រើយន្ត​ហោះ​ចម្បាំង​ Gripen វាយ​ប្រហារ​ឈ្លានពាន​កម្ពុជា​ងផងដែរ៕

អត្ថបទដោយ ហ៊ុន សិរីវឌ្ឍន៍