កីឡា

កម្ពុជា មានតែ ព្រះខ័នរាជស្វាយរៀង មួយគត់ត្រូវចូលប្រកួតពាន Shopee Cup រដូវកាលក្រោយ

បានផុស

១ ខែ មុន

នៅ

ថ្ងៃចន្ទ ១ មិថុនា ២០២៦

ដោយ

ការប្រកួតប្រជែងក្នុងពាន ASEAN Club Championship Shopee Cup រដូវកាល ២០២៦-២០២៧ ត្រូវបានប្រកាសជាផ្លូវការអំពីកាលបរិច្ឆេទចាប់ឆ្នោតវគ្គចែកពូល ខណៈសមាសភាពក្រុមពី កម្ពុជា នឹងត្រូវចូលប្រកួតក្នុងពាននេះ គឺមានតែ ព្រះខ័នរាជស្វាយរៀង មួយគត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ASEAN United FC បានប្រកាសជាផ្លូវការ ថា ការចាប់ឆ្នោតវគ្គចែកពូលពាន ASEAN Club Championship រដូវកាល ២០២៦-២០២៧ នឹងធ្វើឡើងនៅថ្ងៃទី ៥ ខែ មិថុនា ឆ្នាំ ២០២៦ នេះទីក្រុង ហ្សាកាតា ប្រទេស ឥណ្ឌូណេស៊ី។

ពានក្លិប អាស៊ាន ក្នុងរដូវកាលថ្មីខាងមុខ គឺមានលក្ខណៈពិសេសច្រើន ដោយបង្កើនចំនួនក្រុមចូលរួមពី ១២ ដល់ ១៤ ក្រុម ដែលក្រុមនីមួយៗ ជាក្រុមជើងឯកលីគ ក្រុមជើងឯករង រួមជាមួយក្រុមជើងឯកពានក្នុងស្រុកលំដាប់ទី ២ (Cup) ផងដែរ។

យោងតាមព័ត៌មានពី ASEAN Football ក៏ដូចជាប្រភពគួរឱ្យទុកចិត្តមួយចំនួនទៀតបានបង្ហាញ ថា រដូវកាលថ្មីខាងមុខ កៅអីក្រុមចូលរួមមកពីប្រទេស កម្ពុជា នឹងមិនប្រែប្រួលនោះទេ ដោយទទួលបាន ១ កៅអី ដើម្បីចូលប្រកួតនៅវគ្គក្នុងពូលដោយស្វ័យប្រវត្តិ។ ជាមួយគ្នានេះ ក្រុមត្រូវតំណាងឱ្យ កម្ពុជា ក៏បានរកឃើញហើយដែរ នោះគឺក្រុមជើងឯកលីគកំពូល កម្ពុជា ព្រះខ័នរាជស្វាយរៀង។

ដោយឡែកក្រុមមកពីលីគ ថៃ ទទួលបាន ៣ កៅអី, ក្រុមលីគ វៀតណាម ទទួលបាន ២ កៅអី, ក្រុមលីគ ម៉ាឡេស៊ី ទទួលបាន ២ កៅអី, ក្រុមលីគ ឥណ្ឌូណេស៊ី ទទួលបាន ២ កៅអី, ក្រុមលីគ សិង្ហបុរី ទទួលបាន ២ កៅអី។ រីឯក្រុមលីគ ហ្វីលីពីន មីយ៉ាន់ម៉ា ឡាវ និង ប្រ៊ុយណេ ទទួលបានកន្លះកៅអីដូចគ្នា ដែលតម្រូវឱ្យប្រកួតជម្រុះ Playoff។

សូមបញ្ជាក់ថា ពានរង្វាន់ ASEAN Club Championship នេះទើបត្រូវបានបង្កើតឡើងពីររដូវកាលប៉ុណ្ណោះគឺ រដូវកាល ២០២៤-២៥ ដោយ ព្រះខ័នរាជស្វាយរៀង បានបញ្ចប់នៅចំណាត់ថ្នាក់លេខ ៣ ក្នុងពូល និងរដូវកាល ២០២៥-២៦ បញ្ចប់ចំណាត់ថ្នាក់លេខ ៣ ក្នុងពូលទៀត។ អ្វីគួរឲ្យកត់សំគាល់ ក្រុមជើងឯកលីគកំពូលកំពូលកម្ពុជា បានយកឈ្នះក្រុមខ្លាំងរបស់សិង្ហបុរី Lion City Sailors ២-០, ស្មើក្រុមខ្លាំងម៉ាឡេស៊ី Johor Darul Tazim ២-២ និងស្មើក្រុមថៃ Bangkok United ១-១ ជាលទ្ធផលដ៏ល្អនៅក្នុងរដូវកាល ២០២៥-២៦ ដែលអ្នកគាំទ្រគិតថា លីគកម្ពុជាគួរមានក្រុមហោចណាស់ពីរក្រុមចូលរួមការប្រកួតចាប់ពីរដូវកាលក្រោយទៅ៕