កីឡាបាល់ទាត់ Archives - Kampuchea Thmey Daily

ឯកឧត្តម ហ៊ុន ម៉ានី ក្រុមបាល់ទាត់ ស.ស.យ.ក អលស្តារ បង្កើតឡើងក្រោមស្មារតី «កីឡា មិត្តភាព សប្បុរសធម៌»

Sina Noun — Wed, 15 Jul 2026 04:15:29 +0000

ឯកឧត្តម ហ៊ុន ម៉ានី នាល្ងាចថ្ងៃទី១៤ ខែកក្កដា ឆ្នាំ២០២៦ បានប្រកាសទទួលស្គាល់សមាសភាពក្រុមបាល់ទាត់ ស.ស.យ.ក អលស្តារ (UYFC All STAR) និងអបអរសាទរចំពោះការបង្កើតក្រុមនេះឡើយក្នុងស្មារតី «កីឡា មិត្តភាព សប្បុរសធម៌»។

ទិដ្ឋភាពពិធីប្រកាស

ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជាបានលើកឡើងថា ដោយផ្អែកលើការរីកចម្រើននៃសកម្មភាពក្រុមបាល់ទាត់ ស.ស.យ.ក អលស្តារ (UYFC All STAR) នេះត្រូវបានសម្រេចបង្កើតឡើងជាផ្លូវការជាជំហានៗរហូតដល់នៅថ្ងៃទី១៣ ខែកក្កដា ឆ្នាំ២០២៦។ ចំពោះសមាសភាពសមាជិកគឺមានសរុប ៨៧រូបដែលមកពីគ្រប់មជ្ឈដ្ឋានរួមមានថ្នាក់ដឹកនាំ និងសមាជិកសកម្មរបស់ ស.ស.យ.ក មន្ត្រីរាជការ ពាណិជ្ជករ សិល្បករ កីឡាករអាជីព អតីតកីឡាករអាជីព និងកីឡាករមកពីក្រុមផ្សេងៗផងដែរ។

ទិដ្ឋភាពពិធីប្រកាស

ក្រុមបាល់ទាត់ ស.ស.យ.ក អលស្តារ (UYFC All STAR) បង្កើតឡើងក្រោមស្មារតី «កីឡា មិត្តភាព សប្បុរសធម៌» និងបង្កើនសាមគ្គីភាពជាតិ។ នាពេលកន្លងមកសហភាពសហព័ន្ធយុវជនកម្ពុជា(ស.ស.យ.ក) បានបង្កើតពានរង្វាន់បាល់ទាត់ និងសកម្មភាពជំរុញលើកស្ទួយវិស័យកីឡាបាល់ទាត់ជាច្រើនរួចមកហើយពិសេសការបំផុសសា្មរតីសាមគ្គីភាព និងចូលរួមលើកិច្ចការសប្បុរធម៌នានា។ បន្តទៅមុខទៀតក្រុមបាល់ទាត់មួយនេះនឹងមានរៀបចំការប្រកួតជាច្រើនទៀតជាមួយបណ្ដាក្រុមបាល់ទាត់ផ្សេងៗដើម្បីរឹតចំណងមិត្តភាព និងការងារសប្បុរធម៌។

ទិដ្ឋភាពពិធីប្រកាស

បញ្ជាក់ដែរថា នៅល្ងាចថ្ងៃទី១៤ ខែកក្កដា ឆ្នាំ២០២៦ នេះ ស.ស.យ.ក ដែលមានឯកឧត្ដម ហ៊ុន ម៉ានី ជាប្រធានបានចូលរួមពិធីប្រកាសទទួលស្គាល់សមាសភាពនៃក្រុមបាល់ទាត់ ស.ស.យ.ក អលស្តារ (UYFC All STAR) ចាប់ពីពេលនេះតទៅ។ ឯកឧត្ដម ហ៊ុន ម៉ានី ជាប្រធានក្រុម និងមានសមាជិកសរុប ៨៧ រូបដែលនឹងរួមចំណែកដំណើរការសកម្មភាព និងអភិវឌ្ឍន៍ក្រុមនេះតទៅថ្ងៃខាងមុខ៕

ទិដ្ឋភាពពិធីប្រកាស

អត្ថបទដោយ៖ នួន ស៊ីណា

The post ឯកឧត្តម ហ៊ុន ម៉ានី ក្រុមបាល់ទាត់ ស.ស.យ.ក អលស្តារ បង្កើតឡើងក្រោមស្មារតី «កីឡា មិត្តភាព សប្បុរសធម៌» appeared first on Kampuchea Thmey Daily.

ក្លិបបាល់ទាត់មន្ទីរឣប់រំខេត្តកំពង់ចាម ទទួលបានការសហការឧបត្ថម្ភពី HSK ជំរុញលើការអភិវឌ្ឍន៍បន្ថែម

Sina Noun — Tue, 16 Jun 2026 09:41:43 +0000

ក្លិបបាល់ទាត់មន្ទីរឣប់រំ យុវជន និងកីឡា ខេត្តកំពង់ចាម នឹងកាន់តែមានការអភិវឌ្ឍន៍បន្ថែមទៀតបន្ទាប់ពីមានការសហការឧបត្ថម្ភគាំទ្រពីសសិប្បកម្មកិនថ្ម HSK ដើម្បីត្រៀមខ្លួនឆ្ពោះទៅកាន់ការប្រកួតសំខាន់ៗនាពេលខាងមុខនេះ។

ក្លិបបាល់ទាត់មន្ទីរឣប់រំខេត្តកំពង់ចាម

លោក កុក ស៊ីជឿន អនុប្រធានក្លិប និងជាអនុប្រធានមន្ទីរអប់រំ យុវជន និងកីឡា ខេត្តកំពង់ចាម និងលោក សាន សុគន្ធ ម្ចាស់សិប្បកម្មកិនថ្មHSK នាព្រឹកថ្ងៃទី១៦ ខែមិថុនា ឆ្នាំ២០២៦ នេះបានចុះអនុស្សរណៈ នៃការយោគយល់គ្នា (MOU) លើការឧបត្ថម្ភគាំទ្ររាល់សកម្មភាព និងការអភិវឌ្ឍន៍វិស័យបាល់ទាត់របស់ក្លឹបមួយនេះ។

ទិដ្ឋភាពចុះ MOU

ឆ្លៀតឱកាសក្នុងនោះដែរអនុប្រធានក្លិបបាល់ទាត់ខេត្តកំពង់ចាម នៅរដូវកាលថ្មីនេះស្វាគមន៍អ្នកជួយគាំទ្រឧបត្ថម្ភជានិច្ច និងថ្លែងអំណរគុណដល់ម្ចាស់ឧបត្ថម្ភទាំងអស់ដែលជួយទ្រទ្រង់សកម្មភាពក្លិបចាប់តាំងពីដើមរហូតមកដល់បច្ចប្បន្ន។ ជាពិសេសគឺមានការជួយគាំទ្រឧបត្ថម្ភពីលោក អ៊ុន ចាន់ដា អភិបាលខេត្តកំពង់ចាម ជាប្រចាំរហូតមក។ ក្លិបទាំងមូលពិតជាមានភាពសប្បាយរីករាយខ្លាំងមែនទែនចំពោះម្ចាស់សិប្បកម្មកិនថ្ម HSK ដែលបានចូលរួមឧបត្ថម្ភគាំទ្រជាផ្នែកធំមួយចំពោះក្លឹបនៅរដូវកាលថ្មីនេះ។

ក្លិបបាល់ទាត់មន្ទីរឣប់រំខេត្តកំពង់ចាម

ចំណែកលោក នួន បូរី គ្រូបង្គោលក្រុមខេត្តកំពង់ចាម បានលើកឡើងថា ដូចជាការរំពឹងទុកឆ្នាំនេះ ក្លិបនឹងបន្តគ្រងជើងឯកម្ដងទៀត និងមានទំនុកចិត្តកាន់តែខ្ពស់។ នាពេលកន្លងទៅកីឡាករមានបទពិសោធន៍ និងបច្ចេកទេសច្រើនក្នុងការលេងហើយ ដូច្នោះការប្តេជ្ញាចិត្តរបស់ក្លិបនឹងធ្វើឲ្យអស់ពីសមត្ថភាពដើម្បីយកជ័យជម្នះឲ្យបាននៅរដូវកាលថ្មីនេះ។

បញ្ជាក់ដែរថា ក្លិបបាល់ទាត់មន្ទីរឣប់រំ យុវជន និងកីឡាខេត្តកំពង់ចាមនឹងចូលរួមការប្រកួតពាន់រង្វាន់ សម្តេចអគ្គមហាសេនាបតីតេជោ ហ៊ុន សែន លើកទី២០ ឆ្នាំ២០២៦ នេះ៕

ក្លិបបាល់ទាត់មន្ទីរឣប់រំខេត្តកំពង់ចាម

អត្ថបទដោយ៖ នួន ស៊ីណា

The post ក្លិបបាល់ទាត់មន្ទីរឣប់រំខេត្តកំពង់ចាម ទទួលបានការសហការឧបត្ថម្ភពី HSK ជំរុញលើការអភិវឌ្ឍន៍បន្ថែម appeared first on Kampuchea Thmey Daily.

ការប្រកួតបាល់ទាត់សប្បុរសធម៌រវាងក្រុមសុខសាន្ត និងតោក្រហម បញ្ចប់ដោយស្នាមញញឹម

Sina Noun — Mon, 15 Jun 2026 02:22:20 +0000

ការប្រកួតបាល់ទាត់សប្បុរសធម៌រវាងក្រុមបាល់ទាត់សុខសាន្ត និងក្រុមតោក្រហម ដើម្បីរៃអង្គាសថវិកាជួយសាងសង់ជម្រកដ៏កក់ក្តៅជូនដល់កុមារងាយរងគ្រោះ និងកុមារកំព្រា ជាង២០០នាក់ នៅមណ្ឌលមែកឈើ កាលពីថ្ងៃទី១៤ ខែមិថុនា ២០២៦ នេះបានបញ្ចប់ដោយលទ្ធផល ៥-៥ និងប្រកបដោយស្នាមញញឹមនៅឯកីឡដ្ឋានបាល់ទាត់ អាយ អេស អាយ ផាក។

ទិដ្ឋភាពប្រកួតម្សិលមិញ

នេះជាការបើកទំព័រប្រវត្តិសាស្ត្រមនុស្សធម៌ថ្មីមួយទៀតរបស់ក្រុមបាល់ទាត់មិនមែនអាជីពគឺក្រុមបាល់ទាត់សុខសាន្ត (Sok San FC) និងក្រុមបាល់ទាត់តោក្រហម (Red Lion Casumina) បានរួមគ្នារៀបចំកម្មវិធីប្រកួតមិត្តភាពសប្បុរសធម៌ប្រចាំឆ្នាំ២០២៦ នៅកីឡដ្ឋាន អាយ អេស អាយ ផាក (ISI Park)។

ទិដ្ឋភាពប្រកួតម្សិលមិញ

ប្រធានក្រុមទាំងពីរខាងលើលើកឡើងថា គំនិតផ្តួចផ្តើមដ៏មានអត្ថន័យនេះកើតចេញពីបេះដូងស្រលាញ់ និងបំណងប្រាថ្នាចង់ផ្តល់ជម្រកដ៏កក់ក្តៅ ព្រមទាំងស្នាមញញឹមឡើងវិញដល់កុមារៗ។ នៅក្នុងឆ្នាំនេះព្រឹត្តិការណ៍ទាំងមូលទទួលបានការគាំទ្រយ៉ាងខ្លាំងពីសំណាក់សប្បុរសជន ដោយទទួលថវិកាពីសប្បុរសធម៌ប្រមាណជាង ៦លានរៀល និងបានប្រគល់ជូនថ្នាក់ដឹកនាំនៃមណ្ឌលមែកឈើដើម្បីយកទៅបំពេញក្តីស្រមៃសង់ផ្ទះជូនកុមារៗប្រមាណជាង ២០០នាក់។

ប្រធានក្រុមសុខសាន្ត

ការប្រកួតបាល់ទាត់សប្បុរសធម៌នេះកើកមានឡើងពីស្មារតីរបស់កីឡាករទាំងពីរក្រុម និងការលៈបង់នូវពេលវេលាចូលហ្វឹកហាត់ ប្រកួត និងពិសេសនោះគឺការរៃអង្គាសថវិកាគ្នានេះតែម្ដងដើម្បីជួយដល់កុមារៗដែលកំពុងជួបការលំបាកក្នុងការរស់នៅប្រចាំថ្ងៃ។ លោកសូមអរគុណចំពោះការលៈបង់ និងទឹកចិត្តដ៏ល្អរបស់ក្រុមទាំងពីរក្នុងការចូលរួមការប្រកួតបាល់ទាត់សប្បុរសធម៌មួយនេះ។ សម្ដីលោក «រាល់ការចូលរួមរបស់បងប្អូន ទោះតិចក្តីច្រើនក្តី គឺក្លាយទៅជាឥដ្ឋ ស៊ីម៉ង់ត៍ ដែក និងជាដំបូលផ្ទះសម្រាប់កុមារៗ»។

ចំណែកលោក ផន ផល្លា ប្រធានមជ្ឈមណ្ឌលមែកឈើ បានថ្លែងអំណរគុណដល់ក្រុមបាល់ទាត់ទាំងពីរព្រមទាំងសប្បុរសជនទាំងអស់ ដែលបានចូលរួមគាំទ្រដល់មណ្ឌលមែកឈើ ជាពិសេសការចូលរួមបរិច្ចាគថវិកា និងសម្ភារៈ តាមរយៈកម្មវិធីប្រកួតបាល់ទាត់មិត្តភាពសប្បុរសធម៌ និងការជាវអាវរបស់លោក ដើម្បីឱ្យលោកមានលទ្ធភាពយកប្រាក់ទាំងអស់នេះទៅផ្គត់ផ្គង់កុមារ និងសាងសង់ជម្រករបស់ពួកគេឱ្យបានចប់សព្វគ្រប់។ ក្នុងឱកាសនោះ លោកផល្លា ក៏បានបន្តសំណូមពរ និងអំពាវនាវដល់សាធារណជន និងសប្បុរជនទាំងអស់ ចូលរួមបរិច្ចាគជាថវិកាក្តី និងសម្ភារៈក្តី ដើម្បីឱ្យកុមារនៃមណ្ឌលមែកឈើមានជម្រកដ៏កក់ក្តៅ។

ទិដ្ឋភាពប្រកួតម្សិលមិញ

គួរបញ្ជាក់ថា ការប្រកួតសប្បុរសធម៌នេះចាប់ផ្តើមនាពេលព្រឹកចាប់ពីម៉ោង ៧ព្រឹក ដល់ម៉ោង ១១ព្រឹកដោយការប្រកួតដំបូងធ្វើឡើងរវាងកុមារក្រោមអាយុ១២ឆ្នាំ និងការជួបគ្នារវាងក្រុម Sok San FC ដឹកនាំដោយលោក ឈុន កុសល និងក្រុម Red Lion Casumina ដឹកនាំដោយលោក ញឹក សេរីវុធ ដែលបានប្រកួតគ្នាយ៉ាងស្វិតស្វាញចំនួន ៣ តង់។ ក្រៅពីអ្នកគាំទ្រផ្ទាល់នៅលើទីលាន ព្រឹត្តិការណ៍នេះក៏បានទាក់ទាញទស្សនិកជនទស្សនាតាមអនឡាញ (ការផ្សាយផ្ទាល់លើទំព័រហ្វេសប៊ុកផ្លូវការ) យ៉ាងច្រើនកុះករផងដែរ៕

ទិដ្ឋភាពប្រកួតម្សិលមិញ

អត្ថបទ៖ នួន ស៊ីណា

The post ការប្រកួតបាល់ទាត់សប្បុរសធម៌រវាងក្រុមសុខសាន្ត និងតោក្រហម បញ្ចប់ដោយស្នាមញញឹម appeared first on Kampuchea Thmey Daily.

អន បូរីហ្សា គ្រាន់តែប្រឡងចប់មកគាំទ្របាល់ទាត់ជម្រើសជាតិភ្លាម និងសន្យាបន្តមកលើកក្រោយៗទៀត

Sina Noun — Thu, 11 Jun 2026 01:52:02 +0000

កញ្ញា អន បូរីហ្សា ថាក្នុងការប្រកួតមិត្តភាពរវាងកម្ពុជា ប៉ះ ប៊ូតង់ លើកមុនរូបគេមិនបានចូលរួមទេដោយសារតែជាប់ប្រឡង ខណៈលើកទី២ ប៉ះ ហុងកុង ដែលទើបបញ្ចប់នេះគឺមិនអាចឃាត់ចិត្តខ្លួនបានឡើងត្រូវតែមកគាំទ្រ និងកាន់តែពេញចិត្តមិនខកបំណងដោយជម្រើសជាតិកម្ពុជាធ្វើបានល្អទៀតផង។

កញ្ញា អន បូរីហ្សា

យុវតីថ្នាក់ទី៩ អន បូរីហ្សា បានឲ្យដឹងថា រូបគេចាប់គាំទ្រវិស័យបាល់ទាត់នៅកម្ពុជាតាំងពីអំឡុងឆ្នាំ២០២០ មកម្ល៉េះ។ ក្នុងជំនួបមិត្តភាពអន្តរជាតិ ២លើកកន្លងទៅនេះរូបគេមិនបានមកទស្សនាគាំទ្រជំនួបជាមួយក្រុមជម្រើសជាតិ ប៊ូតង់ នោះទេដោយសារតែរវល់ប្រឡង។

អ្នកគាំទ្រខាងលើបន្ថែមទៀតថា នៅជំនួបជាមួយ ហុងកុង នេះរូបគេទំនេរក៏ឆ្លៀតមកចូលរួមលើកទឹកចិត្តដល់ក្រុមកម្ពុជាតែម្ដង។ ការមកចូលរួមគាំទ្រនៅថ្ងៃទី៩ មិថុនា ឆ្នាំ២០២៦ នេះគឺមិនធ្វើឲ្យខ្លួនខកបំណងនោះឡើយ ពោលមានកម្លាំងឡើងវិញតែម្ដងបន្ទាប់ពីឃើញលទ្ធផលប្រកួតបើទោះជានឿយហត់ពីការសិក្សាយ៉ាងណាក្ដី។

ក្រុមជម្រើសជាតិកម្ពុជា

កញ្ញា អន បូរីហ្សា ថានឹងបន្តមកគាំទ្រក្រុមបាល់ទាត់ជម្រើសជាតិរហូត ព្រោះការគាំទ្រពីមហាជនគឺបានផ្ដល់កម្លាំងចិត្តដល់កីឡាករ និងបានធ្វើឲ្យវិស័យកីឡាមួយនេះកាន់តែរីកចម្រើនទៅមុនជាបន្តបន្ទាប់ទៀតពិសេសការប្រកួតលើឆាកអន្តរជាតិ។

កញ្ញា អន បូរីហ្សា

បញ្ជាក់ដែរថា រយៈពេលថ្មីៗនេះក្រុមបាល់ទាត់ជម្រើសជាតិកម្ពុជាបានធ្វើការប្រកួតមិត្តភាពអន្តរជាតិចំនួន ២ប្រកួតគឺឈ្នះទាំង ២ប្រកួតគឺលើកទី១ យកឈ្នះលើក្រុមជម្រើសជាតិប៊ូតង់ ដោយលទ្ធផល ៤-០ និងលើកទី២ កាលពីថ្ងៃទី៩ ខែមិថុនា ឆ្នាំ២០២៦ នេះយកឈ្នះលើ ហុងកុង ដោយលទ្ធផល ២-០ ក្រោមក្រសែភ្នែកអ្នកគាំទ្រជាង ២ម៉ឺននាក់៕

អត្ថបទដោយ៖ នួន ស៊ីណា

The post អន បូរីហ្សា គ្រាន់តែប្រឡងចប់មកគាំទ្របាល់ទាត់ជម្រើសជាតិភ្លាម និងសន្យាបន្តមកលើកក្រោយៗទៀត appeared first on Kampuchea Thmey Daily.

ពូឈីវ បើជាទោះរវល់មុខរបររកស៊ីទាំង ១០សាខាយ៉ាងណាក្ដីនៅតែឆ្លៀតមកគាំទ្របាល់ទាត់កម្ពុជាដែរ

Sina Noun — Wed, 10 Jun 2026 04:26:32 +0000

អ្នកគាំទ្របាល់ទាត់យ៉ាងស្ម័គ្រស្មោះ ពូឈីវ ថាបើទោះជារវល់ចំពោះមុខរបររកស៊ីទាំង ១០សាខាយ៉ាងណាក្ដី ប៉ុន្តែរូបលោកនៅតែឆ្លៀតមកគាំទ្រក្រុមជម្រើសជាតិ និងលើកទឹកចិត្តជាការបង្ហាញពីទំហំទឹកចិត្តស្រឡាញ់ចំពោះកីឡាមួយនេះ។

ពូឈីវ មកគាំទ្រកម្ពុជាប៉ះហុងកុង

ពូឈីវ បានឲ្យដឹងថា បច្ចុប្បន្ននេះលោកមានហាងលក់ចំណីអាហាររហូតដល់ទៅ ១០សាខាឯណោះ និងមានភាពមមាញឹកច្រើនផងដែរ។ បើទោះជារវល់ជាមួយមុខរបររកស៊ីដូចបានលើកឡើងនេះក្ដីក៏រូបលោកនៅតែឆ្លៀតមកគាំទ្រក្រុមបាល់ទាត់ជម្រើសជាតិកម្ពុជាផងដែរកាលពីម្សិលមិញនេះ។

ពូឈីវ មកគាំទ្រកម្ពុជាប៉ះហុងកុង

អ្នកគាំទ្រស្ម័គ្រស្មោះរូបនេះបន្ថែមទៀតថា គិតមកដល់ពេលនេះលោកនៅជាមួយបាល់ទាត់ និងលើកទឹកចិត្តក្រុមបាល់ទាត់កម្ពុជាបានរយៈពេល ១០ឆ្នាំមកហើយ។ ការមកគាំទ្រនេះគឺជាក្ដីស្រឡាញ់ និងចង់ជំរុញលើកទឹកចិត្តកីឡាករផង និងលើកស្ទួយវិស័យបាល់ទាត់ឲ្យមានភាពរីកចម្រើនតទៅមុខទៀត។ លោកចង់ឲ្យវិស័យបាល់ទាត់កាន់តែរីកចម្រើនកាន់តែមានសមត្ថភាពខ្លាំងជាបន្តបន្ទាប់ឈានពីមួយកម្រិតទៅមួយកម្រិត និងសំណូមពរប្រជាជនកម្ពុជាចូលរួមគាំទ្រវិស័យបាល់ទាត់កម្ពុជាឲ្យបានកាន់តែច្រើនថែមទៀត។

ពូឈីវ មកគាំទ្រកម្ពុជាប៉ះហុងកុង

បញ្ជាក់ដែរថា ពូឈីវ ក្នុងជំនួបមិត្តភាពអន្តរជាតិរវាង កម្ពុជា ប៉ះ ហុងកុង កាលពីយប់ថ្ងៃទី៩ ខែមិថុនា ឆ្នាំ២០២៦ នេះលោកក៏បានមកចូលរួមលើកទឹកចិត្តក្រុមបាល់ទាត់ជម្រើសជាតិកម្ពុជានៅពហុកីឡដ្ឋានជាតិផងដែរ។ ពូឈីវ ត្រូវបានមហាជនស្គាល់ថាជាអ្នកគាំទ្របាល់ទាត់យ៉ាងស្ម័គ្រស្មោះរយៈពេល ១០ឆ្នាំមកហើយ និងតែងតែបង្ហាញមុខគ្រប់កម្មវិធីប្រកួតបាល់ទាត់ និងការងារសប្បុរសធម៌៕

ពូឈីវ មកគាំទ្រកម្ពុជាប៉ះហុងកុង

អត្ថបទដោយ៖ នួន ស៊ីណា

The post ពូឈីវ បើជាទោះរវល់មុខរបររកស៊ីទាំង ១០សាខាយ៉ាងណាក្ដីនៅតែឆ្លៀតមកគាំទ្របាល់ទាត់កម្ពុជាដែរ appeared first on Kampuchea Thmey Daily.

កម្ពុជា រៀបចំព្រឹត្តិការណ៍ប្រកួត ពានរង្វាន់បាល់ទាត់មិត្តភាពសហគមន៍ខ្មែរ នៅកូរ៉េខាងត្បូង

deth leng — Sun, 07 Jun 2026 06:56:55 +0000

ក្រសួងការងារ និងបណ្តុះបណ្តាលវិជ្ជាជីវៈ ស្ថានទូតកម្ពុជាប្រចាំសាធារណរដ្ឋកូរ៉េ និងសមាគមរាជសីហ៍ នៅថ្ងៃសៅរ៍ទី ០៦ មិថុនា ២០២៦ បានសហការជាមួយរដ្ឋបាលស្រុក អឺមសង់នៃសាធារណរដ្ឋកូរ៉េ រៀបចំព្រឹត្តិការណ៍ប្រកួត “ពានរង្វាន់បាល់ទាត់មិត្តភាពសហគមន៍ខ្មែរនៅសាធារណរដ្ឋកូរ៉េ លើកទី១ ឆ្នាំ២០២៦” ដោយមានក្រុមកីឡាករមកពីតំបន់នានាចំនួន ២១ក្រុម ចូលរួមប្រកួតនៅតារាងបាល់ទាត់ នៅតំបន់អឺមសង់នៃសាធារណរដ្ឋកូរ៉េ។

ព្រឹត្តិការណ៍នេះ មានការអញ្ជើញចូលរួមពី លោក សេង សក្តា រដ្ឋលេខាធិការ និងជាតំណាងលោក ហេង សួរ រដ្ឋមន្រ្តីក្រសួងការងារ លោក ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ លោក ស៊ូម សារឿន ប្រធានសមាគមរាជសីហ៍ និង លោក ចូ ប្យ៉ុងវ៉ុក អភិបាលស្រុកអឹមសង់។

ព្រឹត្តការណ៍នេះ ត្រូវបានរៀបចំឡើងក្រោមស្មារតី «រួមគ្នាដើម្បីសាមគ្គីភាព សុខភាព ការគាំពារសហគមន៍ និងកីឡា» ដើម្បីពង្រឹងចំណងសាមគ្គីភាព និងមិត្តភាព បង្កើតឱកាសដល់បងប្អូនសហគមន៍ខ្មែរ ពលករ ពលការិនី សិស្ស-និស្សិត និងពលករខ្មែរដែលកំពុងរស់នៅ ធ្វើការ និងសិក្សានៅសាធារណរដ្ឋកូរ៉េ បានជួបជុំគ្នាស្និទ្ធស្នាល និងបង្កើនទំនាក់ទំនងល្អ ទោះបីនៅឆ្ងាយពីស្រុកកំណើត។

លើសពីនេះក្នុងព្រឹត្តិការណ៍នេះ ស្ថានទូតក៏មានបើកផ្តល់សេវាសាធារណៈ ប្រឹក្សាការងារចល័ត និងការពិនិត្យសុខភាពឥតគិតថ្លៃ ជួយសម្រួលដល់បងប្អូនប្រជាពលរដ្ឋខ្មែរផងដែរ។

ការប្រកួតបាល់ទាត់មិត្តភាពបានបង្ហាញពីវិន័យ សីលធម៌ និងភាពថ្លៃថ្នូររបស់យុវជនខ្មែរទៅកាន់សហគមន៍អន្តរជាតិ និងម្ចាស់ផ្ទះ តាមរយៈការប្រកួតប្រជែងដោយភាពស្មោះត្រង់មិនមែនផ្តោតលើតែការចាញ់-ឈ្នះ ប៉ុន្តែជាស្ពានចម្លងនៃការយោគយល់ អធ្យាស្រ័យ និងការចេះអត់ឱនឱ្យគ្នាទៅវិញទៅមក (Fair Play) ។

ព្រឹត្តិការណ៍នេះមិនត្រឹមតែជាការប្រកួតកីឡា ដើម្បីស្វែងរកជើងឯកនោះទេ ប៉ុន្តែវាជាព្រឹត្តិការណ៍ មួយដែលបង្ហាញពីការយកចិត្តទុកដាក់ និងការរួមសហការគ្នាយ៉ាងពិតប្រាកដ ដើម្បីមហាគ្រួសារខ្មែរនៅលើទឹកដីនៃសាធារណរដ្ឋកូរ៉េ៕

The post កម្ពុជា រៀបចំព្រឹត្តិការណ៍ប្រកួត ពានរង្វាន់បាល់ទាត់មិត្តភាពសហគមន៍ខ្មែរ នៅកូរ៉េខាងត្បូង appeared first on Kampuchea Thmey Daily.

លោក Koji មើលឃើញពីសក្ដានុពលរបស់ ហាវ សុខណេត រហូតសម្រេចកោះហៅឲ្យចូលក្រុមជម្រើសជាតិ

Sina Noun — Fri, 05 Jun 2026 02:30:37 +0000

គ្រូបង្វឹកជម្រើសជាតិបាល់ទាត់កម្ពុជា លោក Koji ថាការដែលលោកកោះហៅកីឡាករ ហាវ សុខណេត ឲ្យចូលក្រុមជម្រើសជាតិសម្រាប់ការប្រកួតមិត្តភាពនេះគឺដោយសាររូបគេមានសក្ដានុពលពិសេសនោះកាយសម្បទាធំរឹងមាំល្អ។

លោក Koji Gyotoku 

លោក Koji Gyotoku បានឲ្យដឹងថា មូលហេតុដែលលោកកោះហៅកីឡាករ ហាវ សុខណេត មកចូលក្រុមជម្រើសជាតិនេះដោយសារតែមើលឃើញសន្ដានុពលកាយសម្បទាធំ ខ្ពស់ រឹងមាំល្អ។ នៅតាមបណ្ដាក្លឹបបាល់ទាត់ផ្សេងៗគឺមិនសូវមានកីឡាករខ្មែរណាមានមាឌធំល្អបែបនេះនោះទេ ស្របពេលភាគច្រើនគឺប្រើប្រាស់កម្លាំងបរទេស។

ក្រុមជម្រើសជាតិកម្ពុជា

គ្រូបង្វឹកជនជាតិជប៉ុនរូបនេះបន្ថែមទៀតថា នៅប្រកួតក្រោយប្រសិនបើ ហៅ សុខណេត ល្អលោកនឹងដាក់ឲ្យលេងក្នុងជំនួបមិត្តភាពអន្តរជាតិជាមួយហុងកុងមិនខាន។ ប្រសិនបើមានការរិះគន់អំពីការកោះហៅកីឡាករដូចការលើកឡើងយ៉ាងណានោះលោកនឹងពិនិត្យរួចជជែកជាមួយកីឡាករផ្ទាល់ៗ។

ក្រុមជម្រើសជាតិកម្ពុជា

បញ្ជាក់ដែរថា កម្ពុជាមានការប្រកួតមិត្តភាពអន្តរជាតិចំនួន ២ប្រកួតដោយក្នុងនោះប្រកួតទី១ កាលពីថ្ងៃទី៤ ខែមិថុនា ឆ្នាំ២០២៦ យកឈ្នះលើក្រុមជម្រើសជាតិបាល់ទាត់ ប៊ូតង់ ដោយលទ្ធផល ៤-០។ ជំនួបមិត្តភាពទី២ កម្ពុជានឹងប៉ះ ហុងកុង នៅថ្ងៃទី៩ ខែមិថុនា ឆ្នាំ២០២៦។ ការប្រមូលផ្ដុំហ្វឹកហាត់ត្រៀមការប្រកួតកន្លងទៅនេះដែរគេឃើញមានកីឡាករចាស់-ថ្មី ប្លែកមុខមួយចំនួនផងដែរចំពោះការសម្រេចចិត្តកោះហៅរបស់លោក Koji ដែលជាជនជាតិជប៉ុន៕

អត្ថបទដោយ៖ នួន ស៊ីណា

The post លោក Koji មើលឃើញពីសក្ដានុពលរបស់ ហាវ សុខណេត រហូតសម្រេចកោះហៅឲ្យចូលក្រុមជម្រើសជាតិ appeared first on Kampuchea Thmey Daily.

ប្រធាន AFF លោក ខៀវ សាម៉េត គាំទ្រលោក Gianni បន្តជាប្រធាន FIFA អាណត្តិថ្មី

chean virakbot — Sat, 09 May 2026 03:03:56 +0000

ប្រមុខថ្នាក់ដឹកនាំសហព័ន្ធកីឡាបាល់ទាត់អាស៊ីអាគ្នេយ៍ (AFF) បានបង្ហាញពីការប្តេជ្ញាចិត្តដើម្បីធ្វើការជាមួយ សហព័ន្ធកីឡាបាល់ទាត់អន្តរជាតិ (FIFA) សម្តៅឆ្ពោះទៅរកការជំរុញអភិវឌ្ឍកីឡាបាល់ទាត់នៅតំបន់អាស៊ានឲ្យកាន់តែរីកចម្រើន។

ប្រសាសន៍ក្នុងនាមប្រធានសហព័ន្ធកីឡាបាល់ទាត់អាស៊ាន លោក ខៀវ សាម៉េត បានលើកឡើងថា ៖«សហព័ន្ធបាល់ទាត់អាស៊ានផ្តល់តម្លៃលើស្មារតីនៃសាមគ្គីភាព កិច្ចសហប្រតិបត្តិការ និងការគោរពគ្នាទៅវិញទៅមកដែលបញ្ជាក់ពីសហគមបាល់ទាត់សកល ស្ថិតក្រោមការដឹកនាំដ៏ឆ្លាតវៃរបស់លោកប្រធាន Gianni Infantino។ ចក្ខុវិស័យ និងការប្តេជ្ញាចិត្តរបស់លោកប្រធាន FIFA ជាមូលដ្ឋានគ្រឹះដ៏រឹងមាំនៃការប្រកួត និងពង្រីកកាលានុវត្តភាពសម្រាប់ការអភិវឌ្ឍបាល់ទាត់គ្រប់តំបន់»។

«យើងខ្ញុំគាំទ្រលោកប្រធាន Gianni Infantino សម្រាប់អាណត្តិថ្មី និងជឿជាក់ថា ភាពជាអ្នកដឹកនាំរបស់លោកនឹងបន្តនាំផ្លូវបាល់ទាត់ឆ្ពោះទៅរកសុចរិតភាព ភាពរឹងមាំ ការចូលរួម និងកំណើនប្រកបដោយនិរន្តរភាព»។ សំដីសង្កត់ធ្ងន់របស់លោក ខៀវ សាម៉េត។

ក្រោមការដឹកនាំរបស់លោក Gianni Infantino សហព័ន្ធកីឡាបាល់ទាត់អន្តរជាតិបានបន្តពង្រឹកអភិបាលកិច្ច លើកកម្ពស់គុណភាព និងឈានទៅរកការប្រកួតប្រជែង ព្រមទាំងពង្រីកកម្មវិធីប្រកួត ក៏ដូចជាព្រឹត្តិការណ៍កាន់តែច្រើនទូទាំងពិភពលោក។

និយាយដោយឡែកតែតំបន់អាស៊ាន FIFA បានផ្តល់ឳកាសឲ្យរៀបចំកម្មវិធីប្រកួតសំខាន់ៗជាច្រើនដូចជា ជើងឯកពិភពលោកអាយុ ២៣ ឆ្នាំ FIFA U-17 World Cup កាលពីឆ្នាំ ២០២៣ និងកិច្ចប្រជុំកំពូល FIFA Congress លើកទី៧៤ ឆ្នាំ ២០២៥ និងជើងឯកហ្វូតបាលសាលពិភពលោក FIFA Futsal Women’s World Cup ឆ្នាំ ២០២៥។ អ្វីដែលសំខាន់ចុងក្រោយ ពានរង្វាន់ FIFA ASEAN Cup។

លោក Gianni Infantino បានប្រកាសឈរឈ្មោះបោះឆ្នោតជ្រើសរើសជាប្រធាន FIFA អាណត្តិទី៤ របស់លោក ដែលគ្រោងធ្វើនៅឆ្នាំ ២០២៧៕

អត្ថបទ៖ វិរបុត្រ

The post ប្រធាន AFF លោក ខៀវ សាម៉េត គាំទ្រលោក Gianni បន្តជាប្រធាន FIFA អាណត្តិថ្មី appeared first on Kampuchea Thmey Daily.

កីឡាបាល់ទាត់​ Archives - Kampuchea Thmey Daily

ឯកឧត្តម​ ហ៊ុន​ ម៉ានី​ ក្រុម​បាល់ទាត់​ ស.ស.យ.ក​ អលស្តារ​ បង្កើតឡើងក្រោមស្មារតី «កីឡា មិត្តភាព សប្បុរសធម៌»​

ការ​ប្រកួត​បាល់ទាត់​សប្បុរសធម៌​រវាង​ក្រុម​សុខសាន្ត​ និង​តោ​ក្រហម​ បញ្ចប់​ដោយ​ស្នាម​ញញឹម

កម្ពុជា រៀបចំព្រឹត្តិការណ៍ប្រកួត ពានរង្វាន់បាល់ទាត់មិត្តភាពសហគមន៍ខ្មែរ នៅកូរ៉េខាងត្បូង

លោក​ Koji ​មើល​ឃើញ​ពី​សក្ដានុពល​របស់​ ហាវ​ សុខណេត​ រហូត​សម្រេច​កោះ​ហៅ​ឲ្យ​ចូល​ក្រុម​ជម្រើសជាតិ​

ប្រធាន AFF លោក ខៀវ សាម៉េត គាំទ្រ​លោក Gianni បន្ត​ជា​ប្រធាន FIFA អាណត្តិ​ថ្មី

កីឡាបាល់ទាត់ Archives - Kampuchea Thmey Daily

ឯកឧត្តម ហ៊ុន ម៉ានី ក្រុមបាល់ទាត់ ស.ស.យ.ក អលស្តារ បង្កើតឡើងក្រោមស្មារតី «កីឡា មិត្តភាព សប្បុរសធម៌»

ការប្រកួតបាល់ទាត់សប្បុរសធម៌រវាងក្រុមសុខសាន្ត និងតោក្រហម បញ្ចប់ដោយស្នាមញញឹម

លោក Koji មើលឃើញពីសក្ដានុពលរបស់ ហាវ សុខណេត រហូតសម្រេចកោះហៅឲ្យចូលក្រុមជម្រើសជាតិ

ប្រធាន AFF លោក ខៀវ សាម៉េត គាំទ្រលោក Gianni បន្តជាប្រធាន FIFA អាណត្តិថ្មី