ការកាត់សក់ Archives - Kampuchea Thmey Daily

ក្រសួងការងារ និងសមាគមមិត្តយើង រៀបចំកម្មវិធីកាត់សក់ឥតគិតថ្លៃជូន កម្មករ ពលរដ្ឋ ប្រមាណ ៥០០ នាក់ នៅសង្កាត់ចោមចៅទី ១

អ៊ិន ពិសី — Mon, 15 Sep 2025 02:24:25 +0000

លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានអញ្ជើញចូលរួមជាអធិបតីក្នុង”កម្មវិធីសក់ និងសម្រស់មិត្តយើង” ដើម្បីផ្តល់ជូនការកាត់សក់បង្កក់សិរីក្នុងឱកាសភ្ជុំបិណ្ឌ ដោយឥតគិតថ្លៃដល់កម្មករ និងប្រជាពលរដ្ឋ នៅផ្សារត្រពាំងថ្លឹង សង្កាត់ចោមចៅទី ១ ខណ្ឌពោធិ៍សែនជ័យ រាជធានីភ្នំពេញ ក្រោមកិច្ចសហការរវាងក្រសួងការងារ និងបណ្តុះបណ្តាលវិជ្ជាជីវៈ និងសមាគមមិត្តយើង កាលពីព្រឹកថ្ងៃទី ១៤ ខែកញ្ញា ឆ្នាំ ២០២៥។

ថ្លែងទៅកាន់អ្នកចូលរួមនាឱកាសនោះ លោករដ្ឋមន្ត្រី លើកឡើងថា ពិធីកាត់សក់ដែលធ្វើឡើងនាពេលនេះ ជាការបង្កើតភាពជិតស្និទ្ធ និងបង្ខិតទំនាក់ទំនងរវាងមន្ត្រីរាជរដ្ឋាភិបាល អាជ្ញាធរមូលដ្ឋាន ជាមួយនឹងប្រជាពលរដ្ឋនៅមូលដ្ឋាន ជាពិសេសជាការរួមចំណែកកាត់បន្ថយការចំណាយមួយផ្នែករបស់ពលរដ្ឋ និងជាការលើកសម្រស់ និងសិរីសួស្តីដល់អ្នកចូលរួមផងដែរ។

ឆ្លៀតឱកាសនោះ លោករដ្ឋមន្ត្រី បានផ្ដាំផ្ញើដល់កម្មករត្រូវត្រឡប់ទៅស្រុកកំណើតក្នុងឱកាសឈប់សម្រាកបុណ្យភ្ជុំបិណ្ឌខាងមុខនេះ បើបានជួបពលករទើបត្រឡប់មកពីថៃ សូមចូលរួមផ្សព្វផ្សាយឱកាសការងារទៅដល់ពួកគាត់ បើសិនជាសហគ្រាស ក្រុមហ៊ុន រោងចក្រ ដែលកម្មករធ្វើការកំពុងត្រូវការជ្រើសរើសបុគ្គលិក។ លោករដ្ឋមន្ត្រី ក៏បានស្នើឲ្យកម្មករ-និយោជិតទាំងអស់ ជួយផ្សព្វផ្សាយលេខ ១២៩៧ ដើម្បីក្រសួងការងារជួយចុះឈ្មោះស្វែងរកការងារជូន។

ជាមួយគ្នានេះ លោករដ្ឋមន្ត្រី ក៏បានផ្សព្វផ្សាយពីការផ្តល់ជូនសេវាដឹកជញ្ជូនសាធារណៈរថយន្តក្រុងដោយមិនបង់ប្រាក់ក្នុងឱកាសពិធីបុណ្យភ្ជុំបិណ្ឌមានរថយន្តក្រុងជិត ៦០០ គ្រឿង ដែលជាអនុសាសន៍ណែនាំដ៏ខ្ពស់ខ្ពស់របស់ សម្តេចនាយករដ្ឋមន្ត្រី ហ៊ុន ម៉ាណែត ដើម្បីសម្រួលដល់ការចំណាយធ្វើដំណើររបស់ប្រជាពលរដ្ឋ។

ទន្ទឹមនឹងនេះ លោករដ្ឋមន្ត្រី ក៏បានអរគុណដល់សមាគមមិត្តយើង ក្រុមការងារអាជ្ញាធរមូលដ្ឋានក្នុងសង្កាត់ និងខណ្ឌ ទីភ្នាក់ងារជាតិមុខរបរ និងការងារ NEA នៃក្រសួងការងារ ដែលផ្តល់ព័ត៌មានការងារ ជាពិសេសជាងកាត់សក់ស្ម័គ្រចិត្តទាំងអស់ រួមទាំងអ្នកពាក់ព័ន្ធផ្សេងៗ ទៀត ដែលធ្វើឲ្យកម្មវិធីកាត់សក់ជូនកម្មករ-និយោជិត និងប្រជាពលរដ្ឋនៅមូលដ្ឋានសម្រេចបានជោគជ័យ៕

The post ក្រសួងការងារ និងសមាគមមិត្តយើង រៀបចំកម្មវិធីកាត់សក់ឥតគិតថ្លៃជូន កម្មករ ពលរដ្ឋ ប្រមាណ ៥០០ នាក់ នៅសង្កាត់ចោមចៅទី ១ appeared first on Kampuchea Thmey Daily.

ពលរដ្ឋប្រមាណ ៥០០ នាក់ ទទួលបានការកាត់សក់ដោយឥតគិតថ្លៃពី សមាគម«មិត្តយើង»

អ៊ិន ពិសី — Thu, 29 Feb 2024 08:20:49 +0000

ប្រជាពលរដ្ឋប្រមាណ ៥០០ នាក់ ដែលជា កម្មករ កម្មការិនី អ្នកបើកកង់បី តាក់ស៊ី និងប្រជាជនក្នុងសហគមន៍ បានទទួលសេវាកម្មកាត់សក់ដោយមិនគិតថ្លៃពីសមាគម «មិត្តយើង» នៅថ្ងៃព្រហស្បតិ៍ ទី ២៩ ខែកុម្ភៈ ឆ្នាំ ២០២៤ នេះ នាសង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ។

កញ្ញា ផាន់ សុនីតា ប្រធានគណៈកម្មការ ប្រតិបត្តិសមាគម បានលើកឡើងថា ការកាត់សក់ជូនកម្មករ កម្មការិនី និងប្រជាពលរដ្ឋ នេះ គឺជាសកម្មភាពមនុស្សធម៌របស់សមាគមដែលតែងតែធ្វើឡើងជាប្រចាំដោយមិនប្រកាន់អ្វីឡើយ។

បើតាម កញ្ញា ដដែល កម្មវិធីសក់ និងសម្រស់ ដើម្បីមិត្តយើង គឺជាកម្មវិធីដ៏សំខាន់មួយរបស់ សមាគម «មិត្តយើង» រៀបចំឡើងក្នុងគោលបំណងលើកកម្ពស់ការយល់ដឹងអំពីជំនាញហាងសក់ និងសម្រស់ សម្រាប់អ្នកកំពុងស្វែងរកការបណ្ដុះបណ្ដាលវិស័យនេះ ដើម្បីជាមធ្យោបាយលើកកម្ពស់ជីវភាពរស់នៅ។

ប្រធានគណៈកម្មការ ប្រតិបត្តិសមាគម រូបនេះ បានបញ្ជាក់ពីផែនការមនុស្សធម៌របស់ខ្លួននៅឆ្នាំ ២០២៤ នេះថា សមាគម គ្រោងនឹងរៀបចំការកាត់សក់មនុស្សធម៌នេះ ឱ្យបាន ១២ លើក នៅឆ្នាំ ២០២៤ នេះ ដោយរំពឹងថា នឹងអាចជួយដល់ពលរដ្ឋប្រមាណ ១ ម៉ឺននាក់ ទទួលបានការកាត់សក់ ដោយឥតគិតថ្លៃ។ បេសកកម្មរបស់ «មិត្តយើង» គឺដើម្បីពង្រឹងមិត្តភាព សាមគ្គីភាព បង្កើតបណ្ដាញគាំទ្រ ចែករំលែកព័ត៌មាន និងបទពិសោធជាមួយគ្នាក្នុងចំណោមអ្នកជំនាញ ដែលធ្វើការក្រៅប្រព័ន្ធ អ្នកជំនាញបច្ចេកទេស អ្នកផ្តល់សេវា និងអាជីវកម្ម ទាំងជាតិ និងអន្តរជាតិ។

ទន្ទឹមនឹងនេះ សមាគម «មិត្តយើង» បានអំពាវនាវឱ្យប្រជាពលរដ្ឋនៅខណ្ឌពោធិ៍សែនជ័យ ចូលរួមក្នុងកម្មវិធីកាត់សក់ដោយសេរី និងឥតគិតថ្លៃ ដែលគ្រោងនឹងរៀបចំនៅថ្ងៃទី ២៦ ខែមីនា ឆ្នាំ ២០២៤ នេះ៕

The post ពលរដ្ឋប្រមាណ ៥០០ នាក់ ទទួលបានការកាត់សក់ដោយឥតគិតថ្លៃពី សមាគម«មិត្តយើង» appeared first on Kampuchea Thmey Daily.

កាត់ក្រចក កាត់សក់ថ្ងៃណា នឹងជួយឲ្យមានលាភសំណាង ចៀសពីគ្រោះចង្រៃ

សាង ស្រីល័ក្ខ — Thu, 21 Sep 2023 01:00:00 +0000

យោងតាមអប្បិយជំនឿមនុស្សយើង មានជំនឿខុសៗគ្នាជាច្រើនអំពីការមិនកាត់ក្រចក ឬកាត់សក់នៅថ្ងៃណាមួយ។ ប៉ុន្តែជំនឿលើការមិនកាត់ក្រចក ឬកាត់សក់ មានតាំងពីបុរាណកាលមកម្ល៉េះ។ ហើយមនុស្សមួយចំនួននៅតែប្រកាន់ខ្ជាប់និងបន្តអនុវត្តរហូតដល់សព្វថ្ងៃ។

ជំនឿនេះចាប់ផ្ដើមដោយគោលការណ៍ដែលក្រចក និងសក់ជាផ្នែកមួយនៃរាងកាយ។ នៅពេលដែលត្រូវកាត់ក្រចក និងសក់ វាអាចនាំឲ្យមានរឿងអាក្រក់ឬជំងឺអាចកើតឡើងផងដៃរ។

ជំនឿពីបុរាណកាលថា តើយើងគួរកាត់សក់ថ្ងៃណាដើម្បីលាភសំណាង ?

ថ្ងៃអាទិត្យ កាត់សក់ថ្ងៃអាទិត្យ វាត្រូវបានគេជឿថាជីវិតនឹងមានអាយុវែង គ្មានជំងឺ មានសុខភាពល្អរឹងមាំរហូតទៅ។

ថ្ងៃច័ន្ទ ការកាត់សក់របស់អ្នកនៅថ្ងៃច័ន្ទ ត្រូវបានគេជឿថានាំមកនូវសំណាងល្អ។

ថ្ងៃអង្គារ វាត្រូវបានគេជឿថា កាត់សក់នៅថ្ងៃអង្គារ វានឹងធ្វើឲ្យអ្នកជាមនុស្សដែលមានអំណាច និងមហិច្ឆតាធំ។

ថ្ងៃពុធ កុំកាត់សក់របស់អ្នកនៅថ្ងៃពុធ។ ព្រោះជំនឿបែបនេះ នឹងមានការឈ្លោះប្រកែកគ្នា មានទុក្ខលំបាក និងគ្មានសំណាង។

ថ្ងៃព្រហស្បតិ៍ កាត់សក់ថ្ងៃព្រហស្បតិ៍ មានជំនឿថាទេវតា ឬវត្ថុពិសិដ្ឋនឹងការពារអ្នក។

ថ្ងៃសុក្រ ការកាត់សក់របស់អ្នកនៅថ្ងៃសុក្រ ត្រូវបានគេជឿថានាំមកនូវសំណាងល្អ។ ទាក់ទាញដល់អ្នកដែលបានឃើញ ឃើញនឹងចូលចិត្តអាណិតស្រលាញ់។

ថ្ងៃសៅរ៍ ការកាត់សក់របស់អ្នកនៅថ្ងៃសៅរ៍ ត្រូវបានគេជឿថាទទួលបានជោគជ័យ។ អ្វីដែលអ្នកគិត អ្នកនឹងទទួលបានអ្វីដែលអ្នកចង់បាន។

ជំនឿតាំងពីបុរាណកាល៖ តើយើងគួរកាត់ក្រចកនៅថ្ងៃណា ដើម្បីលាភសំណាង?

ថ្ងៃអាទិត្យ ការកាត់ក្រចកថ្ងៃអាទិត្យ មានជំនឿថានឹងមានលាភសំណាង កិត្យានុភាព និងជួបតែរឿងល្អៗដោយមិននឹកស្មានដល់ ។

ថ្ងៃច័ន្ទ ការកាត់ក្រចកនៅថ្ងៃច័ន្ទ ត្រូវបានគេជឿថានាំមកនូវលាភសំណាង ជួយបន្ថែមរឿងល្អៗចូលក្នុងជីវិតរបស់អ្នក។

ថ្ងៃអង្គារ កុំកាត់ក្រចកនៅថ្ងៃអង្គារ ព្រោះគេជឿថានឹងធ្វើឲ្យទ្រព្យសម្បត្តិត្រូវខាតបង់ និងជួបតែសំណាងអាក្រក់។

ថ្ងៃពុធ ការកាត់ក្រចកថ្ងៃពុធ មានជំនឿថាអ្នកនឹងជួបតែភាពរុងរឿង។ វាត្រូវបានចាត់ទុកថាជាថ្ងៃដ៏រីករាយ។

ថ្ងៃព្រហស្បតិ៍ កុំកាត់ក្រចកនៅថ្ងៃព្រហស្បតិ៍ ព្រោះមានជំនឿថា អ្នកនឹងជួបតែទុក្ខ ជួបប្រទះតែឧបសគ្គ។

ថ្ងៃសុក្រ ការកាត់ក្រចកនៅថ្ងៃសុក្រត្រូវបានគេជឿថា នឹងនាំមកនូវភាពរុងរឿងអំពីទ្រព្យសម្បត្តិ មិនខ្វះលុយចាយទេ។

ថ្ងៃសៅរ៍ កុំកាត់ក្រចកនៅថ្ងៃសៅរ៍ ព្រោះគេជឿថា ងាយនឹងឈឺ មិនមានសុខភាពល្អ។

ទោះយ៉ាងណាក៏ដោយ ជំនឿលើការកាត់សក់ ឬកាត់ក្រចក ជាជំនឿផ្ទាល់ខ្លួនតាំងពីបុរាណមក។ ចំណែកអ្នកមិនជឿក៏មិនអីដែរ! ព្រោះជាជំនឿផ្ទាល់ខ្លួន។ អាចជ្រើសរើសតាមចិត្ត និងគិតថាសមហេតុផលប៉ុណ្ណោះ!

គ្រូ ណុប

ចុចអាន៖ធាតុហុងស៊ុយ ៤ ប្រភេទ ជួយអាជីពរលូនទៅមុខឥតឧបសគ្គ និងមានសំណាងល្អក្នុងជីវិត

The post កាត់ក្រចក កាត់សក់ថ្ងៃណា នឹងជួយឲ្យមានលាភសំណាង ចៀសពីគ្រោះចង្រៃ appeared first on Kampuchea Thmey Daily.

ជំនឿកាត់ក្រចក កាត់សក់ កក់សក់ ថ្ងៃណាល្អ និងមិនគួរ ចៀសវាងនាំគ្រោះ

សាង ស្រីល័ក្ខ — Thu, 19 May 2022 00:35:00 +0000

បើយោងតាមជំនឿរបស់អាស៊ីភាគច្រើន គឺមានជំនឿណាស់ មុននឹងធ្វើសកម្មភាពអ្វីមួយ មកលើខ្លួនឯង។ ជាពិសេសជំនឿនៃការកាត់គឺជារឿងធំណាស់ ប្រសិនបើប្រព្រឹត្តិខុស នឹងនាំភាពស៊យឬជួបតែរឿង

ថ្ងៃនេះ គ្រូ ណុប មានជំនឿបុរាណមួយ អំពីការកាត់ក្រចក កាត់សក់ និងកក់សក់ក្នុងថ្ងៃល្អ និងអាក្រក់ ចៀសវាងនាំគ្រោះ។

តើថ្ងៃណាជាថ្ងៃល្អ ដើម្បីកក់សក់?

ថ្ងៃអាទិត្យ៖អាយុវែង

ថ្ងៃច័ន្ទ៖ សំណាងល្អ

ថ្ងៃអង្គារ៖ ដូចកម្ចាត់សត្រូវឲ្យចេញឆ្ងាយ

ថ្ងៃពុធ៖ មិនល្អទេ អាចរងការខូចខាត ឬបែកបាក់

ថ្ងៃព្រហស្បតិ៍៖ ទេវតាទ្រព្យ

ថ្ងៃសុក្រ៖ នាំត្រជាក់ត្រជំ

ថ្ងៃសៅរ៍: ជោគជ័យ នាំកិត្តយស

តើថ្ងៃណាដែលល្អបំផុត ដើម្បីកាត់សក់របស់អ្នក?

ថ្ងៃអាទិត្យ៖ អាយុវែង

ថ្ងៃច័ន្ទ៖ នឹងមានសំណាងល្អ

ថ្ងៃអង្គារៈ ខ្មាំងសត្រូវ នឹងធ្វើទុក្ខបុកម្នេញ

ថ្ងៃពុធ: មានជម្លោះ

ថ្ងៃព្រហស្បតិ៍៖ ទេវតាទ្រព្យ

ថ្ងៃសុក្រ៖ មានសំណាងល្អ

ថ្ងៃសៅរ៍៖ ជោគជ័យ

តើពេលណាជាថ្ងៃល្អបំផុត ដើម្បីកាត់ក្រចក?

ថ្ងៃអាទិត្យ: សត្រូវនឹងឈឺចាប់

ថ្ងៃច័ន្ទ៖ សំណាងល្អ

ថ្ងៃអង្គារ៖ ទ្រព្យសម្បត្តិអាចនឹងបាត់បង់

ថ្ងៃពុធ៖ រុងរឿង

ថ្ងៃព្រហស្បតិ៍ ៖ជួបទុក្ខ

ថ្ងៃសុក្រ៖ មានទ្រព្យសម្បត្តិច្រើន

ថ្ងៃសៅរ៍៖ អាចនឹងឈឺថ្កាត់៕

គ្រូ ណុប

ចុចអាន៖លែងត្រីប្រភេទណា កុំហូបត្រីនោះ ព្រោះបាបខ្លាំងណាស់ តើនេះជាជំនឿពិតទេ?

ចុចអាន៖វត្ថុ ៤ យ៉ាង គេជឿថា ជាស្នេហ៍មុខ ឲ្យគេអាណិតស្រលាញ់ អ្នកនៅលីវយូរឆ្នាំ នឹងជួបគូព្រេង

The post ជំនឿកាត់ក្រចក កាត់សក់ កក់សក់ ថ្ងៃណាល្អ និងមិនគួរ ចៀសវាងនាំគ្រោះ appeared first on Kampuchea Thmey Daily.

ហេតុអ្វីស្រីៗភាគច្រើននិយមកាត់សក់ខ្លី ក្រោយពេលបែកបាក់ស្នេហា

Sonya — Wed, 03 Feb 2021 08:49:33 +0000

ជារឿយៗ យើងតែងតែប្រទះឃើញថា ក្រោយពេលបែកបាក់ស្នេហា មនុស្សស្រីភាគច្រើន រមែងនិយមកាត់សក់របស់ខ្លួនឲ្យខ្លីជាងមុន។ តើមានមូលហេតុអ្វីខ្លះដែលបណ្ដាលឲ្យនាងសម្រេចចិត្តធ្វើរឿងនេះ ក្រោយពេលបែកបាក់គ្នាពីមិត្តប្រុស?

នាងកំពុងតែរីករាយជាមួយសេរីភាពថ្មី៖ ចំពោះគូស្នេហ៍ខ្លះ ពេលកំពុងស្រឡាញ់គ្នា ក៏ចាប់ផ្តើមដាក់កម្រិតទៅលើដៃគូម្ខាងទៀត លើការតុបតែងខ្លួន និងរបៀបរស់នៅផ្សេងៗ។ ដូច្នេះក្រោយពីចែកផ្លូវគ្នា ការកាត់សក់ខ្លីរបស់នារីគឺបង្ហាញពីការចាកចេញពីបន្ទុកនិងសម្ពាធ ក្នុងការធ្វើរឿងរ៉ាវណាមួយដែលនាងស្រឡាញ់ពេញចិត្តសម្រាប់ខ្លួនឯង ដោយមិនចាំបាច់ត្រូវធ្វើការតាមបង្គាប់របស់នរណាម្នាក់ឡើយ។

នាងជាមនុស្សស្រីថ្មីម្នាក់ផ្សេងទៀត៖ ក្រោយពេលមនុស្សស្រីកាត់សក់ខ្លីរួច វានឹងបង្ហាញពីភាពថ្មីប្លែករបស់នាងដែលទម្លាប់ទុកសក់វែងដដែលៗ។ អ្វីដែលគួរឲ្យចាប់អារម្មណ៍វាក៏បានបង្ហាញពីភាពជាមនុស្សថ្មីរបស់នាង ក្រោយពេលដែលស្នេហាចាស់ បានបាត់បង់ទៅ។ ការកាត់សក់ខ្លីក៏បានបញ្ជាក់ប្រាប់ទៅមនុស្សទូទៅថា នាងលែងមាន ជីវិតពាក់ព័ន្ធជាមួយនឹងរឿងរ៉ាវស្នេហាចាស់ៗនាគ្រាអតីតទៀតហើយ។ គ្រប់យ៉ាងនឹងចាប់ផ្តើមថ្មី ប្រៀបដូចជាសក់ដែលកាត់ចោលហើយ វាក៏ចាប់ផ្តើមដុះមកវិញម្ដងទៀតអ៊ីចឹង។

នាងត្រឡប់មកចាប់អារម្មណ៍ទៅលើរូបរាងកាយរបស់ខ្លួនជាថ្មីវិញ៖ ក្រោយពេលកាត់សក់ខ្លីរួច វាជួយឲ្យស្រីៗមានពេលចាប់អារម្មណ៍ខ្លាំងទៅលើការរៀបចំខ្លួនជាមួយនឹងម៉ូតសក់ថ្មី ជាជាងចំណាយពេលនឹកគិតពីភាពឈឺចាប់នៃរឿងរ៉ាវស្នេហាចាស់ៗ។ ការកាត់សក់ខ្លី ក៏អាចជួយឲ្យនាងឆាប់ភ្លេចរឿងមួយចំនួនជាមួយអតីតមិត្តប្រុសបានខ្លះដែរ។ ហេតុផលគឺថា ការទុកសក់វែងដដែលៗ ជួនកាលទៅវាក៏បានរំឭកពីរឿងរ៉ាវ ឬសកម្មភាពចាស់ៗ ដែលធ្លាប់មានជាមួយគ្នាផងដែរ។

នាងបង្ហាញពីភាពរឹងមាំទៅកាន់អតីតមិត្តប្រុស៖ ការកាត់សក់ខ្លីរបស់ស្រីៗ បានបង្ហាញដែរថា នាងពិតជារឹងមាំច្រើន ក្រោយពេលដើរចេញពីមិត្តប្រុសចាស់។ មូលហេតុដោយសារ នាងបានសម្រេចចិត្តយ៉ាងក្លាហាន ក្នុងការកាត់សក់របស់ខ្លួនឯង ដោយមិនមានការស្តាយស្រណោះបន្តិចឡើយ ហើយវាក៏ប្រៀបបានដូចជាស្នេហារបស់នាង និងអតីតមិត្តប្រុស ដែលមិនត្រូវមានរឿងអ្វីពាក់ព័ន្ធជាមួយគ្នាតទៅទៀតនោះដែរ។

នាងព្រមការបើកចិត្តទទួលយកស្នេហាថ្មី៖ ការកាត់សក់ខ្លី ក៏បានបង្ហាញពីការបើកចិត្តទទួលយកស្នេហាជាថ្មីពីបុរសដទៃ និងបានឆ្លុះបញ្ចាំងឲ្យឃើញថា នាងបានត្រៀមលក្ខណៈដើម្បីបើកចិត្តទទួលយកស្នេហាពីមនុស្សប្រុសម្នាក់ផ្សេងដែលអាចជួយឲ្យនាង មានសេចក្តីសុខទាំងផ្លូវកាយ និងផ្លូវចិត្ត៕

ប្រែសម្រួល៖ សន្យា

ប្រភព៖ elite daily

ចុចអាន៖ ពេលដែលមនុស្សស្រីនិយាយពាក្យថា «យើងបែកគ្នាចុះ!»

ចុចអាន៖ មហាសេដ្ឋីយល់ថា ប្រាក់ជាមូលហេតុភាគច្រើននៃការបែកបាក់ស្នេហា

The post ហេតុអ្វីស្រីៗភាគច្រើននិយមកាត់សក់ខ្លី ក្រោយពេលបែកបាក់ស្នេហា appeared first on Kampuchea Thmey Daily.

ការកាត់សក់ Archives - Kampuchea Thmey Daily

ពលរដ្ឋប្រមាណ ៥០០ នាក់ ទទួលបានការកាត់សក់ដោយឥតគិតថ្លៃពី សមាគម«មិត្តយើង»

កាត់ក្រចក កាត់សក់ថ្ងៃណា នឹងជួយឲ្យមានលាភសំណាង ចៀសពីគ្រោះចង្រៃ

ជំនឿកាត់ក្រចក កាត់សក់ កក់សក់ ថ្ងៃណាល្អ និងមិនគួរ​​ ចៀសវាងនាំគ្រោះ

ហេតុអ្វីស្រីៗភាគច្រើននិយមកាត់សក់ខ្លី ក្រោយពេលបែកបាក់ស្នេហា

ជំនឿកាត់ក្រចក កាត់សក់ កក់សក់ ថ្ងៃណាល្អ និងមិនគួរ ចៀសវាងនាំគ្រោះ