កម្ពុជាឆ្លើយតបចំពោះការដកខ្លួនដោយឯកតោភាគីរបស់ថៃចេញពី MOU-2001 ស្ដីពីតំបន់ដែនសមុទ្រត្រួតគ្នា

អ្នកនាំពាក្យក្រសួងការបរទេសកម្ពុជាចេញសេចក្តីថ្លែងការណ៍ឆ្លើយតបជាថ្មីទៅនឹងការដកខ្លួនដោយឯកតោភាគីរបស់ថៃចេញពីអនុស្សរណៈនៃការយោគយល់គ្នាឆ្នាំ២០០១ ស្ដីពីតំបន់ដែនសមុទ្រត្រួតត្នា ដោយថា វាជារឿងគួរឱ្យសោកស្តាយ ប្រសិនបើថៃសម្រេចចិត្តដកខ្លួនចេញពីអនុស្សរណៈនេះ។

ឆ្លើយតបនឹងការសម្រេចរបស់ក្រុមប្រឹក្សាសន្តិសុខជាតិថៃ ក្នុងការដកខ្លួនចេញពីអនុស្សរណៈនៃការយោគយល់គ្នាស្តីពីតំបន់ទាមទារដែនសមុទ្រត្រួតគ្នានៃខ្ពង់រាបបាតសមុទ្រ ដែលបានចុះហត្ថលេខារវាងកម្ពុជា-ថៃ កាលពីឆ្នាំ២០០១ ដែលហៅថា MOU-2001 នោះ អ្នកនាំពាក្យក្រសួងការបរទេសកម្ពុជា ចាត់ទុកថា គឺជាជំហានមួយងាកចេញពីស្មារតីសហប្រតិបត្តិការ ដែលជាមូលដ្ឋានគ្រឹះនៃការចុះហត្ថលេខាលើឯកសារនេះ។

សេចក្តីថ្លែងការណ៍របស់អ្នកនាំពាក្យក្រសួងការបរទេស នាថ្ងៃទី២៤ ខែមេសា ក៏បានអះអាងពីជំហររបស់កម្ពុជា ដែលនៅតែប្តេជ្ញាចិត្តយ៉ាងមុតមាំ និងឥតងាករេចំពោះខ្លឹមសារ និងស្មារតីនៃអនុស្សរណៈនេះ ព្រមទាំងចំពោះសុច្ឆន្ទៈ និងភាពស្មោះត្រង់ ដែលបាននាំឱ្យអនុស្សរណៈនៃការយោគយល់គ្នានេះ សម្រេចបានកាលពីឆ្នាំ២០០១។

អ្នកនាំពាក្យ បានគូសបញ្ជាក់អំពីតម្លៃនៃ MOU-2001 នេះ ដោយបានព៌ណនាថា ការចុះហត្ថលេខាលើ MOU-2001 រវាងកម្ពុជា និងថៃ បានឆ្លុះបញ្ចាំងពីឆន្ទៈពិតប្រាកដ និងផលប្រយោជន៍រួមរបស់ប្រទេសទាំងពីរក្នុងការរៀបចំដោយស្មោះត្រង់នូវក្របខ័ណ្ឌមួយ ដែលភាគីទាំងពីរអាចទទួលយកបានសម្រាប់ការទាញយកនូផលប្រយោជន៍រួមពីធនធាននៅក្នុងតំបន់ដែនសមុទ្រត្រួតគ្នា (OCA)។

ក្នុងពេលដំណាលគ្នានោះ MOU-2001 ក៏ជំរុញការកំណត់ព្រំដែនសមុទ្រស្របតាមច្បាប់អន្តរជាតិផងដែរ។ លើលពីនេះ អ្នកនាំពាក្យក្រសួងការបរទេសកម្ពុជា ថា MOU-2001 ក៏តំណាងឱ្យសុឆន្ទៈរបស់ប្រទេសទាំងពីរ ក្នុងកិច្ចខិតខំប្រឹងប្រែងកំណត់ព្រំដែនសមុទ្រមួយ ប្រកបដោយមិត្តភាព កិច្ចសហប្រតិបត្តិការ និងវិបុលភាពរួម៕

ដោយ៖ ធឿន វ៉ាន់សុង