កីឡា

បើកដំណើរការអាជីវកម្មក្លឹបហាត់ប្រាណ និងលេងកីឡាឡើងវិញ ក្រោយបញ្ចប់ថ្ងៃ២៨វិច្ឆិកា

បានផុស

៣ years មុន

នៅ

ថ្ងៃព្រហស្បតិ៍ ៣១ ធ្នូ ២០២០

ដោយ

ប្រមុខរាជរដ្ឋាភិបាលកម្ពុជាបានអនុញ្ញាតឲ្យក្រសួងអប់រំយុវជន និងកីឡា បើកដំណើរការឡើងវិញ នៅអាជីវកម្មក្លឹបហាត់ប្រាណ និងលេងកីឡា ដើម្បីសុខភាព ការប្រកួតលីគ និងការប្រមូលផ្ដុំរបស់ក្រុមជម្រើសជាតិជាជំហានៗ។ នេះបើយោងតាមចំណារយល់ព្រមរបស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា លើសំណើរបស់ក្រសួងអប់រំ យុវជននិងកីឡាកាលពីថ្ងៃទី៣០ ខែធ្នូ ឆ្នាំ២០២០។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឯកឧត្តម បណ្ឌិតសភាចារ្យ ហង់ ជួន ណារ៉ុន រដ្ឋមន្ត្រីក្រសួងអប់រំយុវជន និងកីឡា បានស្នើសុំគោលការណ៍អនុញ្ញាតពីសម្តេចអគ្គមហាសេនាបតីតេជោ ហ៊ុន សែន ដើម្បីបើកដំណើរការឡើងវិញនូវអាជីវកម្មក្លឹបហាត់ប្រាណ និងលេងកីឡា ដើម្បីសុខភាព ការប្រកួតលីគ និងការប្រមូលផ្ដុំរបស់ក្រុមជម្រើសជាតិជាជំហានៗ ដើម្បីលើកកម្ពស់សុខភាព និងការហាត់ហ្វឹកហ្វឺនពង្រឹងបច្ចេកទេស និងគុណផលរបស់កីឡាករ កីឡាការិនីសម្រាប់ត្រៀមលក្ខណៈឆ្ពោះទៅការប្រកួតកីឡាស៊ីហ្គេមលើកទី៣១ ឆ្នាំ២០២១ នៅប្រទេសវៀតណាម និងការប្រកួតកីឡាស៊ីហ្គេមលើកទី៣២ ឆ្នាំ២០២៣ នៅកម្ពុជា។

ឯកឧត្តមរដ្ឋមន្ត្រី ក្រសួងអប់រំយុវជន និងកីឡាបានបញ្ជាក់ក្នុងសេចក្តីប្រកាសព័ត៌មានថា នៅក្នុងការបើកដំណើរការឡើងវិញនេះ ក្រសួងនឹងបន្តណែនាំ និងគោរពតាមវិធានសុវត្ថិភាពសុខភាពរបស់ក្រសួងសុខាភិបាលឲ្យបានត្រឹមត្រូវ និងម៉ឺងម៉ាត់ ដោយ៖

១. ត្រូវធ្វើអនាម័យជាប្រចាំ សម្អាតដៃនឹងសាប៊ូ ទឹកអាល់កុល ដែលសម្លាប់មេរោគ ពាក់ម៉ាសនិងវាស់កម្តៅ។

២. រក្សាគម្លាតសុវត្ថិភាពបុគ្គល ១.៥ម៉ែត្រ

៣. ទីកន្លែងហ្វឹកហាត់ ហាត់ប្រាណ និងកន្លែងលេងកីឡាត្រូវបាញ់ថ្នាំសម្លាប់មេរោគ និងធ្វើអនាម័យជាប្រចាំ។

៤. ទីកន្លែងហ្វឹកហាត់ ហាត់ប្រាណ និងកន្លែងលេងកីឡា ត្រូវណែនាំឲ្យអ្នកចូលហាត់ប្រាណ និងលេងកីឡាចុះឈ្មោះ ផ្តល់លេខទូរសព្ទ និងអាសយដ្ឋានច្បាស់លាស់សម្រាប់ទំនាក់ទំនង និង៥. ត្រូវធានាថា កន្លែងហ្វឹកហាត់ ហាត់ប្រាណ និងលេងកីឡា មិនមែនជាកន្លែងឆ្លងកូវីដ-១៩៕