ក្រោយប្ដីនាំប្រពន្ធទៅលោតទឹកពេលនេះនគរបាលថាកំពុងតាមរកជនសង្ស័យហើយ

ក្រុមការងារព័ត៌មាននិងប្រតិកម្មរហ័សនៃស្នងការដ្ឋានគរបាលរាជធានីភ្នំពេញបានលើកឡើងថាករណីជនរងគ្រោះ ស៊ីម ចិរិយា ដែលត្រូវគេរំលោភហើយគ្មានចំណាត់ការពីនគរបាលនោះព្រោះជនរងគ្រោះថាដកពាក្យប្ដឹងវិញ ទោះជាយ៉ាងណាក្រោយហេតុការណ៍នេះកើតឡើងនគរបាលខណ្ឌដូនពេញកំពុងស្រាវជ្រាវរកជនសង្ស័យហើយ។ នេះបើតាមសេចក្ដីបំភ្លឺរបស់នគរបាលតាំងពីពាក់កណ្ដាលយប់ថ្ងៃទី១៨ ឈានចូលថ្ងៃទី១៩ ខែមេសានេះ។

ក្នុងសេចក្ដីបំភ្លឺនោះនគរបាលបានឱ្យដឹងថាមន្ត្រីប៉ុស្តិ៍នគរបាលស្រះចកពិតជាបានដឹងករណីរំលោភលើជនរងគ្រោះឈ្មោះ ស៊ីម ចិរិយា ពិតមែនតាមរយៈការមកដាក់ពាក្យប្ដឹងនៅថ្ងៃទី១៦ ខែមេសាកន្លងទៅ តែពេលដែលកំពុងសាកសួរជនរងគ្រោះខ្លួនឯងផ្ទាល់បានប្រាប់សមត្ថកិច្ចថាឈប់ដាក់ពាក្យប្ដឹងវិញ។

ក្នុងសេចក្ដីបំភ្លឺនោះរុមការងារព័ត៌មាននិងប្រតិកម្មរហ័សនៃស្នងការដ្ឋានគរបាលរាជធានីភ្នំពេញបានលើកឡើងថា៖ «ជនរងគ្រោះឈ្មោះ ស៊ីម ចិរិយា មករាយការណ៍ថាមានករណីចាប់រំលោ.ភមកលើខ្លួន កាលថ្ងៃទី១៥ខែមេសាឆ្នាំ២០២៥ នៅចំណុចភូមិ១៦ សង្កាត់ស្រះចក ខណ្ឌដូនពេញ រាជធានីភ្នំពេញ នៅពេលនោះបានមកជួប មន្រ្តីប៉ុស្តិ៍ពីរនាក់ហើយក៏បានសួរនាំរឿងហេតុការណ៍ជុំវិញអំពីបញ្ហាករណីរំលោភនេះ។ ក្រោយពីសមត្ថកិច្ចសួរនាំបានបន្តិចមក តែត្រូវជនរងគ្រោះ (ឈ្មោះ ស៊ីម ចរិយា ) ក៏បានប្រាប់សមត្ថកិច្ចវិញថាឈប់ដាក់ពាក្យបណ្ដឹងទៀតហើយ ហើយក៏ក្រោកដើរចេញទៅក្រៅប៉ុស្តិ៍នគរបាលរដ្ឋបាល ខណៈនោះសមត្ថកិច្ចក៏តាមហៅស្រ្តីរងគ្រោះមានឈ្មោះខាងលើមកវិញដើម្បីសរសេរក្នុងពាក្យបណ្ដឹងបន្ដ តែត្រូវស្រ្តីខាងលើពុំព្រម»។

ទោះជាយ៉ាងណាក្រោយពីឃើញការផ្សាយព័ត៌មានពេញបណ្ដាញសង្គមហើយ បច្ចុប្បន្នកម្លាំងប៉ុស្តិ៍និងជំនាញនៃអធិការដ្ឋាននគរបាលខណ្ឌដូនពេញកំពុងស្រាវជ្រាវតាមស្វែងរកឃាត់ខ្លួនជនសង្ស័យដើម្បីសួរនាំ និងក៍កំពុងព្យាយាមស្វែងរកស្រ្តីរងគ្រោះមកដាក់ពាក្យបណ្តឹងដើម្បីឲ្យសមត្ថកិច្ចអនុវត្តតាមនីតិវិធី។

បើតាមនគរបាល សមត្ថកិច្ចបានតាមស្វែងរកពីរនាក់ប្តីប្រពន្ធនោះដើម្បីសួរនាំតែរកមិនឃើញនោះទេដោយសារពួកគាត់រស់នៅគ្មានទីលំនៅពិតប្រាកដ៕

អត្ថបទដោយ ហ៊ុន សិរីវឌ្ឍន៍