អគ្គិភ័យឆេះផ្ទះមួយល្វែងអស់ទាំងស្រុងនៅក្រុងច្បារមន

ទីតាំងផ្ទះល្វែងកម្ពស់២ជាន់ប្រកបមុខរបរដេពូក និងលក់គ្រឿងបន្លាស់ម៉ូតូមួយកន្លែងត្រូវបានអគ្គិភ័យឆាបឆេះបំផ្លាញទាំងស្រុង ប៉ុន្តែមិនបណ្តាលឲ្យមានមនុស្សរងគ្រោះថ្នាក់ឡើយ ។ ហេតុការណ៍គ្រោះអគ្គិភ័យខាងលើនេះ បានកើតឡើងនៅវេលាម៉ោង២៣និង៥០នាទីនាយប់ថ្ងៃទី២៤ ខែឧសភា ឆ្នាំ២០២២ របស់ជនរងគ្រោះឈ្មោះ កៅ ផេង ភេទប្រុស អាយុ៥២ឆ្នាំ រស់នៅភូមិសំណង់ សង្កាត់រការធំ ក្រុងច្បារមន ខេត្តកំពង់ស្ពឺ ។

នគរបាលបានប្រាប់ថា បន្ទាប់ពីកើតមានអគ្គិភ័យឆេះទីតាំងដេពូក និងលក់គ្រឿងបន្លាស់ម៉ូតូក្រុមអន្តរាគមន៍សង្គ្រោះផ្នែកអគ្គិភ័យនៃស្នងការដ្ឋាននគរបាលខេត្តកំពង់ស្ពឺ កងរាជអាវុធហត្ថខេត្ត ​និងមានការជួយបន្ថែម​ពីក្រុមហ៊ុនស្ថានីយប្រេងឥន្ធនៈ និងរថយន្តពន្លត់អគ្គិភ័យស្នងការនគរបាលខេត្តកណ្តាល សរុប០៩គ្រឿង  បានប្រតិបត្តិការបាញ់ពន្លត់តាំងពីយប់រហូតដល់ព្រឹកទើបគ្រប់គ្រងស្ថានការបានទាំងស្រុង ។

តាមការឲ្យដឹងពីនគរបាល ចំពោះការខូចខាតផ្ទះ០១ល្វែងធ្វើអំពីថ្មមានទំហំ ៥ម៉ែត្រx៥០ម៉ែត្រ កម្ពស់ពីរជាន់ សម្ភារៈសំបកកង់ម៉ូតូ គ្រឿងបន្លាស់ម៉ូតូ ប្រេងម៉ាស៊ីន គ្រឿងដេពូកម៉ូតូ និងទ្រព្យសម្បត្តិជាច្រើនទៀត ត្រូវអគ្គិភ័យឆាបឆេះអស់គ្មានសល់ ។

សមត្ថកិច្ចបញ្ជាក់ថា មូលហេតុដែលបង្ករឲ្យមានករណីអគ្គិភ័យនេះ មិនទាន់ដឹងច្បាស់លាស់នោះទេ មន្ត្រីជំនាញកំពុងស្រាវជ្រាវ៕

អត្ថបទ៖ ភួង រដ្ឋា