នយោបាយ

គណបក្សខ្មែរស្រឡាញ់ជាតិ ផ្តោតសំខាន់លើការចុះតាមផ្ទះរបស់ប្រជាពលរដ្ឋ អំឡុងពេលឃោសនា

បានផុស

៤ years មុន

នៅ

ថ្ងៃសុក្រ ២០ ឧសភា ២០២២

ដោយ

លោក ជីវ កត្តា ប្រធានគណបក្សខ្មែរស្រឡាញ់ជាតិ បានថ្លែងប្រាប់កម្ពុជាថ្មីថា នៅក្នុងដំណើការឃោសនាបោះឆ្នោត ជ្រើសរើសក្រុមប្រឹក្សាឃុំ-សង្កាត់ រយៈពេល ១៤ថ្ងៃនេះ គណបក្សខ្មែរស្រឡាញ់ជាតិ មិនបានរៀបចំហែរក្បួនធំនោះទេ គឺធ្វើទៅតាមលទ្ធភាពរបស់ឃុំនីមួយៗ ហើយការឃោសនានេះ ផ្តោតសំខាន់ លើការចុះតាមផ្ទះរបស់ប្រជាពលរដ្ឋ ដើម្បីសុំការគាំទ្រ និងជូនខិតប័ណ្ណគោលនយោបាយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ជីវ កត្តា បញ្ជាក់យ៉ាងនេះថា «គម្រោងឃោសនារបស់យើង ដូចជាមិនមានការហែក្បួនអីធំដុំទេ គ្រាន់តែធ្វើតាមលទ្ធភាពនៃឃុំនីមួយៗ ដែលធ្វើកើត ឬមិនកើត។ ទីពីរទៀត ការឃោសនារបស់យើង គឺធ្វើតាមឃុំ-សង្កាត់ ដែលយើងមានដាក់បេក្ខជន គឺធ្វើទៅតាមអ្វីដែលយើងមានជាក់ស្ដែង ហើយយើងចង់បំផុស ចង់ផ្ញើសារជូនបងប្អូនប្រជាពលរដ្ឋ និងចុះទៅតាមផ្ទះរបស់ប្រជាពលរដ្ឋ ដើម្បីសុំការគាំទ្រ និងជូនជាគោលនយោបាយ បំណងរបស់យើង ជូនទៅដល់ម្ចាស់ឆ្នោតលោកជ្រាបជាព័ត៌មាន ដើម្បីសុំការគាំទ្រពីពួកគាត់”។

សូមជម្រាបថា ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី ៥ នឹងប្រព្រឹត្តទៅនៅថ្ងៃអាទិត្យទី ៥ ខែមិថុនា ឆ្នាំ ២០២២ខាងមុខ ដោយចាប់ផ្តើមពីម៉ោង ៧ ព្រឹក រហូតដល់ម៉ោង ៣ រសៀល។ ក្នុងនោះ មានគណបក្សនយោបាយចំនួន ១៧ បានចូលរួម ហើយការឃោសនា នឹងចាប់ផ្តើមពីថ្ងៃទី ២១ ខែឧសភា ដល់ថ្ងៃទី ៣ ខែមិថុនា ឆ្នាំ២០២២៕

អត្ថបទ៖ កោះកែវ