កីឡារត់ប្រណាំង Archives - Kampuchea Thmey Daily

រត់-ដើរដើម្បីលើកកម្ពស់ការអាន ធ្វើនៅ ៦ ខេត្ត-រាជធានីផ្សេងគ្នាក្នុងថ្ងៃតែមួយ

chean virakbot — Mon, 20 Apr 2026 04:54:26 +0000

ក្រសួងអប់រំ យុវជន និង កីឡា សហការជាមួយ សារមន្ទីរសេដ្ឋកិច្ច និងរូបិយវត្ថុ ព្រះស្រីឦសានវរ្ម័ន (ស.ស.រ) ក្រោមការឧបត្ថម្ភពីគ្រឹះស្ថាន អម្រឹត នឹងរៀបចំព្រឹត្តិការណ៍«រត់-ដើរដើម្បីលើកកម្ពស់ការអាន»ទ្រង់ទ្រាយធំទាំងនៅរាជធានីភ្នំពេញ និងតាមបណ្តាខេត្ត ៥ ផ្សេងទៀត។

ព្រឹត្តិការណ៍ រត់-ដើរដើម្បីលើកកម្ពស់ការអាន ក្រោមមូលបទ«១ ម៉ឺនជំហាន ដើម្បីសិស្ស ១ ម៉ឺននាក់»គ្រោងនឹងធ្វើនៅថ្ងៃអាទិត្យ ទី២៤ ខែឧសភា ឆ្នាំ ២០២៦ នៅ ៦ ខេត្ត-រាជធានីផ្សេងគ្នា។ ទី១ ស្ថិតនៅមជ្ឈមណ្ឌលកោះពេជ្រ ក្នុងរាជធានីភ្នំពេញ និង ៥ ខេត្តទៀតស្ថិតនៅ ខេត្តបាត់ដំបង កំពត ស្វាយរៀង តាកែវ និង រតនគិរី។

គោលបំណងសំខាន់នៃព្រឹត្តិការណ៍គឺលើកកម្ពស់វិស័យអប់រំដែលជាអាទិតភាពរបស់រាជរដ្ឋាភិបាលកម្ពុជា។ ការចូលរួមផ្សព្វផ្សាយពីសារសំខាន់នៃការអាន ដើម្បីបណ្តុះទម្លាប់នៃការអានក្នុងជីវិតប្រចាំថ្ងៃ និងជំរុញវប្បធម៌អាន ព្រមទាំងចូលរួមផ្សព្វផ្សាយពីប្រវត្តិសាស្ត្ររូបិយវត្ថុខ្មែរនៅសារមន្ទីរ ស.ស.រ ដែលជាសារមន្ទីរទំនើប និងដំបូងគេបង្អស់សម្រាប់ការផ្តល់ចំណេះដឹងអំពីទំនាក់ទំនងរវាង សេដ្ឋកិច្ច រូបិយវត្ថុ និងសង្គមក្នុងប្រវត្តិសាស្ត្រកម្ពុជា។

ក្នុងសន្និសីទសារព័ត៌មាន ព្រឹកថ្ងៃទី២០ ខែមេសា ឆ្នាំ ២០២៦ នៅទីស្នាក់ការគណៈកម្មាធិការជាតិអូឡាំពិកកម្ពុជា លោក ដុស ឌីន អគ្គនាយកគ្រឹះស្ថានមីក្រូហិរញ្ញវត្ថុអម្រិត បានថ្លែងថា ការរៀបចំព្រឹត្តិការណ៍ដ៏ធំរហូតដល់ ៦ ខេត្ត-រាជធានីផ្សេងគ្នាក្នុងថ្ងៃតែមួយនេះឡើងដើម្បីលើកកម្ពស់ការអប់រំ សុខភាព និងសាមគ្គីភាពតាមរយៈសកម្មភាពកីឡាដោយផ្តោតគោលដៅសំខាន់ ៣ យ៉ាង។ ទី១. ថវិកាដែលទទួលបានពីព្រឹត្តិការណ៍រត់ជួយឧបត្ថម្ភដល់ ទិវាអំណានជាតិ និងពិព័ណ៌សៀវភៅថ្នាក់ជាតិរយៈពេល ៣ ឆ្នាំ។ ទី២ ប្រមូលសិស្សានុសិស្សឲ្យបានចំនួន ១ ម៉ឺននាក់ដើម្បីធ្វើទស្សនកិច្ចសិក្សានៅសារមន្ទីរ ស.ស.រ ដើម្បីសិក្សាស្វែងយល់ពីប្រវត្តិសាស្ត្រនៃវិស័យសេដ្ឋកិច្ច រូបិយវត្ថុ និងសង្គម នៅកម្ពុជាតាំងពីសម័យបុរាណ រហូតដល់បច្ចុប្បន្នរយៈពេល ៣ឆ្នាំ និងទី៣ ដើម្បីផ្សព្វផ្សាយពីសារសំខាន់នៃការអាននៅតាមបណ្តាខេត្តនានារយៈពេល ៣ ឆ្នាំ។

ជាមួយគ្នានេះ លោក ប្លែស គីលីយ៉ង់ សហប្រធានសារមន្ទីរ សេដ្ឋកិច្ច និងរូបិយវត្ថុ ព្រះស្រីឦសានវរ្ម័ន បានលើកឡើងថា សារមន្ទីរ ស.ស.រ មិនត្រឹមតែជាកន្លែងអភិរក្សប៉ុណ្ណោះទេ ប៉ុន្តែថែមទាំងជាទីតាំងផ្តល់ចំណេះដឹង ការអប់រំ និងឯកសារជាប្រវត្តិសាស្ត្រតាំងពីសម័យបុរាណ រហូតដល់បច្ចុប្បន្នដល់សិស្ស និស្សិត និងមហាជនដែលសិក្សាស្វែងយល់ ស្រាវជ្រាវ អំពីវិស័យ សេដ្ឋកិច្ច និងរូបិយវត្ថុ នៅកម្ពុជា។

គិតត្រឹមថ្ងៃទី២០ ខែមេសា ឆ្នាំ ២០២៦ មានអ្នកចុះឈ្មោះចូលរួមរត់ប្រមាណ ៥០០នាក់ហើយ ខណៈផែនការគ្រោងទុកហោចណាស់ឲ្យមានអ្នកចូលរួមចន្លោះពី ២០០០ ទៅ ២០០០ នាក់នៅកោះពេជ្រ រាជធានីភ្នំពេញ។ វិញ្ញាសាមានចម្ងាយ ១០ គីឡូម៉ែត្រ ៥គីឡូម៉ែត្រ និង ២.៥គីឡូម៉ែត្រ ព្រមទាំងផ្តល់ជូនរង្វាន់ដល់អ្នករត់ផ្សេងៗទៀតដូចជា អ្នករត់ជាក្រុម ជាគ្រួសារ និងអ្នករត់ដែលមានសម្លៀកបំពាក់ទាក់ទាញដែលផ្តោតលើការអប់រំ៕

អត្ថបទ៖ វិរបុត្រ

The post រត់-ដើរដើម្បីលើកកម្ពស់ការអាន ធ្វើនៅ ៦ ខេត្ត-រាជធានីផ្សេងគ្នាក្នុងថ្ងៃតែមួយ appeared first on Kampuchea Thmey Daily.

វិទ្យាល័យព្រែកលៀបជំនាន់ថ្មី មានចក្ខុវិស័យវែងឆ្ងាយ ដោយចាប់ដៃគូក្លឹបរត់-ជីរ៉ាន់ ឲ្យជួយបង្ហាត់កីឡារត់

Kosal Sem — Thu, 19 Mar 2026 07:54:07 +0000

គ្រូនាយកសាលាវិទ្យាល័យព្រែកលៀបជំនាន់ថ្មី លោក ឆុំ សុភក្តិ បានសម្លឹងឃើញចក្ខុវិស័យវែងឆ្ងាយអំពីកីឡាគ្រប់ប្រភេទ ជាពិសេសកីឡារត់ប្រណាំងសម្រាប់សិស្សានុសិស្សរបស់ខ្លួន បន្ទាប់ពីបានសហការជាមួយក្លិបរត់ ជីរ៉ាន់-កម្ពុជា។

នៅព្រឹកថ្ងៃ ព្រហស្បតិ៍ ទី ១៩ ខែ មីនា ឆ្នាំ ២០២៦ វិទ្យាល័យព្រែកលៀប (សាលាជំនាន់ថ្មី) បានធ្វើពិធីចុះអនុស្សរណៈយោគយល់គ្នាជាមួយក្លិបរត់ ជីរ៉ាន់-កម្ពុជា ដើម្បីលើកកម្ពស់សុខភាព និងបញ្ញាស្មារតី តាមរយៈកម្មវិធីហ្វឹកហាត់ត្រឹមត្រូវដល់សិស្សានុសិស្សរបស់ខ្លួន ជាមួយក្រុមអ្នកជំនាញ បន្ថែមលើកម្មវិធីអប់រំកាយ និងកីឡា។

លោក ឆុំ សុភក្តិ មានប្រសាសន៍ ថា ការចុះកិច្ចសហការគ្នាជាមួយក្លិបរត់ ជីរ៉ាន់-កម្ពុជា បានក្លាយជាសកម្មភាពបន្ថែម ដើម្បីឱ្យសិស្សានុសិស្សទទួលបានឱកាសលេងកីឡា បន្ទាប់ពីការរៀនសូត្រពេញមួយថ្ងៃ។ អត្ថប្រយោជន៍នៃកិច្ចសហការនេះ នឹងធ្វើឱ្យសិស្សានុសិស្សរបស់លោកបានហ្វឹកហាត់កីឡារត់ជាមួយអ្នកជំនាញច្បាស់លាស់ ដើម្បីទទួលបានសុខភាពល្អ និងកាត់បន្ថយសម្ពាធ បន្ទាប់ពីការរៀនសូត្រ។

ទន្ទឹមនឹងនេះ លោកគ្រូក៏បានរំពឹងខ្ពស់ផងដែរ ថា បន្ទាប់ពីការហ្វឹកហាត់នេះ សិស្សានុសិស្សរបស់វិទ្យាល័យព្រែកលៀប នឹងអាចចូលរួមប្រកួតប្រជែងកីឡារត់នេះ ដើម្បីតំណាងឱ្យសាលា មន្ទីររាជធានី ស្ថាប័នផ្សេងៗ នៅក្នុងថ្នាក់ជាតិ និងអន្តរជាតិជាដើម។

ដោយឡែកប្រធានក្លិបរត់ជីរ៉ាន់-កម្ពុជា កញ្ញា យ៉ាន់ សុជី ក៏បានសម្លឹងឃើញចក្ខុវិស័យវែងឆ្ងាយផងដែរអំពីការចុះអនុស្សរណៈយោគយល់គ្នានេះដែលនឹងអាចក្លាយជាផ្នែកមួយនៃការអភិវឌ្ឍធនធានមនុស្ស យុវជនជំនាន់ក្រោយទៅលើផ្នែកកាយសម្បទា និងបំផុសស្មារតីកីឡា ក្រោមយុទ្ធសាស្រ្តមួយរបស់រាជរដ្ឋាភិបាល «ពលរដ្ឋម្នាក់លេងកីឡាមួយប្រភេទ»។

កញ្ញា បានបន្ថែម ថា ការសហការនេះ គឺក្លិប ជីរ៉ាន់-កម្ពុជា នឹងនាំយកនូវបទពិសោធ បច្ចេកទេស និងស្មារតីកីឡា ដើម្បីចូលរួមអភិវឌ្ឍកម្មវិធីកីឡានៅក្នុងសាលារៀនជំនាន់ថ្មី ព្រែកលៀប ឱ្យកាន់តែសម្បូរបែប។ កញ្ញា ប្តេជ្ញាជម្រុញសិស្សានុសិស្សឱ្យយល់ដឹងពីតម្លៃនៃសុខភាព និងកសាងសហគមន៍យុវជន ដែលស្រឡាញ់ការលេងកីឡា ដើម្បីជៀសឆ្ងាយអំពើអបាយមុខផ្សេងៗ៕

អត្ថបទ៖ សេម កុសល

The post វិទ្យាល័យព្រែកលៀបជំនាន់ថ្មី មានចក្ខុវិស័យវែងឆ្ងាយ ដោយចាប់ដៃគូក្លឹបរត់-ជីរ៉ាន់ ឲ្យជួយបង្ហាត់កីឡារត់ appeared first on Kampuchea Thmey Daily.

កីឡារត់ប្រណាំងជាកីឡាមួយបង្កើនមិត្តភាពសាមគ្គីភាពពិសេសព្យាបាលជំងឺ Depression

Sina Noun — Tue, 17 Mar 2026 02:14:03 +0000

លោក មេន ឌី ថាកីឡាអត្តពលកម្ម ឬកីឡារត់ប្រណាំងនេះជាកីឡាមួយជួយបង្កើនចំណងមិត្តភាពរវាងគ្នានិងគ្នា ថែមទាំងមានសាមគ្គីភាពទៀតផងពិសេសអ្នកដែលមានបញ្ហាផ្លូវចិត្ត (Depression) គួរព្យាយាមហ្វឹកហាត់សាកល្បងបាន។

លោក មេន ឌី

អ្នករត់ប្រណាំងមួយរូបនៅកម្ពុជាគឺលោក មេន ឌី ថាកីឡារត់នេះមានសារប្រយោជន៍ច្រើនចំពោះសុខភាព និងការរស់នៅប្រចាំថ្ងៃតែម្ដង។ កីឡារត់នេះមិនត្រឹមតែផ្ដល់ឲ្យមានសុខភាពល្អនោះទេ ពោលបានបង្កើតឲ្យមានទំនាក់ទំនងល្អក្នុងសង្គមតាមរយៈជួបជជែកផ្លាស់ប្ដូរយោបល់ល្អៗ និងចែករំលែកចំណេះដឹងគ្នាទៅវិញទៅអំពីការរត់ជាដើម។

លោក មេន ឌី

អ្នកផលិតមាតិការូបនេះបន្ថែមទៀតថា លោកលើកទឹកចិត្តចំពោះអ្នកមានបញ្ហាផ្លូវចិត្ត (Depression) ដែលព្យាយាមដកខ្លួនចេញពីសង្គម និងតែងតែនៅស្ងាត់តែម្នាក់ឯងៗនោះគួរសាកល្បងមកលេងកីឡារត់មួយនេះ ព្រោះអាចព្យាបាលឲ្យជាពីជំងឺនេះបាន។ លោកធ្លាប់ជួយអ្នកមានជំងឺនេះរួចហើយគឺអ្នកទាំងនោះថា បន្ទាប់ពីចូលរួមរត់លេងគឺបានស្គាល់មិត្តភ័ត្រ ស្គាល់គេឯង បានជជែកជាមួយអ្នករត់ដូចគ្នា និងចាប់ផ្ដើមមានក្ដីសង្ឃឹមឡើងវិញរហូតជាពីជំងឺនេះផងដែរ។

លោក មេន ឌី

បញ្ជាក់ដែរថា នាពេលបច្ចុប្បន្ននេះកីឡារត់ប្រណាំង ឬអត្តពលកម្មនេះមានការគាំទ្រច្រើននៅកម្ពុជាពិសេសនៅរាជធានីភ្នំពេញ។ គេសង្កេតឃើញថារាល់ព្រឹត្តិការណ៍រត់ប្រណាំងមិនថាតូច-ធំ នោះទេតែងតែមានការចូលរួមច្រើនពីសាធារណៈជន។ លើសពីនេះគេឃើញមានបណ្ដាក្រុមរត់ធំៗមួយចំនួនព្យាយាមបង្កើតព្រឹត្តិការណ៍រត់កម្សាន្ត និងបែបសប្បុរសធម៌ក៏ច្រើនផងដែរបច្ចុប្បន្ន៕

អត្ថបទដោយ៖ នួន ស៊ីណា

The post កីឡារត់ប្រណាំងជាកីឡាមួយបង្កើនមិត្តភាពសាមគ្គីភាពពិសេសព្យាបាលជំងឺ Depression appeared first on Kampuchea Thmey Daily.

អ្នកចង់ទទួលបានបទពិសោធផ្លូវរត់ថ្មី និងបរិយាសតាមឆ្នេរសមុទ្រគួរទៅចូលរួមម៉ារ៉ាតុងនៅខេត្តព្រះសីហនុ

Sina Noun — Fri, 06 Mar 2026 03:30:50 +0000

មិនថាអ្នករៀបចំ ឬអ្នកជំនាញរត់ប្រណាំងមួយចំនួននោះទេសុទ្ធតែលើកទឹកចិត្តដល់សាធារណៈជនឲ្យចូលរួមកម្មវិធីពាក់កណ្ដាលម៉ារ៉ាតុងអន្តរជាតិ លើកទី១១ នៅខេត្តព្រះសីហនុប្រសិនបើចង់ទទួលបានបទពិសោធថ្មី បរិយាកាសប្លែកអារម្មណ៍ពីការរត់មុនៗ។

លោក វ៉ាត់ ចំរើន (រូបភាពផេក SIH)

លោក វ៉ាត់ ចំរើន អគ្គលេខាធិការ NOCC បានឲ្យដឹងថា អ្នកដែលធ្លាប់រត់នៅទីលានភ្នំពេញ ឬទីលានផ្សេងៗកន្លងមកសូមងាកមកចូលរួមជាថ្មីនៅក្នុងការប្រកួតពាក់កណ្ដាលម៉ារ៉ាតុងអត្តរជាតិឯខេត្តព្រះសីហនុ នៅថ្ងៃទី២២ ខែមីនា ឆ្នាំ២០២៦ នេះបន្តទៀត។ នេះជាការផ្លាស់ប្ដូររបត់រត់ថ្មី និងទទួលបាននូវបរិយាកាសប្លែកថ្មីតាមបណ្ដោយឆ្នេរសមុទ្រ និងជាការជម្នះសម្រាប់ខ្លួនឯងថ្មីផ្សេងៗដែលមិនទាន់បានជួបកន្លង។

លោក មេន ឌី រត់កន្លងទៅ

ចំណែកលោក មេន ឌី ដែលជាអ្នកលេងកីឡាអត្តពលកម្ម និងជាអ្នកផលិតវីដេអូខ្លីៗពីកីឡាមួយនេះបានឲ្យដឹងដែរថា ផ្លូវរត់ថ្មីសម្រាប់ថ្ងៃទី២២ កុម្ភៈ នេះអាចនឹងជាឧបសគ្គថ្មីសម្រាប់អ្នកមិនធ្លាប់រត់។ ដោយសារតែផ្លូវថ្មីដែលត្រូវរត់នេះមានចំណុចដែលត្រូវឡើងទួលខ្ពស់អ្នកមិនធ្លាប់ឆ្លងកាត់ឧបសគ្គនេះអាចនឹងបោះបង់ត្រង់កន្លែងនេះក៏ថាបាន។

មេន ឌី បន្ថែមទៀតថា លោកលើកទឹកចិត្តដល់អ្នករត់ទាំងអស់គួរទៅចូលរួមការរត់នៅឯខេត្តព្រះសីហនុនេះ ព្រោះជាបទពិសោធរត់ថ្មីផង និងពិសេសនោះគឺទៅទទួលយកនូវខ្យល់អាកាសត្រជាក់នៅពេលរត់តាមបណ្ដោយឆ្នេរសមុទ្រអមដោយទេសភាពស្អាតប្លែកខុសពីការរត់នៅភ្នំពេញ ឬរត់នៅខេត្តសៀមរាប។

រូបភាពផេក SIH

បញ្ជាក់ផងដែរថា ទិវារត់ប្រណាំងអន្តរជាតិពាក់កណ្ដាលម៉ារ៉ាតុងនេះនឹងធ្វើឡើងនៅឯខេត្តព្រះសីហនុ ថ្ងៃទី២២ ខែមីនា ឆ្នាំ២០២៦។ គណៈកម្មការរៀបចំនៅតែទទួលការចុះឈ្មោះចូលរួមពីសាធារណៈជនដែលមានបំណងចង់ទៅរត់លេងកម្សាន្តក្នុងកម្មវិធីខាងលើនេះ។ អ្នកចង់ចុះឈ្មោះអាចទំនាក់ទំនងទៅកាន់ហ្វេសបុក ឬវេបសាយ Cambodia Events Organizer (015 213 525 / 069 213 525 / 077 213 525)/(Telegram: +85515213525 or https://t.me/CambodiaMarathon)៕

អត្ថបទដោយ៖ នួន ស៊ីណា

The post អ្នកចង់ទទួលបានបទពិសោធផ្លូវរត់ថ្មី និងបរិយាសតាមឆ្នេរសមុទ្រគួរទៅចូលរួមម៉ារ៉ាតុងនៅខេត្តព្រះសីហនុ appeared first on Kampuchea Thmey Daily.

លោក Mendy អ្នកផលិតវីដេអូអំពីកីឡារត់ប្រណាំងចែករំលែកពីគុណប្រយោជន៍នៃកីឡាមួយនេះ

Sina Noun — Thu, 05 Mar 2026 08:22:39 +0000

លោក មេន ឌី ដែលអ្នកគាំទ្រវិស័យកីឡារត់ប្រណាំងស្គាល់នៅលើបណ្ដាញសង្គមតាមរយៈការធ្វើវីដេអូគន្លឹះសំខាន់ៗក្នុងការលេងកីឡាមួយនេះបានរំលែកបទពិសោធល្អៗ និងការទទួលបានសុខភាពរឹងមាំទាំងផ្លូវកាយផ្លូវចិត្តបន្ទាប់ពីហ្វឹកហាត់អស់ជាច្រើនឆ្នាំមកនេះ។

លោក មេន ឌី

លោក មេន ឌី បានឲ្យដឹងថា ចាប់ផ្ដើមហ្វឹកហាត់កីឡាមួយនេះតាំងពីអំឡុងឆ្នាំ២០១៩ មកម្ល៉េះ និងកំពុងបន្តជារៀងរាល់ថ្ងៃផងដែរ។ កីឡារត់ប្រណាំង ឬអត្តពលកម្មនេះពិតជាបានផ្ដល់នូវគុណប្រយោជន៍យ៉ាងច្រើនចំពោះសុខភាពរស់នៅប្រចាំថ្ងៃរបស់ខ្លួន។

លោក មេន ឌី

អ្នកផលិតវីដេអូលើបណ្ដាសង្គមរូបនេះបន្ថែមទៀតថា ចាប់តាំងពីហ្វឹកហាត់កីឡារត់នេះរហូតមកមិនដែលមានជំងឺធំដុំអ្វីចំពោះខ្លួននោះឡើយ។ លើសពីនេះទៅទៀតអ្នកហាត់កីឡាមួយនេះកាត់បន្ថយភាពតានតឹងផ្សេងៗ សុខភាពផ្លូវចិត្តរឹងមាំ បង្កើនចំណងមិត្តភាព និងរក្សាទម្ងន់បានថេរល្អថែមទៀត។ បញ្ជៀសពីជំងឺមួយចំនួន និងបានជួយពង្រឹងសុខភាពរាងកាយឲ្យជាពីជំងឺដែលកំពុងឈឺផងដែរ។

លោក មេន ឌី

បញ្ជាក់ដែរថា លោក មេន ឌី ជាអ្នកចូលចិត្តកីឡារត់ប្រណាំងមួយរូបនៅកម្ពុជា និងតែងតែធ្វើវីដេអូពីគន្លឹះសំខាន់ផ្សេងៗដើម្បីចែករំលែកចំណេះដឹងដល់សាធារណៈជនដែលស្រឡាញ់ចូលចិត្តកីឡាមួយនេះ។ លោកតែងតែចូលរួមក្នុងការប្រកួតផ្សេងៗនាពេលកន្លងមក និងមានគម្រោងចូលចរួមជាថ្មីនៅទិវារត់ប្រណាំងអន្តរជាតិពាក់កណ្ដាលម៉ារ៉ាតុងខេត្តព្រះសីហនុ៕

លោក មេន ឌី

អត្ថបទដោយ៖ នួន ស៊ីណា

The post លោក Mendy អ្នកផលិតវីដេអូអំពីកីឡារត់ប្រណាំងចែករំលែកពីគុណប្រយោជន៍នៃកីឡាមួយនេះ appeared first on Kampuchea Thmey Daily.

ទិវារត់ប្រណាំងអន្តរជាតិពាក់កណ្ដាលម៉ារ៉ាតុងខេត្តព្រះសីហនុ មានអ្នកចុះឈ្មោះចូលរួមខ្ទង់ ២០០០នាក់ហើយ

Sina Noun — Wed, 04 Mar 2026 10:47:39 +0000

ទិវារត់ប្រណាំងអន្តរជាតិពាក់កណ្ដាលម៉ារ៉ាតុង ឯខេត្តព្រះសីហនុ លើកទី១១ ថ្ងៃទី២២ ខែមីនា ឆ្នាំ២០២៦ នេះមានអ្នកចុះឈ្មោះចូលរួមប្រហែលខ្ទង់ ២០០០នាក់រួចហើយ ខណៈបរទេសជម្រុះជាតិសាសន៍មានប្រហែល ២០០នាក់ផងដែរត្រៀមនឹងទៅទីនោះ។

លោក វ៉ាត់ ចំរើន អគ្គលេខាធិការ NOCC

លោក វ៉ាត់ ចំរើន អគ្គលេខាធិការ នៃគណៈកម្មាធិការជាតិអូឡាំពិកកម្ពុជា បានលើកឡើងថា ទិវារត់ប្រណាំងនៅឯខេត្តព្រះសីហនុនេះមានអ្នកចុះឈ្មោះចូលរួមប្រហែល ២០០០នាក់មកហើយ។ ដោយក្នុងនោះមានបរទេសជម្រុះជាតិសាសន៍ខ្ទង់ ២០០នាក់ផងដែរ។ លោករំពឹងថាចំនួនអ្នកចូលរួមអាចនឹងកើនឡើងរហូតដល់ ២៥០០នាក់បន្ទាប់ពីមានការផ្សព្វផ្សាយផ្សេងៗទៀតនោះ។

លោក សែម ផល្លា គណៈកម្មការរៀបចំ

អ្នកជំនាញផ្នែកកីឡារូបនេះបន្ថែមទៀតថា ទិវារត់ប្រណាំងអន្តរជាតិនេះរៀបចំឡើងក្នុងគោលបំណងចូលរួមថែរក្សាការពារបរិស្ថាននៅតំបន់ឆ្នេរ។ ចំណែកថវិកាដែលទទួលបានគឺនៅតែយកទៅជួយលើកិច្ចមនុស្សធម៌ និងជាការបង្កើតនូវព្រឹត្តិការណ៍កីឡាលើកកម្ពស់សុខុមាលភាពធារណៈផងដែរ។

ទិដ្ឋភាពសន្និសីទសារព័ត៌មាន

អត្ថបទដោយ៖ នួន ស៊ីណា

The post ទិវារត់ប្រណាំងអន្តរជាតិពាក់កណ្ដាលម៉ារ៉ាតុងខេត្តព្រះសីហនុ មានអ្នកចុះឈ្មោះចូលរួមខ្ទង់ ២០០០នាក់ហើយ appeared first on Kampuchea Thmey Daily.

សហព័ន្ធកីឡាទ្រីយ៉ាត្លុង ទទួលស្គាល់ក្លិបកីឡារត់ជីរ៉ាន់-កម្ពុជាសមាជិកពេញសិទ្ធិ

chean virakbot — Mon, 02 Mar 2026 06:41:28 +0000

កាលពីថ្ងៃទី១ ខែមីនា ឆ្នាំ ២០២៦ សហព័ន្ធកីឡាទ្រីយ៉ាត្លុងកម្ពុជា បានប្រកាសទទួលស្គាល់ក្លិបកីឡារត់ជីរ៉ាន់-កម្ពុជា (GeeRun Cambodia) ជាសមាជិកពេញសិទ្ធិរបស់ខ្លួន បន្ទាប់ពីឃើញក្លិបនេះរួមចំណែកជួយអភិវឌ្ឍកីឡារត់នៅកម្ពុជា។

ពិធីប្រកាសជាផ្លូវការបានធ្វើឡើងនៅសាលប្រជុំនៃគណៈកម្មាធិការជាតិអូឡាំពិកកម្ពុជា ដែលមានលោកស្រី បេង ប៊ុននេត អនុប្រធានសហព័ន្ធទ្រីយ៉ាត្លុងកម្ពុជា និងកញ្ញា យ៉ាន់ សុជី ស្ថាបនិកក្លិប កីឡារត់ជីរ៉ាន់-កម្ពុជា ព្រមទាំងមានភ្ញៀវកិត្តិយសជាច្រើននាក់។

លោកស្រី បេង ប៊ុននេត បានលើកឡើងថា ក្លិប ជីរ៉ាន់-កម្ពុជា បានកំពុងធ្វើសកម្មភាពយ៉ាងសកម្មភាពក្នុងសកម្មភាពកីឡា និងជួយលើកកម្ពស់សុខភាពប្រជាពលរដ្ឋ។ ក្លិបនេះដំណើរការរតាមគោលការណ៍កីឡាជាតិ ហេតុដូច្នេះហើយទើបសហព័ន្ធកីឡាទ្រីយ៉ាត្លុងកម្ពុជា សម្រេចឱ្យចូលជាសមាជិកពេញសិទ្ធរបស់សហព័ន្ធ។ ការចូលជាសមាជិករបស់ក្លិប ជីរ៉ាន់-កម្ពុជា នាពេលនេះ បានបង្ហាញពីការវិវឌ្ឍ និងជាសញ្ញាវិជ្ជមានមួយក្នុងវិស័យកីឡាជាតិ ដើម្បីសុខភាពសាធារណៈ និងឆ្ពោះទៅរកកីឡាកម្រិតខ្ពស់នាពេលអនាគត។

ចំណែក កញ្ញា យ៉ាន់ សុជី ប្រធានក្លិបកីឡារត់ជីរ៉ាន់-កម្ពុជា បានប្រាប់ថា ក្លិបរបស់កញ្ញាបង្កើតឡើងដំបូងក្នុងឆ្នាំ ២០២៣ ក្នុងគោលបំណងលើកកម្ពស់សុខមាលភាពសង្គមតាមរយៈកីឡារត់។ ក្លិបមានចក្ខុវិស័យប្រែក្លាយទៅជាក្លិបមានទាំងការបង្ហាត់កីឡាទ្រីយ៉ាត្លុង ឌូអាត្លុង និង អាគ័រត្លុង។ សព្វថ្ងៃនេះក្លិបមានកូនសិស្សជាច្រើនទាំងមនុស្សពេញវ័យ និងកុមារ ទាំងប្រុស-ស្រីបានចូលរួមហ្វឹកហាត់ ហើយមានសិស្សជាច្រើនបានចូលរួមរត់ក្នុងព្រឹត្តិការណ៍ប្រកួតជាច្រើនក្នុងរយៈពេលប៉ុន្មានឆ្នាំចុងក្រោយនេះ។

ក្លិបនេះមានកម្មវិធីហ្វឹកហាត់រាល់ល្ងាចថ្ងៃចន្ទ ពុធ និងសុក្រ ព្រមទាំងមានការហ្វឹកហាត់ដោយឥតគិតថ្លៃដល់សាធារណជននៅរាល់ព្រឹកថ្ងៃសៅរ៍ និងថ្ងៃអាទិត្យ៕

អត្ថបទ៖ វិរបុត្រ

The post សហព័ន្ធកីឡាទ្រីយ៉ាត្លុង ទទួលស្គាល់ក្លិបកីឡារត់ជីរ៉ាន់-កម្ពុជាសមាជិកពេញសិទ្ធិ appeared first on Kampuchea Thmey Daily.

កម្មវិធី «រត់ដើម្បីក្តីស្រឡាញ់! រត់ដើម្បីទេសចរណ៍! រត់ដើម្បីសប្បុរសធម៌!» ទាក់ទាញអ្នកចូលរួមរហូត ១២០០០នាក់

Sina Noun — Mon, 23 Feb 2026 08:01:17 +0000

កម្មវិធីរត់ប្រណាំងបែបកម្សាន្តសប្បាយ និងជាការផ្សព្វផ្សាយ «ព្រឹត្តិការណ៍ទេសចរណ៍វប្បធម៌ និងពាណិជ្ជកម្ម» ដែលបានរៀបចំឡើងនៅឯខេត្តព្រះសីហនុ កាលពីថ្ងៃទី២២ ខែកុម្ភៈ ឆ្នាំ២០២៦ នេះបានទាក់ទាញអ្នកចូលរួតរត់រហូតដល់ទៅ ១២០០០នាក់ឯណោះ។

រូបភាពលើហ្វេសបុកផេក លោក ហួត ហាក់

នេះបើតាមការបង្ហោះផ្សព្វផ្សាយនៅលើហ្វេសបុកផេកលោក ហួត ហាក់ រដ្ឋមន្ត្រីក្រសួងទេសចរណ៍ បានបញ្ជាក់ថា «ព្រឹត្តិការណ៍ទេសចរណ៍វប្បធម៌ និងពាណិជ្ជកម្ម» ក្រោមប្រធានបទ «កីឡាដើម្បីសុខភាព និងឯកភាពជាតិតែមួយ» នេះរៀបចំឡើងក្នុងគោលបំណងលើកកម្ពស់សុខុមាលភាព បណ្តុះទម្លាប់ហាត់ប្រាណដើម្បីសុខភាពមាំមួន និងកាត់បន្ថយភាពតានតឹង បង្ហាញពីកម្លាំងឯកភាពជាតិ និងស្មារតីចេះជួយគ្នាទៅវិញទៅមកក្នុងនាមជាមហាគ្រួសារខ្មែរតែមួយ។ លើសពីនេះទៅទៀតជាការជំរុញទេសចរណ៍ និងសេដ្ឋកិច្ច អបអរសាទរវប្បធម៌ដ៏សម្បូរបែប និងគាំទ្រដល់ពាណិជ្ជកម្មក្នុងតំបន់នៃខេត្តព្រះសីហនុ និងបង្ហាញពីភាពរីកចម្រើន នៃទីក្រុងមាត់សមុទ្រតាមរយៈព្រឹត្តិការណ៍កីឡា និងទេសចរណ៍។

រូបភាពលើហ្វេសបុកផេក លោក ហួត ហាក់

បញ្ជាក់ដែរថា «ព្រឹត្តិការណ៍ទេសចរណ៍វប្បធម៌ និងពាណិជ្ជកម្ម» ក្រោមប្រធានបទ «កីឡាដើម្បីសុខភាព និងឯកភាពជាតិតែមួយ» បានរៀបចំឡើងកាលពីថ្ងៃទី២២ ខែកុម្ភៈ ឆ្នាំ២០២៦ នៅឯខេត្តព្រះសីហនុ។ ព្រឹត្តិការណ៍នេះមានអ្នកចូលរួមរត់លេងកម្សាន្តសប្បាយរហូតដល់ទៅ ១២០០នាក់ឯណោះ។ ក្នុងពិធីនោះផងដែរមានការអញ្ជើញចូលរួមពីលោក ហួត ហាក់ រដ្ឋមន្ត្រីក្រសួងទេសចរណ៍ រួមជាមួយលោក ម៉ាង ស៊ីណេត អភិបាល នៃគណៈអភិបាលខេត្តព្រះសីហនុ ជាអធិបតីភាពផងដែរ៕

រូបភាពលើហ្វេសបុកផេក លោក ហួត ហាក់

អត្ថបទដោយ៖ នួន ស៊ីណា

The post កម្មវិធី «រត់ដើម្បីក្តីស្រឡាញ់! រត់ដើម្បីទេសចរណ៍! រត់ដើម្បីសប្បុរសធម៌!» ទាក់ទាញអ្នកចូលរួមរហូត ១២០០០នាក់ appeared first on Kampuchea Thmey Daily.

កីឡារត់ប្រណាំង Archives - Kampuchea Thmey Daily

រត់​-ដើរ​ដើម្បី​លើក​កម្ពស់​ការ​អាន ធ្វើ​នៅ ៦ ខេត្ត-រាជធានី​​​ផ្សេង​គ្នា​ក្នុង​ថ្ងៃ​តែ​មួយ

កីឡា​រត់​ប្រណាំង​ជា​កីឡា​មួយ​បង្កើន​មិត្តភាព​សាមគ្គីភាព​ពិសេស​ព្យាបាល​​ជំងឺ​ Depression

លោក​ Mendy អ្នក​ផលិត​វីដេអូ​អំពី​កីឡា​រត់​ប្រណាំង​ចែក​រំលែក​ពី​គុណ​ប្រយោជន៍​នៃ​កីឡា​មួយ​នេះ​

សហព័ន្ធ​កីឡា​ទ្រីយ៉ាត្លុង ទទួល​​ស្គាល់​ក្លិប​​កីឡា​រត់ជីរ៉ាន់-កម្ពុជា​សមាជិកពេញសិទ្ធិ​

រត់-ដើរដើម្បីលើកកម្ពស់ការអាន ធ្វើនៅ ៦ ខេត្ត-រាជធានីផ្សេងគ្នាក្នុងថ្ងៃតែមួយ

កីឡារត់ប្រណាំងជាកីឡាមួយបង្កើនមិត្តភាពសាមគ្គីភាពពិសេសព្យាបាលជំងឺ Depression

លោក Mendy អ្នកផលិតវីដេអូអំពីកីឡារត់ប្រណាំងចែករំលែកពីគុណប្រយោជន៍នៃកីឡាមួយនេះ

សហព័ន្ធកីឡាទ្រីយ៉ាត្លុង ទទួលស្គាល់ក្លិបកីឡារត់ជីរ៉ាន់-កម្ពុជាសមាជិកពេញសិទ្ធិ