កីឡា

ម៉ារ៉ុក ផ្ដល់សំបុត្រឥតគិតថ្លៃចំនួន ១៣,០០០ សន្លឹក ដល់អ្នកគាំទ្រទៅទស្សនា World Cup ទល់នឹងបារាំង

បានផុស

៣ years មុន

នៅ

ថ្ងៃពុធ ១៤ ធ្នូ ២០២២

ដោយ

សហព័ន្ធកីឡាបាល់ទាត់ម៉ារ៉ុក សម្រេចផ្តល់សំបុត្រឥតគិតថ្លៃចំនួន ១៣,០០០ សន្លឹក ដល់អ្នកគាំទ្ររបស់ខ្លួន ដើម្បីទៅចូលរួមទស្សនាការប្រកួតបាល់ទាត់ពិភពលោក (FIFA World Cup 2022) ទល់នឹងបារាំង សម្រាប់ការប្រកួតវគ្គពាក់កណ្ដាលផ្ដាច់ព្រ័ត្រជាប្រវត្តិសាស្ត្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ម៉ារ៉ុក បានក្លាយជាក្រុមដ៏គួរឲ្យភ្ញាក់ផ្អើល នៃការប្រកួតនេះ បន្ទាប់ពីក្លាយជាប្រទេសអាហ្វ្រិក និងអារ៉ាប់ដំបូងគេដែលបានឈានដល់វគ្គ ៤ ក្រុមចុងក្រោយ នៃការប្រកួតបាល់ទាត់ពិភពលោក។

ក្រុមអាហ្វ្រិកខាងជើង បានទទួលជ័យជម្នះ ១-០ លើព័រទុយហ្គាល់ ក្នុងវគ្គ ៨ ក្រុមចុងក្រោយ បន្ទាប់ពីទទួលបានភាពជោគជ័យដោយការស៊ុតបាល់ប៉េណាល់ទី របស់ពួកគេជាមួយនឹងក្រុមអេស្ប៉ាញក្នុងវគ្គ ១៦ ក្រុមចុងក្រោយ។

សហព័ន្ធបាល់ទាត់ម៉ារ៉ុក បានផ្តល់សំបុត្រដោយឥតគិតថ្លៃដល់អ្នកគាំទ្រសម្រាប់ការប្រកួតជាច្រើនរបស់ពួកគេក្នុងប្រទេសកាតា ដោយក្រុមទទួលបានការគាំទ្រយ៉ាងខ្លាំងនៅក្នុងកីឡដ្ឋាន និងជុំវិញប្រទេសម្ចាស់ផ្ទះក្នុងអំឡុងពេល នៃការប្រកួត។

យោងតាម BBC សហព័ន្ធនឹងចែកសំបុត្រឥតគិតថ្លៃចំនួន ១៣,០០០ សម្រាប់ការប្រកួតវគ្គពាក់កណ្ដាលផ្ដាច់ព្រ័ត្រថ្ងៃស្អែកដល់អ្នកគាំទ្រម៉ារ៉ុក នៅទីក្រុងដូហា។ សំបុត្រត្រូវបានគេរំពឹងថា នឹងត្រូវបានចែកចាយដោយស្ថានទូតម៉ារ៉ុកក្នុងប្រទេសកាតា។

អ្នកគាំទ្រម៉ារ៉ុក ក៏បានធ្វើដំណើរលើជើងហោះហើរចំនួន ៣០ ដែលដំណើរការដោយក្រុមហ៊ុន Royal Air Maroc។ ក្រុមហ៊ុនអាកាសចរណ៍របស់រដ្ឋ ទើបតែបានបង្កើនជើងហោះហើរបន្ថែមចំនួន ៧ ទៀត ដើម្បីអនុញ្ញាតឲ្យអ្នកគាំទ្រចូលរួមវគ្គ ១/៤ ផ្តាច់ព្រ័ត្រជាមួយព័រទុយហ្គាល់ កាលពីសប្ដាហ៍មុន។

ក្រុមហ៊ុនអាកាសចរណ៍ មិនតម្រូវឲ្យអ្នកគាំទ្រធានាសំបុត្រសម្រាប់វគ្គពាក់កណ្ដាលផ្ដាច់ព្រ័ត្រមុនពេលហោះហើរទៅកាន់ប្រទេសកាតានោះទេ។

អ្នកគាំទ្រម៉ារ៉ុកប្រហែល ២០,០០០ នាក់ ត្រូវបានគេរំពឹងថា នឹងចូលរួមការប្រកួតវគ្គពាក់កណ្ដាលផ្ដាច់ព្រ័ត្រនៅថ្ងៃនេះ ដែលនឹងប្រព្រឹត្តទៅនៅកីឡដ្ឋាន Al Bayt មានសមត្ថភាព ៦៨,៨៩៥ នាក់។

កីឡដ្ឋាននេះធ្លាប់ធ្វើជាម្ចាស់ផ្ទះការប្រកួត World Cup វគ្គ ៨ ក្រុមចុងក្រោយ រវាងបារាំង ទល់នឹង អង់គ្លេស៕

ប្រភព ៖ dailymail.co.uk

អត្ថបទ ៖ មន្នីរ័ត្ន