កីឡា

កម្ពុជា បញ្ចប់ភារកិច្ចក្នុងកីឡាឆ្នេរខ្សាច់អាស៊ី លើកទី៦ ដោយទទួលបានមេដាយ ២ គ្រឿង

បានផុស

២ ខែ មុន

នៅ

ថ្ងៃពុធ ២៩ មេសា ២០២៦

ដោយ

កីឡាទាំង ៤ ប្រភេទរបស់កម្ពុជា បានបញ្ចប់ការប្រកួតរបស់ខ្លួនកាលពីថ្ងៃទី២៨ ខែមេសា ឆ្នាំ ២០២៦ ក្នុងព្រឹត្តិការណ៍កីឡាឆ្នេរខ្សាច់អាស៊ី លើកទី៦ នៅប្រទេសចិន ដោយទទួលបានមេដាយចំនួន ២ គ្រឿង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កម្ពុជា បានបញ្ជូនកីឡាចំនួន ៤ ប្រភេទ គឺ កីឡាទ្រីយ៉ាថ្លុង ជឺជីតស៊ូ បាល់ទាត់លើតុ និងកីឡាចំបាប់ ដែលស្មើនឹងកីឡាករ កីឡាការិនី ១៨ នាក់ចូលរួមប្រកួត។ ជាលទ្ធផល កីឡាទ្រីយ៉ាថ្លុង ទទួលបានមេដាយប្រាក់ ១ គ្រឿង ដោយកីឡាការិនីកូនកាត់ខ្មែរ-បារាំង ម៉ហ្គត មរកត និងមេដាយសំរិទ្ធ ១ គ្រឿងរកបានដោយកីឡាបាល់ទាត់លើតុគឺ កីឡាការិនី ម៉ី ស្រីមាស និង យ៉ន សោភ័ណ្ឌរស្មី។

ចំណែកកីឡាជឺជីតស៊ូធ្វើមិនបានល្អទេដោយមានកីឡាករ សៅ សុភារ៉ា បានឈ្នះកីឡាករថៃ ក្នុងជុំ ៣២ នាក់ដំបូង ប៉ុន្តែចាញ់ត្រឹមវគ្គ១៦នាក់ចុងក្រោយ។ ចំណែកកីឡាករ ៣ នាក់ផ្សេងទៀតបានចាញ់ត្រឹមវគ្គ ៣២ នាក់ដំបូង។

ចំពោះកីឡាចំបាប់វិញ កីឡាករ ឈឿន ឆេង បានឈ្នះ ១ ប្រកួត និងចាញ់ ២ ប្រកួតនៅវគ្គក្នុងពូល ប៉ុន្តែមិនបានឡើងទៅវគ្គបន្តទេ។ កីឡាករ ហេង រដ្ឋា, កីឡាករ ហេង វុទ្ធី, កីឡាការិនី ឌិត សំណាង, កីឡាការិនី ឈឿន ស្រីឡែន និងកីឡាការិនី ជា កញ្ញា សុទ្ធតែចាញ់ទាំង ៣ ប្រកួតនៅវគ្គពូលដូចគ្នា។

ព្រឹត្តិការណ៍កីឡាឆ្នេរខ្សាច់អាស៊ី លើកទី៦ នឹងបញ្ចប់នៅថ្ងៃទី៣០ ខែមេសា ឆ្នាំ ២០២៦ បន្ទាប់ពីដំណើរការប្រកួតតាំងពីថ្ងៃទី២១ ខែមេសា។

គិតត្រឹមថ្ងៃទី២៩ ខែមេសានេះ កម្ពុជា ស្ថិតនៅចំណាត់ថ្នាក់លេខ ១៦ ក្នុងតារាងមេដាយ ប៉ុន្តែនឹងមានការប្រែប្រួលបន្ថែមទៀតដោយសារការប្រកួតនឹងបញ្ចប់នៅថ្ងៃទី៣០ ខែមេសា។

ព្រឹត្តិការណ៍កីឡាឆ្នេរខ្សាច់ទ្វីបអាស៊ី លើកទី៦ បានចាប់ផ្តើមបើកជាផ្លូវការកាលពីថ្ងៃទី២២ ខែមេសា ឆ្នាំ ២០២៦ និងបិទបញ្ចប់ ថ្ងៃទី៣០ ខែមេសា ឆ្នាំ ២០២៦ នៅទីក្រុង Sanya ប្រទេសចិន។ កីឡាមានចំនួន ១៤ ប្រភេទ ស្មើនឹង ៦១ វិញ្ញាសា ដែលមានប្រទេស ៤៥ មកពីទូទាំងអាស៊ីចូលរួមប្រកួត៕