កីឡា

ព្រះខ័នរាជស្វាយរៀង ជិតបង្កើតកំណត់ត្រាជាក្លិបទី១ឈ្នះជើងឯកលីគ ៣ រដូវកាលជាប់គ្នា

បានផុស

២ ខែ មុន

នៅ

ថ្ងៃចន្ទ ៦ មេសា ២០២៦

ដោយ

ព្រះខ័នរាជស្វាយរៀង ត្រូវការតែ ១ ពិន្ទុទៀតដើម្បីក្លាយជាម្ចាស់ជើងឯកលីគកំពូលកម្ពុជារដូវកាលនេះ បន្ទាប់ពីបានឈ្នះ ភ្នំពេញក្រោន ៤-១ ក្នុងសប្តាហ៍ទី២៥ កាលពីថ្ងៃសៅរ៍ ទី៤ ខែមេសា ឆ្នាំ ២០២៦ នៅកីឡដ្ឋានភ្នំពេញក្រោន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រហូតដល់ពេលនេះ ព្រះខ័នរាជស្វាយរៀង មាន ៦២ ពិន្ទុ ឈរលើកំពូលតារាង ដោយនាំមុខ ១៥ ពិន្ទុ លើ ភ្នំពេញក្រោន ដែលមាន ៤៧ ពិន្ទុស្ថិតនៅលេខ ២។ សម្រាប់ការប្រកួតនៅសល់ ៥ លើកចុងក្រោយ ពួកគេត្រូវតែ ១ ពិន្ទុទៀតប៉ុណ្ណោះដើម្បីក្លាយជាម្ចាស់ជើងឯកលីគកំពូលកម្ពុជារដូវកាលនេះ។

ប្រការនេះបានផ្តល់ឲ្យ ព្រះខ័នរាជស្វាយរៀង កាន់តែខិតជិតទៅរកការបង្កើតកំណត់ត្រាថ្មីមួយក្នុងប្រវត្តិលីគបាល់ទាត់កំពូលកម្ពុជា គឺជាក្លិបដែលបានឈ្នះជើងឯកលីគកំពូលកម្ពុជា ៣ រដូវកាលជាប់គ្នា ពីព្រោះមិនទាន់មានក្រុមណាឈ្នះជើងឯកលីគកំពូលកម្ពុជា ៣ រដូវកាលជាប់គ្នាឡើយ។ សូមបញ្ជាក់ថា ព្រះខ័នរាជស្វាយរៀង បានឈ្នះជើងឯក ២ រដូវកាលមុនគឺ ២០២៣-២៤ និង ២០២៤-២៥។

សម្រាប់ការរកបាន ៦២ ពិន្ទុ ស្ថិតនៅចំណាត់ថ្នាក់លេខ ២ ក្នុងតារាងគិតត្រឹមសប្តាហ៍ទី២៥ ព្រះខ័នរាជស្វាយរៀង បានកក់កន្លះកៅអីរួចជាស្រេចសម្រាប់ពានរង្វាន់អាស៊ីកម្រិតទី២ AFC Champions League Two នៅរដូវកាលក្រោយ ២០២៦-២៧ ប៉ុន្តែបើពួកគេឈ្នះជើងឯកលីគ គឺទទួលបានកៅអីលេងនៅវគ្គសន្សំពិន្ទុក្នុងពូលតែម្តង។

បន្ទាប់ពីកំពុងខិតទៅការឈ្នះជើងឯកលីគកំពូលកម្ពុជា រដូវកាលនេះ ព្រះខ័នរាជស្វាយរៀង ត្រូវបើកទ្វារពហុកីឡដ្ឋានជាតិមរតកតេជោ ដើម្បីទទួល ក្រុម Manila Digger នៅថ្ងៃព្រហស្បតិ៍ ទី៩ ខែមេសា ឆ្នាំ ២០២៦ ជើងទី១ វគ្គពាក់កណ្តាលផ្តាច់ព្រ័ត្រ ពានរង្វាន់ AFC Challenge League។