នយោបាយ

ព្រឹត្តិការណ៍ថ្ងៃ២៨ ឧសភា សម្ដេចធិបតីបញ្ជារួចហើយបើថៃមិនថយ «វ៉ៃ»

បានផុស

១ year មុន

នៅ

ថ្ងៃសៅរ៍ ៣១ ឧសភា ២០២៥

ដោយ

នាយករដ្ឋមន្ត្រី សម្ដេចធិបតី ហ៊ុន ម៉ាណែត បានរម្លឹកព្រឹត្ដិការណ៍ថ្ងៃ២៨ ខែឧសភា ក្នុងការប៉ះទង្គិចគ្នាថាពេលនោះសម្ដេចបញ្ជារួចហើយថាបើថៃមិនព្រមដកថយពីកន្លែងប៉ះទង្គិចទេឱ្យប្រយុទ្ធតែម្ដង។ ទោះជាយ៉ាងបន្ទាប់ពីមានការទាក់ទងគ្នារវាងអគ្គបញ្ជាការទ័ពទាំងពីរទ័ពថៃបានដកចេញពីទីតាំងប៉ះទង្គិចនៅល្ងាចថៃដដែល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីជួបជុំប្រជាពលរដ្ឋខ្មែរដែលរស់នៅប្រទេសជប៉ុនព្រឹកថ្ងៃទី៣១ ខែឧសភា ឆ្នាំ២០២៥នាទីក្រុងតូក្យូ សម្ដេចធិបតី ហ៊ុន ម៉ាណែត បានឱ្យដឹងថាក្រោយទទួលព័ត៌មានពីការប៉ះទង្គិចសម្ដេចបានបញ្ជាទៅអគ្គបញ្ជាការទ័ពរកវិធីសាស្ត្រយ៉ាងណាកុំឱ្យមានការរាលដាល ខណៈកងទ័ពកម្ពុជាបានបង្កើននៅទីតាំងជួរមុខ នឹងដាក់គ្រាប់រួចរាល់ហើយ។

សម្ដេចថា៖ «យើងចរចាដើម្បីដេញចេញ! អ្នកខ្លះគេថាយើងទៅសុំគេចរចាក្នុងការនិយាយគ្នា។ មានឱសានុវាទក្នុងការត្រៀមប្រយុទ្ធរួចទៅហើយ! តែពេលជាមួយគ្នានេះទាក់ទងដើម្បីអី ដើម្បីវាយតម្លៃការចូលនេះកម្រិតណា»។

សម្ដេចបន្ថែមថា៖ «អធិបតេយ្យភាពរបស់ខ្ញុំត្រូវរក្សា អ្នកឯងត្រូវថយចេញវិញល្ងាចដកថយ។ បើនៅតែអូសបន្លាយនឹងផ្ទុះអាវុធវ៉ៃកាន់កាប់ហើយវានឹងរាល»។

សម្ដេចធិបតីថាការវាយតម្លៃពីស្ថានភាពសំខាន់ណាស់សម្រាប់ការសម្រេចចិត្តនយោបាយដែលត្រូវទទួលខុសត្រូវខ្ពស់ចំពោះប្រជាពលរដ្ឋ និងប្រទេសជាតិ។

សម្ដេចធិបតីបញ្ជាក់ថាកម្ពុជាចង់ដោះស្រាយបញ្ហាព្រំដែនដោយសន្ដិភាពផ្អែកលើច្បាប់បច្ចេកទេសអន្តរជាតិ ជាមួយគ្នានោះកម្ពុជារក្សាសិទ្ធិក្នុងការការពារទឹកដីរបស់ខ្លួនតាមគ្រប់មធ្យោបាយបើសិនជាមានការឈ្លានពានលើដីកម្ពុជា។

សម្ដេចបញ្ជាក់ថា៖ «បើជៀសបានជៀស តែបើជៀសមិនបានត្រូវវ៉ៃឱ្យឈ្នះហើយនឹងការពារអាយុជីវិតទាហានរបស់យើងឱ្យបានជាអតិបរិមា»។

គួរឱ្យដឹងដែរថា ហេតុការណ៍ប៉ះទង្គិចរវាងកងទ័ពកម្ពុជា និងថៃកាលពីព្រឹកថ្ងៃទី២៨ ខែឧសភា ឆ្នាំ២០២៥ នៅចំណុចព្រំដែនមុំ៣ ស្រុកជាំក្សាន្ត ខេត្តព្រះវិហារ បណ្ដាលមកពីការឆ្មក់ចូលមកវាយប្រហារពីកងទ័ពថៃមុនលើកងទ័ពកម្ពុជា។ សកម្មភាពនេះធ្វើឱ្យទាហានខ្មែរម្នាក់ស្លាប់បាត់បង់ជីវិត និងបានបង្កឱ្យស្ថានភាពព្រំដែនកម្ពុជា-ថៃឡើងកម្ដៅជាខ្លាំងដោយកងទ័ពកម្ពុជាបានចល័តទៅត្រៀមនៅខ្សែមុខនៅព្រំដែនផងដែរ។

ក្នុងជំនួបជាមួយមេបញ្ជាការជើងគោកថៃកាលពីថ្ងៃទី២៩ ខែឧសភា មេបញ្ជាការទ័ពជើងគោកកម្ពុជា នាយឧត្តមសេនីយ៍ ម៉ៅ សុផាន់ បានបញ្ជាក់ថាកម្ពុជានឹងមិនដកថយឬឈរជើងដោយគ្មានអាវុធនៅចំណុចប៉ះទង្គិចគ្នាទេ៕