អាជ្ញាធរសង្កាត់អូរបែកក្អម កំពុងផ្លាស់ប្ដូរប្រព័ន្ធលូជាង២០០ម៉ែត្រ ដើម្បីរំដោះទឹកជំនន់

អាជ្ញាធរនៃរដ្ឋបាលសង្កាត់អូរបែកក្អម ខណ្ឌសែនសុខ បាននិងកំពុងជីកកាយផ្លាស់ប្ដូររៀបចំប្រព័ន្ធលូចាស់ដាក់លូថ្មី មានប្រវែងជាង ២០០ម៉ែត្រ នៅលើកំណាត់ផ្លូវបេតុង ដែលកែងផ្លូវលេខ ២០០២ ក្រោយពលរដ្ឋក្នុងមូលដ្ឋានលើកឡើងពីការ លំបាករស់នៅដោយសារទឹកលិច។

លោក យឹម រ័ត្ន ចៅសង្កាត់រដ្ឋបាលអូរបែកក្អម បានអោយដឹងថា ការផ្លាស់ប្តូរប្រព័ន្ធលូចាស់ ដាក់លូថ្មីនេះ គឺជាគម្រោងអភិវឌ្ឍន៍សង្កាត់ឆ្នាំ២០២៥ នៅលើបណ្តោយផ្លូវបេតុងភូមិត្រពាំងឈូក។ លោកចៅសង្កាត់ បានបន្តថា នៅពេលដែលក្រុមហ៊ុនទទួលការជួសជុល និងកំពុងស្ថាបនា លោកក៏បានណែនាំអោយក្រុមហ៊ុនត្រូវអនុវត្តតាមស្តង់ដាបច្ចេកទេស និងផែនការដែលបានកំណត់។ លោកចៅសង្កាត់ក៏ណែនាំឲ្យក្រុមហ៊ុនត្រូវអនុវត្តពន្លឿនការងារនៅតាមចំណុចប៉ះពាល់ខ្លាំង ហើយរាល់ការដឹកជញ្ជូនសម្ភារៈ គឺត្រូវដឹកអោយទាន់ពេលវេលាដើម្បីបញ្ចប់គម្រោងតាមផែនការ។

ក្នុងនាមអាជ្ញាធរ លោកក៏សូមសំណូមពរពលរដ្ឋដែលប្រកបអាជីវកម្ម និងរស់នៅជាលក្ខណៈគ្រួសារក្នុងមូលដ្ឋាន មេត្តាទុកដាក់សំរាមអោយបានត្រឹមត្រូវតាមម៉ោងកំណត់ និងជួយថែរក្សាអនាម័យទាំងអស់គ្នា ជៀសវាងមានកាកសំណល់ ឬ ថង់ប្លាស្ទិចហូរចូលលូ ដែលងាយរាំងស្ទះប្រព័ន្ធលំហូរទឹកធ្វើអោយទៅជាជនលិច។

អ្នកស្រី ពេជ្រ ពលរដ្ឋរស់នៅអមសងខាងផ្លូវ ប្រាប់អោយដឹងថា ចំណុចផ្លូវបេតុងមួយខ្សែនេះ តែងមានការជនលិច ពិបាកខ្លាំងក្នុងការរស់នៅ រហូតធ្វើអោយស្ទះលូក្នុងផ្ទះជានិច្ចកាលធ្វើអោយទឹកដក់សាយភាយក្លិនស្អុយ ដោយសារតែប្រព័ន្ធលូចាស់ហូរយឺត។

លោក កិត្យា ពលរដ្ឋរស់នៅលើផ្លូវ ៥៣៦ បានលើកឡើងថា ពេលដល់រដូវវស្សា មេឃចាប់ផ្តើមភ្លៀង តំបន់នេះលិចដក់ទឹកលើផ្លូវយូរគួរសមដែរ ប៉ុន្តែមួយរយៈក្រោយនេះ លែងសូវមានទឹកលិច និងដក់បន្តទៀតហើយ ព្រោះថា អាជ្ញាធរបាន ចុះមកដោះស្រាយបញ្ហាទាំងនេះទាន់ពេលមិនថាយប់ឬថ្ងៃ។ ជាមួយគ្នានោះ ពលរដ្ឋរស់នៅលើកំណាត់ផ្លូវទាំង៣ បានកោតសរសើរចំពោះអាជ្ញាធរ និងអរគុណបន្ទាប់ពីបានដាក់គ្រឿងចក្រកាយលូចាស់ ដាក់លូថ្មីជូនពួកគាត់ដើម្បីកុំអោយមានការលិចលង់ពិបាករស់នៅបន្តទៀត៕

អត្ថបទ៖ រដ្ឋា