លោកប្រាក់ សុខុន ថា កម្ពុជាទទួលតួនាទីជាប្រធានអាស៊ានក្នុងបរិការណ៍ដែលតំបន់កំពុងរងសម្ពាធចម្រុះជ្រុង

នៅថ្ងៃទី០៩ ខែកុម្ភៈ ឆ្នាំ២០២២ លោកឧបនាយករដ្ឋមន្រ្តី ប្រាក់ សុខុន រដ្ឋមន្រ្តីការបរទេស និងសហប្រតិបត្តិការអន្តរជាតិ បានជួបប្រជុំការងារជាមួយគណៈកម្មការកិច្ចការបរទេស សហប្រតិបត្តិការអន្តរជាតិ ឃោ​សនាការ និងព័ត៌មាននៃព្រឹទ្ធសភា។ លោក ប្រាក់ សុខុន បានជម្រាបជូនគណៈកម្មការអំពីគោលនយោបាយការបរទេសកម្ពុជាក្នុងស្ថានភាពពិភពលោកដែលប្រែប្រួលយ៉ាងឆាប់រហ័ស មិនប្រាកដប្រជា និងប្រកបដោយគ្រោះថ្នាក់។ ក្នុងនោះ លោកបានផ្តោតទៅលើការប្រកួតប្រជែងជាយុទ្ធសាស្រ្តដែលតំបន់ និងពិភពលោកកំពុងជួបប្រទះ រួមទាំងតំបន់អាស៊ី-ប៉ាស៊ីហ្វិក ផងដែរ។

ទិសដៅគោលនយោបាយការបរទេស និងការទូតរបស់កម្ពុជា គឺភាពជាប្រធានអាស៊ានរបស់កម្ពុជា និងដំណើរការកំណែទម្រង់នៅក្នុងក្រសួងការបរទេស និងសហប្រតិបត្តិការអន្តរជាតិ ដើម្បីពង្រឹងប្រសិទ្ធភាពការងារផ្នែកកិច្ចការបរទេស។ លោកឧបនាយករដ្ឋមន្រ្តី បានគូសបញ្ជាក់អំពីសមិទ្ធផលសំខាន់ៗ ដែលសម្រេចបានក្នុងការអនុវត្តការងារសំខាន់ៗទាំង៥ របស់ក្រសួង គឺ ការងារធំទី១ គឺ ការការពារឯករាជ្យ អធិ​បតេយ្យ បូរណភាពទឹកដីកម្ពុជា។ ការងារធំទី២ គឺការអនុវត្តគោលនយោបាយការបរទេសប្រកបដោយភាពបត់បែន វាងវៃ តបតទៅនឹងសម្ពាធភូមិសាស្រ្តនយោបាយ និងការប្រកួតប្រជែងរបស់មហាអំណាច។ ការ​​ងារ​ធំទី៣ គឺការចូលរួមចំណែកកាន់តែសកម្មថែមទៀតដល់បុព្វហេតុសន្តិភាព និងស្ថិរភាព និងការប្រយុទ្ធប្រឆាំងនឹងបញ្ហាប្រឈមនានានៃពិភពលោក។

រីឯ ការងារធំទី៤ គឺ ការអនុវត្តការទូតសេដ្ឋកិច្ច និងវប្បធម៌ ដើម្បីរួមចំណែកពង្រឹងសេដ្ឋកិច្ចជាតិ និងការងារធំទី៥ គឺកំណែទម្រង់ផ្ទៃក្នុង ដើម្បីគាំទ្រ និងលើកកម្ពស់ប្រសិទ្ធិភាពការងារការទូត។ លោកឧបនាយករដ្ឋមន្រ្តី បានគូសបញ្ជាក់ថា៖ «ឆ្នាំ២០២២នេះ កម្ពុជាទទួលយកតួនាទីជាប្រធានប្តូរវេនអាស៊ានក្នុងបរិការណ៍ដែលតំបន់របស់យើងកំពុងរងនឹងសម្ពាធចម្រុះជ្រុង និងក្នុងកម្រិតមិនធ្លាប់មាន ចាប់តាំងពីប្រទេសយើងបានក្លាយជាសមាជិក នៃអង្គការនេះជិត ២៣ឆ្នាំមក។ បន្ថែមពីលើសម្ពាធ និងការប្រឈមបណ្តាលមកពីការផ្ទុះឡើងនៃជំងឺរាតត្បាតកូវីដ-១៩ ការប្រកួតប្រជែងដ៏តានតឹងបំផុត បន្ទាប់ពីការបញ្ចប់នៃសង្រ្គាមត្រជាក់រវាងមហាអំណាចធំជាងគេនៃពិភពលោក និងវិបត្តិតំបន់កាន់តែជ្រៅទៅៗ ដូចបានរៀបរាប់ខាងលើនេះ អាស៊ានក៏កំពុងតែប្រឈមនឹងបញ្ហាផ្ទៃក្នុង និងបញ្ហាស្ថាប័នដ៏លំបាកផងដែរ”។  

លោកឧបនាយករដ្ឋមន្រ្តី បានបន្ថែមថា ការប្រឈមដូចរៀបរាប់ខាងលើនេះ បានបង្កសម្ពាធមកលើអាស៊ាននាំឱ្យប៉ះពាល់ដល់កិច្ចប្រឹងប្រែងក្នុងការកសាងសហគមន៍ ប៉ះពាល់ដល់ការរក្សា និងពង្រឹងមជ្ឈភាពរបស់អាស៊ាន ពិសេស ក្នុងយន្តការនានាដែលដឹកនាំដោយអាស៊ាន។ វាក៏ប៉ះពាល់ដល់ឯកភាព សាមគ្គីភាព ភាពធន់របស់អាស៊ាន ក៏ដូចជាកិច្ចខិតខំប្រឹងប្រែងក្នុងការងារសមាហរណកម្ម និងការពង្រីកដៃគូខាងក្រៅជាដើម៕

ដោយ ៖ កោះកែវ