លោក ម៉ែន អេង បានទទួលស្វាគមន៍យ៉ាងកក់ក្តៅចំពោះវត្តមានរបស់ លោក គីម ឆាងយ៉ូង និង គណៈប្រតិភូស្ថានទូតកូរ៉េ។ បន្ទាប់មក ភាគីទាំងពីរ បានបន្តចូលរួមក្នុងកិច្ចប្រជុំពិភាក្សាការងារយ៉ាងយកចិត្តទុកដាក់នៅច្រកទ្វារព្រំដែនអន្តរជាតិបាវិត ដើម្បីស្វែងយល់បន្ថែមអំពីស្ថានភាពសន្តិសុខ ការគ្រប់គ្រងលំហូរឆ្លងដែន និង កិច្ចសហប្រតិបត្តិការនានា។

នៅក្នុងដំណើរចុះពិនិត្យជាក់ស្តែង លោកអភិបាលរងខេត្ត និង លោកឯកអគ្គរដ្ឋទូត រួមជាមួយកងកម្លាំងមានសមត្ថកិច្ច បានអញ្ជើញទៅពិនិត្យមើលអគារ និង ទីតាំងមួយចំនួនដែលធ្លាប់រងការបង្ក្រាបពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យា (Online Scams) ក្នុងក្រុងបាវិត។ ការចុះពិនិត្យនេះ ដើម្បីបង្ហាញពីភាពម៉ឺងម៉ាត់ និង កិច្ចខិតខំប្រឹងប្រែងរបស់អាជ្ញាធរមានសមត្ថកិច្ចកម្ពុជា ក៏ដូចជាខេត្តស្វាយរៀង ក្នុងការលុបបំបាត់រាល់បទល្មើសបច្ចេកវិទ្យាឆ្លងដែនខុសច្បាប់ ធានាសន្តិសុខ សណ្តាប់ធ្នាប់សង្គម និង ការពារសុវត្ថិភាពជូនដល់ជនបរទេសដែលមកវិនិយោគ និង ស្នាក់នៅក្នុងប្រទេសកម្ពុជា។

ជាទីបញ្ចប់ នៃដំណើរទស្សនកិច្ចនេះ លោក ម៉ែន អេង និង លោក គីម ឆាងយ៉ូង ព្រមទាំងគណៈប្រតិភូ និង មន្ត្រីជំនាញពាក់ព័ន្ធទាំងអស់ បានអញ្ជើញទៅពិនិត្យច្រកព្រំដែនអន្តរជាតិបាវិត និង ថតរូបនៅបង្គោលព្រំដែន ដើម្បីទុកជាអនុស្សាវរីយ៍ និង បង្ហាញពីចំណងមិត្តភាព កិច្ចសហប្រតិបត្តិការដ៏ល្អប្រពៃរវាងប្រទេសទាំងពីរផងដែរ៕
អត្ថបទ ៖ ភក្ដី

The post អភិបាលរងខេត្តស្វាយរៀង ដឹកនាំ ទូតកូរ៉េ ពិនិត្យទីតាំងបង្ក្រាប Online Scams និង ច្រកព្រំដែនអន្តរជាតិបាវិត appeared first on Kampuchea Thmey Daily.

ការស្នើនេះក្នុងឱកាស លោក ប៉េង ពោធិ៍សា អភិបាលខេត្តស្វាយរៀង បានអនុញ្ញាតឲ្យ លោក គីម ឆាងយ៉ូង ឯកអគ្គរដ្ឋទូតសាធារណរដ្ឋកូរ៉េ ប្រចាំព្រះរាជាណាចក្រកម្ពុជា ចូលជួបសម្តែងការគួរសម និង ពិភាក្សាការងារ នៅសាលប្រជុំសាលាខេត្ត នាថ្ងៃទី ១៦ ខែមិថុនា ឆ្នាំ ២០២៦ នេះ។

ជំនួបនេះ មានការអញ្ជើញចូលរួមពីប្រតិភូអមដំណើរ លោកឯកអគ្គរដ្ឋទូតស្ថានទូតកូរ៉េប្រចាំកម្ពុជា លោកអភិបាលរងខេត្ត លោកស្រីនាយករងរដ្ឋបាលសាលាខេត្ត លោកស្នងការ ស្នងការរងនគរបាលខេត្ត លោកមេបញ្ជាការរងកងរាជអាវុធហត្ថខេត្ត លោកអនុប្រធានមន្ទីរការងារ និង បណ្តុះបណ្តាលវិជ្ជាជីវៈខេត្ត លោកអភិបាលក្រុងបាវិត លោកប្រធានទីស្នាក់ការត្រួតពិនិត្យច្រកទ្វាព្រំដែនអន្តរជាតិបាវិត ព្រមទាំងមន្ត្រីពាក់ព័ន្ធមួយចំនួនទៀត។

មានប្រសាសន៍ទៅកាន់ លោក គីម ឆាងយ៉ូង , លោកអភិបាលខេត្ត បានជម្រាបជូនអំពីទីតាំងភូមិសាស្ត្រ និង សក្តានុពលសំខាន់ៗ ដែលរដ្ឋបាលខេត្តសម្រេចបាន ព្រមទាំងបានសម្តែងនូវការស្វាគមន៍ និង ថ្លែងអំណរគុណចំពោះដំណើរបំពេញទស្សនកិច្ចនៅខេត្តស្វាយរៀង នាឱកាសនេះ ដើម្បីបន្តពង្រឹងកិច្ចសហប្រតិបត្តិការការងាររវាងខេត្តស្វាយរៀង និង ប្រទេសកូរ៉េ។ ក្នុងនោះ លោកអភិបាលខេត្ត បានជម្រាបជូនអំពីកិច្ចការងារក្នុងការអនុវត្តនូវបទបញ្ជារបស់ប្រមុខរាជរដ្ឋាភិបាលកម្ពុជាក្នុងការចូលរួមសហការបង្ក្រាបបទល្មើស Online Scams នៅតាមទីតាំង និង មូលដ្ឋាននានា ឲ្យដល់ឫសគល់ នៅក្នុងខេត្តផងដែរ។

លោកអភិបាលខេត្តស្វាយរៀង ក៏បានស្នើដល់ លោកឯកអគ្គរដ្ឋទូតកូរ៉េ លើការពង្រឹងពង្រីកភាពជាដៃគូវិនិយោគមកពីប្រទេសកូរ៉េបន្ថែមទៀត មកបណ្តាក់ទុនវិនិយោគនៅលើទឹកដីខេត្តស្វាយរៀង ដើម្បីចូលរួមលើកកម្ពស់ជីវភាព ក៏ដូចជាផ្តល់ឱកាសការងារជូនដល់ប្រជាពលរដ្ឋកម្ពុជា។ ក្នុងនោះ កន្លងមក អង្គការដៃគូនានា មកពីកូរ៉េ ក៏បាននាំមកនូវជំនួយផ្សេងៗ ជួយដល់ខេត្តស្វាយរៀង ជាបន្តបន្ទាប់ថែមទៀតផង។

ក្នុងនាមរដ្ឋបាលខេត្ត លោកតែងតែយកចិត្តទុកដាក់ក្នុងការការពារថែរក្សាសន្តិសុខ សុវត្ថិភាព ជូនដល់ដៃគូវិនិយោគទាំងអស់ដែលមានវត្តមាននៅខេត្តស្វាយរៀងផងដែរ៕
អត្ថបទ ៖ ភក្ដី

The post អភិបាលខេត្តស្វាយរៀង ស្នើ ទូតកូរ៉េ ជំរុញអ្នកវិនិយោគមកបណ្តាក់ទុនបន្ថែម ដើម្បីបង្កើតការងារ និង លើកកម្ពស់ជីវភាពពលរដ្ឋកម្ពុជា appeared first on Kampuchea Thmey Daily.

នាឱកាសនោះ លោករដ្ឋមន្ត្រី បានថ្លែងអំណរគុណយ៉ាងជ្រាលជ្រៅ និង វាយតម្លៃខ្ពស់ចំពោះមិត្តភាព និង ភាពជាដៃគូដ៏យូរអង្វែងរវាងប្រទេសកម្ពុជា និង សាធារណរដ្ឋកូរ៉េ ដែលបន្តរីកចម្រើនដោយផ្អែកលើការជឿទុកចិត្តគ្នា ការគោរពគ្នា និង ការប្តេជ្ញាចិត្តរួមគ្នាក្នុងការជំរុញវិបុលភាព និង ការអភិវឌ្ឍប្រកបដោយចីរភាព។ ភាពជាដៃគូនេះ នាំមកនូវការអភិវឌ្ឍ និង ផលជះវិជ្ជមានដល់វិស័យការងារនៅកម្ពុជា តាមរយៈការគាំទ្របច្ចេកទេសដល់បេឡាជាតិសន្តិសុខសង្គម (ប.ស.ស) ដែលបានរួមចំណែកដល់ការពង្រឹងក្របខណ្ឌគាំពារសង្គមរបស់កម្ពុជា និង ការពង្រីកវិសាលភាព នៃរបបសន្តិសុខសង្គមសម្រាប់កម្មករ-និយោជិត។ កិច្ចប្រឹងប្រែងទាំងនេះ កំពុងជួយឲ្យកម្ពុជាខិតកាន់តែជិតទៅរកចក្ខុវិស័យ នៃប្រព័ន្ធគាំពារសង្គមប្រកបដោយបរិយាបន្ន ភាពធន់ និង គោលការណ៍ «មិនទុកអ្នកណាម្នាក់ចោល» (Leaves No One Behind)។

ទន្ទឹមនឹងនេះ លោកក៏បានលើកឡើងពីវឌ្ឍនភាព នៃភាពជាដៃគូលើផ្នែកសុវត្ថិភាព និង សុខភាពការងារ តាមរយៈគំនិតផ្តួចផ្តើមអភិវឌ្ឍន៍សមត្ថភាព និង ការពង្រឹងកិច្ចសន្ទនាសង្គម ក៏ដូចជាការដោះស្រាយវិវាទការងារ និង ការអធិការកិច្ចការងារ តាមរយៈគំនិតផ្តួចផ្តើមកាតាលីករសកល (GA) ស្ដីពីការងារសមរម្យ និង ការគាំពារសង្គមសម្រាប់អន្តរកាលយុត្តិធម៌ ដែលបានក្លាយជាសសរស្តម្ភដ៏សំខាន់ នៃកិច្ចសហប្រតិបត្តិការរវាងភាគីទាំងពីរនាប៉ុន្មានឆ្នាំចុងក្រោយនេះ។

លោក ហេង សួរ សង្កត់ធ្ងន់ថា កម្ពុជា នៅតែបន្តប្តេជ្ញាចិត្តយ៉ាងមុតមាំក្នុងការពង្រឹង និង ពង្រីកភាពជាដៃគូដ៏មានតម្លៃនេះ ដោយ លោករដ្ឋមន្រ្តី បានបង្ហាញការជឿជាក់ថា កិច្ចសហប្រតិបត្តិការអន្តរជាតិ និង ការរៀនសូត្រពីគ្នា គឺជាកត្តាដ៏ចាំបាច់មិនអាចខ្វះបានសម្រាប់ការឆ្លើយតបទៅនឹងបញ្ហាប្រឈម និង កាលានុវត្តភាពដែលកំពុងវិវត្តនៅក្នុងពិភពការងារ។

តំណាងអង្គការ ILO និង សាធារណរដ្ឋកូរ៉េ បានវាយតម្លៃខ្ពស់ចំពោះការចូលរួមយ៉ាងសកម្មរបស់កម្ពុជា ក្នុងកម្មវិធីភាពជាដៃគូ ILO-កូរ៉េ និង ស្វាគមន៍ចំពោះសមិទ្ធផលដែលសម្រេចបាននៅកម្ពុជា ជាពិសេសលើផ្នែកសន្តិសុខសង្គម , សុវត្ថិភាព និង សុខភាពការងារ , កិច្ចសន្ទនាសង្គម និង ការពង្រឹងស្ថាប័នការងារ៕

The post កម្ពុជា-កូរ៉េ បន្តពង្រឹងភាពជាដៃគូជាមួយ ILO ដើម្បីលើកកម្ពស់ការងារសមរម្យ និង សន្តិសុខសង្គម appeared first on Kampuchea Thmey Daily.

អនុស្សរណៈយោគយល់គ្នា​ (MoU) នេះ ធ្វើឡើងនាថ្ងៃទី២ ខែមិថុនា ឆ្នាំ២០២៦ ក្នុងគោលបំណងធានាថា ប្រជាពលរដ្ឋកម្ពុជា​ ដែលកំពុងរស់នៅប្រទេសកូរ៉េ​ អាចទទួលបានសេវាថែទាំសុខភាពដ៏ល្អ ក្នុងតម្លៃសមរម្យក្នុងប្រទេសកូរ៉េ និងជាយន្តការមួយសម្រាប់ស្ថាប័នទាំងពីរបន្តសហការធ្វើការរួមគ្នាក្នុងនាមជាអ្នកជិតខាង និងជាដៃគូដ៏ជិតស្និត ក្នុងបេសកកម្មមនុស្សធម៌ដើម្បីបំរើដល់ផលប្រយោជន៍របស់ប្រជាជនកម្ពុជាទាំងនៅក្នុងប្រទេសកម្ពុជា និងនៅប្រទេសកូរ៉េនេះ។

ថ្លែងក្នុងសុន្ទរកថាបើកកម្មវិធី លោកវេជ្ជបណ្ឌិត Suh You-Sung នាយកមន្ទីរពេទ្យ Soonchunhyang បានមានប្រសាសន៍ថា មន្ទីរពេទ្យ Soonchunhyang បានចាប់ផ្តើមបេសកកម្មរបស់ខ្លួនក្នុងប្រទេសកម្ពុជាតាំងពីឆ្នាំ ២០០២។ ក្នុងរយៈពេល ២៤ឆ្នាំកន្លងទៅនេះ មន្ទីរពេទ្យបានចូលរួមចំណែកយ៉ាងច្រើនក្នុងការកសាងនូវហេដ្ឋារចនាសម្ព័ន្ធសុខាភិបាលក្នុងប្រទេសកម្ពុជា រួមមានការកសាងមន្ទីរពេទ្យ ការបញ្ជូនក្រុមគ្រូពេទ្យស្ម័គ្រចិត្ត បណ្តុះបណ្តាលក្រុមគ្រូពេទ្យកម្ពុជា​ និងផ្តល់អាហារូបករណ៍ដល់និស្សិតកម្ពុជា ជាដើម។ លោកបន្តថា លោកនឹងខិតខំប្រឹងប្រែងបន្ថែមទៀតក្នុងការជួយដល់ប្រទេសកម្ពុជាលើវិស័យសុខាភិបាល ពិសេសការបណ្តុះធនធានមនុស្សដើម្បីជាទុនដ៏រឹងមាំក្នុងការកសាងហេដ្ឋារចនាសម្ព័ន្ធសុខាភិបាលក្នុងប្រទេសកម្ពុជា។

ចំណែក លោកឯកអគ្គរាជទូត បានថ្លែងអំណរគុណចំពោះក្រុមគ្រួសារមន្ទីរ Soonchunhyang ដែលជានិច្ចជាកាលតែងតែចូលរួមជាមួយស្ថានទូតក្នុងសកម្មភាពមនុស្សធម៌ជាច្រើន​ ទាំងនៅប្រទេសកម្ពុជា និងកូរ៉េ ដូចជា ឧបត្ថម្ភថ្នាំពេទ្យ និងសម្ភារៈប្រើប្រាស់ជូនដល់ជនភៀសសឹក មណ្ឌលកុមារកំព្រា និងមន្ទីរពេទ្យក្នុងប្រទេសកម្ពុជា និងផ្តល់ការពិនិត្យសុខភាពដោយឥតគិតថ្លៃជូនបងប្អូនប្រជាជនខ្មែរនៅកម្ពុជា​ ក៏ដូចជាតាមតំបន់នានាក្នុងប្រទេសកូរ៉េ ជាដើម។

លោក ឃួន ផុនរតនៈ ជឿជាក់ថា តាមរយៈការចុះ​MOU នេះ ស្ថាប័នទាំងពីរនឹងអាចបង្កើនកិច្ចសហការកាន់តែជិតស្និតបន្ថែមទៀត លើគម្រោងមនុស្សធម៌ផ្សេងទៀតនាពេលខាងមុខ សម្រាប់ជាប្រយោជន៍ដល់ប្រជាជនទាំងពីរប្រទេស៕

The post ទូតកម្ពុជាប្រចាំសាធារណរដ្ឋកូរ៉េ និងមន្ទីរពេទ្យមួយក្នុងទីក្រុងសេអ៊ូល ចុះMOU ដើម្បីពលរដ្ឋខ្មែរទទួលបានការថែទាំសុខភាពដ៏ល្អ appeared first on Kampuchea Thmey Daily.

ការលើកឡើងរបស់ លោក ឃួន ផុន រតនៈ បន្ទាប់ពីលោកទទួលជួបសម្តែងការគួរសម និងពិភាក្សាការងារជាមួយលោកស្រី JUNG Kyung Hee អ្នកគ្រប់គ្រងនៃវិទ្យាស្ថានស្រាវជ្រាវចំណីអាហារកូរ៉េ នៅស្ថានទូតកម្ពុជាក្នុងទីក្រុងសេអ៊ូល នាថ្ងៃទី០១ ខែមិថុនា ឆ្នាំ២០២៦។

តាមប្រភពដដែល ក្នុងជំនួប លោកស្រី JUNG Kyung Hee បានធ្វើបច្ចុប្បន្នជូនឯកអគ្គរាជទូតកម្ពុជា អំពីវឌ្ឍនភាពគម្រោងសហប្រតិបត្តិការរវាងវិទ្យាស្ថានស្រាវជ្រាវចំណីអាហារកូរ៉េ និងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍កម្ពុជា ដែលស្ថាប័នទាំងពីរបានអនុវត្តគម្រោងរួមគ្នាលើការពង្រឹងសមត្ថភាពមន្ត្រីរាជការ និងសហគ្រាសធុនតូច និងមធ្យមលើការកែច្នៃចំណីអាហារ តាំងពីឆ្នាំ ២០១៨ ហើយបានសាងសង់ និងសម្ពោធមជ្ឈមណ្ឌលកែច្នៃចំណីអាហារកម្ពុជា-កូរ៉េ TASK នៅកម្ពុជា កាលពីខែសីហា ឆ្នាំ២០២៥ កន្លងទៅ។ បន្ថែមពីនេះ លោកស្រីបានស្នើសុំស្ថានទូតបន្តផ្តល់កិច្ចសហការលើគម្រោងជាបន្តបន្ទាប់របស់វិទ្យាស្ថាន និងស្ថាប័នរដ្ឋ-ឯកជនរបស់កម្ពុជានាពេលខាងមុខបន្តទៀត។

ជាការឆ្លើយតប ឯកអគ្គរាជទូតបញ្ជាក់ថា៖ “ស្ថានទូតបានត្រៀមខ្លួនរួចជាស្រេចក្នុងការសហការលើគម្រោងនានារបស់វិទ្យាស្ថាននាពេលខាងមុខ”។

ក្រៅពីការបញ្ជាក់ពីជំហគាំទ្រ, លោក ឃួន ផុនរតនៈ ក៏បានថ្លែងអំណរគុណចំពោះវិទ្យាស្ថានដែលបានចូលរួមចំណែកក្នុងការជួយបណ្តុះបណ្តាលមន្ត្រីជំនាញ និងសហគ្រាសធុនតូច-មធ្យមរបស់កម្ពុជា។ លោកថា ការងារនេះ នឹងអាចជួយបង្កើនសមត្ថភាពផលិត និងលើកកម្ពស់ស្តង់ដារផលិតផលកម្ពុជា ឱ្យស្របតាមលក្ខខណ្ឌនាំចេញទៅបរទេស ពិសេសប្រទេសកូរ៉េតែម្តង៕

The post ឯកអគ្គរាជទូតកម្ពុជា គាំទ្រការបន្តអនុវត្តគម្រោងអភិវឌ្ឍន៍វិស័យកែច្នៃចំណីអាហារជាមួយកូរ៉េ appeared first on Kampuchea Thmey Daily.

លោក ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ នាថ្ងៃទី២៦ ខែឧសភា ឆ្នាំ២០២៦ បានទទួលជួបសម្តែងការគួរសម និងពិភាក្សាការងារជាមួយលោក Lee Mooncheol នាយកប្រតិបត្តិក្រុមហ៊ុន Aerobi Co., Ltd និងលោក Song Young-Ho គ្រូបង្វឹកកីឡាវាយសី នៅស្ថានទូតកម្ពុជា ក្នុងទីក្រុងសេអ៊ូល ក្រោមការសម្របសម្រួលរបស់លោក Kim Yun Tae នាយកសារមន្ទីរពហុវប្បធម៌កូរ៉េ។

នៅក្នុងជំនួបនេះ លោក Kim បានសម្តែងនូវសេចក្តីសោមន្សរីករាយដែលមានឱកាសអញ្ជើញមកស្ថានទូតសាជាថ្មី និងបានជម្រាបពីវឌ្ឍនភាពនៃការងារសហការក្នុងការស្វែងរកអ្នកវិនិយោគកូរ៉េ ដើម្បីទៅសិក្សាពីឱកាសវិនិយោគក្នុងប្រទេសកម្ពុជា ដែលជាលទ្ធផលលោកមានគម្រោងដឹកនាំក្រុមហ៊ុនចំនួន​៥​ ទៅកាន់ប្រទេសកម្ពុជា ជាជំហានដំបូង នៅខែមិថុនា ឆ្នាំ២០២៦ ខាងមុខនេះ។

ក្នុងអំឡុងពេលទស្សនកិច្ចរបស់ក្រុមអ្នកវិនិយោគកូរ៉េនៅកម្ពុជា លោក Kim បានសំណូមពរឱ្យស្ថានទូតជួយសម្របសម្រួលជំនួបជាមួយក្រសួង-ស្ថាប័ន និងក្រុមហ៊ុនជំនាញពាក់ព័ន្ធ ដើម្បីពិភាក្សាអំពីកិច្ចសហប្រតិបត្តិការ និងសិក្សាបន្ថែមពីឱកាសវិនិយោគជាមួយគ្នានាពេលអនាគត។

ជាការឆ្លើយតប លោក ឃួន ផុនរតនៈ បានជម្រាបជូនភាគីក្រុមហ៊ុនថា ស្ថានទូតនឹងជួយសម្របសម្រួលដំណើរទស្សនកិច្ចទៅកាន់ប្រទេសកម្ពុជា និងសំណើសុំជួបជាមួយភាគីពាក់ព័ន្ធកម្ពុជា​ និងបន្តគាំទ្រក្រុមហ៊ុនឱ្យទទួលបានផ្លែផ្កាក្នុងដំណើរទស្សនកិច្ចការងារនាពេលឆាប់ៗខាងមុខនេះ។

ជាមួយគ្នានេះ លោកអគ្គរាជទូត បានថ្លែងអំណរគុណ លោក Kim ដែលតែងតែសហការ សម្របសម្រួលការងារ និងណែនាំក្រុមហ៊ុនមួយចំនួនដើម្បីស្វែងយល់បន្ថែមពីឱកាសវិនិយោគក្នុងប្រទេសកម្ពុជានាពេលកន្លងមក៕

The post វិនិយោគិនកូរ៉េ ​៥ក្រុមហ៊ុន​ នឹងមកសិក្សាពីឱកាសវិនិយោគក្នុងប្រទេសកម្ពុជា នាខែមិថុនា ខាងមុខនេះ appeared first on Kampuchea Thmey Daily.

ក្នុងជំនួបនេះ ភាគីទាំងពីរបានផ្លាស់ប្តូរយោបល់អំពីស្ថានភាពទូទៅនៃការធ្វើដំណើរតាមអាកាសចរណ៍​ Sky Angkor Airlines ទៅមករបស់ប្រជាជនកម្ពុជា និងកូរ៉េ ព្រមទាំងបានពិភាក្សាអំពីការពង្រឹងកិច្ចសហប្រតិបត្តិការរវាងស្ថាប័នទាំងពីរក្នុងគោលដៅសម្រួលដល់ការធ្វើដំណើររបស់បងប្អូនប្រជាជនខ្មែរដែលតែងតែទុកចិត្ត និងប្រើប្រាស់សេវាកម្មរបស់ក្រុមហ៊ុន Sky Angkor និងបង្កើនចំនួនអ្នកទេសចរកូរ៉េទៅទស្សនាប្រទេសកម្ពុជា។

ឆ្លៀតក្នុងឱកាសនេះ លោកឯកអគ្គរាជទូតក៏បានជម្រាបលោក Kim អំពីគម្រោងរៀបចំព្រឹត្តិការណ៍ធំៗរបស់ស្ថានទូតក្នុងពេលខាងមុខ និងបានស្នើក្រុមហ៊ុនចូលរួមហ​សហការគាំទ្រផងដែរ។ ទន្ទឹមនឹងនេះ លោកបានជម្រាបលោក Kim ថាមានភ្ញៀវទេសចរកូរ៉េ និងបរទេសជាច្រើនមានបំណងទៅទស្សនាប្រាសាទអង្គរវត្តរបស់កម្ពុជា ដូច្នេះសង្ឃឹមថាក្រុមហ៊ុននឹងពិចារណាពិនិត្យលទ្ធភាពបើកជើងហោះហើរត្រង់ពីទីក្រុងសេអ៊ូល ទៅខេត្តសៀមរាប ដើម្បីសម្រួលដល់អ្នកទេសចរ​ ដែលមានបំណងធ្វើដំណើរកំសាន្តដោយផ្ទាល់ទៅកាន់ខេត្តសៀមរាប។

ជាការឆ្លើយតប​ លោក Kim បានមានប្រសាសន៍ថាក្រុមហ៊ុន​ Sky Angkor Airlines ក៏មានគម្រោងរៀបចំជើងហោះហើរត្រង់ទៅខេត្តសៀមរាបសម្រាប់រដូវរងារខាងមុខនេះផងដែរ៕

The post ក្រុមហ៊ុនអាកាសចរណ៍កូរ៉េមួយ មានគម្រោងរៀបចំជើងហោះហើរត្រង់ពីទីក្រុងសេអ៊ូល ទៅខេត្តសៀមរាប appeared first on Kampuchea Thmey Daily.

ការឯកភាពនេះ បន្ទាប់ពីនាយឧត្តមសេនីយ៍ ស ថេត អគ្គស្នងការនគរបាលជាតិ និង លោក YOO Jae Seong អគ្គស្នងការស្តីទីនគរបាលជាតិ បានបើកកិច្ចប្រជុំកំពូលនគរបាលជាតិកូរ៉េ-កម្ពុជា នៅទីក្រុងសេអ៊ូល នៃសាធារណៈរដ្ឋកូរ៉េ នាថ្ងៃទី២៩ ខែមេសា ឆ្នាំ ២០២៦ ដើម្បីពិភាក្សាអំពីវិធីសាស្ត្រយុទ្ធសាស្ត្រក្នុងការពង្រឹងកិច្ចសហប្រតិបត្តិការរវាងកងកម្លាំងនគរបាលនៃប្រទេសទាំងពីរឱ្យកាន់តែរឹងមាំបន្ថែមទៀត។

សេចក្តីប្រកាសព័ត៌មានស្តីពីលទ្ធផលផ្លែផ្កាជំនួប បានគូសបញ្ជាក់ថា ថ្នាក់ដឹកនាំនៃកងកម្លាំងនគរបាលជាតិនៃប្រទេសទាំងពីរ បានបង្ហាញនូវទស្សនៈរួមថា បណ្តាញឧក្រិដ្ឋកម្មឆ្លងដែន រួមទាំងក្រុមធ្វើប្រតិបត្តិការមជ្ឈមណ្ឌលឆបោកតាមប្រព័ន្ធបច្ចេកវិទ្យា គឺជាការគំរាមកំហែងយ៉ាងធ្ងន់ធ្ងរដល់ពិភពលោកដោយបានបញ្ជាក់នូវការប្តេជ្ញាចិត្តជាថ្មីថា កិច្ចសហប្រតិបត្តិការយ៉ាងជិតស្និទ្ធ និងសាមគ្គីភាពរបស់កងកម្លាំងនគរបាល គឺមានសារៈសំខាន់ខ្លាំងក្នុងការធានាសុវត្ថិភាពសម្រាប់ប្រជាពលរដ្ឋនៃប្រទេសទាំង២ និងការកសាងសន្តិសុខសាធារណៈក្នុងតំបន់។

ទន្ទឹមនឹងការវាយតម្លៃខ្ពស់ចំពោះសមិទ្ធផលដែលសម្រេចបានដោយក្រុមការងាររួមកម្ពុជា-កូរ៉េ សម្រាប់ពលរដ្ឋកូរ៉េ (CKJTFK) អគ្គស្នងការនគរបាលជាតិទាំងពីរបានព្រមព្រៀងគ្នាពង្រីកវិសាលភាពប្រតិបត្តិការរបស់ ក្រុមការងារ CKJTFK។ បន្ទាប់ពីថ្នាក់ដឹកនាំនៃកងកម្លាំងនគរបាលប្រទេសទាំងពីរបានព្រមព្រៀងគ្នាក្នុងការបង្កើតក្រុមការងាររួមនេះ នៅក្នុងកិច្ចប្រជុំកំពូល កាលពីខែតុលា ឆ្នាំ២០២៥ មន្ត្រីនគរបាលកូរ៉េបាននិងកំពុងធ្វើការរួមគ្នាជាមួយមន្ត្រីនគរបាលកម្ពុជា ដើម្បីប្រយុទ្ធប្រឆាំងនឹងការឆបោកតាមប្រព័ន្ធបច្ចេកវិទ្យា និងបទល្មើសពាក់ព័ន្ធផ្សេងទៀតប្រឆាំងនឹងពលរដ្ឋកូរ៉េ ចាប់តាំងពីខែធ្នូ ឆ្នាំ២០២៥កន្លងមក។

លទ្ធផលការងារលេចធ្លោរបស់ក្រុមការងារ CKJTFK បាននាំឱ្យមានការពង្រីកកិច្ចសហប្រតិបត្តិការរបស់ខ្លួនដែលជាមូលដ្ឋានគ្រឹះសម្រាប់ការការពារពលរដ្ឋកូរ៉េនៅកម្ពុជាក្នុងអំឡុងប្រតិបត្តិការយ៉ាងសកម្មរយៈពេល ៤ ខែ (ចាប់ពីខែធ្នូឆ្នាំ២០២៥ ដល់ខែមីនាឆ្នាំ២០២៦)។ ក្រុមការងារ CKJTFK ទទួលបានជោគជ័យក្នុងការចាប់ខ្លួនឧក្រិដ្ឋជនសំខាន់ៗ​សរុបចំនួន ១៦៦នាក់ រួមទាំងជនជាតិកូរ៉េ ដែលរត់គេចខ្លួនចូលមកសម្ងំនៅប្រទេសកម្ពុជា និងបានជួយសង្គ្រោះពលរដ្ឋកូរ៉េចំនួន ៥ រូប ពីការឃុំឃាំង ដែលបង្ហាញពីប្រសិទ្ធភាពនៃកិច្ចសហប្រតិបត្តិការនៃប្រទេសទាំងពីរក្នុងការការពារពលរដ្ឋកូរ៉េនៅកម្ពុជា។

ផ្អែកលើលទ្ធផលការងារលេចធ្លោទាំងនេះ ថ្នាក់ដឹកនាំនៃកងកម្លាំងនគរបាលនៃប្រទេសទាំងពីរ បានបញ្ជាក់ជាថ្មីនូវការប្តេជ្ញាចិត្តក្នុងការលុបបំបាត់បទល្មើសឆ្លងដែនតាមរយៈការឈានដល់កិច្ចព្រមព្រៀង ដើម្បីពង្រីកកិច្ចសហប្រតិបត្តិការរបស់ក្រុមការងារ CKJTFK ដែលបច្ចុប្បន្នមានកម្រិតត្រឹមតែបទល្មើសពាក់ព័ន្ធនឹងការឆបោកតាមប្រព័ន្ធបច្ចេកវិទ្យា ដោយដាក់រួមបញ្ចូលទាំងបទល្មើសគ្រឿងញៀន និងល្បែងស៊ីសងខុសច្បាប់។

ការពង្រីកកិច្ចសហប្រតិបត្តិការនេះ ត្រូវបានចាត់ទុកថាជាវិធានការបុរេសកម្ម នឹងជួយជំរុញដល់ការចែករំលែកព័ត៌មានតាមពេលវេលាជាក់ស្តែង និងប្រតិបត្តិការស៊ើបអង្កេតរួមគ្នា ស្របតាមច្បាប់និងបទប្បញ្ញត្តិនៃប្រទេសនីមួយៗ ដើម្បីឆ្លើយតបទៅនឹងបណ្តាញឧក្រិដ្ឋជនដែលកំពុងពង្រីកវិសាលភាពបង្កើតមជ្ឈមណ្ឌលយុទ្ធសាស្ត្ររបស់ពួកគេ នៅអាស៊ី អាគ្នេយ៍៕

The post នគរបាលជាតិកម្ពុជា-កូរ៉េ ព្រមព្រៀងគ្នាពង្រឹងកិច្ចសហប្រតិបត្តិការបង្ក្រាបបណ្តាញឧក្រិដ្ឋកម្មឆ្លងដែនបន្ថែមទៀត appeared first on Kampuchea Thmey Daily.