កីឡា

ក្រុមបាល់ទះអង្គុយពិការកម្ពុជាប៉ះថៃ ដណ្តើមមេដាយមាស ព្រឹកនេះ

បានផុស

៧ ខែ មុន

នៅ

ថ្ងៃព្រហស្បតិ៍ ៤ សីហា ២០២២

ដោយ

Sovath

ក្រុមកីឡាករបាល់ទះអង្គុយពិការកម្ពុជាត្រូវប្រកួតជាមួយក្រុមកីឡាករបាល់ទះអង្គុយថៃ ក្នុងវគ្គផ្តាច់ព្រ័ត្រដណ្តើមមេដាយមាស វេលាម៉ោង១១ព្រឹក ថ្ងៃទី៤ ខែសីហានេះ នៅអាស៊ានប៉ារ៉ាហ្គេម លើកទី១១ ឆ្នាំ២០២២ នៅប្រទេសឥណ្ឌូនេស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមបាល់ទះអង្គុយពិការកម្ពុជានៅវគ្គសន្សំពិន្ទុក្នុងពូលបានប្រកួតឈ្នះក្រុមហ្វីលីពីនដោយលទ្ធផល ៣សិត០ និងបន្តឈ្នះក្រុមមីយ៉ាន់ម៉ា ដោយលទ្ធផល ៣សិត២ ដើម្បីឈរលើកំពូលតារាងពូល B ឡើងទៅវគ្គពាក់កណ្តាលផ្តាច់ព្រ័ត្រ ខណៈក្រុមមីយ៉ាន់ម៉ា ឈរលេខ២។

ស្របពេលជាមួយគ្នា ក្រុមបាល់ទះអង្គុយពិការថៃ ក្នុងវគ្គសន្សំពិន្ទុពូល A បានយកឈ្នះក្រុមម៉ាឡេស៊ី ដោយលទ្ធផល ៣សិត០ និងបន្តឈ្នះម្ចាស់ផ្ទះឥណ្ឌូនេស៊ី ដោយលទ្ធផល ៣សិត១ ដើម្បីឈរលើកំពូលតារាង ខណៈក្រុមឥណ្ឌូនេស៊ីស្ថិតនៅលេខ២។

នៅវគ្គពាក់កណ្តាលផ្តាច់ព្រ័ត្រ ក្រុមបាល់ទះអង្គុយពិការកម្ពុជាបានយកឈ្នះក្រុមឥណ្ឌូនេស៊ី ដោយលទ្ធផលតឹងតែង ៣សិត២ ដើម្បីឡើងទៅវគ្គផ្តាច់ព្រ័ត្រដណ្តើមមេដាយមាសជាមួយថៃដែលបានយកឈ្នះក្រុមមីយ៉ាន់ម៉ា ដោយលទ្ធផលតឹងតែដូចគ្នា ៣សិត២ នៅវគ្គពាក់កណ្តាលផ្តាច់ព្រ័ត្រ។

តាមប្រវត្តិជួបគ្នានៅអាស៊ានប៉ារ៉ាហ្គេម ក្រុមបាល់ទះអង្គុយថៃមិនធ្លាប់ឈ្នះក្រុមបាល់ទះអង្គុយកម្ពុជាឡើយ ហើយក្រុមថៃក៏មិនធ្លាប់បានឡើងដល់វគ្គផ្តាច់ព្រ័ត្រ។ នេះជាលើកទី១ហើយដែលក្រុមបាល់ទះអង្គុយថៃបានឡើងដល់វគ្គផ្តាច់ព្រ័ត្រ ខណៈកម្ពុជានេះជាលើកទី៣បានឡើងដល់វគ្គផ្តាច់ព្រ័ត្រក្នុងអាស៊ានប៉ារ៉ាហ្គេម បន្ទាប់ពីលើកទី១ឆ្នាំ២០១៣ឈ្នះបានត្រឹមមេដាយប្រាក់ និងលើកទី៩ ឆ្នាំ២០១៧បានឈ្នះមេដាយប្រាក់ម្តងនេះ។

សម្រាប់ការឡើងដល់វគ្គផ្តាច់ព្រ័ត្រជាលើកទី៣នេះ ក្រុមកីឡាករបាល់ទះអង្គុយកម្ពុជាសង្ឃឹមទទួលបានមេដាយមាសជូនជាតិ។

សូមបញ្ជាក់ថា រហូតដល់ពេលនេះ ក្រុមអត្តពលិកជនពិការកម្ពុជាឈ្នះបានមេដាយមាស១៨គ្រឿងហើយគឺមាស៥ ប្រាក់៧ និងសំរឹទ្ធ ហើយក៏នៅមានវិញ្ញាសាប្រកួតជាច្រើនទៀតមុនពេលអាស៊ានប៉ារ៉ាហ្គេម លើកទី១១បិទជាផ្លូវការនាថ្ងៃទី៦ ខែសីហា ឆ្នាំ២០២២៕

អត្ថបទ៖ វីរបុត្រ

Related Topics:អាស៊ានប៉ារ៉ាហ្គេម