នគរបាលខណ្ឌព្រែកព្នៅ បញ្ជូនខ្លួនលោក ណុប សក្កដា ហៅគ្រូផេះគ្រូអង្កាមទៅតុលាការ

នៅព្រឹកថ្ងៃទី២៦ ខែមិថុនា ឆ្នាំ២០២៤ កម្លាំងនគរបាលនៃអធិការដ្ឋាននគរបាលខណ្ឌព្រែកព្នៅ បានកសាងសំណុំរឿង និងបញ្ជូនខ្លួនលោក ណុប សក្កដា ហៅគ្រូផេះគ្រូអង្កាម ទៅតុលាការដើម្បីអនុវត្តតាមនីតិវិធីច្បាប់ពាក់ព័ន្ធការប្រើប្រាស់អាវុធខុសច្បាប់។

សូមបញ្ជាក់ថានៅពេលថ្មីៗនេះមាន ការបង្ហោះចែកចាយឃ្លីបវីដេអូផ្សព្វផ្សាយលើបណ្ដាញសង្គម ពាក់ព័ន្ធសកម្មភាពប្រើប្រាស់អាវុធដើម្បីយកមកបាញ់ខ្លួនឯងផ្ទាល់ ។

នៅព្រឹកថ្ងៃទី២៤ ខែមិថុនា ឆ្នាំ២០២៤ លោក ណុប សក្កដា ហៅគ្រូផេះគ្រូអង្គាម បានចេញលិខិតសុំទោសជាសាធារណៈ ដែលមានគណនីហ្វេសប៊ុកឈ្មោះ លោកតាធំភ្នំគូលែន កាលពីព្រឹកថ្ងៃទី២១ ខែមិថុនា ឆ្នាំ២០២៤ អំពីសកម្មភាពការប្រើប្រាស់អាវុធដើម្បីយកមកបាញ់ខ្លួនឯងផ្ទាល់ ព្រោះចង់បញ្ជាក់អំពីក្បួនវេទមន្តសិល្បៈរបស់ខ្មែរពិតជាអស្ចារ្យ ដើម្បីឲ្យបរទេសក៏ដូចជាប្រទេសជិតខាងបានឃើញ។

បន្ទាប់ពីឃើញការផ្សព្វផ្សាយព័ត៌មាននេះភ្លាម នៅថ្ងៃទី២៤ ខែមិថុនា ឆ្នាំ២០២៤ លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញបាន ដាក់បទបញ្ជាទៅអធិការដ្ឋាននគរបាលខណ្ឌព្រែកព្នៅចុះស្រាវជ្រាវ និងកោះហៅលោក ណុប សក្កដា ហៅគ្រូផេះគ្រូអង្គាម ភេទប្រុស អាយុ៥៤ឆ្នាំ រស់នៅភូមិត្រពាំងស្នោរ សង្កាត់ពញ្ញាពន់ ខណ្ឌព្រែកព្នៅ យកមកសួរនាំនៅអអិការដ្ឋាននគរបាលខណ្ឌព្រែកព្នៅ ។

បន្ទាប់ពីសាកសួរនាំរួច នៅល្ងាចថ្ងៃដដែល លោកឧត្ដមសេនីយ៍ឯក ជួន ណារិន្ទ បានបញ្ជាឲ្យឃាត់ខ្លួនជនសង្ស័យដើម្បីអនុវត្តតាមផ្លូវច្បាប់។ ជាមួយគ្នានោះបើយោងតាមចម្លើយសារភាពរបស់ជនសង្ស័យ គឺអាវុធខ្លីនោះគាត់រើសបាន ជាប្រភេទអាវុធខ្លីម៉ាកឡុក ហើយគាត់ប្រើប្រាស់បាញ់មកលើខ្លួនឯង ចំនួន០៤គ្រាប់ដើម្បី អួតអ្នកភូមិពីមហិទ្ធិប្ញទ្ធិខ្លាំងពូកែបាញ់មិនមុត ក្នុងពិធីឡើងអាស្រមបារមី នៅផ្ទះរបស់គាត់កាលពីខែមេសា ឆ្នាំ២០២២។ ជនសង្ស័យបានបន្តថា អាវុធខ្លីនោះ គាត់យកទៅបោះចោលនៅក្នុងជ្រោះមួយកន្លែងក្នុងខេត្តក្រចេះ៕

អត្ថបទ៖ សំណាង