«កម្មវិធីអប់រំបង្កើតហ្គេម» នៅតាមសាលារៀនក្រោមកិច្ចសម្របសម្រួលពីនាយកដ្ឋានបរិវត្តកម្មឌីជីថល ក្រសួងអប់រំ យុវជន និងកីឡា សហការជាមួយអង្គការយូនីសេហ្វ សាលាគោលដៅនានាបាននិងកំពុងបន្តដំណើរការយ៉ាងសកម្ម តាមរយៈថ្នាក់ក្រៅម៉ោងសិក្សា កម្មវិធីអប់រំបង្កើតហ្គេម។ សិស្សានុសិស្សកំពុងអនុវត្តផ្ទាល់លើការរចនាហ្គេមដ៏ទាក់ទាញ និងការសរសេរកូដ ដើម្បីស្វែងរកដំណោះស្រាយចំពោះបញ្ហានានាក្នុងសហគមន៍របស់ពួកគេ។

បើតាមក្រសួងអប់រំយុវជននិងកីឡាបានឱ្យដឹងថា «កម្មវិធីអប់រំបង្កើតហ្គេម» ត្រូវបានចាប់ផ្តើមអនុវត្តក្នុងឆ្នាំ២០២៣ នៅប្រទេសចំនួន៨ រួមទាំងប្រទេសកម្ពុជាផងដែរ។ នៅក្នុងឆ្នាំ២០២៤ កម្មវិធីនេះបានពង្រីកវិសាលភាពដល់សាលាគោលដៅចំនួន ៣៣សាលា ក្នុងខេត្តចំនួន៥ និងបានរៀបចំការប្រកួតប្រជែងបង្កើតហ្គេមថ្នាក់ជាតិជាលើកទី១។

ក្រសួងអប់រំបានបន្តថាឈានចូលដល់ឆ្នាំ២០២៥ កម្មវិធីបានបន្តពង្រីកយ៉ាងទូលំទូលាយដល់ជាង ១០០សាលា ក្នុងរាជធានី-ខេត្តគោលដៅចំនួន១៥ ដោយមានសិស្សានុសិស្សជាង ១ម៉ឺននាក់ (ដែលក្នុងនោះ ៦០% ជាកុមារី) បានទទួលផលពីកម្មវិធីនេះ។ អ្វីដែលជាមោទនភាព ក្រុមយុវតីតំណាងកម្ពុជាចំនួន ៤ក្រុម បានឈ្នះជ័យលាភីក្នុងការប្រកួតប្រជែងសាកលលោកតាមប្រព័ន្ធអនឡាញ (Virtual Global Game Jam 2025) របស់អង្គការយូនីសេហ្វ។ សម្រាប់កម្មវិធីប្រកួតប្រជែងថ្នាក់ជាតិឆ្នាំ២០២៥ ក៏ទទួលបានការគាំទ្រយ៉ាងខ្លាំង ដោយមានក្រុមកុមារីចូលរួមដាក់ពាក្យចូលរួមប្រកួតប្រជែងរហូតដល់ទៅ ៥២ក្រុម។

ក្រសួងអប់រំបានបន្ថែមទៀតថា កម្មវិធីនេះត្រូវបានផ្តួចផ្តើមឡើងក្នុងគោលដៅផ្តល់សិទ្ធិអំណាច ជំនាញ និងចំណេះដឹងដល់យុវតីកម្ពុជា ដើម្បីឈោងចាប់ឱកាសការងារក្នុងវិស័យបច្ចេកវិទ្យា។ ការអនុវត្តកម្មវិធីនេះ គឺស្របទិសដៅទាំងស្រុងទៅនឹងយុទ្ធសាស្រ្តបញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា ដែលផ្តោតសំខាន់លើការអភិវឌ្ឍមូលធនមនុស្ស និងការបណ្តុះបណ្តាលជំនាញបច្ចេកវិទ្យាឌីជីថល។

លើសពីការកម្សាន្ត កម្មវិធីនេះបានចូលរួមចំណែកយ៉ាងសំខាន់ក្នុងការបណ្តុះបំណិនសតវត្សទី២១ ដល់ប្អូនៗសិស្សានុសិស្ស រួមមានការគិតបែបត្រិះរិះពិចារណា ការស្វែងរកឫសគល់នៃបញ្ហា ការដោះស្រាយបញ្ហាប្រកបដោយភាពច្នៃប្រឌិត និងជួយលុបបំបាត់គម្លាតយេនឌ័រក្នុងវិស័យបច្ចេកវិទ្យា ដែលជាស្ពានចម្លងពួកគេទៅកាន់ភាពជោគជ័យនាពេលអនាគត៕

អត្ថបទ៖ សំអឿន

The post សិស្សជាង ១ម៉ឺននាក់ នៅរាជធានី-ខេត្តគោលដៅចំនួន​១៥​ ទទួលបានចំណេះដឹងជំនាញលើការរចនាហ្គេម និងការសរសេរកូដ appeared first on Kampuchea Thmey Daily.

ការបញ្ជាក់នេះ ធ្វើឡើងនាថ្ងៃទី០១ ខែកក្កដា ឆ្នាំ២០២៦ ក្នុងឱកាស បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានជួបពិភាក្សាការងារ និងពិសាអាហារពេលល្ងាចជាមួយលោកស្រី KUNIMITSU Ayano អនុរដ្ឋមន្ត្រីក្រសួងការបរទេសជប៉ុន ក្នុងឱកាសដែលរដ្ឋមន្ត្រីក្រសួងអប់រំ បំពេញទស្សនកិច្ចនៅទីក្រុងតូក្យូ ប្រទេសជប៉ុន។

ក្នុងជំនួបនោះ បណ្ឌិតសភាចារ្យ ហង់ជួន ណារ៉ុន ក៏បានលើកឡើងពីវឌ្ឍនភាពនៃកំណែទម្រង់វិស័យអប់រំនៅកម្ពុជា និងស្នើបង្កើត «Japan Desk» ដើម្បីបង្កើនប្រសិទ្ធភាពនៃការសម្របសម្រួល និងគាំទ្រកិច្ចសហប្រតិបត្តិការជាមួយស្ថាប័នអប់រំ ព្រមទាំងនិស្សិតជប៉ុន។

បើតាមក្រសួងអប់រំ ពាក់ព័ន្ធនឹងបរិយាកាសវិនិយោគ ភាគីកម្ពុជាបានបញ្ជាក់ថា៖ «រាជរដ្ឋាភិបាលកម្ពុជាកំពុងអនុវត្តវិធានការយ៉ាងម៉ឺងម៉ាត់ក្នុងការបង្ក្រាបបទល្មើសឆបោកតាមប្រព័ន្ធអនឡាញ (Online Scam) ដើម្បីពង្រឹងសន្តិសុខ សុវត្ថិភាព បង្កើនទំនុកចិត្តរបស់វិនិយោគិន និងលើកកម្ពស់កិត្តិយស និងភាពជឿជាក់របស់កម្ពុជានៅលើឆាកអន្តរជាតិ»។

ក្នុងឱកាសនោះដែរ រដ្ឋមន្ត្រីក្រសួងអប់រំ បានថ្លែងអំណរគុណចំពោះរាជរដ្ឋាភិបាល និងប្រជាជនជប៉ុន ដែលបានគាំទ្រកម្ពុជាក្នុងការស្វែងរកសន្តិភាព ការកសាងប្រទេសឡើងវិញ និងការអភិវឌ្ឍធនធានមនុស្សអស់រយៈពេលជាច្រើនទសវត្សរ៍។ លោកបណ្ឌិត បានគូសបញ្ជាក់ថា សន្តិភាពបានក្លាយជាមូលដ្ឋានដ៏រឹងមាំសម្រាប់ការអភិវឌ្ឍយ៉ាងឆាប់រហ័សរបស់កម្ពុជា និងការទាក់ទាញវិនិយោគពីជប៉ុន និងប្រទេសជាដៃគូផ្សេងៗ ដែលបានរួមចំណែកជំរុញកំណើនសេដ្ឋកិច្ចជាតិ។

ជំនួបបានបញ្ចប់ក្នុងបរិយាកាសស្និទ្ធស្នាល ដោយភាគីទាំងពីរបានអះអាងជាថ្មីនូវការប្តេជ្ញាចិត្តបន្តពង្រឹងទំនាក់ទំនងកម្ពុជា-ជប៉ុន ឱ្យកាន់តែរឹងមាំ និងឈានទៅកម្រិតខ្ពស់ថ្មី ដើម្បីផលប្រយោជន៍រួម និងវិបុលភាពរបស់ប្រជាជន ប្រទេសទាំងពីរ៕

The post កម្ពុជា-ជប៉ុន ប្តេជ្ញាបន្តពង្រឹងកិច្ចសហប្រតិបត្តិការលើវិស័យអប់រំ និងការវិនិយោគ appeared first on Kampuchea Thmey Daily.

ថ្លែងក្នុងពិធីប្រគល់សញ្ញាបត្រមធ្យមសិក្សាទុតិយភូមិអន្តរជាតិ ដល់សិស្សានុសិស្ស នៃសាលាអន្តរជាតិ ស៊ី អាយ អេ ហ្វឺសត៍ កាលពីថ្ងៃទី ២៧ មិថុនា លោកបណ្ឌិតសភាចារ្យ ហង់ជួន ណារ៉ុន ក៏បានណែនាំដល់សិស្សានុសិស្ស ត្រូវជ្រើសរើសជំនាញឯកទេសតាមចំណង់ចំណូលចិត្តរបស់ខ្លួន និង តម្រូវការទីផ្សារការងារ បន្តពង្រឹងសមត្ថភាពបច្ចេកវិទ្យា ជាពិសេសការប្រើប្រាស់បញ្ញាសិប្បនិម្មិត (AI) ប្រកបដោយប្រសិទ្ធភាព និង ការទទួលខុសត្រូវ ពង្រឹងសមត្ថភាពភាសា ទាំងភាសាជាតិ និង អន្តរជាតិ ដើម្បីជាស្ពានឆ្ពោះទៅរកការសិក្សាកម្រិតខ្ពស់ បន្តពង្រឹងជំនាញទន់ និង ប្រកាន់ខ្ជាប់នូវគោលការណ៍ នៃការសិក្សាពេញមួយជីវិត រក្សានូវសីលធម៌ គុណធម៌ និង ចូលរួមចំណែកសកម្មក្នុងសង្គម និង បន្តខិតខំអភិវឌ្ឍន៍ខ្លួនឱ្យក្លាយជាធនធានមនុស្សដ៏មានសក្ដានុពល ដោយត្រូវប្រកាន់ខ្ជាប់នូវ វិជ្ជាសម្បទា បំណិនសម្បទា និង ចរិយាសម្បទា ដើម្បីក្លាយជាទំពាំងស្នងឫស្សីដ៏រឹងមាំសម្រាប់អភិវឌ្ឍន៍ជាតិមាតុភូមិកម្ពុជា។

ក្នុងឱកាសនោះដែរ លោកបណ្ឌិតសភាចារ្យ ឧបនាយករដ្ឋមន្ត្រី ចូលរួមអបអរសាទរដល់សិស្សានុសិស្សទាំងអស់ ដែលបានខិតខំប្រឹងប្រែងរៀនសូត្ររហូតបញ្ចប់ការសិក្សានូវកម្រិតមធ្យមសិក្សានេះ ដោយសម្រេចបាននូវក្ដីស្រមៃរបស់ខ្លួន និងជាការបំពេញក្ដីស្រមៃរបស់មាតាបិតាផងដែរ ដែលសមិទ្ធផលជោគជ័យនេះ គឺជាផ្លែផ្កាកើតចេញពីការចូលរួមយ៉ាងសកម្មពីគ្រប់ភាគីពាក់ព័ន្ធ រួមមាន សិស្សានុសិស្សផ្ទាល់ដែលបានខិតខំប្រឹងប្រែងសិក្សារៀនសូត្រ មាតាបិតាដែលបានជួយជ្រោមជ្រែងគ្រប់បែបយ៉ាង និង លោកគ្រូ អ្នកគ្រូ ដែលបានយកចិត្តទុកដាក់បង្រៀនប្រកបដោយការទទួលខុសត្រូវខ្ពស់។
ក្នុងន័យនេះ លោកបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និង វាយតម្លៃខ្ពស់ចំពោះសាលារៀនដែលបានចូលរួមយ៉ាងសកម្មជាមួយក្រសួងអប់រំ យុវជន និង កីឡា ក្នុងការអនុវត្តកម្មវិធីសិក្សាជាតិ និងអន្តរជាតិ ដើម្បីបណ្ដុះបណ្ដាលសិស្សានុសិស្សឱ្យក្លាយជាធនធានមនុស្សប្រកបដោយសមត្ថភាព តាមរយៈការជំរុញការគិតបែបស៊ីជម្រៅ ការស្រាវជ្រាវ ការធ្វើការងារជាក្រុម ភាពជាអ្នកដឹកនាំ និង ការប្រើប្រាស់បច្ចេកវិទ្យាឌីជីថល រួមទាំងបញ្ញាសិប្បនិម្មិត (AI) ដើម្បីដោះស្រាយបញ្ហាជាដើម។

លោកបណ្ឌិតសភាចារ្យ បានគូសបញ្ជាក់ថា «គោលដៅ នៃសាលារៀន និង ការសិក្សា គឺមិនត្រឹមតែផ្ដល់ចំណេះដឹងប៉ុណ្ណោះទេ ថែមទាំងបណ្ដុះបណ្ដាលសិស្សានុសិស្សឱ្យមាននូវក្រមសីលធម៌ និង គុណធម៌ ដើម្បីក្លាយជាពលរដ្ឋគំរូ និងជាអ្នកដឹកនាំដ៏មានសក្ដានុពលសម្រាប់សង្គមជាតិនាពេលអនាគត»៕
អត្ថបទ ៖ សំអឿន

The post រដ្ឋមន្ត្រីអប់រំ ជំរុញសិស្សានុសិស្សបន្តខិតខំអភិវឌ្ឍន៍ខ្លួន ឱ្យក្លាយជាធនធានមនុស្សដ៏មានសក្ដានុពលសម្រាប់អភិវឌ្ឍន៍ប្រទេសជាតិ appeared first on Kampuchea Thmey Daily.

លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា

ថ្លែងក្នុងពិធីសម្ពោធជាផ្លូវការនៃ សាលារៀន ហេរីងតុន អន្តរជាតិ កាលពីរសៀលថ្ងៃទី២៦ ខែមិថុនា ឆ្នាំ២០២៦ លោក បណ្ឌិតសភាចារ្យ បានបន្តថា ក្រៅពីនេះរដ្ឋាភិបាលក៏បានជំរុញឱ្យយុវជនរៀនសូត្រជំនាញថ្មីៗ និងបទពិសោធន៍បន្ថែមទៀត រួមមាន វិទ្យាសាស្ត្រ ទស្សនវិជ្ជា ជំនាញដោះស្រាយបញ្ហា បង្កើនសមត្ថភាពភាពជាអ្នកដឹកនាំ និងជាពិសេសជំនាញឌីជីថល ដើម្បីឱ្យយុវជនមានភាពរឹងមាំ និងកាន់តែរីកចម្រើនជាបន្តបន្ទាប់ទៅមុខទៀត និងមានភាពម្ចាស់ការលើខ្លួនឯងលើគ្រប់វិស័យ។

លោក បណ្ឌិតសភាចារ្យ ហង់ ជូនណារ៉ុន បានបន្ថែមថាជាមួយគ្នានេះដែរ ទោះបីកម្ពុជាបានឆ្លងកាត់បទពិសោធន៍ប្រវត្តិសាស្ត្រដ៏ឈឺចាប់ជាច្រើនក៏ដោយ ប៉ុន្តែសន្តិភាពនៅកម្ពុជាបានកើតមានរយៈពេល ២៥ឆ្នាំនេះ ក្រោមការដឹកនាំរបស់ សម្ដេចមហាសេនាធិបតី ហ៊ុន សែន ដែលបានរក្សាបាននូវស្ថិរភាពនេះ និងបង្កើតបរិយាកាសអំណោយផលយ៉ាងខ្លាំងដល់ការអភិវឌ្ឍសេដ្ឋកិច្ច ការទាក់ទាញការវិនិយោគ និងការពង្រឹងទំនុកចិត្តរបស់ដៃគូអភិវឌ្ឍន៍អន្តរជាតិ។ តាមរយៈចក្ខុវិស័យនេះ ធ្វើឱ្យកាន់តែមានការរីកចម្រើនលើគ្រប់វិស័យ និងធានាបានយ៉ាងល្អប្រសើរនូវសុខសន្តិភាព ស្ថិរភាពនយោបាយ សន្តិសុខសណ្ដាប់ធ្នាប់សាធារណៈ និងដំណើរការជាប្រក្រតីភាពនូវសកម្មភាពសេដ្ឋកិច្ច សង្គម នយោបាយ ពាណិជ្ជកម្ម និងទំនាក់ទំនងកាន់តែសកម្មថែមទៀត។

លោក បណ្ឌិត សភាចារ្យបានចាត់ទុកការដាក់ឱ្យប្រើប្រាស់ជាផ្លូវការនូវសាលារៀនថ្មីនាពេលនេះគឺជាការវិនិយោគដ៏សំខាន់មួយ ក្នុងការអភិវឌ្ឍវិស័យអប់រំឱ្យរីកចម្រើននាពេលបច្ចុប្បន្ន និងអនាគត ស្របតាមយុទ្ធសាស្ត្របញ្ចកោណរបស់រាជរដ្ឋាភិបាល ក្រោមការដឹកនាំរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដើម្បីឱ្យកម្ពុជាសម្រេចចក្ខុវិស័យឆ្នាំ២០៥០ ក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០ ដែលក្នុងនោះមូលធនមនុស្ស គឺជាកម្លាំងចលករដ៏សំខាន់ឆ្ពោះទៅសម្រេចបានចក្ខុវិស័យនេះ។

លោកបណ្ឌិតសភាចារ្យ បានថ្លែងអំណរគុណយ៉ាងជ្រាលជ្រៅដល់គណៈគ្រប់គ្រងសាលា លោកគ្រូ អ្នកគ្រូ និងភាគីពាក់ព័ន្ធទាំងអស់ ចំពោះកិច្ចខិតខំប្រឹងប្រែងបំពេញតួនាទីការងារប្រកបដោយមនសិការទទួលខុសត្រូវខ្ពស់ ដើម្បីផ្ដល់នូវការអប់រំប្រកបដោយគុណភាព ដែលបានចូលរួមចំណែកដ៏សំខាន់ជាមួយក្រសួងអប់រំ យុវជន និងកីឡាក្នុងការអនុវត្តកំណែទម្រង់វិស័យអប់រំនៅកម្ពុជាឱ្យកាន់តែជោគជ័យ ៕ អត្ថបទ៖សំអឿន

The post ការអប់រំ និងជំនាញឌីជីថល ជាកម្លាំងចលករដ៏សំខាន់ក្នុងការជំរុញកម្ពុជាទៅជាប្រទេសមានចំណូលខ្ពស់ appeared first on Kampuchea Thmey Daily.

ការរៀបចំប្រព័ន្ធអធិការកិច្ចសាលារៀនបែបថ្មីនេះ ត្រូវបានបង្ហាញនៅក្នុងកិច្ចប្រជុំកាលពីរសៀលថ្ងៃទី ២៥ ខែមិថុនា ឆ្នាំ ២០២៦ ក្រោមអធិបតីភាព លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និង កីឡា នៅទីស្តីការ។

កិច្ចប្រជុំនេះ រៀបចំឡើងក្នុងគោលដៅបំណង ដើម្បីពិនិត្យ និង ពង្រឹងការអនុវត្តយន្តការអធិការកិច្ចសាលារៀន សំដៅជំរុញឱ្យបាននូវប្រព័ន្ធអធិការកិច្ចមួយដែលមានប្រសិទ្ធភាពខ្ពស់ ដើម្បីលើកកម្ពស់គុណភាពអប់រំជាលក្ខណៈប្រព័ន្ធ ក៏ដូចជាចាប់ផ្តើមពីការដាក់ចេញវិធានការដើម្បីពង្រឹងគុណភាពអប់រំសាលារៀននៅរាជធានីភ្នំពេញ និង ការអនុវត្តគំរូអធិការកិច្ចបែបថ្មី ដែលភ្ជាប់ជាមួយនឹងអ្វីដែលបានអនុវត្តល្អនៅក្នុងគម្រោង ទៅនឹងក្របខ័ណ្ឌសាលារៀនទូទៅ។

ជាមួយគ្នានេះដែរ កិច្ចប្រជុំ បានរំលេចនូវចំណុចគន្លឹះមួយចំនួន ដូចជា ក្រសួងមានភាពចាំបាច់ក្នុងការដាក់ចេញនូវ “គំរូអធិការកិច្ចសាលារៀនបែបថ្មី” គាំទ្រដល់ការលើកកម្ពស់កំណែទម្រង់សាលារៀន ដែលជាប្រព័ន្ធអធិការកិច្ចសាលារៀនបែបថ្មី ដែលនឹងរួមចំណែកយ៉ាងសំខាន់ដល់យុទ្ធសាស្ត្រលើកកម្ពស់ស្តង់ដារសាលារៀនទូទាំងប្រទេស។ ការធ្វើកំណែទម្រង់ក្របខណ្ឌអធិការកិច្ចសាលារៀន គាំទ្រដល់ការកែលម្អស្តង់ដារសាលារៀន ការទទួលស្គាល់គុណភាពសាលារៀន ការពង្រឹងវិជ្ជាជីវៈអធិការ សំដៅកែលម្អការបង្រៀន និង រៀន ការគ្រប់គ្រងសាលារៀន លើកកម្ពស់គុណភាពសិក្សារបស់សិស្ស ការលើកទឹកចិត្ត ការគាំទ្រសាលារៀន និង ការដាក់ទណ្ឌកម្មវិន័យ។ ការកែលម្អគុណភាពសាលារៀន និង លទ្ធផលសិក្សារបស់សិស្ស ទាមទារឱ្យមានប្រព័ន្ធត្រួតពិនិត្យ និង កែលម្អជាប្រចាំ (អធិការកិច្ច និង សវនកម្ម) ប្រកបដោយវិជ្ជាជីវៈ។ អធិការកិច្ចសាលារៀន ដើរតួនាទីយ៉ាងសំខាន់ក្នុងការធានាថា ស្តង់ដារអប្បបរមាត្រូវបានអនុវត្ត , ការកំណត់គម្លាតខ្វះខាតក្នុងការបង្រៀន និង ការរៀន និង ការគាំទ្រសាលារៀន ដើម្បីកែលម្អការអនុវត្តប្រព័ន្ធប្រកបដោយនិរន្តរភាព។ បទពិសោធអន្តរជាតិ បានបង្ហាញថា អធិការកិច្ចមានប្រសិទ្ធភាពបំផុត គឺមានលក្ខណៈអភិវឌ្ឍន៍ ផ្អែកលើភស្តុតាង និង ផ្សារភ្ជាប់យ៉ាងជិតស្និទ្ធនឹងការកែលម្អសាលារៀន និង កំណែទម្រង់ប្រព័ន្ធអប់រំ។ ក្រោយពីការធ្វើអធិការកិច្ច សាលារៀន នឹងត្រូវបានទទួលស្គាល់តាមរយៈវិញ្ញាបនបត្រ ទទួលស្គាល់គុណភាព មានស្តង់ដារត្រូវបានចុះអធិការកិច្ចក្រោយរយៈពេល ៥ ឆ្នាំ។ ចំណែកសាលារៀនដែលមានពិន្ទុក្រោមស្តង់ដារ នឹងត្រូវមានវិធានការ។ សាលារៀនដែលមានស្តង់ដារពេញលេញ និង មានស្តង់ដារ ឬ សាលារៀន ដែលមានការកែលម្អ ផ្អែកលើមូលដ្ឋានអនុវត្ត នឹងត្រូវផ្តល់ជូននូវថវិកាដំណើរការសាលារៀនបន្ថែម។ ប្រព័ន្ធអធិការកិច្ចសាលាបែបទំនើប មិនត្រឹមតែជាយន្តការធានាគណនេយ្យភាពប៉ុណ្ណោះទេ ថែមទាំងជាកត្តាលីករសម្រាប់កំណែទម្រង់សាលារៀន ការអភិវឌ្ឍវិជ្ជាជីវៈ និង ការកែលម្អជាប្រចាំ។ ក្នុងន័យនេះ អង្គភាពទទួលបន្ទុកត្រួតពិនិត្យទាំងអស់ នឹងត្រូវអនុវត្តប្រព័ន្ធអធិកាកិច្ចបែបថ្មីនេះរួមគ្នាប្រកបដោយការទទួលខុសត្រូវ និង តម្លាភាព។

បន្ថែមពីនេះ លោកបណ្ឌិតសភាចារ្យ ឧបនាយករដ្ឋមន្ត្រី បានណែនាំដល់ក្រុមការងារជំនាញ រៀបចំផែនការចុះទៅតាមសាលារៀន ដោយត្រូវចុះអធិការកិច្ចតាមកាលកំណត់ និង តាមប្រធានបទ។ដាក់ចំណាត់ថ្នាក់សាលារៀន ដោយការដាក់ពិន្ទុសាលារៀន ចាប់ផ្តើមអនុវត្តពីសាលារៀននៅរាជធានីភ្នំពេញ។ គ្រប់សាលារៀនទាំងអស់ ត្រូវមានរបាយការណ៍ស្វ័យវាយតម្លៃ ដោយស្តង់ដារអធិការកិច្ចដូចគ្នានឹងស្តង់ដារសាលារៀនគំរូ។ រៀបចំផ្សព្វផ្សាយជាសាធារណៈនូវរាល់របាយការណ៍ដែលមានស្រាប់ ដើម្បីលើកទឹកចិត្តសាលារៀនដែលអនុវត្តបានល្អ និង ជំរុញឱ្យសាលារៀនទាំងអស់ខិតខំប្រឹងប្រែងកែលម្អ។

លើសពីនេះ ត្រូវរៀបចំធ្វើវេបសាយមួយ ដើម្បីផ្សព្វផ្សាយលទ្ធផលអធិការកិច្ចសាលារៀនជាសាធារណៈតាមប្រព័ន្ធឌីជីថល និង រៀបចំជាប្រព័ន្ធធានាគុណភាពអប់រំ ដើម្បីជំរុញកំណែទម្រង់សាលារៀន គាំទ្រដល់ការអនុវត្តស្តង់ដារសាលារៀនគំរូ។ ចំណែកសាលារៀនដែលនៅក្រោមពិន្ទុស្តង់ដារ ត្រូវមានវិធានការកែលម្អ និង ត្រូវលើកកម្ពស់ការផ្សព្វផ្សាយពីវឌ្ឍនភាព និង លទ្ធផលកំណែទម្រង់សាលារៀនឱ្យកាន់តែទូលំទូលាយបន្ថែមទៀត៕
អត្ថបទ​ ៖ សំអឿន

The post ក្រសួងអប់រំ រៀបចំប្រព័ន្ធអធិការកិច្ចសាលារៀនបែបថ្មី ដើម្បីពង្រឹងអភិបាលកិច្ច និង លើកកម្ពស់គុណភាពអប់រំ appeared first on Kampuchea Thmey Daily.

ពិធីនេះបានប្រព្រឹត្តទៅក្រោមអធិបតីភាព​ ឧបនាយករដ្ឋមន្រ្តី ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និង មានការអញ្ជើញចូលរួមពីសំណាក់ថ្នាក់ដឹកនាំ តំណាងស្ថានទូតឥណ្ឌា ព្រមទាំងនិស្សិតជ័យលាភី​អាហារូបករណ៍ទាំងអស់ផងដែរ។

នៅក្នុងប្រសាសន៍ថ្លែងអបអរសាទរទៅកាន់និស្សិតជ័យលាភី លោក Vanlalvawna Bawitlung ឯកអគ្គរដ្ឋទូតឥណ្ឌាកម្ពុជា បានមានប្រសាសន៍ថា ប្រទេសឥណ្ឌាគឺជាទឹកដីនៃមជ្ឈមណ្ឌលសិក្សាធិការដ៏ចំណាស់ជាងគេបំផុតមួយក្នុងពិភពលោក និងមានប្រព័ន្ធអប់រំឧត្តមសិក្សាដ៏ធំបំផុតមួយផងដែរ។ លោកទូតបានលើកទឹកចិត្តដល់និស្សិតទាំងអស់ឱ្យខិតខំក្រេបជញ្ជក់ចំណេះដឹង និងទាញយកប្រយោជន៍ជាអតិបរមាពីឱកាសសិក្សាដ៏មានតម្លៃនេះនៅក្នុងប្រទេសឥណ្ឌា ដោយលោក បានបង្ហាញនូវជំនឿជាក់យ៉ាងមុតមាំថា អាហារូបករណ៍នេះនឹងបើកនូវកាលានុវត្តភាពថ្មីៗសម្រាប់និស្សិតគ្រប់រូប។

ជាមួយគ្នានេះ លោកបានសម្តែងនូវក្តីសោមនស្សរីករាយដែលនិស្សិតកម្ពុជាជាច្រើននឹងមានឱកាសចូលសិក្សានៅវិទ្យាស្ថានបច្ចេកវិទ្យាឥណ្ឌា (IITs) និងគ្រឹះស្ថានឧត្តមសិក្សាលំដាប់ពិភពលោកដទៃទៀតរបស់ឥណ្ឌា ដែលត្រូវបានទទួលស្គាល់ជាអន្តរជាតិចំពោះឧត្តមភាពផ្នែកការសិក្សា និងសមិទ្ធផលស្រាវជ្រាវ តាមរយៈកម្មវិធីអាហារូបករណ៍ ICCR នេះ។

លោកឯកអគ្គរដ្ឋទូតបានសម្តែងក្តីសង្ឃឹមយ៉ាងមុតមាំថា តាមរយៈកម្មវិធីអាហារូបករណ៍ និងបទពិសោធន៍សិក្សានៅប្រទេសឥណ្ឌា និស្សិតទាំងអស់នឹងអាចរួមចំណែកដល់ការអភិវឌ្ឍជាតិរបស់កម្ពុជា ក្រោយពេលបញ្ចប់ការសិក្សា ហើយថែមទាំងជួយពង្រឹងចំណងមិត្តភាព និងកិច្ចសហប្រតិបត្តិការរវាងប្រទេសទាំងពីរឱ្យកាន់តែស្អិតរមួតថែមទៀត។

សូមជម្រាបថា ICCR គឺជាស្ថាប័នស្វយ័តមួយស្ថិតក្រោមក្រសួងកិច្ចការបរទេសនៃរដ្ឋាភិបាលឥណ្ឌា ដែលគ្រប់គ្រងអាហារូបករណ៍ប្រមាណ ៤,០០០ កន្លែងជារៀងរាល់ឆ្នាំ ក្រោមកម្មវិធីអាហារូបករណ៍ជាង ២០ប្រភេទ សម្រាប់និស្សិតមកពីជិត ១៨០ ប្រទេស។ ជារៀងរាល់ឆ្នាំ មាននិស្សិតអន្តរជាតិជាង ៦,០០០ នាក់កំពុងបន្តការសិក្សាថ្នាក់ឧត្តមសិក្សានៅប្រទេសឥណ្ឌា ក្រោមកម្មវិធីដែលគាំទ្រដោយ ICCR។ គិតមកទល់បច្ចុប្បន្ន មាននិស្សិតកម្ពុជាជាង ៣៥០ នាក់ហើយ ដែលបានទទួលអត្ថប្រយោជន៍ពីអាហារូបករណ៍ ICCR ក្នុងនោះរួមមានទាំងអ្នកដែលបានបញ្ចប់ការសិក្សាដោយជោគជ័យ និងអ្នកដែលកំពុងបន្តការសិក្សានៅប្រទេសឥណ្ឌា។

កម្មវិធីអាហារូបករណ៍ ICCR ផ្តល់ឱកាសដល់និស្សិតកម្ពុជាក្នុងការបន្តការសិក្សាថ្នាក់ឧត្តមសិក្សានៅតាមគ្រឹះស្ថានឧត្តមសិក្សាល្បីៗមួយចំនួនរបស់ឥណ្ឌា រួមមាន៖ វិទ្យាស្ថានបច្ចេកវិទ្យាឥណ្ឌា (IITs) វិទ្យាស្ថានបច្ចេកវិទ្យាជាតិ (NITs) សាកលវិទ្យាល័យដេលី (University of Delhi) សាកលវិទ្យាល័យណាលន្ទា (Nalanda University) សាកលវិទ្យាល័យអន្ធ្រា (Andhra University) និងគ្រឹះស្ថានសិក្សាល្បីល្បាញជាច្រើនទៀត ដែលលេចធ្លោខាងផ្នែកស្រាវជ្រាវ និងការអប់រំ។ កម្មវិធីនេះគ្របដណ្តប់លើមុខជំនាញយ៉ាងទូលំទូលាយ រួមមាន វិស្វកម្ម វិទ្យាសាស្ត្រ បច្ចេកវិទ្យា មនុស្សសាស្ត្រ ពុទ្ធសាសនវិទ្យា ទស្សនវិជ្ជា គ្រប់គ្រង ព្រមទាំងវិទ្យាសាស្ត្រសង្គម៕

The post និស្សិតកម្ពុជាចំនួន ៤១រូប ទទួលបានអាហារូបករណ៍ពេញលេញ ដើម្បីបន្តការសិក្សាថ្នាក់ឧត្តមសិក្សានៅប្រទេសឥណ្ឌា appeared first on Kampuchea Thmey Daily.

ថ្លែងក្នុងពិធីសំណេះសំណាលជាមួយសិស្សានុសិស្សដែលបញ្ចប់ការសិក្សាកម្រិតមធ្យមសិក្សាឆ្នាំ២០២៦ នៃសាលាអន្តរជាតិកាណាដាភ្នំពេញកាលពីរសៀលថ្ងៃទី២៤ ខែមិថុនា ឆ្នាំ២០២៦ លោកបណ្ឌិតសភាចារ្យ ហង់ជួន ណារ៉ុន បានមានប្រសាសន៍ថា«ការអប់រំពិតប្រាកដមិនមែនត្រឹមតែជាការផ្តល់ចំណេះដឹងប៉ុណ្ណោះទេ ថែមទាំងផ្តល់នូវវិធីសាស្ត្របង្រៀនដ៏ត្រឹមត្រូវ ដើម្បីបណ្តុះបណ្តាលសិស្សឱ្យមានបំណិនសតវត្សរ៍ទី២១ មានការគិតបែបស៊ីជម្រៅ និងមានសមត្ថភាពដោះស្រាយបញ្ហាប្រឈមនានា ដើម្បីឆ្លើយតបទៅនឹងតម្រូវការទីផ្សារការងារជាក់ស្តែង រួមទាំងការចេះទាញយកផលប្រយោជន៍ពីបច្ចេកវិទ្យាបញ្ញាសិប្បនិម្មិត (AI) ប្រកបដោយភាពឆ្លាតវៃ និងការពិចារណាវែងឆ្ងាយ ដោយមិនត្រូវពឹងផ្អែកទាំងស្រុងលើបច្ចេកវិទ្យានោះឡើយ»។

បន្ថែមលើនេះ លោកបណ្ឌិតសភាចារ្យ ឧបនាយករដ្ឋមន្ត្រី បានលើកឡងពីតួនាទីដ៏ចម្បងរបស់លោកគ្រូអ្នកគ្រូដែលជាគំរូដ៏ល្អសម្រាប់សិស្សានុសិស្ស និងមាតាបិតាដែលជាបង្អែកដ៏រឹងមាំ ក្នុងការជួយតម្រង់ទិស និងរៀបចំគ្រឹះសម្រាប់ដំណើរការសិក្សាពេញមួយជីវិត របស់យុវជន។ ក្រៅពីសមត្ថភាពខាងផ្នែកវិជ្ជាជីវៈ និងបច្ចេកវិទ្យា ការកសាងបុគ្គលិកលក្ខណៈ និងសីលធម៌ល្អ ក៏ជារឿងដ៏សំខាន់ដែលមិនអាចខ្វះបានដែរក្នុងការធានាថាសិស្សានុសិស្សនឹងក្លាយជាពលរដ្ឋល្អក្នុងសង្គម។

ក្នុងន័យនេះ លោកបណ្ឌិតសភាចារ្យ ឧបនាយករដ្ឋមន្ត្រី បានលើកទឹកចិត្តដល់សិស្សានុសិស្សទាំងអស់ ឱ្យបន្តខិតខំប្រឹងប្រែងរៀនសូត្រ ចាប់យកជំនាញឯកទេសស្របទៅតាមចំណង់ចំណូលចិត្ត និងទេពកោសល្យរបស់ខ្លួន ដោយបុគ្គលម្នាក់ៗសុទ្ធតែមានសក្តានុពល និងជំនាញរៀងៗខ្លួន ដែលរួមចំណែកក្នុងការអភិវឌ្ឍសង្គមជាតិឱ្យកាន់តែរីកចម្រើនរុងរឿងនាពេលអនាគត។

ក្នុងឱកាសនេះ លោកបណ្ឌិតសភាចារ្យ ឧបនាយករដ្ឋមន្ត្រី បានអបអរសាទរដល់សិស្សានុសិស្សជ័យលាភីឆ្នាំ២០២៦ទាំងអស់ ព្រមទាំងបានថ្លែងអំណរគុណយ៉ាងជ្រាលជ្រៅចំពោះគណៈគ្រប់គ្រងសាលា លោកគ្រូ អ្នកគ្រូ មាតាបិតា និងអ្នកអាណាព្យាបាលទាំងអស់ ដែលបានលះបង់ទាំងកម្លាំងកាយចិត្ត ពេលវេលា និងធនធានក្នុងការជួយជ្រោមជ្រែងសិស្សានុសិស្សរហូតទទួលបានជោគជ័យដ៏ត្រចះត្រចង់ ដែលសមិទ្ធផលទាំងនេះសុទ្ធតែបានមកពីការតាំងចិត្ត និងខិតខំ ប្រឹងប្រែងមិនខ្លាចនឿយហត់របស់អ្នកពាក់ព័ន្ធទាំងអស់៕ អត្ថបទ៖សំអឿន

The post រដ្ឋមន្ត្រីអបរំលើកទឹកចិត្តសិស្ស ចាប់យកជំនាញឯកទេសស្របតាមចំណង់ចំណូលចិត្ត ដើម្បីរួមចំណែកអភិវឌ្ឍន៍សង្គមជាតិកាន់តែរីកចម្រើន appeared first on Kampuchea Thmey Daily.

ក្នុងកិច្ចប្រជុំនោះ បណ្ឌិតសភាចារ្យ ហង់ជួន ណារ៉ុន បានណែនាំឱ្យក្រុមការងារពាក់ព័ន្ធបន្តសហការយ៉ាងជិតស្និទ្ធ ដើម្បីរៀបចំដំណើរការផលិតវីដេអូឱ្យមានលក្ខណៈជាប្រព័ន្ធ និងច្បាស់លាស់ សំដៅធានាគុណភាពខ្ពស់នៃខ្លឹមសារ ។ ទន្ទឹមនឹងនេះ ក្រុមការងារត្រូវពិនិត្យទិន្នន័យជាក់ស្តែងនៃថ្នាក់ពីរភាសា ដើម្បីប្រើប្រាស់ជាមូលដ្ឋានក្នុងការរៀបចំសៀវភៅបង្រៀនភាសាបារាំង និងជ្រើសរើសលោកគ្រូ អ្នកគ្រូដែលមានជំនាញគរុកោសល្យ និងបទពិសោធន៍ខ្ពស់ក្នុងការសម្របសម្រួលមេរៀន។

លោករដ្ឋមន្ត្រីបានបញ្ជាក់ថា ការផលិតវីដេអូវិធីសាស្ត្របង្រៀនភាសាបារាំងនេះ មានគោលបំណងពង្រីកឱកាសសិក្សា និងការប្រើប្រាស់ភាសាបារាំងឱ្យកាន់តែទូលំទូលាយក្នុងចំណោមសិស្សានុសិស្ស និស្សិត និងសាធារណជនទូទៅ។ គម្រោងនេះក៏នឹងរួមចំណែកពង្រឹងសមត្ថភាពស្តាប់ និយាយ អាន និងសរសេរភាសាបារាំង តាមរយៈមេរៀនដែលមានភាពច្បាស់លាស់ ងាយយល់ និងអាចអនុវត្តបានប្រកបដោយប្រសិទ្ធភាព។ បន្ថែមពីនេះ ក៏ជំរុញការអភិវឌ្ឍធនធាននៃការសិក្សាភាសាបារាំង និងការប្រើប្រាស់បច្ចេកវិទ្យាឌីជីថលក្នុងវិស័យអប់រំឱ្យកាន់តែមានភាពល្អប្រសើរថែមទៀតផង៕

The post ក្រសួងអប់រំ គ្រោងផលិតវីដេអូវិធីសាស្ត្របង្រៀនភាសាបារាំង ដើម្បីលើកកម្ពស់ការរៀនភាសាបារាំងក្នុងសម័យឌីជីថល appeared first on Kampuchea Thmey Daily.