កីឡា

សេដ្ឋីបាល់បោះ LeBron អាយុ៣៩ឆ្នាំជាប់ឈ្មោះទៅកីឡាអូឡាំពិកលើកទី៤

បានផុស

១ year មុន

នៅ

ថ្ងៃអង្គារ ៩ កក្កដា ២០២៤

ដោយ

កីឡាករបាល់បោះ Lebron James ដែលមានទ្រព្យសម្បត្តិច្រើនជាងគេបំផុតបានជាប់ឈ្មោះក្នុងបញ្ជីក្រុមបាល់បោះជម្រើសជាតិអាមេរិកលើកទី៤ដើម្បីចូលរួមប្រកួតកីឡាអូឡាំពិក ឆ្នាំ២០២៤ នៅទីក្រុងបារីស ប្រទេសបារាំង។

លោក Lebron James បានជាប់ឈ្មោះក្នុងក្រុមជម្រើសជាតិអាមេរិកលើកទី១ក្នុងការប្រកួតកីឡាអូឡាំពិកកាលពីឆ្នាំ២០០៤ នៅប្រទេសក្រិក។ កាលណោះលោកមិនសូវទទួលឱកាសលេងច្រើនទេ ខណៈក្រុមបាល់បោះអាមេរិកទទួលបានត្រឹមមេដាយសំរិទ្ធ។

រយៈពេល៤ឆ្នាំបន្ទាប់ Lebron James បានឱកាសចូលរួមជាមួយជម្រើសជាតិសម្រាប់ព្រឹត្តិការណ៍កីឡាស៊ីហ្គេម ជាលើកទី២ នៅឆ្នាំ២០០៨ នៅប្រទេសចិន។ លោកបានបង្ហាញខ្លួនលើទីលានច្រើនបំផុត និងបានជួយអាមេរិកឈ្នះមេដាយមាស។

លើកទី៣ ព្រឹត្តិការណ៍អូឡាំពិក ឆ្នាំ២០១២ នៅប្រទេសអង់គ្លេស Lebron James ជាអ្នកដឹកនាំដែលបានជួយឲ្យអាមេរិកឈ្នះមេដាយមាស និងជាមេដាយមាសលើកទី២សម្រាប់លោក។ ដូច្នេះលោកបានឈ្នះមេដាយមាសអូឡាំពិក២ដង និងសំរិទ្ធ១ដងក្នុងរយៈពេល១២ឆ្នាំចុងក្រោយនេះ។

កីឡាអូឡាំពិកឆ្នាំ២០២៤ឈានមកដល់ លោក Lebron James ដែលមានទ្រព្យសម្បត្តិ១.២ពាន់លានដុល្លារ បានឈានដល់វ័យ៣៩ឆ្នាំនៅតែទទួលបានការជឿទុកចិត្តពីគ្រូបង្វឹកដោយបានជ្រើសរើសជាប់ជម្រើសជាតិជាលើកទី៤ ដែលបានក្លាយជាកីឡាករបាល់បោះអាមេរិកអាយុច្រើនជាងគេបំផុតក្នុងព្រឹត្តិការណ៍អូឡាំពិក។

អាមេរិកជាអធិរាជបាល់បោះនៅលើពិភពលោកទទួលបានជោគជ័យជាងគេបំផុតក្នុងការប្រកួតលើឆាកអន្តរជាតិ។ បើនិយាយតែក្នុងកីឡាអូឡាំពិក ក្រុមបាល់បោះអាមេរិកធ្លាប់ចូលរួមប្រកួតចំនួន១៩ដង ហើយគ្មានលើកណាមួយដែលពួកគេមិនទទួលបានមេដាយទេ។ ពួកគេធ្លាប់បានឈ្នះមេដាយមាសអូឡាំពិក១៦ដង មេដាយប្រាក់១ដង និងមេដាយសំរិទ្ធ២ដង គិតចាប់តាំងពីធ្លាប់ចូលរួមតាំងពីឆ្នាំ១៩៣៦។

ខាងក្រោមជាបញ្ជីឈ្មោះកីឡាករទាំង១២រូប ស្ថិតក្រោមការដឹកនាំរបស់គ្រូបង្វឹកលោក Steve Kerr អមដោយគ្រូជំនួយ៣រូបផ្សេងទៀត។

លេខ៤៖ Stephen Curry អាយុ៣៦ឆ្នាំ កម្ពស់១.៨៨ម៉ែត្រ មកពីក្លិប Golden State Warriors
លេខ៥៖ Anthony Edwards អាយុ២២ឆ្នាំ កម្ពស់១.៩៣ម៉ែត្រ មកពីក្លិប Minnesota Timbewolves
លេខ៦៖ Lebron James អាយុ៣៩ឆ្នាំ កម្ពស់២.០២ម៉ែត្រ មកពីក្លិប Los Angeles Laker
លេខ៧៖ Kevin Durant អាយុ៣៥ឆ្នាំ កម្ពស់២.១១ម៉ែត្រ មកពីក្លិប Phoenix Suns
លេខ៨៖ Kawhi Leonard អាយុ៣៣ឆ្នាំ កម្ពស់២.០១ម៉ែត្រ មកពីក្លិប LA Clippers
លេខ៩៖ Tyrese Haliburton អាយុ២៤ឆ្នាំ កម្ពស់១.៩៦ម៉ែត្រ មកពីក្លិប Indiana Pacers
លេខ១០៖ Jayson Tatum អាយុ២៦ឆ្នាំ កម្ពស់២.០៣ម៉ែត្រ មកពីក្លិប Boston Celtics
លេខ១១៖ Joel Embiid អាយុ៣០ឆ្នាំ កម្ពស់២.១៣ម៉ែត្រ មកពីក្លិប Philadelphia 76ers
លេខ១២៖ Jrue Holiday អាយុ៣៤ឆ្នាំ កម្ពស់១.៩៣ម៉ែត្រ មកពីក្លិប Boston Celtics
លេខ១៣៖ Bam Adebayo អាយុ២៦ឆ្នាំ កម្ពស់២.០៦ម៉ែត្រ មកពីក្លិប Miamii Heat
លេខ១៤៖ Anthony Davis អាយុ៣១ឆ្នាំ កម្ពស់២.០៨ម៉ែត្រ មកពីក្លិប Los Angeles Lakers
លេខ១៥៖ Davin Booker អាយុ២៧ឆ្នាំ កម្ពស់១.៩៨ម៉ែត្រ មកពីក្លិប Phoenix Suns