កីឡា

បញ្ជីជម្រើសជាតិត្រៀមជម្រុះ World Cup មិនសូវប្លែកកាលប្រកួតមិត្តភាព

បានផុស

១ ខែ មុន

នៅ

ថ្ងៃចន្ទ ២ តុលា ២០២៣

ដោយ

សហព័ន្ធកីឡាបាល់ទាត់កម្ពុជាបានចេញបញ្ជីឈ្មោះជម្រើសជាតិកម្ពុជាដើម្បីប្រកួតជម្រុះជើងឯកពិភពលោក FIFA World Cup 2026 ជាមួយជម្រើសជាតិប៉ាគីស្ថាននាពេលខាងមុខ។

កីឡាករដែលមានឈ្មោះក្នុងបញ្ជីទាំង២៧នាក់នេះគឺមិនសូវប្លែក នឹងបញ្ជីឈ្មោះដែលបានប្រកួតមិត្តភាពអន្តរជាតិជាមួយហុងកុង និងម៉ាកាវទេ ខណៈកីឡាករមួយចំនួនដែលអ្នកគាំទ្រមើលឃើញថា គួរជាប់តែមិនជាប់ ហើយកីឡាករមួយចំនួនដែលមិនសូវបានលេងក្នុងលីគបែរជាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ ឃាន់ សុប៉ិន សូវបានលេងឲ្យបឹងកេតទេ។ ចន្ថា ចន្ទាកា បានលេងឲ្យបឹងកេតតែចុងម៉ោងភាគច្រើន ហើយ ចាន់ វឌ្ឍនាកា ក៏មិនសូវបានលេងពេញដែរនៅលីគ។ ជាមួយគ្នានេះ រ៉ឹង ប៊ុនហៀង មិនបានលេងសោះឲ្យវិសាខាក្នុងការប្រកួតលីគ ប៉ុន្តែកីឡាករទាំង៤នេះជាប់ទៀត។

កីឡាករមួយចំនួនដែលអ្នកគាំទ្រគិតថា គួរជាប់ដូចជា ខ្សែប្រយុទ្ធ ប្រាក់ មុន្នីឧត្តម របស់ព្រះខ័នរាជស្វាយរៀង អ្នកចាំទី អ៊ុំ វិចិត្រ ខ្សែការពារ សឿត បារាំង និង ផាច សុជាវីឡា របស់ភ្នំពេញក្រោន ប៉ុន្តែពួកគេមិនបានជាប់ទៅវិញ។ យ៉ាងណា ខ្សែបម្រើ សុះ ស៊ូហាណា និងខ្សែការពារ ទេស សម្បត្តិ បានជាប់ជាថ្មី។

កីឡាករទាំង២៧នាក់រួមមាន វិសាខា ជាប់៩នាក់ បឹងកេត ជាប់៦នាក់ ភ្នំពេញក្រោន ជាប់៤នាក់ ណាហ្គាវើលដ៍ ជាប់៣នាក់ ព្រះខ័នរាជស្វាយរៀង ជាប់៣នាក់ ព្រៃវែង ជាប់១នាក់ និង សៀង ចន្ធា មកពីក្លិប កាតារ Al Shahaniya FC។

កម្ពុជានឹងបើកទ្វារពហុកីឡដ្ឋានជាតិអូឡាំពិកទទួលប៉ាគីស្ថាន ថ្ងៃទី១២ ខែតុលានេះសម្រាប់ជើងទី១ និងជើងទី២ ថ្ងៃទី១៧ ខែតុលា នៅទឹកដីប៉ាគីស្ថាន សម្រាប់វគ្គជម្រុះ FIFA World Cup 2026 ជុំទី១៕