កីឡា

ឡៅ ចិត្រា ទទួលស្គាល់សមត្ថភាពខ្លួនធ្លាក់ចុះជាងមុន

បានផុស

៨ ខែ មុន

នៅ

ថ្ងៃចន្ទ ៩ កញ្ញា ២០២៤

ដោយ

ម្ចាស់មេដាយមាសកីឡាស៊ីហ្គេម ឡៅ ចិត្រា បានទទួលស្គាល់សមត្ថភាពរបស់ខ្លួនធ្លាក់ចុះច្រើន បើប្រៀបធៀបនឹងពេលមុនដែលមានទម្ងន់ស្រាល ប៉ុន្តែរូបគេប្តេជ្ញាព្យាយាមធ្វើឲ្យអ្វីៗល្អប្រសើរឡើងវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មួយរយៈពេលចុងក្រោយនេះ ឡៅ ចិត្រា មិនសូវបានហ្វឹកហាត់ដិនដល់ទេ ដោយសារមានបញ្ហាសុខភាព ដូច្នេះបានធ្វើឲ្យទម្ងន់កើនឡើងច្រើនជាងមុន។ ស្របពេលទម្ងន់កើនឡើង ហើយការហ្វឹកហាត់មិនសូវដិតដល់បានធ្វើឲ្យអាវុធរបស់ខ្លួនមិនសូវមានទម្ងន់ និងយឹតជាងមុន។

ឡៅ ចិត្រា បាននិយាយថា ៖«មួយរយៈពេលចុងក្រោយនេះ ខ្ញុំមានបញ្ហាសុខភាព អីចឹងគីឡូចេះតែឡើង ហើយខ្ញុំអត់សូវបានហ្វឹកហាត់ទេ។ សមត្ថភាពរបស់ខ្ញុំឥឡូវនេះអត់ដូចពីមុនទេ កម្មវិធីធំគេយកតែកីឡាករល្អៗ អីចឹងខ្ញុំអត់តូចចិត្តទេដែលមិនទទួលបានឱកាសប្រកួតកម្មវិធីធំ»។

«សមត្ថភាពរបស់ខ្ញុំឥឡូវនេះអត់ដូចមុនទេ។ កាលពីមុនវ៉ៃចេញលឿន វ៉ៃចេញញាប់ តែឥឡូវយឹត ចេញបានមួយៗ។ ខ្ញុំគិតថា ត្រូវការហ្វឹកហាត់ពីរទៅបីខែទៀត ទម្ងន់អាវុធរបស់ខ្ញុំអាចប្រសើរឡើងវិញ។ មិនអាចបាន១០០% តែក៏បាន៧០ទៅ៨០%ដែរ ដូចជាទម្ងន់ជើងទាត់ និងកណ្តាប់ដៃ»។ ឡៅ ចិត្រា បានបន្ថែម។

កាលពីថ្ងៃសៅរ៍ ទី៧ ខែសីហា ឆ្នាំ២០២៤ ឡៅ ចិត្រា បានប្រកួតក្នុងទម្ងន់៦៧គីឡូក្រាមដោយបានផ្តួលកីឡាករអ៉ីរ៉ង់ក្នុងទឹកទី៣។ កាលពីមុនរូបគេភាគច្រើនប្រកួតក្នុងទម្ងន់៦៥គីឡូក្រាម៕

អត្ថបទ៖ វីរបុត្រ