ពេជ្រ ប៊ុនសិទ្ធ​ ប្តេជ្ញា​បន្ត​ការ​ហ្វឹក​ហាត់ ទោះ​ឈ្នះខ្សែក្រវាត់លើកដំបូង

អ្នក​លេង​គុន​ខ្មែរ ពេជ្រ ប៊ុនសិទ្ធ បាន​ប្តេជ្ញា​​បន្ត​ការ​ហ្វឹក​ហាត់​​បន្ថែម​​ទៀត​ បើ​ទោះ​បី​ជា​ខ្លួន​​ឈ្នះខ្សែក្រវាត់​ខារ៉ាបាវ លើក​ដំបូង​ក្នុង​អាជីព​ តាម​រយៈជ័យជម្នះ​លើ​កីឡាករថៃ ផេតផាកភូមិ នៅវគ្គផ្ដាច់ព្រ័ត្រ កាល​ពី​​យប់ ថ្ងៃ​អាទិត្យ ទី​២៥ ខែ​មិថុនា នៅ​សង្វៀន​បាយ័ន​ស្ទឹង​មាន​ជ័យ។

ពេជ្រ ប៊ុនសិទ្ធ និយាយថា ៖«ខ្ញុំនឹង​បន្ត​ខំ​ប្រឹង​ប្រែង​ហ្វឹក​ហាត់បន្ថែមឲ្យខ្លាំង។ រាល់ការប្រកួតខ្ញុំ​នឹង​ខំវ៉ៃឲ្យដូចប្រកួតវគ្គផ្ដាច់ព្រ័ត្រថ្ងៃ​នេះ​ដែរ»។

ក្នុង​យុទ្ធនាការ​ខ្សែ​ក្រវាត់​ខារ៉ាបាវ​នេះ កូនសិស្សលោកគ្រូ ពេជ្រ សុផាន់ ធ្វើបានល្អឥតខ្ចោះចាប់តាំងពីវគ្គសន្សំពិន្ទុក្នុងពូលរហូតដល់វគ្គផ្តាច់ព្រ័ត្រ។ នៅវគ្គសន្សំពិន្ទុក្នុង៤ប្រកួត ពេជ្រ ប៊ុនសិទ្ធ មិនដែលស្គាល់ពាក្យថាចាញ់ទេគឺប្រកួតទី១​បានឈ្នះកីឡាករ​ថៃ​ ស៊ែងតៈវ៉ាន់ ឆ.ហាផាយ៉ាក់ ដោយពិន្ទុ, ប្រកួតទី២ ផ្តួលកីឡាករថៃ ថៈឡេកងើន ក្នុងទឹកទី២, ប្រកួតទី៣ ផ្តួលកីឡាករថៃ ឡាហ្វាន់ ក្នុងទឹកទី៣ និងប្រកួតទី៤ផ្តួលកីឡាករថៃ ផេតផាកភូមិ ក្នុងទឹកទី១។

ពេជ្រ ប៊ុនសិទ្ធ សម្រាប់ប្រកួតលើសង្វៀនផ្ទាល់វិញ មិនថាប៉ះកីឡាករកម្ពុជាឬប៉ះកីឡាករបរទេស​ទេ រូបគេព្យាយាមវ៉ៃឲ្យអស់ពីសមត្ថភាពមិនធ្វើឲ្យអ្នកគាំទ្រខកបំណ​ង​ឡើយ។

ពេជ្រ ប៊ុនសិទ្ធ ​បាន​បន្ដថា ៖«ខ្ញុំចង់​ប្រកួត​ជា​មួយ​​កីឡាករបរទេសជាងកីឡាករខ្មែរ។ សម្រាប់គូប្រកួតវិញឲ្យតែគេចាប់គូ​ឲ្យគឺខ្ញុំប្រកួតបានទាំងអស់ឲ្យតែគីឡូស្មើគ្នា»។

ក្រោមក្រសែភ្នែកទស្សនិជនរាប់ពាន់នាក់​នៅសង្វៀនបាយ័នស្ទឹងមានជ័យ ពេជ្រ ប៊ុនសិទ្ធ ពិតជាធ្វើបានល្អមែនទែន ដោយផ្ដួលកីឡាករថៃ ផេតផាកភូមិ ឲ្យបោះបង់ការប្រកួតនៅទឹកទី៣ ដោយអាជ្ញាកណ្ដាលរាប់ដល់១០ នៅតែមិនអាចក្រោកបាន។ ការឈ្នះខ្សែក្រវាត់មិញនេះក៏ជាជោគជ័យដ៏ធំសម្រាប់រូបគេផ្ទាល់ក៏ដូចជាលោកគ្រូ ពេជ្រ សុផាន់ ផងដែរ។

«សម្រាប់កីឡាករ បើចង់ជោគជ័យគឺត្រូវប្រឹងប្រែង​ហ្វឹក​ហាត់ គោរពវិន័យ និងស្ដាប់បង្គាប់គ្រូ»។ ពេជ្រ ប៊ុនសិទ្ធ បានបញ្ជាក់។

កីឡាករ​រូប​នេះ​បន្ថែម​ថា កាយសម្បទា​​ជា​រឿង​សំខាន់ក្នុងនាមជាកីឡាករប្រដាល់ ប៉ុន្ដែរឿងដែលមិនអាចខ្វះបានគឺការគោរពវិន័យ ស្ដាប់ការណែនាំរបស់គ្រូ ព្យាយាម​ហ្វឹក​ហាត់មានភាព តស៊ូ អំណត់​អត់​ធន់​ និងមានឆន្ទៈខ្ពស់ទើបអាចឈានទៅភាពជោគជ័យបាន។

អ្នកលេងគុនខ្មែរ ពេជ្រ ប៊ុនសិទ្ធ ដែលមានដើមកំណើតនៅខេត្តបាត់ដំបង មានវ័យត្រឹមតែ២៣ឆ្នាំ ប៉ុន្តែបទពិសោធលើសង្វៀន​រហូត​១២៨​ដង ក្នុង​នោះ​ឈ្នះ៩៣​ដង ដោយ​ធ្លាប់​​ផ្ដួលដៃគូឲ្យសន្លប់​​៤៤​ដង​ ស្មើ​១១​ដង និងចាញ់២៤ដង៕

អត្ថបទ៖ ផា រតនា