សមត្ថកិច្ច បន្តចុះពង្រឹងសន្តិសុខសណ្ដាប់ធ្នាប់ ក្នុងថ្ងៃចុងក្រោយនៃកិច្ចប្រជុំកំពូលអាស៊ាន ខណៈប៉ុន្មានថ្ងៃមកនេះ មានភាពល្អប្រសើរ

ខណៈដែលនៅថ្ងៃទី ១៣ ខែវិច្ឆិកា ឆ្នាំ ២០២២នេះ គឺជាថ្ងៃចុងក្រោយនៃកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធនោះ កម្លាំងនគរបាលរាជធានីភ្នំពេញ បានបន្តចុះបំពេញតួនាទីភារកិច្ចរបស់ខ្លួន ដោយបានប្រចាំការតាមទីបញ្ជាការស្រាល និងល្បាតជុំវិញទីតាំងប្រចាំការ ដឹកនាំដោយលោក-លោកស្រីស្នងការរងនគរបាលរាជធានីភ្នំពេញ ដើម្បីការពារសន្តិសុខ និងរៀបចំសណ្តាប់ធ្នាប់ ដោយក្នុងរយៈពេលប៉ុន្មានថ្ងៃមកនេះ ស្ថានភាពសន្តិសុខ និងសណ្តាប់ធ្នាប់ មានភាពល្អប្រសើរ។

លោកវរសេនីយ៍ឯក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញ បានឲ្យដឹងថា ស្ថានភាពសន្តិសុខសណ្ដាប់ធ្នាប់ទូទៅ អំឡុងពេលនៃកិច្ចប្រជុំកំពូលអាស៊ានលើកទី ៤០ និង ៤១ និងកិច្ចប្រជុំកំពូលពាក់ព័ន្ធ ក្នុងរយៈពេលប៉ុន្មានថ្ងៃមកនេះ មានភាពល្អប្រសើរ ដោយមានការសហការពីកងកម្លាំងចម្រុះជាង ១ម៉ឺននាក់។

លោកបន្តថា សម្រាប់ស្នងការដ្ឋាននគរបាលរាជធានីភ្នំពេញ បានប្រើប្រាស់កងកម្លាំងជាង ២,៣០០នាក់ ដោយដាក់ពង្រាយនៅតាមទីតាំងសំខាន់ៗ នៃកិច្ចប្រជុំដើម្បីការពារសន្តិសុខ និងរៀបចំសណ្ដា​ប់ធ្នាប់ឲ្យមានភាពល្អប្រសើរ។

អ្នកនាំពាក្យ បានបន្ថែមទៀតថា «ក្រោមការដឹកនាំបញ្ជាផ្ទាល់របស់ឯកឧត្ដម ឧត្ដមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ បានដាក់បទបញ្ជាដល់លោក-លោកស្រីស្នងការរង លោកនាយការិយាល័យ ក៏ដូចជាលោកអធិការ គឺមានគោលដៅ និងតួនាទីភារកិច្ចច្បាស់លាស់ ក្នុងការបំពេញការងារនេះ»។

លោកវរសេនីយ៍ឯក សាន សុខសីហា បានគូសបញ្ជាក់ថា គិតមកដល់ថ្ងៃទី ១៣ ខែវិច្ឆិកា ឆ្នាំ ២០២២នេះ គឺជាថ្ងៃចុងក្រោយនៃកិច្ចប្រជុំកំពូលអាស៊ានលើកទី ៤០ និង ៤១ និងកិច្ចប្រជុំកំពូលពាក់ព័ន្ធ។ ដូច្នេះកម្លាំងសមត្ថកិច្ចរាជធានីភ្នំពេញ នឹងប្រឹងប្រែងបន្តដើម្បីឲ្យកិច្ចប្រជុំនេះប្រព្រឹត្តទៅ ក្នុងស្ថា​នភាពសន្តិសុខសណ្ដាប់ធ្លាប់ល្អប្រសើរបំផុត។

សូមជម្រាបថា ប្រទេសកម្ពុជា ធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ានលើកទី ៤០ លើកទី ៤១ និងកិច្ចប្រជុំកំពូលពាក់ព័ន្ធ ចាប់ពីថ្ងៃទី ១០ ដល់ថ្ងៃទី ១៣ ខែវិច្ឆិកា ឆ្នាំ ២០២២។ នៅថ្ងៃនេះ គឺជាថ្ងៃចុងក្រោយនៃកិច្ចប្រជុំ ហើយអ្នកតាមដានស្ថានការណ៍នយោបាយជាតិ-អន្តរជាតិ បានកត់សម្គាល់ឃើញថា ប្រទេសកម្ពុជា បានរៀបចំយ៉ាងល្អ និងប្រកបដោយជោគជ័យ សម្រាប់កិច្ចប្រជុំនេះ៕