កម្ពុជា. Archives - Kampuchea Thmey Daily

អ្នកនាំពាក្យរដ្ឋាភិបាលថា កម្ពុជាជាប្រទេសដែលប្រយុទ្ធប្រឆាំងឧក្រិដ្ឋកម្មឆបោកអនឡាញយ៉ាងសកម្មបំផុត

hun sirivadh — Fri, 24 Apr 2026 09:44:43 +0000

អ្នកនាំពាក្យរាជរដ្ឋាភិបាលបានចេញសេចក្ដីប្រកាសព័ត៌មានមួយអំពាវនាវឱ្យសហគមន៍អន្តរជាតិ មេត្តាទទួលស្គាល់ និងគាំទ្រកម្ពុជាក្នុងការលុបបំបាត់ការឆបោកតាមប្រព័ន្ធបច្ចេកវិទ្យា។ ការអំពាវនាវនេះគឺបន្ទាប់ពីស្ថាប័នព័ត៌មានអន្តរជាតិជាបន្តបន្ទាប់បានចុះផ្សាយពីឧក្រិដ្ឋកម្មឆបោកអនឡាញនៅកម្ពុជា រួមទាំងទណ្ឌកម្មថ្មីពីសហរដ្ឋអាមេរិកលើសមាជិកព្រឹទ្ធសភាមួយរូបផងដែរ។

ក្នុងសេចក្ដីប្រកាសព័ត៌មានថ្ងៃទី២៤ ខែមេសា ឆ្នាំ២០២៦នេះ អ្នកនាំពាក្យរាជរដ្ឋាភិបាលកម្ពុជាបានបញ្ជាក់ពីការខិតខំទាំងអំបាលម៉ានរបស់រដ្ឋាភិបាលក្នុងការប្រយុទ្ធប្រឆាំងឧក្រិដ្ឋកម្មឆបោកអនឡាញ និងការប្ដេជ្ញាខ្ពស់ក្នុងការការបំផ្លាញបណ្ដាញឧក្រិដ្ឋកម្មទាំងមូល។

ក្នុងលិខិតនោះបានសរសេរថា៖ «កម្ពុជាមិនមែនជាគោលដៅឧក្រិដ្ឋកម្មទេ ប៉ុន្តែជាប្រទេសដែលកំពុងដឹកនាំការប្រយុទ្ធប្រឆាំងយ៉ាងតឹងរ៉ឹង និងសកម្មបំផុតមួយក្នុងតំបន់»។

អ្នកនាំពាក្យរាជរដ្ឋាភិបាលកម្ពុជាក៏បានរៀបរាប់ពីសកម្មភាពមួយចំនួនរបស់រដ្ឋាភិបាលក្នុងការប្រយុទ្ធប្រឆាំងការឆបោកអនឡាញនេះផងដែរដោយមានទាំងបទបញ្ជា មានទាំងឆន្ទៈ និងការប្ដេជ្ញាចិត្តរបស់នាយករដ្ឋមន្ត្រី ព្រមទាំងការបង្កើតនូវលិខិតបទដ្ឋានគតិយុត្តិជាច្រើនដើម្បីធានាដល់ការអនុវត្តរបស់អាជ្ញាធរ សហការជាមួយបណ្ដាប្រទេសជាដៃគូរ អង្គការអន្តរជាតិ និងយន្តការពហុភាគីដើម្បីស្រាវជ្រាវបង្ក្រាប បញ្ជូនជនសង្ស័យ និងជួយសង្គ្រោះជនរងគ្រោះពីអំពើឧក្រិដ្ឋនេះថែមទៀត។

ក្នុងសេចក្ដីប្រកាសនោះបានបញ្ជាក់បន្ថែមថា៖ «សម្ដេចធិបតី បានបញ្ជាក់ថាច្បាប់មានហើយ ដូច្នេះត្រូវតែអនុវត្តឱ្យបានម៉ត់ចត់ និងឱ្យមានប្រសិទ្ធភាពដោយមិនបន្ធូរដៃ និងដោយគ្មានការលើកលែងឡើយ ពោលគឺមិនបញ្ឈប់ត្រឹមពិធីបុណ្យចូលឆ្នាំថ្មីប្រពៃណីជាតិខ្មែរនេះ ដូចដែលមានមតិមួយចំនួនបានលើកឡើងនោះឡើយ»។

ជាការកត់សម្គាល់ការឆ្លើយតបរបស់អ្នកនាំពាក្យរាជរដ្ឋាភិបាលកម្ពុជាពេលនេះគឺបន្ទាប់ពីស្ថាប័នព័ត៌មានអន្តរជាតិមួយចំនួនបានចុះផ្សាយពីឧក្រិដ្ឋកម្មឆបោកអនឡាញនៅកម្ពុជា ដោយក្នុងនោះមានទាំងហៅឈ្មោះប្រទេសកម្ពុជា ថាជា Scambodia ។ ដោយឡែករតនាគារសហរដ្ឋអាមេរិកកាលពីយប់ថ្ងៃទី២៣ ខែមេសា បានប្រកាសដាក់ទណ្ឌកម្មសមាជិកព្រឹទ្ធសភាមួយមួយរូប និងបណ្ដាញពាក់ព័ន្ធផ្សេងទៀតជុំវិញឧក្រិដ្ឋកម្មឆបោកអនឡាញសំដៅទៅពលរដ្ឋអាមេរិកផងដែរ។

បើតាមអ្នកនាំពាក្យរាជរដ្ឋាភិបាលចាប់តាំងពីខែកក្កដា ឆ្នាំ២០២៥ រហូតមកដល់ពាក់កណ្ដាលខែមេសា ឆ្នាំ២០២៦ សមត្ថកិច្ចកម្ពុជាបានបង្ក្រាបអំពើឆបោកតាមប្រព័ន្ធបច្ចេកវិទ្យាបានជាង២៥០ករណី ក្នុងនោះបង្ក្រាបទីតាំងកាស៊ីណូបាន៩១ទីតាំង កសាងសំណុំរឿងបញ្ជូនទៅតុលាការចំនួន១១២ករណី ពាក់ព័ន្ធនឹងជនសង្ស័យ ១០៨៩នាក់។ បន្ថែមលើនោះបានអនុវត្តន៍នីតិវិធីបណ្ដាញជនបរទេសចេញពីប្រទេសបានជាង ១ម៉ឺន៣ពាន់នាក់ ខណៈជនបរទេសដែលស្ម័គ្រចិត្តចេញមានជាង២៤ម៉ឺននាក់៕

អត្ថបទដោយ ហ៊ុន សិរីវឌ្ឍន៍

The post អ្នកនាំពាក្យរដ្ឋាភិបាលថា កម្ពុជាជាប្រទេសដែលប្រយុទ្ធប្រឆាំងឧក្រិដ្ឋកម្មឆបោកអនឡាញយ៉ាងសកម្មបំផុត appeared first on Kampuchea Thmey Daily.

កម្ពុជា តវ៉ាផ្លូវការចំពោះសកម្មភាពថ្មីរបស់ថៃ រំលោភអធិបតេយ្យភាពតាមព្រំដែន

អុន ស្រីមាន — Sat, 21 Mar 2026 04:52:36 +0000

រាជរដ្ឋាភិបាលកម្ពុជា បានធ្វើការតវ៉ាជាផ្លូវការបន្ថែមម្តងទៀត ប្រឆាំងនឹងសកម្មភាពបន្តរំលោភលើអធិបតេយ្យភាព និងបូរណភាពទឹកដីរបស់កម្ពុជា ដោយកងកម្លាំងប្រដាប់អាវុធថៃ បន្ទាប់ពីបទឈប់បាញ់នៅថ្ងៃទី២៧ ខែធ្នូ ឆ្នាំ២០២៥។

យោងតាមសេចក្តីប្រកាសព័ត៌មាន សកម្មភាពរំលោភត្រូវបានរាយការណ៍នៅតំបន់ជាច្រើន រួមមាន តំបន់បឹងត្រកួន ដែលត្រូវបានសង្កេតឃើញមានផ្សែងហុយចេញពីទីតាំងចំនួនបី សន្មត់ថាជាផ្ទះកំពុងឆេះ ក្នុងតំបន់លំនៅដ្ឋានរបស់កម្ពុជា ដែលបច្ចុប្បន្នស្ថិតក្រោមការកាន់កាប់ដោយខុសច្បាប់។

នៅតំបន់អូរទឹកចោល ស្ថិតក្នុងសង្កាត់បន្សាយរាក់ ក្រុងសំរោង ខេត្តឧត្តរមានជ័យ កងកម្លាំងប្រដាប់អាវុធថៃ ត្រូវបានរាយការណ៍ថាបានបន្តសកម្មភាពឈូសឆាយដីធ្លី និងសាងសង់ផ្លូវ ព្រមទាំងសំណង់បេតុងផ្សេងៗ លាតសន្ធឹងពីតំបន់ប្រាសាទខ្នារ ទៅកាន់តំបន់ប្រាសាទតាក្របី ក្នុងទឹកដីកម្ពុជា។

បន្ថែមពីនេះ នៅថ្ងៃទី១៨ ខែមីនា ឆ្នាំ២០២៦ កងកម្លាំងថៃ រួមជាមួយមន្ត្រីពាក់ព័ន្ធ បានធ្វើសកម្មភាពវាស់វែង និងបែងចែកដីចំនួន៣កន្លែង ដល់ប្រជាពលរដ្ឋថៃ នៅក្នុងតំបន់ភូមិជោគជ័យ ឃុំអូរបីជាន់ ស្រុកអូរជ្រៅ ស្ថិតចន្លោះបង្គោលព្រំដែនលេខ៤៦ និង៤៧។

រាជរដ្ឋាភិបាលកម្ពុជាបានសង្កត់ធ្ងន់ថា កម្ពុជាមិនទទួលយកការកំណត់ខ្សែព្រំដែន ឬការទាមទារទឹកដីណាមួយ តាមការអះអាងឯកតោភាគីរបស់ភាគីថៃឡើយ ហើយសកម្មភាពទាំងនេះ មិនប៉ះពាល់ដល់សិទ្ធិស្របច្បាប់របស់កម្ពុជា ក្នុងការកំណត់ព្រំដែនអន្តរជាតិ។

ជាមួយគ្នានេះ កម្ពុជាបានអំពាវនាវឱ្យភាគីថៃ បញ្ឈប់ជាបន្ទាន់នូវសកម្មភាពឯកតោភាគីទាំងអស់ និងអនុវត្តឱ្យបានពេញលេញនូវកិច្ចព្រមព្រៀងពាក់ព័ន្ធ ដើម្បីបន្ថយភាពតានតឹង លើកកម្ពស់ទំនុកចិត្ត សន្តិភាព ស្ថិរភាព និងភាពជាអ្នកជិតខាងល្អ តាមបណ្តោយព្រំដែនរវាងប្រទេសទាំងពីរ។

រាជរដ្ឋាភិបាលកម្ពុជា ក៏បានបញ្ជាក់ជាថ្មីពីការប្តេជ្ញាចិត្តក្នុងការស្វែងរកដំណោះស្រាយវិវាទព្រំដែនតាមវិធីសាស្ត្រសន្តិភាព ស្របច្បាប់អន្តរជាតិ និងកិច្ចព្រមព្រៀងទ្វេភាគី ខណៈរក្សាជំហរមិនអនុញ្ញាតឱ្យមានការផ្លាស់ប្តូរខ្សែព្រំដែនដោយកម្លាំងឡើយ៕

The post កម្ពុជា តវ៉ាផ្លូវការចំពោះសកម្មភាពថ្មីរបស់ថៃ រំលោភអធិបតេយ្យភាពតាមព្រំដែន appeared first on Kampuchea Thmey Daily.

ក្រសួងកិច្ចការនារី និងអង្គការសហប្រជាជាតិប្រចាំកម្ពុជា បន្តប្តេជ្ញារួមគ្នាលើកកម្ពស់សមភាពយេនឌ័រនៅកម្ពុជា

អុន ស្រីមាន — Fri, 20 Feb 2026 04:18:20 +0000

ក្រសួងកិច្ចការនារី និងអង្គការសហប្រជាជាតិប្រចាំកម្ពុជា បានប្តេជ្ញារួមគ្នាក្នុងការបន្តលើកកម្ពុជាសមភាពយេនឌ័រនៅកម្ពុជា។ នេះ បើតាមការផុសរបស់ក្រសួងកិច្ចការនារីលើទំព័រហ្វេសប៊ុក នៅព្រឹកថ្ងៃទី២០ ខែកុម្ភៈ ។

ការបន្តកិច្ចសហការរួមគ្នានេះ ធ្វើឡើងក្នុងឱកាស លោកស្រីបណ្ឌិត អុឹង កន្ថាផាវី រដ្ឋមន្រ្តីក្រសួងកិច្ចការនារី ទទួលជួបពិភាក្សាការងារជាមួយលោកស្រី Vladanka Andreeva អ្នកសម្របសម្រួលអង្គការសហប្រជាជាតិប្រចាំនៅកម្ពុជា ដើម្បីពង្រឹង និងបញ្ជាក់ឡើងវិញ អំពីកិច្ចសហការដ៏មានតម្លៃរវាងភាគីទាំងពីរ ក្នុងការលើកកម្ពស់សមភាពយេនឌ័រ និងភាពអង់អាចដល់ស្រ្តីក្នុងប្រទេសកម្ពុជា។

ក្រសួងលើកឡើងថា ក្នុងកិច្ចពិភាក្សា ក៏បានបញ្ជាក់ពីតួនាទីកាន់តែសកម្មរបស់ស្ត្រីកម្ពុជា ក្នុងការរក្សាសន្តិភាព អភិបាលកិច្ច និងការអភិវឌ្ឍសេដ្ឋកិច្ចសង្គម ព្រមទាំងបញ្ហាប្រឈមថ្មីៗក្នុងបរិបទតំបន់ និងពិភពលោក។ តាមការផុសនោះ បញ្ជាក់ថា៖ “ក្រសួងកិច្ចការនារី និងអង្គការសហប្រជាជាតិ បន្តប្តេជ្ញាភាពជាដៃគូរួមគ្នា ដើម្បីជំរុញអភិវឌ្ឍន៍សង្គមប្រកបដោយចីរភាព និងស្ថានភាពស្រ្តីកម្ពុជាឲ្យកាន់តែរឹងមាំ”។

សូមជម្រាបថា ក្នុងជំនួបខាងលើ ក្រសួងកិច្ចការនារី និងអង្គការសហប្រជាជាតិប្រចាំកម្ពុជា បានលើកឡើងពីការបន្តកិច្ចសហប្រតិបត្តិការដ៏មានតម្លៃកន្លងមក ការបញ្ជ្រាបយេនឌ័រតាមវិស័យ ការលើកកម្ពស់សុខុមាលភាពស្រ្តីក្នុងវិស័យសេដ្ឋកិច្ច ការទប់ស្កាត់អំពើហិង្សាផ្អែកលើយេនឌ័រ ការលើកកម្ពស់និយាមសង្គមវិជ្ជមាន និងការចូលរួមរបស់ស្ត្រីក្នុងការធ្វើសេចក្តីសម្រេចផងដែរ៕

The post ក្រសួងកិច្ចការនារី និងអង្គការសហប្រជាជាតិប្រចាំកម្ពុជា បន្តប្តេជ្ញារួមគ្នាលើកកម្ពស់សមភាពយេនឌ័រនៅកម្ពុជា appeared first on Kampuchea Thmey Daily.

កម្ពុជា-អង្គការ OECD បន្តពង្រឹងកិច្ចសហប្រតិបត្តិការសំដៅលើកកម្ពស់ផលិតភាព ការអភិវឌ្ឍជំនាញ និងអនុលោមភាពច្បាប់

អ៊ិន ពិសី — Sat, 14 Feb 2026 07:45:25 +0000

កម្ពុជា និង អង្គការ OECD បានឯកភាពគ្នាក្នុងការបន្តពង្រឹងកិច្ចសហប្រតិបត្តិការសំដៅលើកកម្ពស់ផលិតភាព ការអភិវឌ្ឍជំនាញ និងអនុលោមភាពច្បាប់។

ការឯកភាពគ្នាបន្តពង្រឹងកិច្ចសហប្រតិបត្តិការនេះ ក្នុងឱកាស លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ និងលោក អង់តូនីញូ ហ្គោមេស៍ (Antonio Gomes) នាយករង នៃអគ្គនាយកដ្ឋានកិច្ចការហិរញ្ញវត្ថុ និងសហគ្រាស នៃអង្គការសម្រាប់កិច្ចសហប្រតិបត្តិការ និងអភិវឌ្ឍន៍សេដ្ឋកិច្ច (OECD) បានជួបប្រជុំទ្វេភាគីនៅទីស្នាក់ការអង្គការ OECD ខណៈ លោករដ្ឋមន្ត្រី ដឹកនាំគណៈប្រតិភូត្រីភាគី ចូលរួមវេទិកាអង្គការ OECD ស្ដីពីការត្រួតពិនិត្យអនុលោមភាពក្នុងវិស័យកាត់ដេរ និងផលិតផលស្បែកជើង នាទីក្រុងប៉ារីស ប្រទេសបារាំង កាលពីថ្ងៃទី ១១ ខែកុម្ភៈ ឆ្នាំ ២០២៦ ថ្មីៗ នេះ។

នាឱកាសនោះ លោករដ្ឋមន្ត្រី និងលោក អង់តូនីញូ បានរំលឹកពីកិច្ចសហប្រតិបត្តិការរវាងអង្គការ OECD និងប្រទេសកម្ពុជា លើវិស័យពាក់ព័ន្ធជាច្រើន។ ភាគីទាំងពីរ បានឯកភាពគ្នាក្នុងការពង្រឹងកិច្ចសហប្រតិបត្តិការលើវិស័យការងារ សន្តិសុខសង្គម និងបណ្តុះបណ្តាលវិជ្ជាជីវៈ ជាពិសេសលើការលើកកម្ពស់ផលិតភាព ការអភិវឌ្ឍជំនាញ និងការអនុវត្តការត្រួតពិនិត្យអនុលោមភាពច្បាប់ពាក់ព័ន្ធសិទ្ធិមនុស្ស និងបរិស្ថាន នៅក្នុងវិស័យវាយនភណ្ឌ កាត់ដេរ ផលិតស្បែកជើង ផលិតផលធ្វើដំណើរ និងកាបូប ដែលនឹងជួយរក្សាបាននូវភាពប្រកួតប្រជែង ខណៈកម្ពុជាត្រៀមខ្លួនចាកចេញពីប្រទេសអភិវឌ្ឍន៍តិច (LDC)។

ជាមួយនឹងការសម្ដែងនូវការពេញផ្លែផ្កា នៃកិច្ចសហប្រតិបត្តិការ នាពេលកន្លងមក ភាគីទាំងពីរ ក៏បានធ្វើការផ្លាស់ប្ដូរបទពិសោធ បញ្ហាប្រឈម និងវឌ្ឍនភាពក្នុងការអភិវឌ្ឍវិស័យការងារផងដែរ៕

The post កម្ពុជា-អង្គការ OECD បន្តពង្រឹងកិច្ចសហប្រតិបត្តិការសំដៅលើកកម្ពស់ផលិតភាព ការអភិវឌ្ឍជំនាញ និងអនុលោមភាពច្បាប់ appeared first on Kampuchea Thmey Daily.

លោក Michael ចូលថ្វាយបង្គំ សម្តេច គូ សុភាព ក្នុងកម្មវិធីសមាធិសម្រាប់កុមារ នៅវត្តគល់ទទឹង

អ៊ិន ពិសី — Tue, 27 Jan 2026 02:42:19 +0000

ការធ្វើដំណើរមកកាន់ប្រទេសកម្ពុជា ជាលើកទី ៣ ដើម្បីលើកកម្ពស់ និងចូលរួមផ្សព្វផ្សាយពីសន្តិភាព និងសេដ្ឋកិច្ចពាណិជ្ជកម្ម នៅកម្ពុជា លោក Michael B Alfaro កាលពីថ្ងៃទី ២៥ ខែមករា ឆ្នាំ ២០២៦ បានចូលរួមជាមួយ សម្តេចឧត្តមវង្សា គូ សុភាព ក្នុងកម្មវិធីសមាធិសម្រាប់កុមារ ស្ថិតនៅក្នុងបរិវេណវត្តគល់ទទឹង រាជធានីភ្នំពេញ។

នាឱកាសនោះ ទាំង សម្តេច គូ សុភាព និង លោក Michael B Alfaro បានពិភាក្សាគ្នាច្រើន ជុំវិញតួនាទីព្រះពុទ្ធសាសនាខ្មែរ ក្នុងការចូលរួមចំណែករក្សាសុខសន្តិភាពក្នុងប្រទេសកម្ពុជា និងពិភពលោក។ លើសពីនេះទៀត សម្តេច គូ សុភាព បាននាំ លោក Michael ទស្សនកិច្ចជុំវិញទីធ្លាបរិស្ថានវត្ត ដែលមានសោភណភាព និងភាពបៃតង។ លោក Michael កោតសរសើរយ៉ាងខ្លាំងចំពោះ ការរៀបចំវត្តអារាមរបស់ សម្តេច គូ សុភាព។ លោកថា វត្តគល់ទទឹង ពិតជាមានរបៀប និងរៀបចំបរិស្ថានបានយ៉ាងល្អប្រសើរ។

ជុំវិញការមកថ្វាយបង្គំរបស់ ម៉ៃឃល នេះ សម្តេច គូ សុភាព មានថេរដីកាគូសបញ្ជាក់ពីការរៀបចំឲ្យទៅជាអារាមទេសចរណ៍ ដើម្បីលើកកម្ពស់វិស័យទេសចរណ៍កម្ពុជា ជាពិសេសបានស្វែងយល់ពីវិស័យព្រះពុទ្ធសាសនា វប្បធម៌ និងការគោរពបូជារបស់ពលរដ្ឋកម្ពុជា។

លោក Michael បានសម្តែងនូវការសប្បាយរីករាយដែលបានចូលរួមជាមួយ សម្តេច គូ សុភាព ក្នុងកម្មវិធីសមាធិសម្រាប់កុមារ និងទស្សនាស្វែងយល់ពីតួនាទីព្រះពុទ្ធសាសនាក្នុងការថែរក្សាសន្តិភាព និងប្រែក្លាយទៅជាអារាមទេសចរណ៍៕

The post លោក Michael ចូលថ្វាយបង្គំ សម្តេច គូ សុភាព ក្នុងកម្មវិធីសមាធិសម្រាប់កុមារ នៅវត្តគល់ទទឹង appeared first on Kampuchea Thmey Daily.

លោក ម៉ៃឃល នឹងមកខ្មែរចុងសប្ដាហ៍នេះ ជាមួយគណៈប្រតិភូអាមេរិក និងអ្នកព័ត៌មានចក្រភពអង់គ្លេស

អ៊ិន ពិសី — Fri, 23 Jan 2026 03:00:10 +0000

អ្នកកាសែតចក្រភពអង់គ្លេស និងអ្នកប្រឹក្សានយោបាយរបស់លោក Michael និង លោក Michael Alfaro គ្រោងនឹងត្រឡប់មកកម្ពុជាវិញ នៅថ្ងៃទី ២៥ មករា ចុងសប្ដាហ៍នេះ ជាមួយគណៈប្រតិភូសហរដ្ឋអាមេរិក និងបង្កើតភាពជាដៃគូជាមួយសារព័ត៌មានពុទ្ធសាសនា (Buddhist News)។

លោក Alfaro និងក្រុមរបស់ការងារលោក នឹងធ្វើការរួមគ្នាជាមួយលោក សិរី មុនី ស្ថាបនិក BC News ដែលមានទំនាក់ទំនងយ៉ាងជិតស្និទ្ធជាមួយ សម្តេចបណ្ឌិត យ៉ន សេងយៀត ជាព្រះសង្ឃមានឥទ្ធិពលនៅក្នុងប្រទេស និងបានប្រកាសតែងតាំងប្រធានាធិបតីសហរដ្ឋអាមេរិកលោក Trump សម្រាប់រង្វាន់ណូបែលសន្តិភាពកាលពីឆ្នាំមុន។

ការត្រឡប់មកខ្មែរជាលើកទី ៣ នេះ បានក្លាយជាព្រឹត្តិការណ៍ដ៏សំខាន់មួយសម្រាប់ភាពជាដៃគូដ៏គួរឱ្យរំភើបរវាងប្រព័ន្ធផ្សព្វផ្សាយចក្រភពអង់គ្លេស សហរដ្ឋអាមេរិក និងកម្ពុជា ដោយនាំយកអ្នកជំនាញផ្នែកព័ត៌មានមកពីគ្រប់ប្រទេសដោយសហការជាមួយគ្នាទៅវិញទៅមក។

ដើម្បីចាប់ផ្ដើមភាពជាដៃគូ លោក Alfaro គណៈប្រតិភូអាមេរិក រួមជាមួយនឹង លោកបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន និងព្រះសង្ឃដ៏លេចធ្លោរបស់កម្ពុជា នឹងដាំដើមឈើសន្តិភាពនៅលើភ្នំខ្នងផ្សារ។ ការដាំដើមឈើនេះ ត្រូវបានគេរំពឹងថា ជាព្រឹត្តិការណ៍ដ៏សំខាន់មួយសម្រាប់កម្ពុជា ដែលមានការចូលរួមពីមន្ត្រីជាន់ខ្ពស់រដ្ឋាភិបាលកម្ពុជា ហើយនឹងប្រព្រឹត្តទៅនៅចុងខែមករា និងដើមខែកុម្ភៈ នៅស្របពេលភាពដែល NewsX និង BC News ចាប់ផ្ដើមជាធរមាន។

លោក Alfaro បានក្លាយជាប្រធានបទសំខាន់មួយដែលត្រូវប្រព័ន្ធផ្សព្វផ្សាយទូទាំងពិភពលោកបានផ្សាយពីលោកកាលពីខែកក្កដា ឆ្នាំមុន នៅពេលដែលលោកក្លាយជាអ្នកកាសែតអន្តរជាតិដំបូងគេដែលចុះទៅផ្សាយផ្ទាល់ពីព្រំដែនកម្ពុជានៅភូមិជោគជ័យ នៅខេត្តបន្ទាយមានជ័យ។ ការផ្សាយបន្តផ្ទាល់នោះ មានអ្នកចូលមើលជាង ៩ លានដង ក្នុងរយៈពេល ២៤ ម៉ោង លើទំព័រហ្វេសប៊ុករបស់លោក។ ចាប់តាំងពីពេលនោះមក ការផ្សាយរបស់លោក បានជំរុញឱ្យមានការបោះពុម្ពផ្សាយ និងប្រព័ន្ធផ្សព្វផ្សាយសំខាន់ៗ ជាច្រើនរួមមាន National World , The European , DailyGoat.com និង The Epoch Times ចាប់អារម្មណ៍ផ្សាយពីសកម្មភាពរបស់លោក។

ការត្រលប់មកវិញរបស់ Alfaro ត្រូវបានគេទន្ទឹងរង់ចាំយ៉ាងខ្លាំងនៅក្នុងប្រទេសកម្ពុជា។ លោក ម៉ៃឃល ត្រូវបានពលរដ្ឋកម្ពុជា ចាត់ទុកថា ជនគំរូមួយរូប (Idol) និងជាអ្នកឈឺឆ្អាលចំពោះប្រជាជនខ្មែរ និងប្រទេសកម្ពុជា។ ការមកកាន់កម្ពុជាជាលើកទី ៣ របស់ Alfaro គឺស្របពេលជាមួយនឹងដំណើរទស្សនកិច្ចរបស់តារាល្បីរបស់សហរដ្ឋអាមេរិកផ្សេងទៀតមកកាន់ប្រទេសកម្ពុជា រួមទាំងតារាសម្តែង Angelina Jolie និង Rev. Franklin Graham ជាអ្នកមានឥទ្ធិពលខ្លាំងក្នុងសាសនាគ្រិស្តផ្នែកប្រ៉ូតេស្តង់។

“Wow , រីករាយដែលបានឮថាអ្នកត្រលប់មកកម្ពុជាម្តងទៀត។ ខ្ញុំពិតជាស្រលាញ់ ហើយអរគុណចំពោះអ្វីដែលអ្នកបានធ្វើសម្រាប់ប្រទេសដ៏ស្រស់ស្អាតរបស់ខ្ញុំ។ សូមធ្វើដំណើរប្រកបដោយសុវត្ថិភាព” នេះជាខំមិនរបស់ Hengly Pheng នៅលើ Facebook របស់ Alfaro។ ការខំមិននេះ គឺជាសារមួយក្នុងចំណោមសារស្រដៀងគ្នាជាងមួយពាន់ផ្សេងទៀត។

នៅកម្ពុជា ព័ត៌មានពុទ្ធសាសនា (BC News) ដែលជាសារព័ត៌មានបោះពុម្ពផ្សាយក្នុងស្រុកខ្មែរ ផ្តោតលើកិច្ចការងារសាសនា និងមានទំនាក់ទំនងយ៉ាងស៊ីជម្រៅជាមួយពុទ្ធសាសនា និងសាសនាផ្សេងទៀតនៅកម្ពុជា។ លោក សិរី មុនី បាននិយាយថា ការចាប់ដៃគូជាមួយ NewsX និងលោក Alfaro បានក្លាយជាផ្នែកមួយ នៃយុទ្ធសាស្ត្រទូដ៏មានសារៈសំខាន់ក្នុងគោលដៅផ្សាយព្រឹត្តិការនានា និងរឿងរ៉ាវនានា ស្តីអំពីកំណើនសេដ្ឋកិច្ចរបស់កម្ពុជាទៅកាន់អន្តរជាតិ ការលើកកម្ពស់សន្តិភាពនៅក្នុងតំបន់ និងផ្សាយពីការរងគ្រោះរបស់កម្ពុជា ដែលត្រូវប្រទេសថៃឡោមព័ទ្ធ បង្កជាជម្លោះដើម្បីបង្កើតសង្គ្រាម។

លោក Alfaro បានមានប្រសាសន៍ថា “ខ្ញុំចូលចិត្តគំនិត នៃការធ្វើការជាមួយព័ត៌មានព្រះពុទ្ធសាសនាតាំងពីដំបូងមក ពីព្រោះថា បេសកកម្ម គឺសន្តិភាពមួយ ហើយព័ត៌មានពុទ្ធសាសនាក៏ផ្តោតសំខាន់លើសេដ្ឋកិច្ចផងដែរ ប្រធានបទពីរដែលខ្ញុំបានព្យាយាមជាប់លាប់ក្នុងការរាយការណ៍របស់ខ្ញុំ” Alfaro បាននិយាយ។

ជាការពិតណាស់ ជម្លោះកម្ពុជា-ថៃ បានចាប់ផ្តើមនៅខែកក្កដា ឆ្នាំ ២០២៥ ហើយនៅចុងខែធ្នូ ឆ្នាំ ២០២៥ ទើបមានបទឈប់បាញ់គ្នាមួយរំពេចនៅដំណាច់ឆ្នាំនេះ គឺជាជម្លោះជាសាកលមួយ ដែលទទួលបានការរ៉ាប់រង និងឈឺឆ្អាលតិចពីសំណាក់អន្តរជាតិ នេះបើប្រៀបធៀបទៅនឹងប្រទេសដែលមានឥទ្ធិពេលជាង ដូចជាប្រទេសអ៊ីរ៉ង់។ ហើយអ្វីជាចំណុចសំខាន់បំផុត គឺ កម្ពុជា រងសម្ពាធយ៉ាងខ្លាំងពីសង្គ្រាមពាណិជ្ជកម្មអាមេរិក-ចិន និងសម្រាប់ខ្សែចង្វាក់ផ្គត់ផ្គង់ទូទាំងពិភពលោក។ ព្រំដែនរវាងប្រទេសជិតខាងអាស៊ីអាគ្នេយ៍ទាំងពីរ គឺ កម្ពុជា-ថៃ នៅតែបន្តបិទ បន្ទាប់ពីមានភាពតានតឹងអស់រយៈពេល ៩ ខែ ខណៈដែលផ្ទៃដីសំខាន់ៗ នៅតាមបណ្ដោយព្រំដែនប្រទេសកម្ពុជា ត្រូវបានកាន់កាប់ដោយកងកម្លាំងថៃដែលអះអាងថា វាជាកម្មសិទ្ធិរបស់ពួកគេ។

យោងតាមរបាយការណ៍ពីមន្ត្រីជំនាញ អះអាងថា នៅខេត្តជាប់ព្រំដែនមានជនភៀសខ្លួនជាង ៧០០,០០០ នាក់ នៅក្នុងប្រទេសទាំងពីរ បានជម្លៀសរកទីតាំងមានសុវត្ថិភាព។ ហើយគេសង្កេតឃើញថា ពលរដ្ឋជនភៀសសឹកកម្ពុជា គឺរងគ្រោះច្រើនជាងគេដោយសារជម្លោះនេះ។

ទោះបីបើកម្ពុជាមានសង្គ្រាមយ៉ាងណាក៏ដោយ ប៉ុន្តែសេដ្ឋកិច្ចកម្ពុជាមានសន្ទុះរីកចម្រើនជាង ៦% ក្នុងមួយឆ្នាំ។ ភាគច្រើនជាលទ្ធផល នៃការវិនិយោគឡើងវិញយ៉ាងខ្លាំងក្លានៅក្នុងឧស្សាហកម្ម ដែលអ្នកជំនាញយល់ថា ជាអត្ថប្រយោជន៍មួយដែលបានកើតឡើងពីការកើនឡើង នៃផលិតកម្មក្នុងស្រុក តាមរយៈការបិទព្រំដែនថៃ។

តាមរយៈភាពជាដៃគូរបស់ NewsX-BC News ដែលដឹកនាំដោយលោក Alfaro និងលោក មុនី មានគោលបំណងផ្សាយឱ្យបានល្អពីធាតុសំខាន់នៅកម្ពុជា គឺ មនុស្សធម៌ គុណធម៌ ស្ថិរភាព សន្តិភាព និងសេដ្ឋកិច្ច ដែលមិនទាន់ត្រូវបានសារព័ត៌មានអន្តរជាតិលើកឡើង និងដើម្បីទាក់ទាញចំណាប់អារម្មណ៍អ្នកអានជាជនបរទេស។

BC News លោក មុនី បានមានប្រសាសន៍ថា “នៅចុងបញ្ចប់ នៃថ្ងៃនោះ សេដ្ឋកិច្ចរីកចម្រើន ព្រោះមានសន្តិភាព និងវិបុលភាព ហើយគ្មានរឿងណាដែលល្អជាងរឿងសេដ្ឋកិច្ច និងសន្តិភាព នោះទេ ហើយគ្មានរឿងអ្វីដែលចាំបាច់ជាងការដោះស្រាយរបស់ប្រជាជាតិមួយ ជាពិសេសគឺរឿងរបស់ប្រទេសកម្ពុជា នៅពេលនេះ”។ “ព័ត៌មានរបស់យើង គឺបានមកពីការជ្រៀតចូលជ្រៅបំផុត នៃសង្គមកម្ពុជា ចាប់តាំងពីព្រះពុទ្ធសាសនា គឺជាកម្លាំងចងតែមួយនៅក្នុងតំបន់ដែលឆ្លងកាត់វណ្ណៈ និងព្រំដែន”។

កន្លងទៅថ្មីៗ នេះ លោក Alfaro បានសរសេរសៀវភៅមួយស្តីពីជម្លោះព្រំដែនកម្ពុជា-ថៃ ដែលគ្រោងនឹងបោះពុម្ពក្នុងពេលឆាប់ៗ នេះ។ លោកបានទទួលសិទ្ធិដើម្បីបោះពុម្ពផ្សាយរួចហើយគ្រឹះស្ថានបោះពុម្ពផ្សាយ និងបណ្ដាញព័ត៌មាននៅអាមេរិក។ លោក ម៉ៃឃល កំពុងពិភាក្សាជាមួយភ្នាក់ងារដ៏ធំបំផុតមួយរបស់សហរដ្ឋអាមេរិក ពីកំណត់ត្រានយោបាយ ដែលបានសរសេរ និងរៀបរាប់នៅក្នុងសៀវភៅនេះ។ លោកគ្រោងនឹងចេញផ្សាយ មុនការបោះឆ្នោតពាក់កណ្ដាលអាណត្តិរបស់សហរដ្ឋអាមេរិក។

លោក ម៉ៃឃល បានមានប្រសាសន៍ថា “រឿងកម្ពុជា គឺជារឿងមួយមិនមែនគ្រាន់តែជាចំនួនប្រជាជនដែលមានការចាប់អារម្មណ៍ចំពោះប្រទេសខ្លាំងប៉ុណ្ណោះទេ ប៉ុន្តែវាក៏ជាសក្ខីភាពដ៏សំខាន់មួយចំពោះជោគជ័យ នៃសន្តិភាពដែលមេដឹកនាំកម្ពុជាបានប្រកាន់ភ្ជាប់ ហើយពិភពលោកបានឱ្យតម្លៃ ហើយលោក ត្រាំ Trump បានយល់ស្របថា សន្តិភាពសំខាន់ណាស់សម្រាប់ពិភពលោក”។

លោក Alfaro បាននិយាយថា “យើងអាចនាំយកមិនត្រឹមតែរឿងរ៉ាវ នៃជម្លោះព្រំដែនប៉ុណ្ណោះទេ ប៉ុន្តែយើងអាចនិយាយពីការកើនឡើង នៃសេដ្ឋកិច្ចដ៏មិនគួរឱ្យជឿរបស់កម្ពុជាទៅកាន់ទស្សនិកជនជុំវិញពិភពលោក នេះគឺជាព័ត៌មានដែលនឹងមានសារៈសំខាន់។ នេះជារឿងដែលមានសារៈសំខាន់បំផុតសម្រាប់ជនជាតិអាមេរិក និងអឺរ៉ុប ដែលកំពុងតែស្វែងរកឱកាសពាណិជ្ជកម្ម និងចង់ឈ្វេងយល់ពីកំណើនសេដ្ឋកិច្ចនៅអាស៊ី”៕

អត្ថបទ ៖ National World , UK និង BC News

The post លោក ម៉ៃឃល នឹងមកខ្មែរចុងសប្ដាហ៍នេះ ជាមួយគណៈប្រតិភូអាមេរិក និងអ្នកព័ត៌មានចក្រភពអង់គ្លេស appeared first on Kampuchea Thmey Daily.

ការបោះបង្គោលព្រំដែន ធ្វើឡើងយ៉ាងហ្មត់ចត់ និងទទួលខុសត្រូវខ្ពស់បំផុត ឈរលើមូលដ្ឋាននៃឯកសារគតិយុត្តបន្សល់ទុកពីសម័យបារាំង

កម្ពុជាថ្មី — Sun, 23 Nov 2025 15:15:26 +0000

មន្ត្រីជាន់ខ្ពស់ នៃរដ្ឋលេខាធិការដ្ឋានកិច្ចការព្រំដែន បានថ្លែងនៅយប់ថ្ងៃទី២៣ ខែវិច្ឆិកា ឆ្នាំ២០២៥ នេះថា ក្នុងរយៈពេលចុងក្រោយនេះ ក្រុមប្រឆាំង និងបណ្តាញសង្គមនៅក្រៅស្រុកព្យាយាមប្រឌិតព័ត៌មាន បំភ្លៃ បំផ្លើស ទាក់ទងនឹងបញ្ហាព្រំដែន ជាពិសេសនៅភូមិព្រៃចាន់ និងភូមិជោគជ័យ ដែលក្រុមការងារបច្ចេកទេសភាគីកម្ពុជា និងថៃ បាន និងកំពុងចុះវាស់វែង និងបង្កើតផែនទីរូបភាព ព្រមទាំងការបោះបង្គោលបណ្តោះអាសន្ននៅចន្លោះបង្គោលព្រំដែនលេខ ៤២ និង៤៧ ស្របតាមស្មារតី នៃកិច្ចប្រជុំគណៈកម្មការចម្រុះខណ្ឌសីមាព្រំដែន (JBC) កម្ពុជា-ថៃ កាលពីថ្ងៃទី២១-២២ ខែតុលា ឆ្នាំ២០២៥ កន្លងទៅ។

មន្ត្រីនៃរដ្ឋលេខាធិការដ្ឋានកិច្ចការព្រំដែនបានថ្លែងថា ការងារវាស់វែង និងស្វែងរុករកទីតាំងពិតប្រាកដនៃបង្គោលព្រំដែនទាំងនេះដែលក្នុង នោះរួមទាំងបង្គោលព្រំដែនលេខ៤២ ដល់ ៤៧ ផងដែរ គឺធ្វើឡើងយ៉ាងហ្មត់ចត់ និងទទួលខុសត្រូវខ្ពស់បំផុត ដោយឈរលើមូលដ្ឋាននៃឯកសារគតិយុត្ត ដែលបន្សល់ទុកពីអាណាព្យាបាលបារាំង ជាពិសេសកំណត់ហេតុ (Procès Verbaux) បោះ បង្គោល របស់គណៈកម្មការកំណត់ព្រំដែនរវាងឥណ្ឌូចិន-សៀម ឆ្នាំ១៩០៨- ១៩០៩ និងគណៈកម្មការបោះបង្គោលព្រំដែនរវាងឥណ្ឌូចិន-សៀម ឆ្នាំ១៩១៩-១៩២០។ ដូច្នេះក្រុមប្រឆាំងនៅក្រៅស្រុកដែលបង្កើតព័ត៌មានក្លែងក្លាយ និងការផ្សព្វផ្សាយព័ត៌មានមិនពិត ញុះញង់ គឺដើម្បីរុញឱ្យខ្លោចរោយឱ្យឆៅលើបញ្ហាព្រំដែនតែប៉ុណ្ណោះ។

មន្ត្រីជាន់ខ្ពស់នៃរដ្ឋលេខាធិការដ្ឋានកិច្ចការព្រំដែន បានអំពាវនាវដល់សាធារណជនជឿទុកចិត្តលើរាជរដ្ឋាភិបាលកម្ពុជា និងគណៈកម្មការចម្រុះខណ្ឌសីមា ព្រំដែនគោក (JBC) កម្ពុជា ដែល ជានិច្ចកាលតែងប្រកាន់ខ្ជាប់នូវមនសិការវិជ្ជាជីវៈ និងការទទួលខុសត្រូវខ្ពស់បំផុត ដោយតម្កល់ ឧត្តមប្រយោជន៍ជាតិជាធំ ជាពិសេសការការពារបូរណភាពទឹកដី និងអធិបតេយ្យជាតិ ដោយប្រកាន់ខ្ជាប់ នូវការគោរពច្បាប់អន្តរជាតិ គោរពគោលការណ៍ ព្រំដែនមិនកែប្រែ និងខ្សែព្រំដែនអន្តរជាតិ កម្ពុជា-ថៃ ដែលបន្សល់ទុក ដោយគណៈកម្មការព្រំដែនរវាង ឥណ្ឌូចិន – សៀម និងកុំជឿលើការញុះញ់ង និងការផ្សាយព័ត៌មានមិនពិតរបស់ក្រុមប្រឆាំង៕

The post ការបោះបង្គោលព្រំដែន ធ្វើឡើងយ៉ាងហ្មត់ចត់ និងទទួលខុសត្រូវខ្ពស់បំផុត ឈរលើមូលដ្ឋាននៃឯកសារគតិយុត្តបន្សល់ទុកពីសម័យបារាំង appeared first on Kampuchea Thmey Daily.

កម្ពុជា បញ្ជូនពលករថៃ ២៨ នាក់ ទៅកាន់ប្រទេសកំណើត តាមច្រកទ្វារព្រំដែនចាំយាម

អ៊ិន ពិសី — Thu, 13 Nov 2025 08:05:45 +0000

ពលករថៃចំនួន ២៨ នាក់ ត្រូវបានបញ្ជូនទៅកាន់ប្រទេសកំណើតពួកគេវិញ បន្ទាប់ពីរកឃើញថា មកធ្វើការខុសច្បាប់នៅព្រះរាជាណាចក្រកម្ពុជា។ នេះបើតាមការបញ្ជាក់របស់នគរបាលប៉ុស្តិ៍អន្តោប្រវេសន៍ច្រកទ្វារព្រំដែនអន្តរជាតិចាំយាម។

សមត្ថកិច្ចអាជ្ញាធរភាគីថៃនៅច្រកព្រំដែនហាតឡេក រង់ចាំទទួលបញ្ជូនបន្តឱ្យវិលត្រឡប់ទៅប្រទេសកំណើតរបស់ពួកគេ ក្រោមកិច្ចទំនាក់ទំនងសហការជាមួយនគរបាលអន្តោប្រវេសន៍ប្រចាំច្រកទ្វារព្រំដែនអន្តរជាតិចាំយាម។

លោកវរសេនីយ៍ឯក ង៉ុយ ជៀង នាយប៉ុស្តិ៍នគរបាលអន្តោប្រវេសន៍ប្រចាំច្រកទ្វារព្រំដែនអន្តរជាតិចាំយាម ថ្លែងនៅថ្ងៃទី ១៣ ខែវិច្ឆិកា ឆ្នាំ ២០២៥ នេះថា ការអនុវត្តច្បាប់ចំពោះពលករថៃ ២៨ នាក់ នៅពេលនេះ ធ្វើឡើងតាមច្បាប់អន្តោប្រវេសន៍ នៃព្រះរាជាណាចក្រកម្ពុជា ដើម្បីសុំគោលការណ៍ទៅក្រសួងមហាផ្ទៃ ទាក់ទងទៅស្ថានទូតថៃ។

នាយប៉ុស្តិ៍នគរបាលអន្តោប្រវេសន៍ដដែល បានបន្តទៀតថា ក្រុមពលករថៃ ២៨ នាក់ បន្ទាប់ពីចុះប្រតិបត្តិការបង្ក្រាបរបស់កងកម្លាំងសមត្ថកិច្ចនាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ បានឃាត់ខ្លួននៅរាជធានីភ្នំពេញ កន្លងទៅ។

លោកនាយប៉ុស្តិ៍នគរបាលអន្តោប្រវេសន៍នៅច្រកទ្វារព្រំដែនចាំយាម ការអនុវត្តច្បាប់ជាធរមានចំពោះជនអន្តោប្រវេសន៍ខុសច្បាប់ធ្វើឡើងមិនចំពោះតែជនជាតិថៃទេ ពោលគឺគ្រប់ជាតិសាសន៍ទាំងអស់ ប្រសិនបើរកឃើញថា មកស្នាក់នៅ ឬធ្វើការងារគ្មានឯកសារអនុញ្ញាតត្រឹមត្រូវ គប្បីអនុវត្តច្បាប់ចាត់បណ្ដេញចេញពីប្រទេសកម្ពុជា៕

អត្ថបទ ៖ សិរីវឌ្ឍនៈ

The post កម្ពុជា បញ្ជូនពលករថៃ ២៨ នាក់ ទៅកាន់ប្រទេសកំណើត តាមច្រកទ្វារព្រំដែនចាំយាម appeared first on Kampuchea Thmey Daily.