កីឡា

អ្នកប្រដាល់ត្រកូលឡៅ៣នាក់បង្កើតកំណត់ត្រាឈ្នះមេដាយមាសស៊ីហ្គេមពេលតែមួយ

បានផុស

៤ ខែ មុន

នៅ

ថ្ងៃពុធ ២៤ ឧសភា ២០២៣

ដោយ

អ្នកប្រដាល់ត្រកូលឡៅ៣នាក់បានបង្កើតកំណត់ត្រាថ្មីមួយសម្រាប់វិស័យកីឡាប្រដាល់គុនខ្មែរ និងឃីកបុកស៊ីង តាមរយៈការឈ្នះមេដាយមាស៣គ្រឿងពីព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣។

កីឡាករ ឡៅ ចន្ទ្រា បានឈ្នះមេដាយមាស១គ្រឿង លើប្រភេទកីឡាគុនខ្មែរ វិញ្ញាសាទម្ងន់៧៥គីឡូក្រាម បន្ទាប់ពីយកឈ្នះកីឡាករវៀតណាម Nguyen Thanh Tung នៅវគ្គផ្តាច់ព្រ័ត្រ។ នេះជាមេដាយមាសលើកដំបូងសម្រាប់កីឡាករ ឡៅ ចន្ទ្រា ពីកីឡាស៊ីហ្គេម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ ឡៅ ចិត្រា ជាប្អូនប្រុសបង្កើតរបស់កីឡាករ ឡៅ ចន្ទ្រា បានឈ្នះមេដាយមាស១គ្រឿង លើប្រភេទកីឡាគុនខ្មែរ វិញ្ញាសាទម្ងន់៦៧គីឡូក្រាម តាមរយៈជ័យជម្នះលើកីឡាករវៀតណាម Nguyen Chau Dat នៅវគ្គផ្តាច់ព្រ័ត្រ។ នេះក៏ជាមេដាយមាសលើកទី១សម្រាប់ ឡៅ ចិត្រា បន្ទាប់ពីធ្លាប់ចូលរួមប្រកួតស៊ីហ្គេម៣លើក។

កីឡាករ សៃណី សៃណេត ដែលអ្នកគាំទ្រគុនខ្មែរស្គាល់ ឡៅ សៃណេត ជាក្មួយប្រុសរបស់កីឡាករ ឡៅ ចន្ទ្រា និង ឡៅ ចិត្រា បានឈ្នះមេដាយមាស១គ្រឿង លើកីឡាឃីកបុកស៊ីង វិញ្ញាសាទម្ងន់៥១គីឡូក្រាម បន្ទាប់ពីបានឈ្នះកីឡាករឥណ្ឌូណេស៊ី Salmri Stendra Pattisamallo ក្នុងទឹកទី២។

នេះជាកំណត់ត្រាថ្មីមួយសម្រាប់អ្នកប្រដាល់ ឡៅ ដែលទទួលបានជោគជ័យព្រមគ្នាក្នុងពេលតែមួយក្នុងព្រឹត្តិការណ៍កីឡាសំខាន់ប្រចាំតំបន់អាស៊ាន។ កន្លងមក ឡៅ ចិត្រា ធ្លាប់បានឈ្នះមេដាយសំរិទ្ធ២គ្រឿងពីកីឡាស៊ីហ្គេម ឆ្នាំ២០១៩ និងស៊ីហ្គេម ឆ្នាំ២០១៥៕

អត្ថបទ៖ វីរបុត្រ