ប្រធានសាលាដំបូងខេត្តតាកែវ ត្រូវរងវិន័យការងារពីឧត្ដមក្រុមព្រឹក្សាវិន័យនៃអង្គចៅក្រម ពាក់ព័ន្ធការចេញដីការដោះលែងទណ្ឌិតម្នាក់​ពីបទ ឃាតកម្ម

លោកស្រី ពេជ ម៉ារ៉ែន ប្រធានសាលាដំបូងខេត្តតាកែវ ត្រូវបានក្រុមព្រឹក្សាវិន័យនៃឧត្ដមក្រុមព្រឹក្សានៃអង្គចៅក្រម ប្រកាសពីវិន័យការងារ ក្រោយចេញដីការដោះលែងទណ្ឌិតម្នាក់ ពាក់ព័ន្ធករណីឃាត់កម្ម ដែលត្រូវបានតុលាការសម្រេចផ្ដន្ទាទោសដាក់ពន្ធនាគាររយៈពេល១១ឆ្នាំ។

ការប្រកាសពីវិន័យការងារលើលោកស្រី ពេជ ម៉ារ៉ែន ប្រធានសាលាដំបូងខេត្តតាកែវនេះ ធ្វើឡើងបន្ទាប់ពីក្រុមព្រឹក្សាវិន័យនៃឧត្ដមក្រុមព្រឹក្សាវិន័យនៃអង្គចៅក្រម បានបើកកិច្ចប្រជុំកាលពីថ្ងៃទី២៩ ខែកក្កដា ឆ្នាំ២០២៤ លើសំណុំរឿងវិន័យតាមលិខិតលេខ ១២៨២ កយ.អគ្គា/២៤ ចុះថ្ងៃទី៥ ខែមិថុនា ឆ្នាំ២០២៤ របស់ក្រសួងយុត្តិធម៌។

តាមការប្រកាសរបស់ក្រុមប្រឹក្សាវិន័យនៃឧត្តមក្រុមប្រឹក្សានៃអង្គចៅក្រម លោកជំទាវ ពេជ ម៉ារ៉ែន បានចេញដីការសម្រេច​ដោះលែងដោយមានលក្ខខណ្ឌលេខ ០៦/២០២៤ ចុះថ្ងៃទី៩ ខែមេសា ឆ្នាំ២០២៤ ឱ្យទណ្ឌិតដែលកំពុងអនុវត្តទោសក្នុងពន្ធនាគារខេត្តតាកែវ តាមរយៈសាលដីកាស្ថាពរលេខ ៩២ ក្រII ណ ចុះថ្ងៃទី២៨ ខែធ្នូ ឆ្នាំ២០២១ របស់សាលាឧទ្ធរណ៍ភ្នំពេញ ដែលបានសម្រេចផ្តន្ទាទោសដាក់ពន្ធនាគារកំណត់ ១១ឆ្នាំ ពីបទ ឃាតកម្ម។

ក្រុមប្រឹក្សាវិន័យនៃឧត្តមក្រុមប្រឹក្សាវិន័យនៃអង្គចៅក្រម យល់ឃើញថា ការសម្រេចដោះលែងទណ្ឌិតដែលជាប់ទោសពីបទឃាតកម្មនេះ គឺជាការរំលោភបំពានយ៉ាងធ្ងន់ធ្ងរលើមាត្រា ៥១៣ នៃក្រមនីតិវិធីព្រហ្មទណ្ឌ។

ក្រុមប្រឹក្សាវិន័យនៃឧត្តមក្រុមប្រឹក្សានៃអង្គចៅក្រម បញ្ជាក់ថា ជនដែលត្រូវបានប្រធានសាលាដំបូងខេត្តតាកែវ ដោះលែងនេះ មិនមែនជា ជនជាប់ឃុំបណ្តោះអាសន្ននោះទេ ប៉ុន្តែ គឺជាទណ្ឌិតដែលកំពុងអនុវត្តទោសឧក្រិដ្ឋ ពីបទ ឃាតកម្ម តាមអំណាចសាលដីកាស្ថាពររបស់តុលាការ ហើយប្រសិនបើមានមូលហេតុចាំបាច់នៃការដោះលែង ដោយផ្អែកលើគោល​ការណ៍មនុស្សធម៌ណាមួយ ក៏មិនមែនជាសមត្ថកិច្ចរបស់តុលាការដែរ ប៉ុន្តែ គឺជាបុព្វសិទ្ធិរបស់ប្រមុខរាជរដ្ឋាភិបាល ក្នុងការធ្វើសំណើថ្វាយព្រះមហាក្សត្រសុំលើកលែងទោសឱ្យទណ្ឌិតណាមួយនៅពេលណាក៏បាន ដោយផ្អែកតាមមាត្រា ៧៧ នៃច្បាប់ស្តីពីពន្ធនាគារ៕

អត្ថបទ៖ សុខុម