កីឡា

ដំរីភ្លុកពិឃាត ផល សោភ័ណ្ឌ ចង់សងសឹកវីរបុរសថៃ សែនឆៃ តែក្រៅទឹកដីថៃ

បានផុស

៣ years មុន

នៅ

ថ្ងៃអង្គារ ៤ កក្កដា ២០២៣

ដោយ

អ្នកប្រដាល់គុនខ្មែរ ផល សោភ័ណ្ឌ ចង់ជួបសងសឹកវីរបុរសប្រដាល់ថៃ Saenchai បន្ទាប់ពីជួបគ្នាលើកទី១កាលពីឆ្នាំ២០១៥នៅទឹកដីថៃបានចប់យ៉ាងឆាប់រហ័សដែលធ្វើឲ្យអ្នកលេងគុនខ្មែររូបនេះមិនអស់ចិត្ត។

ដំរីភ្លុកពិឃាត ផល សោភ័ណ្ឌ បានជួបខ្លាចាស់កំពូលល្បិចថៃ សែនឆៃ កាលពី៣១ ខែធ្នូ ឆ្នាំ២០១៥ នៅកម្មវិធី Thai Fight ក្នុងទីក្រុងបាំងកក ប្រទេសថៃ។ ការប្រកួតប្រើពេលត្រឹមតែប៉ុន្មានវិនាទីក្នុងទឹកទី១ប៉ុណ្ណោះ ដោយកីឡាករម្ចាស់ស្រុកបានវាយកណ្តាប់ឲ្យអ្នកលេងគុនខ្មែរសន្លប់យ៉ាងលឿន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតនោះទាំងសាមីខ្លួន ផល សោភ័ណ្ឌ និងអ្នកគាំទ្រពិតជាមិនអស់ចិត្តសោះ ដោយសារអ្នកលេងគុនខ្មែរមិនទាន់បានបញ្ចេញសមត្ថភាពផងក៏ស្រាប់តែត្រូវបានកីឡាករថៃវ៉ៃឲ្យសន្លប់។ ពេលនោះប្រសិនបើ អ្នកលេងគុនខ្មែរអាចតស៊ូបានពីរទៅបីទឹកប្រហែលជាល្អមើល និងទាក់ទាញខ្លាំង។

និយាយក្នុងការផ្សាយផ្ទាល់លើគណនី Facebook ផ្ទាល់ខ្លួនមួយ កីឡាករ ផល សោភ័ណ្ឌ បាននិយាយថា រូបគេពិតជាចង់ជួបសងសឹកកីឡាករថៃ សែនឆៃ មែន ប៉ុន្តែសុំមិនវ៉ៃនៅលើទឹកដីប្រទេសថៃទេ។ រូបគេចង់ជួបសងសឹកខ្លាកំណាចថៃនៅទឹកដីប្រទេសណាក៏បាន តែមិនមិនមែនទឹកដីថៃ។

ផល សោភ័ណ្ឌ បានចាប់ប្រឡូកក្នុងអាជីពប្រដាល់គុនខ្មែររយៈពេលប្រហែលជា១០ឆ្នាំមកហើយ បន្ទាប់ពីប្តូរពីប្រដាល់សកល។ ក្នុងរយៈពេលជិត១០ឆ្នាំកន្លងទៅនេះ កូនសិស្សរបស់ក្លិបតាឡីដំរីមានរិទ្ធិរូបនេះនៅតែរក្សាគុណភាព សមត្ថភាព និងបច្ចេកទេសល្អដដែលពោលគឺមិនសូវឡើងខ្លាំង ហើយក៏មិនធ្លាក់ចុះដែរ។

ក្នុងអាជីពប្រដាល់គុនខ្មែរ ផល សោភ័ណ្ឌ បានឈ្នះខ្សែក្រវាត់៥គ្រឿងគឺខ្សែក្រវាត់ គ្រុដគុនខ្មែរ ខ្សែក្រវាត់ IPCC គុនខ្មែរ ខ្សែក្រវាត់ខារ៉ាបាវ ឆ្នាំ២០១៣ ខ្សែក្រវាត់ខារ៉ាបាវ ឆ្នាំ២០១២ និងខ្សែក្រវាត់ ស្រាបៀរកម្ពុជា ឆ្នាំ២០១១។

សម្រាប់ខ្សែក្រវាត់ទាំង៥ខាងលើនេះ ផល សោភ័ណ្ឌ មិនចង់ទុកឲ្យឥតប្រយោជន៍ទេ ប៉ុន្តែរូបគេចង់ឲ្យមានការរៀបចំឲ្យកីឡាករណាម្នាក់ឡើងប្រកួតដណ្តើមខ្សែក្រវាត់ពីរូបគេ។ កីឡាករបាននិយាយថា ៖«បើសិនជាឈ្នះខ្សែក្រវាត់ហើយគ្មានការប្រកួតការពារខ្សែក្រវាត់ទេ នោះខ្សែក្រវាត់ដែលឈ្នះគ្មានតម្លៃ។ បើមានការដាក់ឲ្យប្រកួតដណ្តើមខ្សែក្រវាត់វិញ នោះកីឡាករនឹងខំហ្វឹកហាត់ដើម្បីការពារ ហើយខ្សែក្រវាត់ក៏មិនត្រូវបានទុកចោល»។

«បើសិនយើងមានខ្សែក្រវាត់ យើងមិនអាចយកខ្សែក្រវាត់ដេកអោបបានទេ។ បើយើងយកខ្សែក្រវាត់មកដេកអោប ស្មើនឹងយើងខ្លាចគេ។ បើគេមានសមត្ថភាពដណ្ដើមខ្សែក្រវាត់យើងបានឲ្យគេយកទៅ តែបើយើងមានសម្ថតភាព យើងនៅតែការពារខ្សែក្រវាត់យើងបានដដែល»។ ផល សោភ័ណ្ឌបានបញ្ជាក់៕

អត្ថបទ៖ វីរបុត្រ

Related Topics:កីឡាប្រដាល់គុនខ្មែរ ផល សោភ័ណ្ឌ

ព័ត៌មានអន្ដរជាតិ២២ ម៉ោង ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៣ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា