ព្រឹទ្ធសភាកម្ពុជាទទួលជំនួយមនុស្សធម៌ពីមូលនិធិ GLS នៃកូរ៉េខាងត្បូង ក្នុងទំហំទឹកប្រាក់ជាង១លានដុល្លារ

ព្រឹទ្ធសភាកម្ពុជា បានទទួលអំណោយមនុស្សធម៌ពីមូលនិធិចែករំលែកសង្គ្រោះជីវិតសកល (GLS) នៃសាធារណរដ្ឋកូរ៉េ ក្នុងទំហំទឹកប្រាក់ប្រមាណជាង១លានដុល្លារអាម៉េរិក។ ពិធីប្រគល់-ទទួលអំណោយនេះ បានធ្វើឡើងកាលពីថ្ងៃទី៣១ ខែឧសភា ឆ្នាំ២០២៦ តំណាងព្រឹទ្ធសភា ដោយលោក ម៉ម ប៊ុននាង ប្រធានគណៈកម្មការអង្កេត បោសសម្អាត និងប្រឆាំងអំពើពុករលួយ នៃព្រឹទ្ធសភា និងតំណាងមូលនិធិ ដោយលោក ឧត្តម Min Byong Jang។

អំណោយមនុស្សធម៌នេះ ជាលើកទី២០ ដែលមូលនិធិបានផ្តល់មកព្រឹទ្ធសភាកម្ពុជា តាមស្មារតីនៃអនុស្សរណៈការយោគយល់គ្នារវាងគណៈកម្មការអង្កេត បោសសម្អាត និងប្រឆាំងអំពើពុករលួយនៃព្រឹទ្ធសភា (គណៈកម្មការទី១០) ជាមួយនឹងមូលនិធិចែករំលែកសង្គ្រោះជីវិតសកល។ បើតាមព្រឹទ្ធសភា អំណោយដែលបានផ្ដល់ពេលនេះរួមមានឱសថ គ្រឿងបរិក្ខាពេទ្យ សម្លៀកបំពាក់ និងសម្ភារៈប្រើប្រាស់ប្រចាំថ្ងៃ ដែលសរុបក្នុងទំហំទឹកប្រាក់១,៣១៧,០៣៩.០៤ដុល្លារអាម៉េរិក។

ជំនួយមនុស្សធម៌នេះ ត្រូវបានផ្តល់ឡើងក្នុងគោលបំណងលើកកម្ពស់គុណភាពជីវិត និងបង្កើតបរិយាកាសរស់នៅ ដែលមានស្ថិរភាពល្អប្រសើរសម្រាប់ប្រជាពលរដ្ឋកម្ពុជា ពិសេសជនភៀសខ្លួន គ្រួសារក្រីក្រ និងសហគមន៍ងាយរងគ្រោះនៅទូទាំងប្រទេស។

គួរឱ្យដឹងថា គណៈកម្មការទី១០ ព្រឹទ្ធសភាកម្ពុជា និងមូលនិធិកូរ៉េ GLS បានចុះហត្ថលេខាលើអនុស្សរណៈនៃការយោគយល់ស្តីពីការផ្តល់ជំនួយមនុស្សធម៌លើកដំបូង ក្នុងឆ្នាំ២០២២ ដែលមានទឹកប្រាក់សរុប១០លានដុល្លារអាម៉េរិក ហើយបន្ទាប់ពីគម្រោងនេះទទួលបានការវាយតម្លៃជាវិជ្ជមាន ភាគីទាំងពីរ បានចុះ MOU ជាលើកទី២ ក្នុងឆ្នាំ២០២៥ ដើម្បីពង្រីកកិច្ចសហប្រតិបត្តិការបន្ថែមទៀត។

ក្រោមកិច្ចសហប្រតិបត្តិការថ្មីនេះ នឹងបន្តរយៈពេល៥ឆ្នាំបន្ថែម ពីឆ្នាំ២០២៥ ដល់ឆ្នាំ២០២៩ ដោយទំហំជំនួយសរុបត្រូវបានពង្រីកយ៉ាងខ្លាំងដល់៥០លានដុល្លារអាមេរិក។ GLS និងព្រឹទ្ធសភាកម្ពុជា ក៏កំពុងពិភាក្សាអំពីការពង្រីកនូវគម្រោងមនុស្សធម៌បន្ថែម នៅខែមិថុនា ឆ្នាំ២០២៦នេះ ដោយផ្ដោតលើគម្រោងគាំទ្រនៅខេត្តកែប បាត់ដំបង និងព្រៃវែង។ ភាគីទាំងពីរ ក៏មានផែនការចុះ MOU ជាលើកទី៣ ដើម្បីបង្កើនទំហំជំនួយមនុស្សធម៌សរុបឱ្យដល់ប្រមាណ៦៥លានដុល្លារអាមេរិក ត្រឹមឆ្នាំ២០២៩ ផងដែរ។

មូលនិធិចែករំលែកសង្គ្រោះជីវិតសកលនៃសាធារណៈរដ្ឋកូរ៉េ បានផ្តល់នូវជំនួយមនុស្សធម៌ដល់ព្រឹទ្ធសភាកម្ពុជា ចំនួន ២០លើករួចមកហើយ ក្នុងទំហំទឹកប្រាក់៣០,៦៣១,៣៩៥.០៦ដុល្លារអាម៉េរិក។ ជំនួយមនុស្សធម៌ទាំងអស់ត្រូវបានថ្នាក់ដឹកនាំព្រឹទ្ធសភាគ្រប់គ្រង និងបែងចែកទៅតាមរាជធានីខេត្ត មន្ទីរពេទ្យ មណ្ឌលសុខភាព ជនងាយរងគ្រោះ ជាពិសេសប្រជាជនភៀសសឹកនៅតាមបណ្តោយព្រំដែនកម្ពុជា-ថៃ ប្រកបដោយតម្លាភាព គណនេយ្យភាព និងចំគោលដៅ ដើម្បីរួមចំណែកលើកកម្ពស់សុខុមាលភាពរបស់ប្រជាពលរដ្ឋកម្ពុជាឱ្យបានកាន់ប្រសើរឡើង៕