អាជ្ញាធរសង្កាត់ទឹកល្អក់ទី២ ជួសជុលអ៊ុតផ្លូវកៅស៊ូ ២​ខ្សែ សរុបប្រវែងជាង៤០០ម៉ែត្រ

រដ្ឋបាលសង្កាត់ទឹកល្អក់ទី២ ខណ្ឌទួលគោក ចាប់ផ្ដើមជួសជុលអ៊ុតផ្លូវកៅស៊ូចំនួន០២ខ្សែ គឺផ្លូវលេខ ១៥០ និង១៥៦ ដែលរងការខូចខាតកន្លងមក ដោយប្រើកញ្ចប់ថវិកាសម្រាប់អភិវឌ្ឍន៍សង្កាត់ឆ្នាំ២០២៥ ដើម្បីសម្រួលដល់ការធ្វើដំណើរ របស់ពលរដ្ឋ។

លោក សូ ជា ចៅសង្កាត់ទឹកល្អក់ទី២ បានប្រាប់ កម្ពុជាថ្មី អោយដឹងថា ចំពោះផ្លូវលេខ១៥០ និង១៥៦នេះ មានប្រវែងប្រវែងសរុប ៤៦៩ម៉ែត្រ កម្រាស់១តឹក និងមានទទឹង៨ម៉ែត្រ ជាគម្រោងអភិវឌ្ឍន៍ភូមិឃុំសង្កាត់ដែលកំពុងចាប់ផ្តើមជួសជុលដោយក្រុមហ៊ុនឯកជន។ លោកចៅសង្កាត់ ក៏សំណូមពរឲ្យប្រជាពលរដ្ឋមានលំនៅដ្ឋានជាប់ផ្លូវ ជួយសម្រួលផលប៉ះពាល់ទាំងឡាយដើម្បីអោយក្រុមហ៊ុនងាយស្រួលដំណើរការដ្ឋានជួសជុល។

អ្នកស្រី ជាតា ពលរដ្ឋរស់នៅអមសងខាងផ្លូវ លើកឡើងថា កន្លងមកផ្លូវនេះមានជង្ហុកច្រើន និងបានធ្វើអោយប៉ះពាល់រាល់ការធ្វើដំណើរឆ្លងកាត់ ហើយណាមួយបណ្តោយផ្លូវនេះ ក៏មានចរាចរណ៍មមាញឹកផងដែរ។ ពលរដ្ឋក៏សូមអរគុណដល់អាជ្ញាធរជំនាញ ពាក់ព័ន្ធទាំងអស់ក្នុងខណ្ឌទួលគោក ដែលបានយកចិត្តទុកដាក់លើការដោះស្រាយបញ្ហាជាបន្តបន្ទាប់។ ក្រោយពេលធ្វើរួចរាល់ ពលរដ្ឋធ្វើដំណើរឆ្លងកាត់ រួមទាំងអ្នករស់នៅសងខាងផ្លូវលែងជួបលំបាកបន្តទៅទៀតហើយ៕

អត្ថបទ៖ ម៉េង