ឆ្មក់បង្ក្រាបទីតាំងខារ៉ាអូខេមួយកន្លែងសង្ស័យបង្កប់បម្រើសេវាផ្លូវភេទ ឃាត់ខ្លួនមនុស្ស៥នាក់

កម្លាំងផែនប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលខេត្តកំពង់ស្ពឺ កាលពីថ្ងៃទី៨ ខែសីហា ឆ្នាំ២០២៤ បានឆ្មក់បង្ក្រាបទីតាំងខារ៉ាអូខេមួយកន្លែងឈ្មោះ បុប្ផាថ្មី ដែលសង្ស័យបង្កប់បម្រើសេវាកម្មផ្លូវភេទ និងរំដោះនារីរងគ្រោះមិនទាន់គ្រប់អាយុមួយចំនួន។

ប្រតិបត្តិការនេះបានធ្វើឡើងក្រោមការសម្របសម្រួលពីលោក ចក សម្បត្តិ ព្រះរាជអាជ្ញារង​អយ្យការ​អ​មសា​លាដំបូងខេត្ដកំពង់ស្ពឺ នៅចំណុចខារ៉ាអូខេមានយីហោ បុប្ផាថ្មី ស្ថិតនៅភូមិបាក់ចិញ្ចៀន ឃុំត្រពាំគង ស្រុកសំ​រោងទង ខេត្តកំពង់ស្ពឺ ដោយរំដោះបាននារីរងគ្រោះក្មេងៗមិនគ្រប់អាយុមួយចំនួនដែលម្ចាស់ទីតាំងទទួលយកមកធ្វើការ។

តាមរបាយការណ៍របស់ស្នងការខេត្តកំពង់ស្ពឺ ក្នុងប្រតិបត្តិការសមត្ថកិច្ចបានរកឃើញតម្រុយមួយចំនួនដែលសង្ស័យថា ទីតាំងនេះលួចអនុញ្ញាតអោយផ្ដល់សេ​វារួមភេទដល់ភ្ញៀវផងដែរ និងបានឃាត់ខ្លួនមនុស្សចំនួន៥នាក់ដែលពាក់ព័ន្ធបើកទីតាំងខាងលើយកមកសួរនាំ ដើម្បរកឱ្យឃើ​ញ​អ្នកទទួលខុសត្រូវ និង​បន្ដចំណាត់ការ​កសាងសំ​ណុំរឿងតាមនីតិវិធីច្បាប់៕