ក្រសួងអប់រំ និងអង្គការទឹកស្អាត ១០០១ បន្តពង្រឹងកិច្ចសហប្រតិបត្តិការលើទឹកស្អាត និងអនាម័យនៅសាលារៀន

ក្នុងជំនួបរវាងក្រសួងអប់រំ យុវជន និងកីឡា និងអង្គការទឹកស្អាត១០០១ កាលពីព្រឹកថ្ងៃទៅ០៨ ខែមិថុនា ឆ្នាំ២០២៦ ភាគីទាំងពីរបានបន្តពង្រឹងកិច្ចសហប្រតិបត្តិការលើទឹកស្អាត និងអនាម័យនៅសាលារៀន។ នេះ បើតាមការផ្សព្វផ្សាយលើទំព័រហ្វេសប៊ុករបស់ក្រសួងអប់រំ។

បើតាមក្រសួងអប់រំ ក្នុងជំនួបនោះ ភាគីអង្គការទឹកស្អាត ១០០១ បានថ្លែងអំណរគុណដល់ក្រសួងអប់រំ យុវជន និងកីឡា ចំពោះកិច្ចសហការដ៏ល្អនាពេលកន្លងមក ដោយបានបន្តអនុស្សរណៈនៃការយោគយល់គ្នាសម្រាប់កិច្ចសហប្រតិបត្តិការរយៈពេល៥ឆ្នាំបន្ថែមទៀត ដើម្បីលើកកម្ពស់ការអប់រំពាក់ព័ន្ធនឹងការថែទាំសុខភាពដោយប្រើប្រាស់ទឹកស្អាត។ ក្នុងឱកាសនោះ អង្គការទឹកស្អាត ១០០១ ក៏បានធ្វើបទបង្ហាញ ស្តីពី លទ្ធផល សមិទ្ធផលឆ្នាំ២០២៥-២០២៦ និងផែនការបន្ទាប់ក្នុងឆ្នាំ២០២៧ -២០២៨ និងផែនការរអនុវត្តគម្រោងបន្តផងដែរ។

ជាមួយគ្នានេះ បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ បានវាយតម្លៃខ្ពស់ចំពោះសមិទ្ធផល និងកិច្ចសហប្រតិបត្តិការដ៏ល្អរវាងអង្គការទឹកស្អាត១០០១ ជាមួយក្រសួងអប់រំ និងសាលារៀននៅតាមបណ្ដាខេត្ត ដោយគូសបញ្ជាក់ពីសារៈសំខាន់ និងភាពចាំបាច់នៃការប្រើប្រាស់ទឹក សម្រាប់ទាំងការបរិភោគ និងអនាម័យដើម្បីសុខភាពរឹងមាំ ដែលចូលរួមចំណែកសម្រាលបន្ទុកចំណាយរបស់គ្រួសារទៀតផង។

រដ្ឋមន្ត្រីក្រសួងអប់រំ គាំទ្រចំពោះការបន្តអនុស្សរណៈយោគយល់គ្នា (MoU) រវាង ក្រសួង និងអង្គការទឹកស្អាត ដើម្បីបន្តពង្រឹងនិងពង្រីកការអនុវត្តកម្មវិធី ដូចជា គម្រោង «ទឹកស្អាតសម្រាប់សាលារៀន», ការលើកកម្ពស់ការយល់ដឹងពី អនាម័យ និងទឹកស្អាត , និងការចូលរួមចំណែកក្នុងផែនការសកម្មភាពជាតិស្តីពីការផ្គត់ផ្គង់ទឹក និងការសម្អាត។

បើតាមក្រសួងអប់រំ, បណ្ឌិតសភាចារ្យ ហង់ជួន ណារ៉ុន បញ្ជាក់ថា កិច្ចសហប្រតិបត្តិការនេះ ពិតជាបានចូលរួមចំណែកកាត់បន្ថយអត្រាអវត្តមានរបស់សិស្ស និងលើកកម្ពស់សុខុមាលភាពកុមារ តាមរយៈការផ្តល់ទឹកស្អាត ដែលជាតម្រូវការមូលដ្ឋាន និងការអប់រំ «អនាម័យ» នៅតាមសាលារៀនក្នុងខេត្តគោលដៅជាច្រើនទូទាំងប្រទេសកម្ពុជា។

អង្គការទឹកស្អាត ១០០១ មានកិច្ចសហប្រតិបត្តិការយ៉ាងជិតស្និទ្ធ និងយូរអង្វែងជាមួយក្រសួងអប់រំ តាមរយៈការអនុវត្តគម្រោងជាច្រើន ដែលផ្តោតសំខាន់លើការផ្គត់ផ្គង់ទឹកស្អាត និងការលើកកម្ពស់សុខភាព អនាម័យសម្រាប់សិស្សានុសិស្សនៅតាមសាលារៀន ជាពិសេសនៅតំបន់ជនបទ៕