កម្ពុជា-ហុងគ្រី Archives - Kampuchea Thmey Daily

ប្រធានសភាថា ទំនាក់ទំនងកម្ពុជា-ហុងគ្រី ៧០ឆ្នាំមកនេះ នៅតែរឹងមាំបើទោះបីមានការផ្លាស់ប្ដូររដ្ឋាភិបាលក៏ដោយ

hun sirivadh — Wed, 27 May 2026 07:53:31 +0000

ប្រធានសភាកម្ពុជា សម្ដេចសភាធិបតី ឃួន សុដារី បានលើកឡើងពីទំនាក់ទំនងល្អរវាងកម្ពុជានិងហុងគ្រីទោះបីជាមានការផ្លាស់ប្ដូររបបដឹកនាំ ឬរដ្ឋាភិបាលយ៉ាងណាក្ដីក៏ទំនាក់ទំនងនេះនេះនៅតែរីកចម្រើនជាបន្តបន្ទាប់គ្មានប្រែប្រួល ឬល្អក់កករជាមួយគ្នាទេ។ នេះបើតាមការឱ្យដឹងពីនាយកខុទ្ទកាល័យ និងជាអ្នកនាំពាក្យប្រធានសភាលោក កែវ ពិសិដ្ឋ បន្ទាប់ពីសម្ដេចសភាធិបតីជួបឯកអគ្គរដ្ឋទូតហុងគ្រីប្រចាំកម្ពុជាដែលមាននិវាសដ្ឋាននៅហាណូយនៅព្រឹកថ្ងៃទី២៧ ខែឧសភា ឆ្នាំ២០២៦នេះ។

ប្រធានសភាកម្ពុជា សម្ដេចសភាធិបតី ឃួន សុដារី និងលោក ប័រ បាឡូកឌី ឯកអគ្គរដ្ឋទូតហុងគ្រី ថ្ងៃទី២៧ ខែឧសភា ឆ្នាំ២០២៦

លោក កែវ ពិសិដ្ឋ បានឱ្យអ្នកសារព័ត៌មានដឹងថាក្នុងជំនួបនោះសម្ដេចសភាធិបតី ឃួន សុដារី បានថ្លែងអំណរគុណដល់ប្រទេសហុងគ្រីដែលតែងតែគាំទ្រដល់កម្ពុជាតាំងពីទសវត្សឆ្នាំ៨០ និងជួយជាប្រចាំដល់ការអភិវឌ្ឍកម្ពុជារហូតមកដល់ពេលនេះ។

លោកថា៖ «រយៈពេលជាង៧០ឆ្នាំកន្លងមកនេះគឺទំនាក់ទំនងរវាងកម្ពុជានិងហុងគ្រីគឺមានការរីកចម្រើនជាលំដាប់បើទោះបីជាមានការផ្លាស់ប្ដូរនូវប្រព័ន្ធនយោបាយនារយៈពេលកន្លងមកក៏ដោយក៏ប៉ុន្តែទំនាក់ទំនងនៅតែរក្សាបាននូវភាពជិតស្និទ្ធជាប្រចាំ»។

គួរឱ្យដឹងផងដែរថាទំនាក់ទំនងរវាងកម្ពុជានិងហុងគ្រីបានចាប់ផ្ដើមនៅឆ្នាំ១៩៥៦។ គិតរហូតមកដល់ឆ្នាំ២០២៦ គឺប្រទេសទាំងពីរមានទំនាក់ទំនង៧០ឆ្នាំមកហើយ។

ក្នុងជំនួបជាមួយសម្ដេចប្រធានសភានៅព្រឹកថ្ងៃពុធនេះ ឯកអគ្គរដ្ឋទូតហុងគ្រីដែលចប់អាណត្តិលោក ប័រ បាឡូកឌី (Tibor Baloghdi) លើកឡើងថាបើទោះបីប្រទេសទាំងពីរមិនទាន់មាននិវេសនដ្ឋានទូតក្នុងប្រទេសរៀងខ្លួនក្ដីតែទំនាក់ទំនងរវាងកម្ពុជានិងហុងគ្រីនៅតែមានទំនាក់ទំនងជាលំដាប់។ លោកបានបន្ថែមថាលោកមានមោទនភាពដែលបានជួយឱ្យសភាកម្ពុជានិងហុងគ្រីមានទំនាក់ទំនងកម្រិតខ្ពស់ និងសង្ឃឹមថាឯកអគ្គរដ្ឋទូតថ្មីនឹងជំរុញទំនាក់ទំនងប្រទេសទាំងពីរឱ្យបានខ្លាំងក្លាបន្ថែមទៀត។

ប្រទេសហុងគ្រីបានឈានដល់របត់នយោបាយថ្មីបន្ទាប់ពីគណបក្ស Fidesz ដែលធ្លាប់គ្រប់គ្រងអំណាច១៦ឆ្នាំនៅហុងគ្រីបានចាញ់ការបោះឆ្នោតខែមេសា ឆ្នាំ២០២៦។ បច្ចុប្បន្ននេះប្រទេសហុងគ្រីបានដឹកនាំដោយគណបក្ស Tisza ដែលមានលោក Péter Magyar ជានាយករដ្ឋមន្ត្រី និងលោកស្រី Agnes Forsthoffer ជាប្រធានសភាថ្មី។

ក្នុងលិខិតកាលពីថ្ងៃទី១១ ខែឧសភា សម្ដេចសភាធិបតី ឃួន សុដារី បានអបអរសាទរជួនលោកស្រី Agnes Forsthoffer ក្នុងពេលដែលលោកស្រីកាន់តួនាទីប្រធានសភានៃប្រទេសជាមិត្តកម្ពុជានៅអឺរ៉ុបមួយនេះ និងមានជំនឿថាចំណងមិត្តភាព និងកិច្ចសហប្រតិបត្តិការរវាងកម្ពុជានិងហុងគ្រីនឹងបន្តពង្រឹងស៊ីជម្រៅបន្ថែមទៀត ដើម្បីជាប្រយោជន៍សម្រាប់ប្រជាជននៃប្រទេសទាំងពីរ៕

អត្ថបទដោយ ហ៊ុន សិរីវឌ្ឍន៍

The post ប្រធានសភាថា ទំនាក់ទំនងកម្ពុជា-ហុងគ្រី ៧០ឆ្នាំមកនេះ នៅតែរឹងមាំបើទោះបីមានការផ្លាស់ប្ដូររដ្ឋាភិបាលក៏ដោយ appeared first on Kampuchea Thmey Daily.

សម្ដេច ហ៊ុន សែន ថា កម្ពុជា និងហុងគ្រី នៅឆ្ងាយគ្នាពិត តែចំណងទាក់ទងមានភាពជិតស្និទ្ធ

Thoeun Vansong — Mon, 25 May 2026 06:28:49 +0000

ប្រមុខរដ្ឋស្ដីទីនៃកម្ពុជា សម្ដេចតេជោ ហ៊ុន សែន នាព្រឹកថ្ងៃទី២៥ ខែឧសភា ឆ្នាំ២០២៦នេះ បានទទួលជួបសម្ដែងការគួរសម និងជម្រាបលាពីលោក Tibor BALOGHDI ឯកអគ្គរដ្ឋទូតហុងគ្រីប្រចាំកម្ពុជា បន្ទាប់ពីចប់បេសកកម្មការទូតនៅកម្ពុជា។ ក្នុងជំនួបនោះ សម្ដេចតេជោ និងលោកឯកអគ្គរដ្ឋទូត បានគូសបញ្ជាក់ពីទំនាក់ទំនង និងកិច្ចសហប្រតិបត្តិការដ៏ល្អរវាងប្រទេសទាំងពីរ ខណៈឆ្នាំនេះជាខួប៧០ឆ្នាំនៃការបង្កើតចំណងការទូត។

លោក Tibor BALOGHDI បានលើកឡើងថា ទំនាក់ទំនងរវាងកម្ពុជានិងហុងគ្រី មានភាពរីកចម្រើនគួរឱ្យកត់សម្គាល់ ទាំងក្របខ័ណ្ឌស្ថាប័ននីតិប្រតិបត្តិ និងស្ថាប័ននីតិបញ្ញត្តិ។ តាមការកត់សម្គាល់របស់លោកឯកអគ្គរដ្ឋទូត កម្ពុជា-ហុងគ្រី ក៏មានការកើនឡើងទំហំពាណិជ្ជកម្ម ដោយលោកអះអាងថាកម្ពុជាបាននាំចូលទៅកាន់ប្រទេសហុងគ្រីមានការកើនឡើងក្នុងរយៈពេលចុងក្រោយនេះ។

ដោយក្នុងឆ្នាំ២០២៦នេះ ជាខួប៧០ឆ្នាំនៃទំនាក់ទំនងរវាងកម្ពុជា និងហុងគ្រី លោក ថា ប្រទេសទាំងពីរបានរួមគ្នាក្នុងការរៀបចំពិធីអបអរសាទរនៃខួប៧០ឆ្នាំនេះដើម្បីឱ្យទំនាក់ទំនងនេះកាន់តែល្អប្រសើរបន្ថែមទៀត។

បើតាមការឱ្យដឹងដោយលោក ជា ធីរិទ្ធ អ្នកនាំពាក្យព្រឹទ្ធសភា នៅក្នុងជំនួបនោះ សម្ដេចតេជោ បានកោតសរសើរចំពោះលោកឯកអគ្គរដ្ឋទូត ដែលបានបំពេញបេសកកម្មរយៈពេល៤ឆ្នាំមកនេះ បានធ្វើឱ្យទំនាក់ទំនងរវាងកម្ពុជា និងហុងគ្រីមានភាពរឹងមាំ។ សម្ដេចតេជោ បានលើកឡើងថា ទោះបីជាហុងគ្រី និងកម្ពុជា នៅឆ្ងាយពីគ្នាក៏ពិតមែន ប៉ុន្តែទំនាក់ទំនងរវាងប្រទេសទាំងពីរមានភាពជិតស្និទ្ធខ្លាំងណាស់។

សម្ដេចតេជោ ក៏បានគូសរំលេចពីការរួមចំណែកយ៉ាងសំខាន់របស់ហុងគ្រីនៅក្នុងការជួយបណ្ដុះបណ្ដាលធនធានមនុស្សរបស់កម្ពុជា ដែលមកដល់ពេលនេះ សម្ដេច ថា មានថ្នាក់ដឹកនាំកម្ពុជាមួយចំនួនបានទៅសិក្សា និងបញ្ចប់ការសិក្សានៅក្នុងប្រទេសហុងគ្រី និងកំពុងតែធ្វើការនៅក្នុងប្រទេសកម្ពុជា។

សម្ដេចតេជោ ក៏បានគូសរំលេចពីសារៈសំខាន់នៃការផ្លាសប្ដូរទស្សនកិច្ចគ្នាទៅវិញទៅមករបស់ថ្នាក់ដឹកនាំនៃប្រទេសទាំងពីរ រាប់ទាំងទស្សនកិច្ចរបស់សម្ដេចទៅកាន់ហុងគ្រី ក៏ដូចជាទស្សនកិច្ចរបស់ប្រធានាធិបតីហុងគ្រីមកកម្ពុជា។ សម្ដេច ថា នេះបានឆ្លុះបញ្ចាំងអំពីទំនាក់ទំនងដ៏ស្អិតរមួតរវាងប្រទេសទាំងពីរ បើទោះបីជាឆ្ងាយពីគ្នាយ៉ាងណាក្តី ក៏ប៉ុន្តែមានភាពជិតស្និទ្ធ៕

The post សម្ដេច ហ៊ុន សែន ថា កម្ពុជា និងហុងគ្រី នៅឆ្ងាយគ្នាពិត តែចំណងទាក់ទងមានភាពជិតស្និទ្ធ appeared first on Kampuchea Thmey Daily.

អ្នកនាំពាក្យប្រធានសភាថាទំនាក់ទំនងជាមួយហុងគ្រីនៅតែដដែលទោះបីប្រទេសនេះផ្លាស់ប្ដូរមេដឹកនាំថ្មី

hun sirivadh — Mon, 11 May 2026 05:03:31 +0000

នាយខុទ្ទកាល័យ និងជាអ្នកនាំពាក្យប្រធានរដ្ឋសភាលោក កែវ ពិសិដ្ឋ បានបញ្ជាក់ថាទំនាក់ទំនងរវាងរដ្ឋសភាកម្ពុជា និងរដ្ឋសភាហុងគ្រីគឺនៅតែរក្សាដដែល និងពង្រឹងការអនុវត្តន៍អនុស្សារណៈរវាងសភាទាំងពីរឱ្យបានរីកចម្រើនថែមទៀត បើទោះបីហុងគ្រីបានផ្លាស់ប្ដូរមេដឹកនាំថ្មីក្ដី។

អ្នកនាំពាក្យប្រធានរដ្ឋសភា លោក កែវ ពិសិដ្ឋ ថ្លែងនៅវិមានសភាថ្ងៃទី៦ ខែឧសភា ឆ្នាំ២០២៦

កាលពីថ្ងៃទី៩ ខែឧសភា ហុងគ្រីបានបញ្ចប់ការដឹកនាំ១៦ឆ្នាំរបស់គណបក្ស Fidesz ដោយជំនួសនូវមេដឹកនាំថ្មីមកពីគណបក្ស Tisza ដែលបានឈ្នះការបោះឆ្នោតកាលពីដើមខែមេសាកន្លងទៅ។

អ្នកនាំពាក្យប្រធានសភាលោក កែវ ពិសិដ្ឋ បានប្រាប់កម្ពុជាថ្មីថា ទំនាក់ទំនងរវាងកម្ពុជា និងហុងគ្រីនៅតែល្អជាប្រក្រតីទោះបីជាមានការផ្លាស់ប្ដូរថ្នាក់ដឹកនាំក្ដី។ លោកបន្ថែមថាក្នុងក្របខណ្ឌសភាវិញដែលបានចុះអនុស្សរណៈយោគយល់គ្នាកាលពីឆ្នាំមុនគឺនៅតែរក្សាការអនុវត្តដដែល។ លោកសង្ឃឹមថាក្រោយពីហុងគ្រីបង្កើតសភាថ្មីរួចភាគីទាំងពីរអាចនឹងពិភាក្សាគ្នាក្នុងការជំរុញការអនុវត្តអនុស្សរណៈយោគយល់គ្នានេះបន្ត។

លោកថា៖ «យើងនៅតែមានទំនាក់ទំនងល្អជាធម្មតាទេ! ធម្មតានៅក្នុងប្រទេសប្រជាធិបតេយ្យការផ្លាស់ប្ដូរថ្នាក់ដឹកនាំគឺជារឿងធម្មតាទេក្នុងអាណត្តិមួយទៅអាណត្តិមួយគាត់បោះឆ្នោត៥ឆ្នាំម្ដង»។

សម្ដេចសភាធិបតី ឃួន សុដារី និងប្រធានរដ្ឋសភាហុងគ្រី លោក ឡាស្លូ កូវឺរ (László Kövér) ថ្ងៃទី២៧ ខែតុលា ឆ្នាំ២០២៥

ទំនាក់ទំនងរវាងកម្ពុជា និងហុងគ្រី ត្រូវបានមើលឃើញថាមានទំនាក់ទំនងល្អច្រើនក្នុងការដឹកនាំរបស់គណបក្ស Fidez ដែលមានទាំងការផ្លាស់ប្ដូរទស្សនកិច្ចរបស់មេដឹកនាំរវាងប្រទេសទាំងពីរផងដែរ។ ប្រធានសភាកម្ពុជា សម្ដេចសភាធិបតី ឃួន សុដារី បានធ្វើដំណើរទស្សនកិច្ចទៅកាន់ហុងគ្រីកាលពីខែតុលា ឆ្នាំ២០២៥ និងបានចុះហត្ថលេខាលើអនុស្សរណៈយោគយល់គ្នាចំនួនពីរ ស្តីពីកិច្ចសហប្រតិបត្តិការរវាងរដ្ឋសភា និងអគ្គលេខាធិការដ្ឋានរដ្ឋសភាប្រទេសទំាងពីរដែលនឹងលើកកម្ពស់កិច្ចសហប្រតិបត្តិការរដ្ឋសភាប្រទេសទាំងពីរឱ្យកាន់តែសកម្ម។

លោក Peter Magyar បានស្បថចូលកាន់តំណែងជានាយករដ្ឋមន្ត្រីថ្មីរបស់ប្រទេសហុងគ្រី

គួរឱ្យដឹងផងដែរបន្ទាប់ឈ្នះឆ្នោតភ្ល្លូកទឹកភ្លូកដីក្នុងការបោះឆ្នោតខែមេសា ឆ្នាំ២០២៦ មកហុងគ្រីបានរៀបចំថ្នាក់ដឹកនាំសភា និងរដ្ឋាភិបាលថ្មីរបស់ខ្លួនកាលពីថ្ងៃទី៩ ខែឧសភា សប្ដាហ៍មុន។ ដែលប្រធានសភាថ្មីដឹកនាំដោយលោកស្រី Agnes Forsthofferនិងរដ្ឋាភិបាលដឹកនាំដោយលោក Péter Magyar៕

អត្ថបទដោយ ហ៊ុន សិរីវឌ្ឍន៍

The post អ្នកនាំពាក្យប្រធានសភាថាទំនាក់ទំនងជាមួយហុងគ្រីនៅតែដដែលទោះបីប្រទេសនេះផ្លាស់ប្ដូរមេដឹកនាំថ្មី appeared first on Kampuchea Thmey Daily.

សភាកម្ពុជា និងហុងគ្រី បន្តពង្រឹងកិច្ចសហប្រតិបត្តិការរវាងស្ថាប័ននីតិបញ្ញត្តិប្រទេសទាំងពីរ

Thoeun Vansong — Mon, 20 Apr 2026 03:54:03 +0000

សភាកម្ពុជា និងសភាហុងគ្រី បានបញ្ជាក់អំពីការបន្តពង្រឹងកិច្ចសហប្រតិបត្តិការរវាងស្ថាប័ននីតិបញ្ញត្តិនៃប្រទេសទាំងពីរ ខណៈកន្លងទៅ ស្ថាប័នសភាកម្ពុជា និងហុងគ្រី បានចុះអនុស្សរណៈនៃការយោគយល់រវាងគ្នា ដែលជាមូលដ្ឋានសំខាន់សម្រាប់ការពង្រឹងកិច្ចសហប្រតិបត្តិការនេះ។

ការបញ្ជាក់ឡើងវិញបែបនេះបានធ្វើឡើងដោយអនុប្រធានទី១ព្រឹទ្ធសភាកម្ពុជា លោក អ៊ុច បូររិទ្ធ និងលោកស្រី Márta MÁTRAI អនុប្រធានទី១រដ្ឋសភាហុងគ្រី ក្នុងជំនួបពិភាក្សាការងារនៅឯប្រទេសតួកគី អំឡុងពេលភាគីទាំងពីរ ទៅចូលរួមមហាសន្និបាតលើកទី១៥២ នៃសហភាពអន្តរសភា កាលពីថ្ងៃទី១៩ ខែមេសា ឆ្នាំ២០២៦។

តាមការបញ្ជាក់របស់ព្រឹទ្ធសភាកម្ពុជា តាមរយៈជំនួបនេះគឺបានឆ្លុះបញ្ចាំងពីមិត្តភាពជាប្រពៃណី និងកិច្ចសហប្រតិបត្តិការដ៏ល្អរវាងកម្ពុជា និងហុងគ្រី ពិសេសគឺឆ្លុះបញ្ចាំងពីតួនាទីយ៉ាងសកម្មរបស់ព្រឹទ្ធសភាកម្ពុជា ក្នុងការជំរុញការទូតសភា។

លោក អ៊ុច បូររិទ្ធ បានលើកឡើងអំពីសារៈសំខាន់នៃការពង្រឹងយន្តការក្រុមមិត្តភាពសភាកម្ពុជា-ហុងគ្រី និងការចូលរួមរបស់ព្រឹទ្ធសភាកម្ពុជា ក្នុងក្របខណ្ឌកិច្ចសហប្រតិបត្តិការនេះ ដើម្បីជាឱកាសសម្រាប់ស្ថានប័នជាមិត្តទាំងពីរអាចធ្វើការផ្លាស់ប្តូរព័ត៌មាន ទស្សនៈ និងបទពិសោធជាប្រចាំ។ លោកបញ្ជាក់ថា កម្ពុជានឹងបន្តធ្វើការយ៉ាងជិតស្និទ្ធជាមួយហុងគ្រី ក្នុងក្របខណ្ឌនៃការទូតសភា ដើម្បីពង្រឹងមិត្តភាព និងជំរុញការអភិវឌ្ឍជាតិ។

ជាការឆ្លើយតប លោកស្រី Márta MÁTRAI បានស្វាគមន៍ចំពោះអនុស្សរណៈនៃការយោគយល់គ្នា (MoU) និងកិច្ចព្រមព្រៀងសហប្រតិបត្តិការរវាងអគ្គលេខាធិការដ្ឋានសភានៃប្រទេសទាំងពីរ ដែលត្រូវបានចុះហត្ថលេខាកន្លងមក ដោយចាត់ទុកថា ជាមូលដ្ឋានសំខាន់សម្រាប់ការពង្រឹងកិច្ចសហប្រតិបត្តិការស្ថាប័នទៅមុខទៀត។

គួរឱ្យដឹងថា អគ្គលេខាធិការដ្ឋានព្រឹទ្ធសភាកម្ពុជា និងអគ្គលេខាធិការដ្ឋានរដ្ឋសភាហុងគ្រី បានចុះអនុស្សរណៈជាមួយនឹងគ្នា កាលពីដើមខែមីនា ឆ្នាំ២០២៦ ដោយអនុស្សរណៈនោះ គឺមានបំណងជំរុញកិច្ចសហប្រតិបត្តិការស្ថាប័នតាមរយៈការផ្លាស់ប្តូរបទពិសោធ ទស្សនកិច្ចសិក្សា កិច្ចសន្ទនាវិជ្ជាជីវៈ និងសកម្មភាពកសាងសមត្ថភាព ដើម្បីបង្កើតផលប្រយោជន៍ជាក់ស្តែងសម្រាប់ស្ថាប័នទាំងពីរ និងរួមចំណែកដល់ការពង្រឹងទំនាក់ទំនងទ្វេភាគីឱ្យកាន់តែទូលំទូលាយ៕

The post សភាកម្ពុជា និងហុងគ្រី បន្តពង្រឹងកិច្ចសហប្រតិបត្តិការរវាងស្ថាប័ននីតិបញ្ញត្តិប្រទេសទាំងពីរ appeared first on Kampuchea Thmey Daily.

សភាកម្ពុជា និងហុងគ្រី ចុះ MOU ក្នុងការជំរុញកិច្ចសហប្រតិបត្តិការស្ថាប័ននីតិប្បញ្ញត្តិ

Thoeun Vansong — Thu, 12 Mar 2026 02:30:38 +0000

លោក អ៊ុច បូររិទ្ធ ប្រធានស្ដីទីព្រឹទ្ធសភា បានទទួលជួបលោក György Such អគ្គលេខាធិការរដ្ឋសភាហុងគ្រី ដោយភាគីទាំងពីរបានផ្ដោតការពិភាក្សាជាសំខាន់លើការជំរុញបន្ថែមនូវកិច្ចសហប្រតិបត្តិការរវាងស្ថាប័ននីតិប្បញ្ញត្តិនៃប្រទេសទាំងពីរ។ ខណៈអនុស្សរណៈនៃការយោគយល់គ្នា MOU រវាងអគ្គលេខាធិការដ្ឋានព្រឹទ្ធសភាកម្ពុជា និងអគ្គលេខាធិការដ្ឋានរដ្ឋសភាហុងគ្រី ក៏ត្រូវបានចុះហត្ថលេខា។

អនុស្សរណៈខាងលើ គឺមានគោលបំណងជំរុញកិច្ចសហប្រតិបត្តិការស្ថាប័ន តាមរយៈការផ្លាស់ប្តូរបទពិសោធ ទស្សនកិច្ចសិក្សា កិច្ចសន្ទនាវិជ្ជាជីវៈ និងសកម្មភាពកសាងសមត្ថភាព ក្នុងគោលដៅបង្កើតផលប្រយោជន៍ជាក់ស្តែងសម្រាប់ស្ថាប័នទាំងពីរ និងរួមចំណែកដល់ការពង្រឹងទំនាក់ទំនងទ្វេភាគីឱ្យកាន់តែទូលំទូលាយ។

ក្នុងជំនួបដែលធ្វើឡើងនៅវិមានសាមគ្គីភាព នៃព្រឹទ្ធសភាកម្ពុជា កាលពីព្រឹកថ្ងៃទី១១ ខែមីនា ឆ្នាំ២០២៦ មុនពិធីចុះហត្ថលេខាលើអនុស្សរណៈនោះ លោក អ៊ុច បូររិទ្ធ និងលោក György Such បានវាយតម្លៃខ្ពស់ចំពោះទំនាក់ទំនងមិត្តភាពយូរង្វែង និងកិច្ចសហប្រតិបត្តិការលើវិស័យជាច្រើនដែលបានផ្តល់ផលប្រយោជន៍ដល់ប្រទេសទាំងពីរ ព្រមទាំងរំលឹកអំពីការរីកចម្រើនទំនាក់ទំនងយ៉ាងជិតស្និទ្ធរវាងស្ថាប័ននីតិប្បញ្ញត្តិ ដែលបានឆ្លុះបញ្ចាំងតាមរយៈការផ្លាស់ប្តូរទស្សនកិច្ចជាន់ខ្ពស់ និងការរក្សាកិច្ចសន្ទនារវាងគ្នាទៅវិញទៅមក។

ភាគីទាំងពីរ ក៏បានពិភាក្សារិះរកមធ្យោបាយជំរុញកិច្ចសហប្រតិបត្តិការឱ្យកាន់តែមានភាពជាក់ស្តែងបន្ថែមទៀត ពិសេស ក្នុងបរិបទ ដែលស្ថានការណ៍អន្តរជាតិបន្តវិវឌ្ឍយ៉ាងឆាប់រហ័ស និងបង្កជាបញ្ហាប្រឈមកំពុងកើនឡើងចំពោះសន្តិភាព សន្តិសុខ និងការអភិវឌ្ឍ។

ការទូត សេដ្ឋកិច្ច ថាមពល អប់រំ ទេសចរណ៍ និងទំនាក់ទំនងរវាងប្រជាជននិងប្រជាជន ក៏ដូចជាលើបញ្ហាតំបន់ដែលជាកង្វល់រួម គឺជាវិស័យដ៏មានសារៈសំខាន់ ដែលភាគីទាំងពីរ ក៏បានផ្លាស់ប្តូរទស្សនៈគ្នាផងដែរ ហើយក៏ជាការសម្លឹងឃើញសម្រាប់ការពង្រីកកិច្ចសហប្រតិបត្តិការរវាងកម្ពុជា និងហុងគ្រី៕

The post សភាកម្ពុជា និងហុងគ្រី ចុះ MOU ក្នុងការជំរុញកិច្ចសហប្រតិបត្តិការស្ថាប័ននីតិប្បញ្ញត្តិ appeared first on Kampuchea Thmey Daily.

សម្ដេចសភាធិបតី៖ យើងត្រូវនាំគ្នាបញ្ចប់សង្គ្រាមបើមិនដូច្នេះសង្គ្រាមនឹងបញ្ចប់យើងទាំងអស់គ្នា

hun sirivadh — Tue, 10 Mar 2026 08:12:04 +0000

ប្រធានសភាកម្ពុជា សម្ដេចសភាធិបតី ឃួន សុដារី មានប្រសាសន៍ថាការរកមធ្យោបាយដើម្បីបញ្ចប់សង្គ្រាមក្នុងពិភពលោកគឺជារឿងសំខាន់ក្នុងកាលៈទេសៈដែលពិភពលោកកំពុងញាំញីដោយសង្គ្រាមពេញទីដូចជាពេលនេះ។ សម្ដេចថ្លែងដោយបង្ហាញនូវក្ដីបារម្ភពីមនុស្សជាតិដែលរងទុក្ខផ្ទួនៗនៅប៉ុន្មានឆ្នាំចុងក្រោយ។

ថ្លែងក្នុងជំនួបជាមួយអគ្គលេខាធិការរដ្ឋសភាហុងគ្រីលោក ជីយ៉ចជី ស៊ូច (Gyorgy Such) នៅព្រឹកថ្ងៃទី១០ ខែមីនា ឆ្នាំ២០២៦ នៅវិមានរដ្ឋសភា សម្ដេចសភាធិបតី ឃួន សុដារី បានលើកឡើងថា ដោយបានបង្ហាញកង្វល់យ៉ាងខ្លាំងចំពោះសន្តិសុខសកល ដោយបញ្ជាក់ថាសន្តិភាពជាតម្រូវការរបស់ពលរដ្ឋគ្រប់ជាតិសាសន៍ ហើយបានកត់សម្គាល់ពីតម្លៃសន្តិភាពដែលហុងគ្រី និងកម្ពុជា បានផ្ដល់ឱ្យដូចគ្នា។ សម្ដេចបានជំរុញយ៉ាងណាឱ្យប្រទេសទាំងពីររួមចំណែកណាមួយក្នុងពិភពលោកដើម្បីអាចធ្វើឱ្យពិភពលោកបញ្ចប់សង្គ្រាមត្រលប់មករួមរស់នឹងគ្នាដោយសុខដុមនីយកម្មឡើងវិញ។

សម្ដេចថា៖ «យើងត្រូវនាំគ្នាបញ្ចប់សង្គ្រាមបើមិនដូច្នេះសង្គ្រាមនឹងបញ្ចប់យើងទាំងអស់គ្នា»។

នាយខុទ្ទកាល័យ និងជាអ្នកនាំពាក្យសម្ដេចប្រធានសភាលោក កែវ ពិសិដ្ឋ បានឱ្យអ្នកសារព័ត៌មានដឹងថា សង្គ្រាមមិនអាចបញ្ចប់ដោយសង្គ្រាមបានទេ មានតែការជជែកគ្នាដោយគោរពលើច្បាប់អន្តរជាតិប៉ុណ្ណោះ។ លោកបន្ថែមថាការលើកឡើងរបស់សម្ដេចប្រធានសភា គឺចង់ឱ្យហុងគ្រី និងកម្ពុជាប្រើវេទិកាអន្តរជាតិដែលខ្លួនមានសំឡេងក្នុងការជំរុញដល់ប្រទេសតូចៗផ្សេងទៀតរួមគ្នាបដិសេធនូវការប្រើប្រាស់សង្គ្រាមប្រឆាំងនឹងរដ្ឋដទៃនោះ។

លោកថា៖ «ពេលដែលសំឡេងប្រទេសតូចៗរួមគ្នាបង្កើតជាសំឡេងធំមួយ ក៏នឹងធ្វើឱ្យប្រទេសធំៗក្រែងរអាដែរ។ ទោះបីជាគាត់ថាគាត់មានអំណាចអាចប្រើអំណាចយោធាប្រើកម្លាំងផ្សេងៗបានក៏ប៉ុន្ដែក៏គាត់នៅតែគិតថាគាត់ខុសច្បាប់អន្តរជាតិ មនុស្សទាំងអស់គ្នាកំពុងតែចង្អុលដូច្នេះជាស្វ័យប្រវត្តិប្រកដជាថយហើយ មិនអាចធ្វើខុសច្បាប់តែឯងទេ»។

ក្នុងជំនួបនោះអគ្គលេខាធិការសភាហុងគ្រី លោក ជីយ៉ចជី ស៊ូច បានគាំទ្រនូវប្រសាសន៍របស់សម្ដេចសភាធិបតី និងសង្ឃឹមថាទំនាក់ទំនងរវាងកម្ពុជា និងហុងគ្រី នឹងកាន់តែរឹងមាំមានការផ្លាស់ប្ដូរយោបល់គ្នា និងគាំទ្រគ្នាលើឆាកអន្តរជាតិកាន់តែច្រើន។

ការអំពាវនាវរកសន្តិភាពនេះ ធ្វើឡើងខណៈដែលស្ថានភាពសង្គ្រាមលើពិភពលោកកំពុងរីករាលដាល។ ដោយឡែក សម្រាប់កម្ពុជា ផលវិបាកនៃការឈ្លានពានពីសំណាក់ប្រទេសថៃកាលពីចុងឆ្នាំ២០២៥ កន្លងទៅ នៅតែជាបញ្ហាចំពោះមុខ ដោយបច្ចុប្បន្នមានពលរដ្ឋខ្មែរជិត ៥ម៉ឺននាក់ទៀត នៅមិនទាន់អាចវិលត្រលប់ទៅកាន់លំនៅឋានវិញបាននៅឡើយទេ៕

អត្ថបទដោយ ហ៊ុន សិរីវឌ្ឍន៍

The post សម្ដេចសភាធិបតី៖ យើងត្រូវនាំគ្នាបញ្ចប់សង្គ្រាមបើមិនដូច្នេះសង្គ្រាមនឹងបញ្ចប់យើងទាំងអស់គ្នា appeared first on Kampuchea Thmey Daily.

ក្រសួងការបរទេសកម្ពុជា និងហុងគ្រី បើកកិច្ចពិគ្រោះយោបល់នយោបាយ ដើម្បីពង្រឹងទំនាក់ទំនង

Thoeun Vansong — Sun, 23 Nov 2025 06:42:26 +0000

លោកស្រី ជ្រឹង បុទុមរង្សី រដ្ឋលេខាធិការក្រសួងការបរទេសកម្ពុជា បានទៅបំពេញទស្សនកិច្ចនៅប្រទេសហុងគ្រី កាលពីថ្ងៃទី២១ ខែវិច្ឆិកា ឆ្នាំ២០២៥ ដែលក្នុងនោះ លោកស្រី និងលោក Péter Sztáray រដ្ឋលេខាធិការ ទទួលបន្ទុកគោលនយោបាយសន្តិសុខ និងសន្តិសុខថាមពល នៃក្រសួងការបរទេស និងពាណិជ្ជកម្មហុងគ្រី បានធ្វើជាសហប្រធានដឹកនាំកិច្ចពិគ្រោះយោបល់នយោបាយទ្វេភាគីលើកទី២ រវាងក្រសួងការបរទេសទាំងពីរ។

ភាគីទាំងពីរបានគូសបញ្ជាក់នូវចំណងមិត្តភាពយូរអង្វែង និងកិច្ចសហប្រតិបត្តិការដ៏ល្អ ដែលបាននិងកំពុងរីកចម្រើនលើវិស័យជាច្រើនដែលជាប្រយោជន៍រួម ដូចបានឆ្លុះបញ្ចាំងតាមរយៈជំនួបជាញឹកញាប់ និងប្រកបដោយផ្លែផ្ការវាងថ្នាក់ដឹកនាំជាន់ខ្ពស់នៃប្រទេសទាំងពីរ។

ភាគីទាំងពីរទន្ទឹងរង់ចាំប្រារព្វខួបលើកទី៧០ឆ្នាំ នៃការបង្កើតទំនាក់ទំនងការទូតរវាងកម្ពុជានិងហុងគ្រីនៅក្នុងឆ្នាំ២០២៦។ រដ្ឋលេខាធិការទាំងពីរបានគូសបញ្ជាក់អំពីសារៈសំខាន់នៃយន្តការកិច្ចពិគ្រោះយោបល់នយោបាយ និងការផ្លាស់ប្តូរកម្រិតខ្ពស់ ក្នុងការពង្រឹងកិច្ចសហប្រតិបត្តិការនយោបាយ សេដ្ឋកិច្ច និងអភិវឌ្ឍន៍។

សហប្រធានទាំងពីរបានផ្លាស់ប្តូរទស្សនៈ និងលើកឡើងពីជំហានជាក់ស្តែងក្នុងការពង្រីកកិច្ចសហប្រតិបត្តិការលើវិស័យសំខាន់ៗ ដូចជាពាណិជ្ជកម្ម និងការវិនិយោគ ការគ្រប់គ្រងធនធានទឹក កសិកម្ម និងកសិឧស្សាហកម្ម ថាមពល អប់រំ សុខាភិបាល និងទេសចរណ៍។

ថ្នាក់ដឹកនាំទាំងពីរ ក៏បានពិភាក្សាអំពីបញ្ហាតំបន់ និងអន្តរជាតិ ដែលជាការព្រួយបារម្ភរួម រួមទាំងបច្ចុប្បន្នភាពនៃស្ថានភាពព្រំដែនកម្ពុជា-ថៃ និងបានបញ្ជាក់ឡើងវិញនូវការប្តេជ្ញាចិត្តរួមគ្នាក្នុងការលើកកម្ពស់សន្តិភាព និងស្ថិរភាព៕

The post ក្រសួងការបរទេសកម្ពុជា និងហុងគ្រី បើកកិច្ចពិគ្រោះយោបល់នយោបាយ ដើម្បីពង្រឹងទំនាក់ទំនង appeared first on Kampuchea Thmey Daily.

ព្រះមហាក្សត្រនឹងយាងបំពេញទស្សនកិច្ចនៅប្រទេសហុងគ្រីដើមឆ្នាំ២០២៦

hun sirivadh — Tue, 28 Oct 2025 04:47:57 +0000

ព្រះមហាក្សត្រកម្ពុជា សម្ដេចព្រះបរមនាថ នរោត្តម សីហមុនី នឹងគ្រោងយាងព្រះរាជដំណើរទស្សនកិច្ចនៅប្រទេសហុងគ្រី នាដើមឆ្នាំ២០២៦ខាងមុន។ នេះបើតាមការចុះផ្សាយដោយរដ្ឋសភាកម្ពុជានៅថ្ងៃទី២៨ ខែតុលានេះ។

សភាកម្ពុជាបានដកស្រង់ប្រសាសន៍របស់ប្រធានសភាហុងគ្រីលោក ឡាស្លូ កូវឺរ (Laszlo Kover) ដែលបានជម្រាបដល់ប្រធានសភាកម្ពុជា ឃួន សុដារី ក្នុងពេលសម្ដេចធ្វើទស្សនកិច្ចថា៖ «ប្រទេសហុងគ្រី កំពុងត្រៀមរៀបចំថ្វាយបដិសណ្ឋារកិច្ច ព្រះរាជដំណើរទស្សនកិច្ចរបស់ព្រះករុណាព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា នៅប្រទេសហុងគ្រី នាដើមឆ្នាំ២០២៦ខាង មុខនេះ»។

នៅមិនទាន់មានព័ត៌មានលំអិតយ៉ាងណាពីដំណើរទស្សនកិច្ចរបស់ព្រះមហាក្សត្រកម្ពុជាទៅប្រទេសហុងគ្រីនៅដើមឆ្នាំក្រោយនោះទេ។

ប្រទេសហុងគ្រីគឺជាមិត្តជិតស្និទ្ធបំផុតមួយរបស់កម្ពុជានៅទ្វីបអឺរ៉ុបដែលបានជួយកម្ពុជាជាបន្តបន្ទាប់តាំងពីឆ្នាំ១៩៧៩ ជាប្រទេស១ក្នុងចំណោម៥ដំបូងគេដែលទទួលស្គាល់សាធារណរដ្ឋប្រជាមានិតកម្ពុជាច្រានចោលរដ្ឋាភិបាលខ្មែរក្រហម។ ប្រទេសនេះក៏បញ្ជូនកងទ័ពមួកខៀវមកការពារសន្តិសុខកម្ពុជានៅឆ្នាំ១៩៩២ផងដែរ ហើយក៏ជាប្រទេសនៅអឺរ៉ុបដែលជួយគាំទ្រដល់កម្ពុជាក្នុងបញ្ហា EBA និងតែងតែផ្ដល់អាហារូបករណ៍ដល់និស្សិតកម្ពុជាដើម្បីឱ្យបានទៅសិក្សា។

គិតរហូតមកដល់ពេលនេះទំនាក់ទំនងកម្ពុជា-ហុងគ្រី មានរយៈពេល៦៩ឆ្នាំហើយ ក្នុងខួបអនុស្សាវរីយ៍លើកទី៦៥នៃទំនាក់ទំនង អតីតនាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានលើកឡើងថា «ទំនាក់ទំនងកម្ពុជា–ហុងគ្រី ផ្អែកលើការជឿទុកចិត្តគ្នា និងសហប្រតិបត្តិការ យ៉ាងជិតស្និទ្ធ»៕

អត្ថបទដោយ ហ៊ុន សិរីវឌ្ឍន៍

The post ព្រះមហាក្សត្រនឹងយាងបំពេញទស្សនកិច្ចនៅប្រទេសហុងគ្រីដើមឆ្នាំ២០២៦ appeared first on Kampuchea Thmey Daily.

កម្ពុជា-ហុងគ្រី Archives - Kampuchea Thmey Daily

សម្ដេច ហ៊ុន សែន ថា កម្ពុជា និងហុងគ្រី នៅឆ្ងាយគ្នាពិត តែចំណងទាក់ទងមានភាពជិតស្និទ្ធ

សភាកម្ពុជា និងហុងគ្រី បន្តពង្រឹងកិច្ចសហប្រតិបត្តិការរវាងស្ថាប័ននីតិបញ្ញត្តិប្រទេសទាំងពីរ

សភាកម្ពុជា និងហុងគ្រី ចុះ MOU ក្នុងការជំរុញកិច្ចសហប្រតិបត្តិការស្ថាប័ននីតិប្បញ្ញត្តិ

ក្រសួងការបរទេសកម្ពុជា និងហុងគ្រី បើកកិច្ចពិគ្រោះយោបល់នយោបាយ​ ដើម្បីពង្រឹងទំនាក់ទំនង

ព្រះមហាក្សត្រ​នឹង​យាង​បំពេញ​ទស្សនកិច្ច​នៅ​ប្រទេស​ហុងគ្រី​ដើម​ឆ្នាំ​២០២៦

ក្រសួងការបរទេសកម្ពុជា និងហុងគ្រី បើកកិច្ចពិគ្រោះយោបល់នយោបាយ ដើម្បីពង្រឹងទំនាក់ទំនង

ព្រះមហាក្សត្រនឹងយាងបំពេញទស្សនកិច្ចនៅប្រទេសហុងគ្រីដើមឆ្នាំ២០២៦