កីឡា

ម្ចាស់ក្លិបបឹងកេតបញ្ជាក់រឿងប្រើស្តាតអូឡាំពិកជាផ្ទះបណ្តោះអាសន្ន

បានផុស

៣ years មុន

នៅ

ថ្ងៃអង្គារ ៤ កក្កដា ២០២៣

ដោយ

ក្លិបបាល់ទាត់បឹងកេតកំពុងស្នើទៅក្រសួងអប់រំ យុវជន និងកីឡាដើម្បីប្រើប្រាស់ ពហុកីឡដ្ឋានជាតិអូឡាំពិកជាផ្ទះបណ្តោះអាសន្នសម្រាប់ការប្រកួតខេមបូឌានព្រីមៀរលីគរដូវកាលថ្មី២០២៣-២៣ បន្ទាប់ពីបានចាកចេញពីកីឡដ្ឋាននៅបឹងស្នោរ ក្នុងខណ្ឌច្បារអំពៅ រាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ស្រី ពុធ ធីតា ប្រធានក្លឹបបឹងកេតបានប្រាប់«កម្ពជាថ្មី»នាព្រឹកថ្ងៃទី៤ ខែកក្កដា ឆ្នាំ២០២៣នេះថា ក្លិបបានស្នើទៅក្រសួងអប់រំ យុវជន និងកីឡាមែន ប៉ុន្តែមិនទាន់ទទួលបានឯកសារសម្រេចនៅឡើយទេ។

ពហុកីឡដ្ឋានជាតិអូឡាំពិកដែលស្ថិតក្រោមការគ្រប់គ្រងរបស់ក្រសួងអប់រំ យុវជន និងកីឡា ត្រូវបានកែលំអមុខមាត់ថ្មីសម្រាប់រៀបចំការប្រកួតបាល់ទាត់ក្នុងព្រឹត្តិការណ៍កីឡាស៊ីហ្គេម លើកទី៣២ ដែលកម្ពុជាធ្វើជាម្ចាស់ផ្ទះ។ ស្មៅធម្មជាតិត្រូវបានដាំថ្មី និងដាក់កៅអីជ័រប្រមាណ៣ម៉ឺនសម្រាប់អ្នកគាំទ្រអង្គុយកាន់តែងាយស្រួល។

បឹងកេត រៀបចំការប្រកួតក្នុងផ្ទះរបស់ខ្លួនចុងក្រោយបំផុតកាលពីថ្ងៃទី៨ ខែមេសា កន្លងទៅនេះជាមួយក្រុមកោះកុង ហើយជាលទ្ធផលបានត្រឹមស្មើគ្នា ១-១ នៅពហុកីឡដ្ឋានជាតិនៅបឹងស្នោរដែលពេលនេះត្រូវបានរំលាយចោលទាំងស្រុងហើយ។

កាលពីថ្ងៃទី៨ ខែមេសានោះ លោកស្រី ពុធ ធីតា បាននិយាយលាទាំងទឹកភ្នែកថា កីឡដ្ឋាននេះបានកើតចេញជារូបរាងឡើងដោយដៃទាំងទ្វេ និងកិច្ចខិតខំប្រឹងប្រែងរបស់ក្រុមការងារទាំងមូល។

«សូមចាំទុកថា ខ្ញុំនឹងមិនឲ្យបាត់ឈ្មោះបឹងកេតទេ។ បើអត់ពីខ្ញុំ ក៏មានអ្នកផ្សេងបន្តទៀតដែរ»។ ម្ចាស់ក្លិបបឹងកេតបានសន្យាចំពោះមុខអ្នកគាំទ្រនៅថ្ងៃចុងក្រោយនៃកីឡដ្ឋានឯបឹងស្នោរ។

កីឡដ្ឋានរបស់បឹងកេតមានអាយុកាល៥ឆ្នាំ បន្ទាប់ពីត្រូវបានកសាងឡើង ប៉ុន្តែដោយសារដីជួលគេមានតម្លៃខ្ពស់ ដូច្នេះក្លិបមិនអាចទប់ទល់នឹងថ្លៃជួលបន្តទៅទៀតបានទេ ខណៈស្ថានភាពសេដ្ឋកិច្ចមិនសូវល្អប្រសើរ៕