នគរបាលខណ្ឌដង្កោ ត្រៀមខ្លួនរួចរាល់ និងប្រឆាំងដាច់ខាតរាល់អំពើទុច្ចរិតទាំងឡាយណា មានចេតនាប៉ុនប៉ងផ្តួលរំលំរដ្ឋាភិបាលស្របច្បាប់

កងកម្លាំងប្រដាប់អាវុធ នៃអធិការនគរបាលខណ្ឌដង្កោ បានត្រៀមលក្ខណៈសម្បត្តិរួចរាល់១០០ភាគរយ ក្នុងការការពារ និងប្រឆាំងដាច់ខាតរាល់អំពើទុច្ចរិតទាំងឡាយណា មានចេតនាប៉ុនប៉ងផ្តួលរំលំរដ្ឋាភិបាលស្របច្បាប់។

លោកវរសេនីយ៍ឯក ជឹម ស៊ីថា អធិការនគរបាលខណ្ឌដង្កោ បានប្រាប់ឱ្យដឹងនៅព្រឹកថ្ងៃទី១៦សីហានេះថា ដោយទទួលបានបទបញ្ជារពីឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ កងកម្លាំងនគរបាលនៅទូទាំងខណ្ឌដង្កោ បានត្រៀមជាស្រេច១០០ភាគរយហើយ ដើម្បីត្រៀមបង្ក្រាបរាល់ជនអគិតិ និងជនឧទ្ទាមក្រៅច្បាប់ទាំងឡាយណា ដែលរៀបចំគម្រោងប៉ុនប៉ុងផ្តួលរំលំរាជរដ្ឋាភិបាល ដោយយកកិច្ចសហប្រតិបត្តិការតំបន់ត្រីកោណអភិវឌ្ឍន៍ CLV – DTA មកធ្វើជាលេស ហើយញុះញង់ពលរដ្ឋស្លូតត្រង់ឱ្យក្រោកឈរបះបោរ ប្រឆាំងរដ្ឋាភិបាលស្របច្បាប់នាពេលបច្ចុប្បន្ន។

លោកអធិការបន្ថែមថា ប្រសិនបើមានការប្រមូលផ្តុំណាមួយក្នុងចេតនារៀបចំកម្លាំងប៉ះបោរកម្លាំងនគរបាលនឹងបង្ក្រាបភ្លាមៗតែម្តង ពោលគឺមិនឱ្យកើតមានឡើងក្នុងមូលដ្ឋាននោះឡើយ។ លោកប្តេជ្ញា ការពារដាច់ខាតមិនបណ្តោយឱ្យជនមួយក្តាប់តូច ធ្វើឱ្យប្រទេសជាតិដែលកំពុងជួបសុខសន្តិភាពវិលទៅរកភាពចលាចលនោះទេ។

លោកអធិការបានសង្កត់ធ្ងនថា គិតចាប់តាំងពីរាជរដ្ឋាភិបាលអាណត្តិសម្តេចតេជោ ហ៊ុន សែន បន្តដល់អាណត្តិសម្តេចធិបតី ហ៊ុន ម៉ាណែត កម្ពុជាមិនទាន់មានការបាត់បង់ទឹកដីសូម្បី១មីលីម៉ែត្រនៅឡើយនោះទេ។ ហើយពាក់ព័ន្ធនឹងកិច្ចសហប្រតិបត្តិការតំបន់ត្រីកោណអភិវឌ្ឍន៍ CLV – DTA គឺជាអភិវឌ្ឍន៍ជាតិ មិនមែនជាការកាត់ទឹកដីដែលជាអធិបតេយ្យភាពរបស់ខ្លួនទៅឱ្យជាតិសាសន៍ ឬប្រទេសដទៃជាអ្នកគ្រប់គ្រងដូចក្រុមប្រឆាំងក្រៅច្បាប់លើកឡើងនោះឡើយ៕

អត្ថបទ៖ សុភា