កីឡា

សិស្សជាង ២០០នាក់ ចូលរួមក្នុងវេទិកាកីឡាសម្រាប់ទាំងអស់គ្នា នៅកែប

បានផុស

៥ ខែ មុន

នៅ

ថ្ងៃព្រហស្បតិ៍ ២៧ វិច្ឆិកា ២០២៥

ដោយ

គណៈកម្មាធិការជាតិអូឡាំពិកកម្ពុជា បានរៀបចំ«វេទិកាកីឡាសម្រាប់ទាំងអស់គ្នា» នៅខេត្តកែប រយៈពេល ២ ថ្ងៃដើម្បីបញ្ជ្រាបការផ្សព្វផ្សាយពីគុណតម្លៃអូឡាំពិកដែលមានសិស្សានុសិស្សជាង ២០០នាក់បានចូលរួមសិក្សាស្វែងយល់។

វេទិកានេះមានលោក ប៊ុយ សុភ័ណ្ឌ ទីប្រឹក្សានៃគណៈកម្មាធិការជាតិអូឡាំពិកម្ពុជាជា វាគ្មិន ដោយសហការរៀបចំជាមួយមន្ទីរអប់រំកាយ និងកីឡាខេត្តកែប។ លោកទីប្រឹក្សាបានឲ្យដឹងថា វេទិកានេះបង្ហាញពីគុណតម្លៃអូឡាំពិក ទស្សនវិជ្ជាអូឡាំពិក ការវិវត្តកីឡាអូឡាំពិកសម័យបុរាណរហូតដល់អូឡាំពិកសម័យទំនើប។ ជាមួយគ្នានេះ ក៏មានការផ្សព្វផ្សាយពីពាក្យស្លោករបស់រាជរដ្ឋាភិបាលដែលបានចែងពី យុវជនម្នាក់ លេងកីឡាមួយប្រភេទប្រចាំជីវិត។

តំណាងគណៈកម្មាធិការជាតិអូឡាំពិកកម្ពុជារូបនេះបានបន្តថា សម្រាប់ថ្ងៃទី១ពោលគឺនៅថ្ងៃទី២៧ ខែវិច្ឆិកា គឺការបង្រៀន និងធ្វើបទបង្ហាញពីខ្លឹមសារ ខណៈថ្ងៃទី២ គឺថ្ងៃសុក្រ ទី២៨ ខែវិច្ឆិកា នឹងមានសកម្មភាពកីឡាជាក់ស្តែងនៅកីឡដ្ឋានខេត្តកែប។ សិស្សានុសិស្សទាំងអស់នឹងចូលរួមលេងសកម្មភាពកីឡាជាច្រើនមានដូចជា កីឡាបាល់ទាត់ កីឡាបាល់ទះ កីឡាវាយសី និងកីឡាទាញព្រ័ត្រជាដើម។

លោក ប៊ុយ សុភ័ណ្ឌ បានបញ្ជាក់ថា ៖«សម្រាប់កីឡាដើម្បីទាំងអស់គ្នានេះ គឺសំដៅទៅលើសកម្មភាពអប់រំកាយ សកម្មភាពហាត់ប្រាណ ឬសកម្មភាពហ្វឹកហាត់កីឡា ដើម្បីផ្សព្វផ្សាយឲ្យមហាជនយល់ដឹង ចូលរួមលេងកីឡាទាំងអស់គ្នា។ យើងមិនផ្តោតទៅលើកីឡាជំនាញសម្រាប់ការប្រកួតទេ ប៉ុន្តែផ្តោតឲ្យប្រជាជន យុវជនចូលរួមសកម្មភាពកីឡា ស្របតាមគោលការណ៍កីឡារបស់អូឡាំពិកពិភពលោកគឺ ការកសាងពិភពលោកប្រកបដោយសន្តិភាព និងស្រស់បំព្រងតាមរយៈកីឡា»។

នេះមិនមែនជាលើកទី១ទេដែល គណៈកម្មាធិការជាតិអូឡាំពិកកម្ពុជា បានរៀបចំ វេទិកាកីឡាសម្រាប់ទាំងអស់ដែលស្ថិតក្រោមគម្រោងសាមគ្គីអូឡាំពិក។ វេទិកានេះតែងរៀបចំឡើងជារៀងរាល់ឆ្នាំដែលបានដំណើរការជាច្រើនឆ្នាំមកហើយទាំងនៅរាជធានីភ្នំពេញ និងតាមបណ្តាខេត្តនានា៕