ថៃបិទព្រំដែន អនុប្រធានព្រឹទ្ធសភា ថា ជាឱកាសផលិតផលខ្មែរពង្រីកខ្លួន

ជម្លោះកម្ពុជា និងថៃ ដែលបានឈានដល់ការបិទព្រំដែនជាឯកតោភាគីពីភាគីថៃ អនុប្រធានព្រឹទ្ធសភា លើកឡើងថា បានក្លាយជាឱកាសជំរុញផលិតកម្មក្នុងស្រុក និងការគាំទ្រផលិតផលខ្មែរពីសំណាក់ប្រជាជននៅទូទាំងប្រទេស។

ការលើកឡើងដូច្នេះ បានធ្វើឡើងនៅក្នុងកិច្ចប្រជុំប្រចាំខែរបស់ខុទ្ទកាល័យអនុប្រធានទី២ នៃព្រឹទ្ធសភា កាលពីរសៀលថ្ងៃទី២៩ ខែកញ្ញា ឆ្នាំ២០២៥ នៅវិមានព្រឹទ្ធសភា រាជធានីភ្នំពេញ។

ក្នុងកិច្ចប្រជុំនេះ លោកបណ្ឌិត ធន់ វឌ្ឍនា អនុប្រធានទី២ នៃព្រឹទ្ធសភាកម្ពុជា បានលើកទឹកចិត្តឱ្យថ្នាក់ដឹកនាំ និងមន្ត្រីខុទ្ទកាល័យ ក៏ដូចជាទីប្រឹក្សាធ្វើកិច្ចសហការជាមួយដៃគូ ឬបណ្តាញទំនាក់ទំនងសង្គមផ្សេងៗដើម្បីជំរុញការផ្សព្វផ្សាយ និងគាំទ្រផលិតផលក្នុងស្រុកឱ្យបានទូលំទូលាយ រួមជាមួយនឹងការបង្ហាញជំហរកម្ពុជាចង់បានសន្តិភាពជាមួយប្រទេសជិតខាង។

ជម្លោះព្រំដែនដែលបានបង្កឡើងដោយភាគីថៃពេលនេះ លោកអនុប្រធានព្រឹទ្ធសភា គូសបញ្ជាក់ថា កម្ពុជាតែងតែអត់ធ្មត់ចំពោះការញុះញង់ការបំពានពីយោធាថៃ និងភ្ជាប់ជាមួយនឹងការអំពាវនាវដោយបើកចំហរសម្រាប់យន្តការអង្កេតការណ៍អន្តរជាតិនានា ព្រមទាំងការអនុវត្តច្បាប់អន្តរជាតិ។ ចំពោះការចោទប្រកាន់ថា កម្ពុជាឈ្លានពានថៃ គឺជាការបំភ្លៃ ដែលមិនសមហេតុផល និងគួរឱ្យអស់សំណើច។ នេះជាការបន្ថែមរបស់អនុប្រធានព្រឹទ្ធសភាដែលចុះផ្សាយលើទំព័រហ្វេសប៊ុកព្រឹទ្ធសភាកម្ពុជា៕