កីឡា

លោក PRA SETH ប្រើពេលជាង១នាទី ក្លាយជាម្ចាស់ពានរង្វាន់ ប្រណាំងរថយន្ត Off Road សន្តិភាព ឆ្នាំ២០២៣

បានផុស

១ year មុន

នៅ

ថ្ងៃចន្ទ ១៦ មករា ២០២៣

ដោយ

ព្រឹត្តការណ៍កីឡាប្រណាំងរថយន្ត Off Road សន្តិភាព ឆ្នាំ២០២៣ នៅទីលាន១២ម៉ូទ័រផាក ខេត្តមណ្ឌលគិរីដែលប្រើពេល៣ថ្ងៃនៃការប្រកួតប្រជែង ស្វែងរកជើងខ្លាំងទាំង៣កម្រិតបានបញ្ចប់ជាផ្លូវការកាលពីល្ងាចថ្ងៃទី ១៥ មករាម្សិលមិញនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតយ៉ាងស្វិតស្វាញចាប់ពីថ្ងៃទី ១៣ មករាមក បានបែងចែកជា៣ក្រុម ឬ 3 Class មានរថយន្តសរុបចំនួន៦៧ គ្រឿង ក្នុងនោះក្រុមទី១ ហៅថា Hard Core ឬ Class A មានរថយន្តកម្ពុជាចំនួន២៧គ្រឿង និងរថយន្តថៃចំនួន២គ្រឿង, ក្រុមទី២ ហៅថា Light Core ឬ Class B មានរថយន្តកម្ពុជាចំនួន១៥គ្រឿង និងវៀតណាមចំនួន១គ្រឿង, ក្រុមទី៣ ហៅថា Overland ឬ Class C មានរថយន្តកម្ពុជាចំនួន២២គ្រឿង។

ជាលទ្ធិផលសម្រាប់ Class A ម្ចាស់ពានរង្វាន់បានទៅលើកីឡាករដែលមកពីប្រទេសថៃ គឺលោក Praseth ជាអ្នកបើកបររថយន្តលេខ១១៦ ធ្វើបានយ៉ាងល្អក្នុងថេរៈវេលាជាង១នាទី អាចឆ្លងកាត់ផ្លូវកម្រិតទី១២ដែលពិបាកបំផុត បានយ៉ាងរលូន មិនជាប់ផុង មិនផ្អៀង ឬប្រើពេលវេលាយូរដូចរថយន្តដ៍ទៃនោះទេ។

មានវ័យ៦១ឆ្នាំ លោក Praseth បានបញ្ជាយានយន្តយ៉ាងប៉ិនប្រសប និងមានជំនាញបំផុតដោយការប្រកួតចាប់ផ្តើមតាំងពីថ្ងៃទី១ ពោលគិតចាប់ពីស្ថានភាពផ្លូវទី៣ រហូតដល់ផ្លូវទី១២ ដែលមានភាពលំបាកបំផុត ត្រូវចូលទៅភក់ ក្នុងទឹកប្រឡាយ គ្រហកដែលមានជម្រៅជ្រៅ ឡើងទួល ក៏លោកនៅតែធ្វើបានល្អ បើកយ៉ាងស្វាហាប់ និងមានថេរៈវេលាតិចបំផុតរហូតក្លាយជាជើងឯកក្នុង Class។

លោក Praseth បានឲ្យដឹងថា លោកបានធ្វើដំណើរចេញពីខេត្តត្រាតប្រទេសថៃ ជាមួយមិត្តរួមជាតិ១រថយន្តផ្សេងទៀត ដែលមានចម្ងាយជាង១ពាន់គីឡូម៉ែត្រពីប្រទេសកម្ពុជា និងឈប់សម្រាកនៅខេត្តកំពង់ចាមមួយយប់ រួចបន្តដំណើរមកកាន់ខេត្តមណ្ឌលគីរីដើម្បីប្រកួតប្រជែងជាមួយកីឡាករជាច្រើនទៀត។

លោកបញ្ជាក់ថា ការរៀបចំទីលានប្រណាំង១២ម៉ូទ័រផាកនេះ គឺពិតជាស័ក្តិសមសម្រាប់កីឡាប្រណាំងយានយន្ត ក្នុងនោះមានដូចជាផ្លូវកាច់កោង គ្រហក ជ្រលង ចម្រាក់ថ្ម ដែលកីឡាករប្រកួតមិនងាយនឹងបើកបរឆ្លងកាត់ស្រួលនោះទេ។

អ្នកប្រណាំងរថយន្តថៃចាស់វស្សារូបនេះ ពិតជារីករាយយ៉ាងខ្លាំងក្នុងការមកចូលរួមប្រកួតជាមួយកីឡាកនៅប្រទេសកម្ពុជា ដោយបានបង្កប់នូវការស្រលាញ់រាប់អានដល់ក្រុមលោកដែលជាកីឡាករមកពីបរទេស។

បញ្ជាក់ដែរថា ការប្រកួតរថយន្ត Off Road បានចាប់ផ្តើមឡើងនាថ្ងៃទី១៣ដល់១៥មករាឆ្នាំ២០២៣ នាទីលាន១២ ម៉ូទ័រផាក ខេត្តមណ្ឌលគិរី ដែលជាទីលានកម្រិតស្តង់ដាដំបូងបង្អស់ក្នុងប្រទេសកម្ពុជា។

ក្រៅពីការប្រកួតការប្រណាំងរថយន្តឆ្លងកាត់ឧបសគ្គ ក៏មានការប្រណាំងរថយន្ត Rally និង ម៉ូតូហោះផងដែរ ដោយមានប្រជាជនជាច្រើនពាន់នាក់ចូលមកទស្សនាផ្ទាល់៕