កីឡាឃីកបុកស៊ីង Archives - Kampuchea Thmey Daily

Wei Rui ជាកីឡាករឃីកបុកស៊ីងលំដាប់កំពូលប្រចាំប្រទេសចិន ធ្លាប់ឈ្នះកីឡាករកម្ពុជា

Kosal Sem — Thu, 21 May 2026 07:11:51 +0000

ជើងខ្លាំងឃីកបុកស៊ីងលំដាប់កំពូលរបស់ ចិន កីឡាករ Wei Rui ធ្លាប់កាន់កំណត់ត្រាប្រកួតមិនចាញ់សោះរយៈពេល ៦ ឆ្នាំជាប់គ្នា ហើយក្នុងនោះក៏ធ្លាប់មានប្រវត្តិឈ្នះកីឡាករ កម្ពុជា ម្នាក់ផងដែរ។

កីឡាករ Wei Rui

កីឡាកររហស្សនាម «ដាវបិសាច» Wei Rui ត្រូវបានគេចាត់ទុកជាកីឡាករឃីកបុកស៊ីងម្នាក់ស្ថិតនៅលំដាប់កំពូលទាំង ៥ ក្នុងប្រទេស ចិន ហើយបច្ចុប្បន្នរូបគេក៏ជាកីឡាករដ៏មានប្រជាប្រិយភាពខ្លាំងម្នាក់ផងដែរ។ ឆ្លងកាត់អាជីពជាកីឡាករឃីកបុកស៊ីងរយៈពេល ១៣ ឆ្នាំមកនេះ កីឡាករវ័យ ៣៦ ឆ្នាំបានឡើងសង្វៀនចំនួន ៧៥ លើក ក្នុងនោះឈ្នះ ៧០ ដង (ផ្តួលដៃគូឱ្យសន្លប់ ១៤ ដង) ចាញ់ ៥ ដង និងមិនធ្លាប់ស្មើ។

រឿងដ៏គួរឱ្យចាប់អារម្មណ៍បំផុត គឺកីឡាករ Wei Rui ធ្លាប់កាន់កំណត់ត្រាមិនចាញ់សោះយូរបំផុតចំនួន ២ លើក គឺរយៈពេល ៤ ឆ្នាំមួយលើក ពីឆ្នាំ ២០១៤ ដល់ ២០១៨ និងមួយលើកទៀតរយៈពេល ៦ ឆ្នាំពី ២០១៨ ដល់ ២០២៤។ នៅក្នុងចំណោមជ័យជម្នះទាំងនោះ Wei Rui ក៏ធ្លាប់មានប្រវត្តិឈ្នះកីឡាករខ្មែរម្នាក់ដែរ នោះគឺកីឡាករ ផល សោភ័ណ្ឌ ដែលពេលនោះឈ្នះដោយពិន្ទុ នៅទឹកដី កម្ពុជា កាលពីឆ្នាំ ២០២២។

កីឡាករ Wei Rui ឈ្នះផល សោភ័ណ្ឌ

Wei Rui ត្រូវបានគេទទួលស្គាល់ ជាកីឡាករចាស់វស្សា ដែលមានបទពិសោធជោគជាំម្នាក់ក្នុងកីឡាករឃីគបុកស៊ីងនេះ។ រូបគេធ្លាប់បានប្រឡូកនៅសង្វៀនធំៗជាច្រើនដូចជាសង្វៀន Glory of Heroes, K-1, Rise of Heroes, Wu Lin Feng, និង ONE Championship ជាដើម។ កីឡាករសម្បូរបច្ចេកទេសរូបនេះ ធ្លាប់ឈ្នះខ្សែក្រវាត់ធំៗចំនួន ៨ ខ្សែរួមមាន GOH Junior Featherweight ទម្ងន់ ៦៣ គីឡូក្រាម, K-1 Lightweight ទម្ងន់ ៦២.៥ គីឡូក្រាម និងខ្សែក្រវាត់ K-1 World GP ទម្ងន់ ៦២ គីឡូក្រាម។

ខ្សែក្រវាត់ ៥ ខ្សែទៀត គឺនៅសង្វៀន Wu Lin Feng រួមមានខ្សែក្រវាត់ WLF ទម្ងន់ ៦៣ គីឡូក្រាម, ខ្សែក្រវាត់WLF Men’s ទម្ងន់ ៦៣ គីឡូក្រាម, ខ្សែក្រវាត់ Wu Lin Feng Rookie King ទម្ងន់ ៦០ គីឡូក្រាម, ខ្សែក្រវាត់Wu Lin Feng King’s Super Cup ទម្ងន់ ៦៥ គីឡូក្រាម និងពាន Wu Lin Feng Fighter of the Year។

ទោះបីជាយ៉ាងណា ការប្រកួត ២ ប្រកួតចុងក្រោយរបស់ Wei Rui គឺមិនសមប្រកបទាល់តែសោះ ដោយបានចាញ់ ២ ប្រកួតជាប់គ្នា អំឡុងការប្រកួតនៅសង្វៀន ONE Championship កាលពីឆ្នាំ ២០២៥។ កីឡាករបានចាញ់កីឡាករ Jonathan Haggerty ដោយពិន្ទុ និងមួយប្រកួតទៀតបានចាញ់កីឡាករ ជប៉ុន Hiroki Akimoto ដោយពិន្ទុដូចគ្នា៕

កីឡាករ Wei Rui

អត្ថបទ៖ សេម កុសល

The post Wei Rui ជាកីឡាករឃីកបុកស៊ីងលំដាប់កំពូលប្រចាំប្រទេសចិន ធ្លាប់ឈ្នះកីឡាករកម្ពុជា appeared first on Kampuchea Thmey Daily.

Rico ប្រកួតមិនចាញ់ ១១ ឆ្នាំជាប់គ្នា ត្រូវគេប្រសិទ្ធនាមជាស្តេចឃីកបុកស៊ីងពិភពលោក

Kosal Sem — Mon, 11 May 2026 05:20:00 +0000

កីឡាករសញ្ជាតិ ហូល្លង់ Rico Verhoeven ត្រូវបានពិភពលោកប្រសិទ្ធនាមជា «ស្តេចប្រដាល់ឃីកបុកស៊ីងពិភពលោក» បន្ទាប់ពីមានកំណត់ត្រាប្រកួតមិនចាញ់សោះរយៈពេល ១១ ឆ្នាំ និងឈរជាម្ចាស់ខ្សែក្រវាត់ Glory ឃីកបុកស៊ីង ទម្ងន់ធ្ងន់យូរជាងគេបង្អស់នៅក្នុងប្រវត្តិសាស្ត្រ។

ភាពជោគជ័យនៃអាជីពជាកីឡាករឃីកបុកស៊ីងរបស់ Rico មិនមែនជារឿងចៃដន្យនោះទេ ប៉ុន្តែវាកើតឡើងតាមរយៈការហ្វឹកហាត់ បូករួមជាមួយទេពកោសល្យតាំងពីក្មេង។ កុមារ Verhoeven បានកើតនៅប្រទេស ហូងល្លង់ ឆ្នាំ ១៩៨៩ ដោយធំដឹងក្តីឡើងជាមួយការហ្វឹកហាត់ក្បាច់គុនការពារខ្លួនតាំងពីអាយុ ៦ ឆ្នាំ ដោយសារឪពុករបស់គេ គឺជាអ្នកបង្ហាត់ក្បាច់គុនម្នាក់។

កត្តានេះ បានរុញច្រានឱ្យ Rico ចាប់អាជីពជាអ្នកកីឡាប្រយុទ្ធម្នាក់ ដែលអាចប្រកួតបានច្រើនប្រភេទកីឡា ទាំងកីឡាឃីកបុកស៊ីង ប្រដាល់សកល និងក្បាច់គុនចម្រុះ។ យ៉ាងណាមិញ អាជីពដែលជោគជ័យបំផុតសម្រាប់ Rico គឺការប្រកួតកីឡាឃីកបុកស៊ីង ដោយផ្តើមអាជីពតាំងពីឆ្នាំ ២០០៥ មកដល់ ២០២៦ នេះ កីឡាករវ័យ ៣៧ ឆ្នាំ បានឆ្លងកាត់ការប្រកួតចំនួន ៧៦ ដង ក្នុងនោះឈ្នះ ៦៦ ដង (ផ្តួលដៃគូឱ្យសន្លប់ ២១ ដង) និងចាញ់ ១០ ដង។

រឿងដ៏ចាប់អារម្មណ៍បំផុត គឺក្នុងរយៈពេល ១១ ឆ្នាំចុងក្រោយ ពោលតាំងពីឆ្នាំ ២០១៥ មក បន្ទាប់ពីចាញ់ចុងក្រោយទល់នឹងកីឡាករ Andrey Gerasimchuk កីឡាករ Rico មិនទាន់ស្គាល់បរាជ័យនៅឡើយទេ ដោយឆ្លងកាត់ ២២ ប្រកួត ឈ្នះទាំង ២២ ប្រកួត។ រឿងដ៏ពិសេសមួយទៀត គឺ Rico បានឈរជាម្ចាស់ខ្សែក្រវាត់ឃីកបុកស៊ីងទម្ងន់ធ្ងន់ពិភពលោក GLORY Heavyweight World Title យូរជាងគេបំផុត រហូតដល់ទៅ ១១ ឆ្នាំ។

ខ្សែក្រវាត់ GLORY Heavyweight World Title នេះ គឺ Rico ដណ្តើមបានពីកីឡាករ Daniel Ghiță នៅសហរដ្ឋអាមេរិកក្នុងឆ្នាំ ២០១៤។ ក្រោយមក គ្មានកីឡាករណាម្នាក់ អាចដណ្តើមបានពីកីឡាករហូល្លង់រូបនេះឡើយ ដោយមានកីឡាករ ១៥ នាក់ចូលដណ្តើម ហើយជាលទ្ធផលគឺបានចាញ់ទាំងអស់។

បន្ទាប់ពីការពារជោគជ័យបាន ១៥ ដង ដោយកាន់កាប់ដល់ឆ្នាំ ២០២៥ កីឡាករ Rico ក៏បានប្រកាសលះបង់ខ្សែក្រវាត់នេះដោយគ្មានមូលហេតុ។ ការលះបង់ខ្សែក្រវាត់នេះ មិនមែនមានន័យ ថា Rico បញ្ចប់អាជីពនោះទេ ប៉ុន្តែត្រូវបានគេប៉ាន់ស្មាន ថា គាត់ចង់បិទបញ្ចប់សម័យកាលរបស់ខ្លួន ជាកីឡាករ ដែលគ្មាននរណាម្នាក់អាចដណ្តើមបានខ្សែក្រវាត់នេះពីគាត់បាន ឬអាចនឹងប្តូរអាជីពទៅប្រកួតកីឡាផ្សេងវិញ៕

អត្ថបទ៖ សេម កុសល

The post Rico ប្រកួតមិនចាញ់ ១១ ឆ្នាំជាប់គ្នា ត្រូវគេប្រសិទ្ធនាមជាស្តេចឃីកបុកស៊ីងពិភពលោក appeared first on Kampuchea Thmey Daily.

Tenshin ជាជើងខ្លាំងឃីកបុកស៊ីងគ្មានប្រវត្តិចាញ់ មុនពេលចាប់អាជីពប្រដាល់សកល

chean virakbot — Tue, 05 May 2026 05:30:00 +0000

អ្នកលេងឃីកបុកស៊ីង Tenshin Nasukawa បានក្លាយជាកីឡាករឃីកបុកស៊ីងជប៉ុនម្នាក់ទទួលបានជោគជ័យបំផុតគិតចាប់តាំងពីប្រឡូកអាជីពផ្លូវការតាំងពីឆ្នាំ២០១២ និងមិនទាន់ស្គាល់បរាជ័យម្តងណាឡើយជាមួយការគ្រងខ្សែក្រវាត់ជាច្រើនគ្រឿង។

កើតនៅឆ្នាំ១៩៩៨ ដើមឡើយយុវជន Tenshin ចាប់អារម្មណ៍ហ្វឹកហាត់កីឡាការ៉ាតេ Kyokushin ក្នុងវ័យ ៥ ឆ្នាំ ប៉ុន្តែឪពុកធ្លាប់បានបង្ខំឲ្យហាត់ការ៉ាតេ។ រូបគេបានឈ្នះជើងឯកការ៉ាតេ Kyokushin ពិភពលោកកម្រិតយុវជននៅពេលរូបគេរៀនថ្នាក់ទី៥។ បន្ទាប់មក រូបគេបានចាប់អារម្មណ៍កីឡាឃីកបុកស៊ីង។

ឥទ្ធិពលដែលធ្វើឲ្យជំនាញឃីកបុកស៊ីងរបស់ Tenshin ខ្លាំងគឺដោយសារមានមូលដ្ឋានគ្រឹះប្រដាល់សកល មួយថៃ និងការ៉ាតេ។ នៅឆ្នាំ ២០១០ រូបគេបានចាប់ផ្តើមប្រកួតឃីកបុកស៊ីងជាលក្ខណៈមិនអាជីព ឬស្ម័គ្រចិត្តរហូតដល់ឆ្នាំ ២០១២ ដោយឆ្លងកាត់លើសង្វៀនចំនួន ១០៧ដងគឺឈ្នះ៩៩ដង ចាញ់៥ដង និងស្មើ៣ដង។

បន្ទាប់មក រូបគេបានចាប់ផ្តើមប្រកួតឃីកបុកស៊ីងអាជីពរហូតដល់ខែមិថុនា ឆ្នាំ ២០២២ ដោយបានឡើងសង្វៀនចំនួន ៤៤ដង គឺឈ្នះទាំង៤៤ដង ក្នុងនោះផ្តួលដៃគូឲ្យសន្លប់ ៣០ដង និងឈ្នះដោយពិន្ទុតែ ១៤ ដងប៉ុណ្ណោះ ហើយមិនទាន់ស្គាល់បរាជ័យម្តងណាសោះ។

សម្រាប់ការប្រកួតឃីកបុកស៊ីងអាជីព ៤៤ដង រូបគេបានជួបដៃគូខ្លាំងៗលំដាប់ពិភពលោកជាច្រើនមានកីឡាករជប៉ុន ថៃ អាហ្សង់ទីន ហ្វីលីពីន អៀរឡង់ ចិន មារ៉ុក ព័រទុយហ្គាល់ ក្រិក បារាំង កូរ៉េខាងត្បូង និងប្រេស៊ីលជាដើម។ ការប្រកួតទាំងនេះរូបគេទទួលបានតម្លៃរាប់លានដុល្លារអាមេរិក។

អ្វីដែលគួរចាប់អារម្មណ៍បំផុតនោះគឺការប្រកួតចុងក្រោយជាមួយជើងខ្លាំងមិត្តរួមជាតិ Takeru Segawa កាលពីថ្ងៃទី១៩ ខែមិថុនា ឆ្នាំ២០២២ តាមផ្សាយរបស់សារព័ត៌មានថា Tenshin ទទួលបានតម្លៃខ្លួន ២.៥លានដុល្លារអាមេរិក ដែលជាតម្លៃដ៏ខ្ពស់សម្រាប់ប្រដាល់ឃីកបុកស៊ីងលំដាប់ពិភពលោក។

ក្រោយឈប់ប្រកួតកីឡាឃីកបុកស៊ីង Tenshin បានចាប់ផ្តើមអាជីពកីឡាប្រដាល់សកលដែលជាកីឡាប្រើកណ្តាប់ដៃសុទ្ធ។ នៅខែមេសា ឆ្នាំ ២០២៣ រូបគេបានឡើងសង្វៀនប្រដាល់សកលដែលរហូតដល់ពេលនេះបានចំនួន ៩ ប្រកួតហើយគឺឈ្នះ ៩ និងចាញ់ ១។

ក្រៅពីកីឡាឃីកបុកស៊ីង និងសកល កីឡាករ Tenshin ក៏បានប្រកួតគុនចម្រុះ (MMA) ៤ដងគឺឈ្នះទាំង៤ដង។

បើនិយាយពីសមិទ្ធផលសម្រាប់អាជីពឃីបុកស៊ី កីឡាករ Tenshin Nasukawa បានឈ្នះខ្សែក្រវាត់ចំនួន ៧ខ្សែគឺខ្សែក្រវាត់ឃីកបុកស៊ីងពិភពលោក ISKA Oriental Rules Bantamweight (៥៥គក), ខ្សែក្រវាត់ឃីកបុកស៊ីង RISE Bantamweight (៥៥គក), ខ្សែក្រវាត់ឃីកបុកស៊ីង BLADE Japan Cup (៥៥គក), ខ្សែក្រវាត់ Riizin Flyweight (៥៧គក), ខ្សែក្រវាត់ RISE World Series (៥៨គក), ខ្សែក្រវាត់ ISKA Unified Rules Featherwieght (៥៧គក) និងខ្សែក្រវាត់ RISE World Series (៥៨គក)៕

ប្រែសម្រួល៖ វិរបុត្រ

The post Tenshin ជាជើងខ្លាំងឃីកបុកស៊ីងគ្មានប្រវត្តិចាញ់ មុនពេលចាប់អាជីពប្រដាល់សកល appeared first on Kampuchea Thmey Daily.

កីឡាករ Liu Mengyang ជើងខ្លាំងឃីកបុកស៊ីងចិនមានប្រវត្តិមិនធ្លាប់ចាញ់កីឡាករ ថៃ

Kosal Sem — Tue, 21 Apr 2026 05:30:00 +0000

កីឡាករ Liu Mengyang ជាជើងខ្លាំងឃីកបុកស៊ីងរបស់ប្រទេស ចិន បានបង្កើតកំណត់ត្រាដ៏អស្ចារ្យ ដោយមិនធ្លាប់ចាញ់កីឡាករ ថៃ ទាល់តែសោះ រាល់ពេលជួបគ្នាម្តងៗ ហើយរឿងដ៏ពិសេសមួយទៀត គឺរូបគេជាអ្នកទាត់ឱ្យអ្នកប្រដាល់កំពុងឡើងកូដ ថៃ Tawanchai P.K. ខូចជើងកាលពីឆ្នាំមុន។

កីឡាករ Liu Mengyang ទល់នឹង Tawanchai

Liu Mengyang ជាអ្នកប្រដាល់ឃីគបុកស៊ីងជំនាន់ក្រោយរបស់ ចិន ដែលទើបរះឡើងកាលពីឆ្នាំ ២០២១។ កីឡាករកើតនៅឆ្នាំ ២០០២ ដែលបច្ចុប្បន្នមានវ័យ ២៣ ឆ្នាំរូបនេះ មានជំនាញប្រកួតគុនចម្រុះមួយទៀត ក្រៅពីកីឡាឃីគបុកស៊ីង។ រូបគេត្រូវបានគេចាត់ទុកជាតារារះថ្មីម្នាក់ នៃកីឡាឃីគបុកស៊ីងរបស់ ចិន បន្ទាប់ពីឆ្លងកាត់ការប្រកួតអាជីព ៤២ ដង ឈ្នះ ៣៥ និង ចាញ់ ៧ ប្រកួត។

ដ្បិតធ្លាប់មានប្រវត្តិចាញ់ ៧ លើកក៏ពិតមែន ប៉ុន្តែអ្នកលេងជំនាញទាត់ជើងក្រោមរូបនេះ តែងតែធ្វើបានល្អរាល់ពេលជួបជើងខ្លាំងរបស់ ថៃ ដោយធ្លាប់ប្រកួតតទល់ ៤ លើក ទទួលបានលទ្ធផលឈ្នះទាំង ៤ លើក។ កាលពីឆ្នាំ ២០២៣ កីឡាករ Liu Mengyang បានឈ្នះកីឡាករ Seksan ដោយពិន្ទុ។ ឆ្នាំ ២០២៤ រូបគេបានឈ្នះកីឡាករ Sudsakorn Sor Klinmee ដោយពិន្ទុ។

កីឡាករ Liu Mengyang

ឈានចូលឆ្នាំ ២០២៥ កីឡាករ Liu Mengyang បានឈ្នះកីឡាករ Shadow Singha Mawynn នៅសង្វៀន ONE ដោយពិន្ទុ។ ចំណែកនៅចុងឆ្នាំ ២០២៥ រូបគេបានបន្តឈ្នះកីឡាករដ៏ល្បីរបស់ ថៃ មួយរូបទៀតនៅសង្វៀន ONE ដដែល គឺកីឡាករ Tawanchai P.K. ដោយផ្តួលឱ្យបោះបង់ការប្រកួតទឹកទី ១ បន្ទាប់ពីខូចជើងស្តាំ។

ទាំងនេះជាកំណត់ត្រាដ៏ល្អរបស់កីឡាករ ចិន វ័យ ២៣ ឆ្នាំរូបនេះ ដែលការប្រកួតរបស់គេកន្លងមកនៅសង្វៀន ONE ជាពិសេសទល់នឹងកីឡាករ ថៃ មិនដែលចាញ់នោះទេ។ យ៉ាងណា នៅថ្ងៃទី ២២ ខែ មេសា ឆ្នាំ ២០២៦ ខាងមុខនេះ រូបគេនឹងត្រូវជួបកីឡាករ ថៃ មួយរូបទៀតនៅសង្វៀន ONE គឺកីឡាករ Superbon Singha Mawynn៕

កីឡាករ Liu Mengyang ទល់នឹង Tawanchai

អត្ថបទ៖ សេម កុសល

The post កីឡាករ Liu Mengyang ជើងខ្លាំងឃីកបុកស៊ីងចិនមានប្រវត្តិមិនធ្លាប់ចាញ់កីឡាករ ថៃ appeared first on Kampuchea Thmey Daily.

លោក ហេង សុឃន កម្ពុជានឹងធ្វើជាម្ចាស់ផ្ទះកីឡាឃីកបុកស៊ីងជើងឯកអាស៊ី នៅខែធ្នូ ២០២៦

Sina Noun — Fri, 17 Apr 2026 02:42:15 +0000

លោក ហេង សុឃន ប្រធានសហព័ន្ធកីឡាឃីកបុកស៊ីង ថាកម្ពុជានឹងធ្វើជាម្ចាស់ផ្ទះការប្រកួតជ្រើសរើសជើងឯកអាស៊ី ជាលើកទី២ អំឡុងខែធ្នូ ឆ្នាំ២០២៦ ខាងមុខនេះម្ដងទៀត។

លោក ហេង សុឃន

ថ្លែងឲ្យដឹងក្នុងកិច្ចសម្ភាសលោក ហេង សុឃន ប្រធានសហព័ន្ធប្រដាល់ឃីកបុកស៊ីង ថាកម្ពុជានឹងទទួលធ្វើជាម្ចាស់ផ្ទះនៃការប្រកួតជ្រើសរើសជើងឯកអាស៊ី នៅអំឡុងខែធ្នូ ឆ្នាំ២០២៦ នាពេលខាងមុខនេះ។ សហព័ន្ធកំពុងដំណើរការរៀបចំលើការងារផ្សេងៗ។

ប្រធានសហព័ន្ធខាងលើបន្ថែមទៀតថា ការប្រកួតកម្រិតអន្តរជាតិខាងលើនេះក៏មានការឧបត្ថម្ភគាំទ្រពីក្រុមហ៊ុនជីបម៉ុងផងដែរលើដំណើរការរៀបចំនេះ។ ក្នុងនាមសហព័ន្ធប្ដេជ្ញាចិត្តថានឹងដណ្ដើមយកមេដាយឲ្យបានធ្វេដងជូនជាតិមាតុភូមិឲ្យបានច្រើនជាងលើកទី១ទៅទៀត។

ក្រុមកីឡាករ កីឡាការិនីកម្ពុជាទទួលប្រាក់រង្វាន់

បញ្ជាក់ដែរថា អំឡុងឆ្នាំ២០២៤ សហព័ន្ធកីឡាឃីកស៊ីងកម្ពុជាបានរៀបចំការប្រកួតជ្រើសរើសជើងឯកអាស៊ីម្ដងហើយ និងទទួលបានភាពជោគជ័យជាខ្លាំង។ សហព័ន្ធនឹងទទួលធ្វើជាម្ចាស់ផ្ទះនៃព្រឹត្តិការណ៍នេះម្ដងទៀតអំឡុងខែធ្នូ ឆ្នាំ២០២៦ ជាថ្មី៕

អត្ថបទដោយ៖ នួន ស៊ីណា

The post លោក ហេង សុឃន កម្ពុជានឹងធ្វើជាម្ចាស់ផ្ទះកីឡាឃីកបុកស៊ីងជើងឯកអាស៊ី នៅខែធ្នូ ២០២៦ appeared first on Kampuchea Thmey Daily.

លោក ហេង សុឃន ការលើកទឹកចិត្តរបស់រដ្ឋាភិបាលធ្វើឲ្យកីឡានៅកម្ពុជារីកចម្រើន និងមានជីវភាពធូរធា

Sina Noun — Sun, 12 Apr 2026 03:07:02 +0000

លោក ហេង សុឃន ប្រធានសហព័ន្ធកីឡាឃីកបុកស៊ីងកម្ពុជា ថាការលើកទឹកចិត្តរបស់រាជរដ្ឋាភិបាលពិសេសតាំងពីសម័យសម្ដេចតេជោ មកគឺវិស័យកីឡាមានការរីកចម្រើនខ្លាំង និងធ្វើឲ្យកីឡាករ កីឡាការិនីមានជីវភាពធូរធាពីមួយកម្រិតទៅមួយកម្រិតផងដែរ។

ទិដ្ឋភាពទទួលប្រាក់លើកទឹកចិត្ត

ថ្លែងក្រោយទទួលប្រាក់រង្វាន់ពីរាជរដ្ឋាភិបាល លោក ហេង សុឃន ប្រធានសហព័ន្ធកីឡាឃីកបុកស៊ីងបានឲ្យដឹងថា លោកផ្ទាល់រួមទាំងកីឡាករ កីឡាការិនី គោរព និងដឹងគុណជាខ្លាំងចំពោះការយកចិត្តទុកដាក់ និងការជំរុញលើកកម្ពស់លើវិស័យកីឡារបស់សម្ដេចតេជោ សម្ដេចបវរធិបតី។

ប្រធានសហព័ន្ធខាងលើនេះបន្ថែមទៀតថា ក្នុងកាលៈទេសៈវិបត្តិសេដកិច្ចសកល និងស្ថានការណ៍ប្រទេសជួបបញ្ហាផ្សេងៗដូចគ្នាឃើញស្រាប់យ៉ាងណាក្ដី ប្រមខរាជរដ្ឋាភិបាលមិនភ្លេចឡើយការលើកទឹកចិត្តដល់ក្រុមកីឡាករ កីឡាការិនីដែលបានដណ្ដើមជយលាភីមេដាយ និងកិត្តយសលើឆាកអន្តរជាតិនោះឡើយ។ តាមរយៈការឧបត្ថម្ភលើកទឹកចិត្តតាំងពីសម័យសម្ដេចតេជោរហូតមកដល់ពេលនេះគឺពិតជាបានធ្វើឲ្យក្រុមកីឡានៅកម្ពុជាមានជីវភាពរស់នៅកាន់តែធូរធា និងសមរម្យពីមួយកម្រិតទៅមួយកម្រិតផងដែរ។

ទិដ្ឋភាពទទួលប្រាក់លើកទឹកចិត្ត

ជាមួយគ្នានោះដែរលោក ហេង សុឃន មិនភ្លេចនោះឡើយការចូលរួមឧបត្ថម្ភគាំទ្រពីសំណាក់ក្រុមហ៊ុនជីបម៉ុង ដែលមានលោក លាង ម៉េង លាង ឃុន ដែលបានរួមចំណែកធ្វើឲ្យកីឡាករ កីឡាការិនី ឃីកបុកស៊ីង និងគុនខ្មែរកាន់តែមានសមត្ថភាពខ្លាំងពូកែ និងរីកចម្រើននៅពេលនេះ។

ទិដ្ឋភាពទទួលប្រាក់លើកទឹកចិត្ត

បញ្ជាក់ដែរថា កាលពីថ្ងៃទី១០ ខែមេសា ឆ្នាំ២០២៦ នេះរាជរដ្ឋាភិបាលកម្ពុជា បានប្រគល់ថវិកាលើកទឹកចិត្តដល់ម្ចាស់មេដាយមាស ប្រាក់ សំរឹទ្ធ មកពី១៦ ប្រភេទកីឡាដែលបានឈ្នះលើឆាកអន្តរជាតិកន្លងមក។ ទឹកប្រាក់ដែលលើកទឹកចិត្តនោះមានសរុបរហូតដល់ ៥,៩០៣,៤០០,០០០រៀល។ ចំណែកសហព័ន្ធកីឡាឃីកបុកស៊ីងក៏មានកីឡាករ កីឡាការិនី ៣៩នាក់ផងដែរចូលរួមពិធីទទួលប្រាក់រង្វាន់លើកទឹកចិត្តរបស់រាជរដ្ឋាភិបាលផងដែរ៕

The post លោក ហេង សុឃន ការលើកទឹកចិត្តរបស់រដ្ឋាភិបាលធ្វើឲ្យកីឡានៅកម្ពុជារីកចម្រើន និងមានជីវភាពធូរធា appeared first on Kampuchea Thmey Daily.

លោក ហេង សុឃន គ្រោងរៀបចំព្រឹត្តិការណ៍ប្រកួតធំមួយយកតម្លៃខ្លួនកីឡាករចូលមូលនិធិគន្ធបុប្ផា

Sina Noun — Tue, 20 May 2025 02:23:16 +0000

លោក ហេង សុឃន ប្រធានសហព័ន្ធកីឡាឃីកបុកស៊ីងកម្ពុជា បានបង្ហោះផ្សព្វផ្សាយថានៅពេលឆាប់ៗខាងមុខនេះនឹងបង្កើតព្រឹត្តិការណ៍ប្រកួតដ៏ធំមួយដែលមានសុទ្ធតែជើងខ្លាំងប្រចាំនៅកម្ពុជាប្រកួតបែបសប្បុរសធម៌យកតម្លៃខ្លួនចូលទៅមូលនិធិគន្ធបុប្ផា។

រូបភាពហ្វេសបុកលោក ហេង សុឃន

ប្រធានសហព័ន្ធកីឡាឃីកបុកស៊ីងខាងលើនេះបានបង្ហោះ Poster កីឡាករ កីឡាការិនី ជាច្រើនរូបជាមួយ Poster មូលនិធិគន្ធបុប្ផាបញ្ជាក់ថា នឹងមានរៀបចំជាព្រឹត្តិការណ៍ប្រកួតធំមួយដោយយកតម្លៃខ្លួនកីឡាករ កីឡាការិនី ដែលទទួលបាននោះទៅចូលក្នុងមូលនិធិពេទ្យ។

រូបភាពហ្វេសបុកលោក ហេង សុឃន

កីឡាករដែលនឹងយកតម្លៃខ្លួនប្រកួតទៅចូលរួមមូលនិធិគន្ធបុប្ផានោះរួមមាន ព្រំសំណាង, មឿន សុខហ៊ុច, វង្ស ណយ, សុខ រិទ្ធី, ឃុន សុម៉ាលី, ទួន ស្រីភិន, ម៉ុន មើ្យយ, ហុឹម គឹមរៀង និង ឈឿន ឆៃដែន។

នេះជាការរួមចំណែកដ៏សំខាន់មួយពីខាងផ្នែកកីឡាផ្សារភ្ជាប់ជាមួយសង្គមដោយមើលឃើញពីភាពចាំបាច់ និងតម្រូវការចំណាយច្រើនក្នុងមួយខែលើកិច្ចការសង្គ្រោះកុមារខ្មែរដែលមានជំងឺផ្សេងៗ។ យ៉ាងណាការរៀបចំនេះកំពុងដំណើរនៅឡើយទេ ដូច្នេះលោក ហេង សុឃន មិនទាន់អាចបញ្ជាក់ថ្ងៃប្រកួតច្បាស់លាស់នៅឡើយទេដោយបង្ហើបត្រឹមថាឆាប់ៗនេះហើយ៕

រូបភាពហ្វេសបុកលោក ហេង សុឃន

អត្ថបទដោយ៖ នួន ស៊ីណា

The post លោក ហេង សុឃន គ្រោងរៀបចំព្រឹត្តិការណ៍ប្រកួតធំមួយយកតម្លៃខ្លួនកីឡាករចូលមូលនិធិគន្ធបុប្ផា appeared first on Kampuchea Thmey Daily.

កីឡាឃីកបុកស៊ីង Archives - Kampuchea Thmey Daily

Wei Rui ជាកីឡាករឃីកបុកស៊ីងលំដាប់កំពូលប្រចាំប្រទេសចិន ធ្លាប់ឈ្នះកីឡាករកម្ពុជា

Rico ប្រកួតមិនចាញ់ ១១ ឆ្នាំជាប់​គ្នា ត្រូវគេប្រសិទ្ធ​នាមជាស្តេចឃីកបុកស៊ីងពិភព​លោក

Tenshin ជាជើង​ខ្លាំងឃីក​បុក​ស៊ីង​គ្មាន​ប្រវត្តិចាញ់ មុន​ពេល​ចាប់​អាជីពប្រដាល់សកល

កីឡាករ Liu Mengyang ជើងខ្លាំងឃីកបុកស៊ីងចិនមានប្រវត្តិមិនធ្លាប់ចាញ់កីឡាករ ថៃ

លោក​ ហេង​ សុឃន​ កម្ពុជា​នឹង​ធ្វើ​ជា​ម្ចាស់​ផ្ទះ​កីឡា​ឃីកបុកស៊ីង​ជើងឯក​អាស៊ី​ ​នៅ​ខែ​ធ្នូ​ ២០២៦

Rico ប្រកួតមិនចាញ់ ១១ ឆ្នាំជាប់គ្នា ត្រូវគេប្រសិទ្ធនាមជាស្តេចឃីកបុកស៊ីងពិភពលោក

Tenshin ជាជើងខ្លាំងឃីកបុកស៊ីងគ្មានប្រវត្តិចាញ់ មុនពេលចាប់អាជីពប្រដាល់សកល

លោក ហេង សុឃន កម្ពុជានឹងធ្វើជាម្ចាស់ផ្ទះកីឡាឃីកបុកស៊ីងជើងឯកអាស៊ី នៅខែធ្នូ ២០២៦