កីឡា

កំណត់ត្រា៥យ៉ាងរបស់បាល់ទះកម្ពុជាក្នុងស៊ីហ្គេមគិតពីឆ្នាំ១៩៧៩

បានផុស

៥៥ នាទី មុន

នៅ

ថ្ងៃចន្ទ ៨ ឧសភា ២០២៣

ដោយ

ក្រុមបាល់ទះជម្រើសជាតិកម្ពុជាបានឡើងទៅកាន់វគ្គផ្តាច់ព្រ័ត្រក្នុងព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ដែលកម្ពុជាធ្វើជាម្ចាស់ផ្ទះ។

ដោយមិនគិតមុនសង្គ្រាម គិតចាប់តាំងពីឆ្នាំ១៩៧៩មក ក្រុមបាល់ទះជម្រើសជាតិកម្ពុជាបានកសាងសមិទ្ធផលថ្មីៗជាច្រើនគួរឲ្យកត់សំគាល់។ ជាពិសេសក្នុងកីឡាស៊ីហ្គេមពីរលើកចុងក្រោយឆ្នាំ២០២១ និង២០២៣។ ថ្ងៃនេះសារព័ត៌មានកម្ពុជាថ្មី សូមបង្ហាញសមិទ្ធផលថ្មីចំនួន៥ដែលក្រុមបាល់ទះកម្ពុជាសម្រេចបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

១. ឡើងវគ្គផ្តាច់ព្រ័ត្រលើកដំបូង

ក្រុមកម្ពុជាបានឡើងវគ្គផ្តាច់ព្រ័ត្រស៊ីហ្គេម ឆ្នាំ២០២៣ បន្ទាប់ពីបានយកឈ្នះក្រុមធ្លាប់ខ្លាំងគឺថៃដោយលទ្ធផល ៣-២ ក្នុងវគ្គពាក់កណ្តាលផ្តាច់ព្រ័ត្រកាលពីយប់ថ្ងៃទី៧ ខែឧសភា។ នៅវគ្គសន្សំពិន្ទុក្នុងពូល កម្ពុជាបានឈ្នះសិង្ហបុរី ៣-០, ឈ្នះហ្វីលីពីន ៣-០ និងចាញ់ឥណ្ឌូណេស៊ី ០-៣។

២. ឡើងវគ្គពាក់កណ្តាលផ្តាច់ព្រ័ត្រលើកដំបូង

ក្រុមកម្ពុជាបានឡើងទៅកាន់វគ្គពាក់កណ្តាលផ្តាច់ព្រ័ត្រលើកដំបូងក្នុងស៊ីហ្គេម លើកទី១ ឆ្នាំ២០២១ នៅប្រទេសវៀតណាម។ ពេលនោះវគ្គសន្សំពិន្ទុក្នុងពូល កម្ពុជាបានឈ្នះហ្វីលីពីន ៣-១ និងចាញ់ថៃ ២-៣។

៣. ឈ្នះមេដាយជាលើកដំបូង

ក្រុមបាល់ទះកម្ពុជាត្រូវបានចារទុកក្នុងបញ្ជីមេដាយកីឡាបាល់ទាត់លើកដំបូងកាលពីឆ្នាំ២០២១ បន្ទាប់ពីបានយកឈ្នះថៃនៅវគ្គដណ្តើមចំណាត់ថ្នាក់លេខ៣ដោយពិន្ទុ ៣-២ ដែលនេះជាមេដាយសំរឹទ្ធសម្រាប់កម្ពុជា។

៤. ឈ្នះថៃ២លើកជាប់គ្នា

ក្រុមបាល់ទះកម្ពុជាបានយកឈ្នះក្រុមជម្រើសជាតិ២លើកជាប់គ្នាក្នុងជំនួប២លើកចុងក្រោយក្នុងស៊ីហ្គេម។ កាលពីឆ្នាំ២០២១ នៅវៀតណាម កម្ពុជាបានឈ្នះថៃ ៣-២ និងទទួលបានដណ្តើមមេដាយសំរឹទ្ធ ហើយឆ្នាំ២០២៣នេះបានឈ្នះ៣-២ ទៀតក្នុងវគ្គពាក់កណ្តាលផ្តាច់ព្រ័ត្រ។

៥. កក់មេដាយប្រាក់ក្នុងដៃស្រេច
សម្រាប់ការឡើងទៅកាន់វគ្គផ្តាច់ព្រ័ត្រស៊ីហ្គេម ឆ្នាំ២០២៣នេះ ក្រុមកម្ពុជាត្រូវប្រជែងមេដាយមាស ដូច្នេះមានមេដាយប្រាក់ក្នុងដៃស្រេចទៅហើយ។ ការប្រកួតវគ្គផ្តាច់ព្រ័ត្រជាមួយឥណ្ឌូណេស៊ីយប់ថ្ងៃទី៨ ខែឧសភានេះ មិនថា កម្ពុជាឈ្នះទទួលបានមេដាយមាស ឬចាញ់ទទួលបានមេដាយប្រាក់ទេគឺសុទ្ធតែជាមេដាយប្រាក់ ឬមាសលើកដំបូងគិតចាប់តាំងពីឆ្នាំ១៩៧៩មក៕