ក្រុម Houthi Archives - Kampuchea Thmey Daily

ក្រុមហ៊ូធីត្រៀមចេញប្រយុទ្ធរួចហើយ បើមានភាគីណាផ្សេងចូលជួយអាមេរិកនិងអ៊ីស្រាអែល

សាង ស្រីល័ក្ខ — Sat, 28 Mar 2026 03:30:00 +0000

ក្រុមហ៊ូធី (Houthi) ដែលជាសម្ព័ន្ធភាពជាមួយអ៊ីរ៉ង់និងមានមូលដ្ឋាននៅក្នុងប្រទេសយេម៉ែន បាននិយាយនៅថ្ងៃសុក្រទី២៧មីនាថា ពួកគេត្រៀមខ្លួនរួចស្រេចហើយដើម្បីធ្វើអន្តរាគមន៍យោធា ប្រសិនបើប្រទេសដទៃទៀតចូលរួមជាមួយសហរដ្ឋអាមេរិក និងអ៊ីស្រាអែលក្នុងសង្គ្រាមប្រឆាំងអ៊ីរ៉ង់ ឬប្រសិនបើសមុទ្រក្រហមត្រូវបានប្រើ ដើម្បីបើកការវាយប្រហារលើសាធារណរដ្ឋអ៊ីស្លាមអ៊ីរ៉ង់នោះ។

អ្នកនាំពាក្យយោធារបស់ក្រុមនេះ លោក Yahya Saree (រូបភាព៖Reuters)

យោងតាមភ្នាក់ងារព័ត៌មាន Reuters អ្នកនាំពាក្យយោធារបស់ក្រុមហ៊ូធី លោក Yahya Saree បាននិយាយនៅក្នុងសេចក្តីថ្លែងតាមទូរទស្សន៍ថា «យើងសូមបញ្ជាក់ថា ម្រាមដៃរបស់យើងដាក់នៅលើគន្លឹះរួចរាល់ សម្រាប់អន្តរាគមន៍យោធាដោយផ្ទាល់» ប្រសិនបើសម្ព័ន្ធមិត្តថ្មីណាមួយចូលរួមជាមួយទីក្រុងវ៉ាស៊ីនតោន និងអ៊ីស្រាអែលប្រឆាំងនឹងអ៊ីរ៉ង់ និងសម្ព័ន្ធមិត្តរបស់ខ្លួន ឬប្រសិនបើសមុទ្រក្រហមត្រូវបានប្រើសម្រាប់ «ប្រតិបត្តិការអរិភាព» ប្រឆាំងនឹងទីក្រុងតេហេរ៉ង់។

ប៉ុន្តែអ្នកនាំពាក្យក្រុមហ៊ូធីរួបនេះ មិនបាននិយាយថា អន្តរាគមន៍ណាមួយនឹងធ្វើឡើងក្នុងទម្រង់បែបណានោះទេ។

នៅក្នុងការថ្លែងរបស់លោក Saree ក៏បាននិយាយផងដែរថា ក្រុមនេះនឹងមិនអនុញ្ញាតឲ្យសមុទ្រក្រហមត្រូវបានប្រើប្រាស់ដើម្បីអនុវត្ត «ប្រតិបត្តិការអរិភាព» ប្រឆាំងនឹងអ៊ីរ៉ង់ ឬប្រទេសមូស្លីមណាមួយឡើយ។ លោកព្រមានប្រឆាំងនឹងការរឹតបន្តឹងបន្ថែមទៀតនៃអ្វីដែលលោកបានពិពណ៌នាថា ជា «ការបិទផ្លូវលើប្រទេសយេម៉ែន»។

នៅក្នុងនោះដែរ លោកក៏បានអំពាវនាវឲ្យបញ្ឈប់ការវាយប្រហារពីអាមេរិក និងអ៊ីស្រាអែលជាបន្ទាន់លើអ៊ីរ៉ង់ និងប្រទេសសម្ព័ន្ធមិត្ត រួមទាំងទឹកដីប៉ាឡេស្ទីន លីបង់ និងអ៊ីរ៉ាក់ ហើយបានជំរុញឲ្យមានការអនុវត្តកិច្ចព្រមព្រៀងឈប់បាញ់នៅហ្គាហ្សា។

ការព្រមាននេះបានបង្កើនការរំពឹងទុកនៃការប្រឈមមុខដាក់គ្នាក្នុងតំបន់កាន់តែទូលំទូលាយ ជាពិសេសដោយសារសមត្ថភាពរបស់ក្រុមហ៊ូធី ក្នុងការវាយប្រហារគោលដៅឆ្ងាយហួសពីយេម៉ែន និងរំខានដល់ផ្លូវដឹកជញ្ជូនជុំវិញឧបទ្វីបអារ៉ាប់។

ជាក់ស្ដែង នាពេលកន្លងមក សម្ព័ន្ធមិត្តនិកាយស៊ីអ៊ីត(Shi’ite) របស់អ៊ីរ៉ង់នៅលីបង់ និងអ៊ីរ៉ាក់ បានចូលរួមក្នុងសង្គ្រាមក្នុងតំបន់ដែលបង្កឡើងដោយការវាយប្រហាររបស់អាមេរិក និងអ៊ីស្រាអែលលើទីក្រុងតេហេរ៉ង់រួចហើយ។ រហូតមកដល់ពេលនេះ ក្រុមហ៊ូធីមិនទាន់បានប្រកាសពីការចូលរួមដោយផ្ទាល់ណាមួយក្នុងសង្គ្រាមនោះទេ ទោះបីជាសមត្ថភាពយោធារបស់ពួកគេ និងទីតាំងភូមិសាស្ត្រដែលមើលរំលងសមុទ្រក្រហមក៏ដោយ៕

អត្ថបទ៖ សាង ស្រីល័ក្ខ

ក្រុមហ៊ូធីចូលជួយអ៊ីរ៉ង់ អាចបង្កើតបញ្ហាថាមពលថ្មី នៅសមុទ្រក្រហមយ៉ាងដូចម្តេច?

The post ក្រុមហ៊ូធីត្រៀមចេញប្រយុទ្ធរួចហើយ បើមានភាគីណាផ្សេងចូលជួយអាមេរិកនិងអ៊ីស្រាអែល appeared first on Kampuchea Thmey Daily.

ស្លាប់១២នាក់ និងរបួស៣០នាក់ ក្រោយអាមេរិកវាយប្រហារទីផ្សារមួយកន្លែងនៅយេម៉ែន

Chheang — Mon, 21 Apr 2025 03:30:17 +0000

មនុស្ស ១២នាក់បានស្លាប់ និងយ៉ាងហោចណាស់ ៣០នាក់ផ្សេងទៀតបានរងរបួស បន្ទាប់ពីការវាយប្រហារតាមអាកាសរបស់សហរដ្ឋអាមេរិកទៅលើទីផ្សារដ៏មមាញឹកមួយកន្លែងនៅក្នុងរដ្ឋធានីសាណារបស់ប្រទេសយេម៉ែនកាលពីល្ងាចថ្ងៃអាទិត្យទី២០ខែមេសាឆ្នាំ២០២៥។ នេះបើយោងតាមការប្រកាសនៅព្រឹកថ្ងៃចន្ទរបស់ក្រសួងសុខាភិបាលដែលគ្រប់គ្រងដោយក្រុមសកម្មប្រយុទ្ធហ៊ូធី។

(រូបថត៖ AP)

ហ៊ូធី បានអះអាងថា ការវាយប្រហាររបស់អាមេរិកបានផ្តោតលើតំបន់ Farwa ក្នុងសង្កាត់ Shuub ជាតំបន់ដែលមានប្រជាជនរស់នៅយ៉ាងច្រើនក្រាស់ក្រែលនៅចំកណ្ដាលរដ្ឋធានីសាណា។

យោធាអាមេរិកមិនទាន់ចេញសេចក្តីថ្លែងការណ៍ជាផ្លូវការអំពីឧបទ្ទវហេតុនេះនៅឡើយទេ។ ទោះជាយ៉ាងណាក៏ដោយ ការវាយប្រហារតាមអាកាសត្រូវបានគេជឿថាជាផ្នែកនៃយុទ្ធនាការយោធាដែលកំពុងបន្តរបស់ទីក្រុងវ៉ាស៊ីនតោន ក្នុងគោលបំណងធ្វើឲ្យចលនាក្រុមហ៊ូធីចុះខ្សោយ ដែលអាមេរិកចោទប្រកាន់ថាបានគំរាមកំហែងដល់ការដឹកជញ្ជូនអន្តរជាតិ និងសន្តិសុខក្នុងតំបន់ដែលមានអ៊ីរ៉ង់ជាអ្នកកាងពីក្រោយខ្នង។

ចាប់តាំងពីខែវិច្ឆិកាឆ្នាំ២០២៣មក ក្រុមហ៊ូធីបានបើកការវាយប្រហារជាង ១០០លើកលើនាវាពាណិជ្ជកម្មនៅសមុទ្រក្រហម ដែលរំខានយ៉ាងខ្លាំងដល់ផ្លូវពាណិជ្ជកម្មដែនសមុទ្រ និងជំរុញឲ្យមានការឆ្លើយតបយ៉ាងចាស់ដៃពីអាមេរិក និងសម្ព័ន្ធមិត្តរបស់អាមេរិក។ ការវាយប្រហារតាមអាកាសកាលពីថ្ងៃអាទិត្យ បានកត់សម្គាល់ការកើនឡើងភាពតានតឹងដ៏អាក្រក់បំផុតមួយក្នុងរយៈពេលជាច្រើនសប្តាហ៍ ហើយបានបង្កឲ្យមានការភ័យខ្លាចនៃស្ថានភាពមនុស្សធម៌នៅក្នុងប្រទេសយេម៉ែនដែលកាន់តែយ៉ាប់យ៉ឺនថែមទៀត។

ក្រុមហ៊ូធី (រូបថត៖ AP)

អគ្គលេខាធិការអង្គការសហប្រជាជាតិ លោក Antonio Guterres បានសម្តែងការព្រួយបារម្ភយ៉ាងខ្លាំងចំពោះការកើនឡើងចំនួនស្លាប់របស់ជនស៊ីវិល ដោយជំរុញឲ្យភាគីទាំងអស់អនុវត្តការអត់ធ្មត់ និងធានាការការពារជនស្លូតត្រង់។ អង្គការសិទ្ធិមនុស្សក៏បានអំពាវនាវឲ្យមានការស៊ើបអង្កេតឯករាជ្យលើឧប្បត្តិហេតុនេះ និងឲ្យមានការទទួលខុសត្រូវចំពោះការរំលោភលើច្បាប់អន្តរជាតិ។

យុទ្ធនាការផ្លូវអាកាសរបស់អាមេរិក បានពង្រីកក្នុងរយៈពេលប៉ុន្មានខែថ្មីៗនេះ ដោយផ្តោតលើឃ្លាំងអាវុធ ការដំឡើងរ៉ាដា និងមជ្ឈមណ្ឌលបញ្ជាដែលត្រូវបានចោទប្រកាន់ថាបានប្រើប្រាស់ដោយក្រុមហ៊ូធី។ យ៉ាងណាមិញ ហេតុការណ៍ដែលជនស៊ីវិលបាត់បង់ជីវិតពីប្រតិបត្តិការបែបនេះ បានបង្កើនការរិះគន់ និងបង្កើនភាពតានតឹងនៅក្នុងតំបន់ដែលផុយស្រួយរួចទៅហើយ៕

ដោយ៖ ឈាង

The post ស្លាប់១២នាក់ និងរបួស៣០នាក់ ក្រោយអាមេរិកវាយប្រហារទីផ្សារមួយកន្លែងនៅយេម៉ែន appeared first on Kampuchea Thmey Daily.

ត្រាំបញ្ជាបើកការវាយប្រហារទ្រង់ទ្រាយធំលើក្រុមហ៊ូធីនៅយេម៉ែន បង្កស្លាប់និងរបួសជាង១៣០នាក់

Rann Reuy — Sun, 16 Mar 2025 07:24:36 +0000

ប្រធានាធិបតី ដូណាល់ ត្រាំ បាននិយាយដោយលើកឡើងថា សហរដ្ឋអាមេរិកបានបើកការវាយប្រហារតាមអាកាសដ៏ខ្លាំងក្លាមួយមិនធ្លាប់មានលើក្រុមឧទ្ទាម ហ៊ូធី (Houthi) ក្នុងប្រទេសយេម៉ែន ដោយលើកឡើងពីការវាយប្រហាររបស់ក្រុមប្រដាប់អាវុធដែលគាំទរដោយប្រទេសអ៊ីរ៉ង់នេះ លើការដឹកជញ្ជូននៅសមុទ្រក្រហមថាជាហេតុផលដែលធ្វើឲ្យអាមេរិកសងសឹក។

យោងការផ្សាយរបស់ BBC ប្រធានាធិបតីសហរដ្ឋអាមេរិក លោក ដូណាល់ ត្រាំ បានសរសេរនៅលើបណ្តាញសង្គម Truth របស់លោក ដោយលើកឡើងថា៖«ការលួចចម្លង អំពើហឹង្សា និងអំពើភេរវកម្ម» របស់ពួកគេបានធ្វើឱ្យខាតបង់ រាប់ពាន់លានដុល្លារ និងធ្វើឱ្យមានហានិភ័យដល់ជីវិត។

លោក ត្រាំ បានចោទចំៗ ថា៖‍«ត្រូវបានផ្តល់មូលនិធិដោយប្រទេសអ៊ីរ៉ង់ ក្រុមហ៊ូធី បានបាញ់មីស៊ីលទៅលើយន្តហោះអាមេរិក ហើយបានកំណត់គោលដៅលើកងទ័ព និងសម្ព័ន្ធមិត្តរបស់យើង»។

ក្រសួងសុខាភិបាលដែលគ្រប់គ្រងដោយក្រុមហ៊ូធី បាននិយាយថា យ៉ាងហោចណាស់មនុស្ស ៣១នាក់បានស្លាប់ និង ១០១នាក់ផ្សេងទៀតបានរងរបួសនៅក្នុងការវាយប្រហារនេះ។

កាលពីល្ងាចថ្ងៃសៅរ៍ យោធាសហរដ្ឋនៅតំបន់មជ្ឈិមបូព៌ាបានបើកប្រតិបត្តិការវាយប្រហារតាមផ្លូវអកាសលើក្រុមហ៊ូធីដែលមានមូលដ្ឋានទីក្រុង Sanaa ប្រទេសយេម៉ែន ដោយបានបណ្តាលឲ្យស្លាប់១៣នាក់និងរបួស៩នាក់។ ប៉ុន្តែនៅក្នុងសេចក្តីរាយការណ៍ ក្រោយៗមកទៀតបង្ហាញឲ្យឃើញថា ចំនួនអ្នកស្លាប់និងអ្នករបួសបានកើនឡើងយ៉ាងឆាប់រហ័ស។

យោងតាមប៉ុស្តិ៍ទូរទស្សន៍ Al Hadath ទីស្នាក់ការក្រុមប្រឹក្សានយោបាយកំពូលរបស់់ក្រុមហ៊ូធី ឃ្លាំងអាវុធ និងមជ្ឈមណ្ឌលបញ្ជាការរបស់ពួកឧទ្ទាមត្រូវបានបាញ់ផ្លោងក្នុងទីក្រុង Sanaa។ អាមេរិកក៏បានវាយប្រហារលើគោលដៅរបស់ក្រុមឧទ្ទាមយេម៉ែនផងដែរនៅក្នុងខេត្ត Saada, Dhamar និង Al-Bayda។

The post ត្រាំបញ្ជាបើកការវាយប្រហារទ្រង់ទ្រាយធំលើក្រុមហ៊ូធីនៅយេម៉ែន បង្កស្លាប់និងរបួសជាង១៣០នាក់ appeared first on Kampuchea Thmey Daily.

អ៊ីរ៉ង់ កំពុងលួចចរចាស្ងាត់ៗជាមួយរុស្ស៊ីឲ្យបញ្ជូនមីស៊ីលដល់ក្រុមហ៊ូធី

Chheang — Wed, 25 Sep 2024 04:26:13 +0000

ប្រទេសអ៊ីរ៉ង់ និងរុស្ស៊ី កំពុងចរចាដោយសម្ងាត់ពាក់ព័ន្ធនឹងការបញ្ជូនមីស៊ីលប្រឆាំងនាវារបស់ក្រុងមូស្គូឲ្យទៅកាន់ក្រុមសកម្មប្រយុទ្ធហ៊ូធីនៅប្រទេសយេម៉ែន។ នេះបើយោងតាមការចុះផ្សាយរបស់ទីភ្នាក់ងារព័ត៌មាន Reuters នៅថ្ងៃទី២៥ខែកញ្ញា។

ក្រុមហ៊ូធី (រូបភាព៖ AP)

ប្រភពចំនួន៧ ដែលបង្ហើបប្រាប់ Reuters បាននិយាយថា រុស្ស៊ីមិនទាន់សម្រេចចិត្តទេក្នុងការបញ្ជូនមីស៊ីល Yakhont ដែលត្រូវបានគេស្គាល់ថា P-800 Oniks ខណៈអ្នកជំនាញបាននិយាយថានឹងអនុញ្ញាតឲ្យក្រុមហ៊ូធីវាយប្រហារគោលដៅនាវាពាណិជ្ជកម្មនៅសមុទ្រក្រហមបានត្រឹមត្រូវជាងមុន និងបង្កើនការគំរាមកំហែងដល់នាវាចម្បាំងសហរដ្ឋអាមេរិក និងអឺរ៉ុប។

កាលពីខែកក្កដា កាសែត Wall Street Journal ក៏ធ្លាប់បានរាយការណ៍ផងដែរថា រុស្ស៊ីកំពុងពិចារណាបញ្ជូនមីស៊ីលប្រភេទនេះឲ្យទៅហ៊ូធី។ យ៉ាងណា កាលណោះ តួនាទីរបស់អ៊ីរ៉ង់ជាអន្តរការីមិនត្រូវបានគេរាយការណ៍នោះឡើយ។

ក្រុមហ៊ូធី បានចាប់ផ្តើមការវាយប្រហារដោយយន្តហោះគ្មានមនុស្សបើក និងមីស៊ីលម្តងហើយម្តងទៀតលើកប៉ាល់នៅក្នុងបណ្តាញដឹកជញ្ជូនសមុទ្រក្រហម ចាប់តាំងពីខែវិច្ឆិកាឆ្នាំមុន ដើម្បីបង្ហាញការគាំទ្រដល់ក្រុមហាម៉ាសក្នុងសង្រ្គាមតំបន់ហ្គាហ្សាជាមួយអ៊ីស្រាអែល។

ពួកគេបានពន្លិចនាវាយ៉ាងហោចណាស់២គ្រឿង ហើយរឹបអូសបាន១គ្រឿងផ្សេងទៀត ដែលរំខានដល់ពាណិជ្ជកម្មដែនសមុទ្រពិភពលោក ដោយបង្ខំឲ្យក្រុមហ៊ុនដឹកជញ្ជូនត្រូវបង្វែរទំនិញ ហើយជំរុញឲ្យមានការឡើងថ្លៃនៃធានារ៉ាប់រងសម្រាប់កប៉ាល់ដែលធ្វើដំណើរតាមសមុទ្រក្រហម។

ជាចំណាត់ការ សហរដ្ឋអាមេរិក និងអង់គ្លេសបានវាយលុកទីតាំងមួយចំនួនរបស់ក្រុមហ៊ូធី ប៉ុន្តែបានបរាជ័យក្នុងការបញ្ឈប់ការវាយប្រហាររបស់ក្រុមនេះ។

មន្ត្រីក្នុងតំបន់២រូបដែលដឹងពីកិច្ចចរចាសម្ងាត់រវាងអ៊ីរ៉ង់និងរុស្ស៊ី បាននិយាយថា ក្រុមហ៊ូធី និងរុស្ស៊ីបានជួបគ្នាក្នុងទីក្រុងតេហេរ៉ង់យ៉ាងហោចណាស់២ដងក្នុងឆ្នាំ២០២៤នេះ ហើយថា ការពិភាក្សាដើម្បីផ្តល់មីស៊ីលរាប់សិបគ្រាប់ដែលមានរយៈចម្ងាយប្រហែល៣០០គីឡូម៉ែត្រ កំពុងបន្តធ្វើជាមួយអ៊ីរ៉ង់បន្ថែមទៀតក្នុងកិច្ចប្រជុំនារយៈពេលប៉ុន្មានសប្តាហ៍ខាងមុខ។

កន្លងមក រុស្ស៊ីបានផ្គត់ផ្គង់មីស៊ីល Yakhont ដល់ក្រុមហេសបូឡាដែលមានការគាំទ្រដោយអ៊ីរ៉ង់ដូចក្រុមហ៊ូធីអ៊ីចឹងដែរ។

ប្រភព១ផ្សេងទៀត បានប្រាប់ Reuters ថា ការចរចាបានចាប់ផ្តើមតាំងពីពេលប្រធានាធិបតីអ៊ីរ៉ង់ លោក Ebrahim Raisi មិនទាន់ស្លាប់ក្នុងការធ្លាក់ឧទ្ធម្ភាគចក្រកាលពីខែឧសភាមកម៉្លេះ។

ចំណែកឯប្រភពចារកម្មលោកខាងលិច បាននិយាយថា៖ «រុស្ស៊ីកំពុងចរចាជាមួយក្រុមហ៊ូធី សម្រាប់ការបញ្ជូនមីស៊ីល Yakhont ល្បឿនលឿនប្រឆាំងនឹងនាវា។ អ៊ីរ៉ង់កំពុងធ្វើជាអន្តរការីលើកិច្ចពិភាក្សានេះ ប៉ុន្តែមិនចង់មានហត្ថលេខារបស់ពួកគេលើវានោះទេ»។

ទាំងបេសកជនអ៊ីរ៉ង់ប្រចាំអង្គការសហប្រជាជាតិ និងក្រសួងការពារជាតិរុស្ស៊ី មិនបានឆ្លើយតបទៅនឹងសំណើសុំការអត្ថាធិប្បាយទេ។ ដោយឡែក លោក Mohamed Abdel-Salam អ្នកនាំពាក្យផ្លូវការសម្រាប់ក្រុមហ៊ូធីនៅយេម៉ែន បានឆ្លើយថា៖ «យើងមិនដឹងពីអ្វីដែលអ្នកបាននិយាយនោះឡើយ»។

ពាក់ព័ន្ធនឹងបញ្ហានេះ មន្ត្រីក្រសួងការពារជាតិអាមេរិកម្នាក់ បានរៀបរាប់ថា វិធានការណាមួយដើម្បីពង្រឹងសមត្ថភាពរបស់ក្រុមហ៊ូធី នឹងធ្វើឲ្យមានការ «បំផ្លាញផលប្រយោជន៍រួមរបស់អន្តរជាតិចំពោះសេរីភាពនៃការធ្វើនាវាចរណ៍សកល និងស្ថិរភាពនៅសមុទ្រក្រហម និងតំបន់មជ្ឈិមបូព៌ាទាំងមូល»៕

ដោយ៖ ឈាង

The post អ៊ីរ៉ង់ កំពុងលួចចរចាស្ងាត់ៗជាមួយរុស្ស៊ីឲ្យបញ្ជូនមីស៊ីលដល់ក្រុមហ៊ូធី appeared first on Kampuchea Thmey Daily.

អាមេរិក បាញ់កម្ទេចនាវា២គ្រឿងរបស់ក្រុមហ៊ូធីលើសមុទ្រក្រហម

Chheang — Wed, 14 Aug 2024 08:09:03 +0000

ទីបញ្ជាការកណ្តាលរបស់សហរដ្ឋអាមេរិក (CENTCOM) បាននិយាយកាលពីថ្ងៃទី១៣ខែសីហាថា ខ្លួនបានកម្ទេចនាវាក្រុមសកម្មប្រយុទ្ធហ៊ូធីចំនួនពីរគ្រឿងនៅលើសមុទ្រក្រហម ដោយចាត់ទុកនាវាទាំងពីរនោះគឺជា «ការគំរាមកំហែងជាក់ស្ដែង និងអាសន្ន» ចំពោះសហរដ្ឋអាមេរិក និងកងកម្លាំងចម្រុះនៅក្នុងតំបន់។

(រូបភាព៖ AP)

CENTCOM បានបង្ហោះនៅលើបណ្ដាញសង្គម X ថា៖ «អាកប្បកិរិយាព្រហើន និងគ្រោះថ្នាក់នេះដោយក្រុមហ៊ូធី ដែលមានការគាំទ្រដោយអ៊ីរ៉ង់ នៅតែបន្តគំរាមកំហែងដល់ស្ថិរភាព និងសន្តិសុខក្នុងតំបន់»។

ក្រុមហ៊ូធីនៅប្រទេសយេម៉ែន បាននិងកំពុងវាយប្រហារលើកប៉ាល់ដឹកទំនិញដែលមានទំនាក់ទំនងជាមួយអ៊ីស្រាអែលនៅលើសមុទ្រក្រហម និងឈូងសមុទ្រ Aden។ សកម្មភាពរបស់ក្រុមហ៊ូធី បានបង្ហាញពីការគាំទ្ររបស់ពួកគេ ចំពោះក្រុមសកម្មប្រយុទ្ធហាម៉ាសនៅក្នុងតំបន់ហ្គាហ្សា បន្ទាប់ពីផ្ទុះសង្គ្រាមថ្ងៃទី៧ខែតុលាឆ្នាំមុន។

សមុទ្រក្រហម គឺជាផ្លូវទឹកដែលប្រើញឹកញាប់បំផុតលើពិភពលោកសម្រាប់ការដឹកជញ្ជូនប្រេង និងឥន្ធនៈ។

ភាពតានតឹងកំពុងកើនឡើងខ្ពស់នៅមជ្ឈិមបូព៌ា បន្ទាប់ពីការធ្វើឃាតមេដឹកនាំកំពូលក្រុមហាម៉ាសគឺលោក Ismail Haniyeh កាលពីថ្ងៃទី៣១ខែកក្កដា នៅរដ្ឋធានីតេហេរ៉ង នៃប្រទេសអ៊ីរ៉ង់ និងការសម្លាប់របស់មេបញ្ជាការជាន់ខ្ពស់ក្រុមហេសបូឡា លោក Fuad Shukr នៅក្នុងការវាយប្រហារតាមអាកាសលើតំបន់ជាយក្រុងភាគខាងត្បូងនៃទីក្រុង Beirut ប្រទេសលីបង់ កាលពីថ្ងៃទី៣០ខែកក្កដា៕

ដោយ៖ ឈាង

The post អាមេរិក បាញ់កម្ទេចនាវា២គ្រឿងរបស់ក្រុមហ៊ូធីលើសមុទ្រក្រហម appeared first on Kampuchea Thmey Daily.

អាមេរិក អង់គ្លេស បើកការវាយប្រហារដែនអាកាស ក្នុងប្រទេសយេម៉ែន

Chheang — Fri, 31 May 2024 04:28:03 +0000

សហរដ្ឋអាមេរិក និងចក្រភពអង់គ្លេស បានបើកការវាយប្រហារដែនអាកាសនៅចំទីតាំងជាច្រើនកន្លែង ស្ថិតនៅក្នុងប្រទេសយេម៉ែន ដែលសម្ព័ន្ធមិត្តទាំង២អះអាងថា ជាយុទ្ធនាការបង្ក្រាបចលានាបះបោរក្រុមឧទ្ទាម Houthi។ ការវាយប្រហារនេះ ធ្វើឡើងបន្ទាប់ពីក្រុមឧទ្ទាមមួយនេះ បានលួចវាយឆ្មក់កប៉ាល់យ៉ាងហោចណាស់ ៦គ្រឿង កាលពីដើមសប្ដាហ៍នេះ។

សារព័ត៌មាន AFP បានចុះផ្សាយនៅថ្ងៃទី៣១ ខែឧសភានេះ ថា សម្លេងផ្ទុះត្រូវបានឮនៅក្នុងរដ្ឋធានី Sanaa និងកំពង់ផែទីក្រុង Hodeida តាំងពីយប់ថ្ងៃព្រហស្បតិ៍ មកទល់នឹងព្រឹកថ្ងៃសុក្រនេះនៅមិនទាន់បាត់ផង។

ដោយឡែកបើតាមប៉ុស្ដិ៍ទូរទស្សន៍គ្រប់គ្រងដោយក្រុម Houthi បានប្រកាសថា ការវាយប្រហាររបស់អាមេរិក-អង់គ្លេស មានគោលដៅកម្ទេចហេដ្ឋារចនាសម្ព័ន្ធទូរគមនាគមន៍នៅក្រុង Taez ហើយក្នុងនោះមានអ្នកស្លាប់ និងរបួសប៉ុន្មាននាក់ផងដែរ តែមិនទាន់អាចកំណត់តួលេខបានច្បាស់លាស់នោះឡើយ។

ក្រសួងការពារជាតិចក្រភពអង់គ្លេស បានប្រកាសនៅក្នុងសេចក្ដីថ្លែងការណ៍ថា យន្តហោះចម្បាំងរបស់ខ្លួន បានបើកការវាយប្រហារនៅក្នុងប្រតិបត្តិការរួមគ្នាជាមួយសហរដ្ឋអាមេរិក ដើម្បីប្រឆាំងកម្លាំងយោធាក្រុម Houthi ក្នុងគោលបំណងកាត់បន្ថយអនុភាពរបស់ពួកគេកុំឲ្យបន្តការវាយប្រហារលើការដឹកជញ្ជូនអន្តរជាតិនៅក្នុងសមុទ្រក្រហម និងឈូងសមុទ្រ Aden ទៀត។ ក្រសួងអង់គ្លេស បានបន្ថែមថា អ្នកឈ្លបការណ៍សម្ងាត់ បានបង្ហើបប្រាប់ពីទីតាំងចំនួន ២កន្លែងក្បែរផែ Hodeida ដែលមានជាប់ពាក់ព័ន្ធនឹងការវាយប្រហារកប៉ាល់អន្តរជាតិ។ ទីតាំងនោះ ជាបណ្ដុំអគារជាច្រើន ប្រើប្រាស់ជាឃ្លាំង និងជាទីតាំងទុកបញ្ជាដ្រូនបើកការវាយប្រហារនៅលើដី និងការវាយប្រហារនៅលើអាកាស។

ដោយឡែក ទីបញ្ជាការកណ្ដាលអាមេរិក កំណត់បានទីតាំងដែលក្រុម Houthi កាន់កាប់ ចំនួន១៣កន្លែង ហើយប្រកាសថា ការវាយប្រហារចាំបាច់ត្រូវតែធ្វើឡើង ដើម្បីការពារកងកម្លាំងអាមេរិក ក៏ដូចជាធានាបាននូវសេរីភាពនាវាចរណ៍ និងធ្វើឲ្យផ្ទៃទឹកអន្តរជាតិមានសុវត្ថិភាព ព្រមទាំងសន្តិសុខជាងមុន។

សូមបញ្ជាក់ថា គិតចាប់តាំងពីខែមករា ឆ្នាំ២០២៤ សហរដ្ឋអាមេរិក និងចក្រភពអង់គ្លេស បានវាយប្រហារសងសឹកប៉ុន្មានដងរួចមកហើយលើក្រុមជ្រុលនិយម Houthi ក្នុងប្រទេសយេម៉ែន ក្រោយពីក្រុមនេះតែងបង្កជាព្យុះភ្លៀងនៅលើផ្ទៃសមុទ្រអន្តរជាតិ។ យ៉ាងណាមិញ ការវាយប្រហារទាំងនោះ មិនបានធ្វើឲ្យក្រុម Houthi ញញើតសោះឡើយ ហើយក្រុមនេះថែមទាំងបានប្ដេជ្ញាបន្តវាយឆ្មក់កប៉ាល់របស់អាមេរិក និងអង់គ្លេស ក៏ដូចជាកប៉ាល់ផ្សេងទៀត ដែលបានឆ្លងកាត់ហើយមានគោលដៅឆ្ពោះទៅកំពង់ផែប្រទេសអ៊ីស្រាអ៊ែល៕

ដោយ៖ ឈាង

The post អាមេរិក អង់គ្លេស បើកការវាយប្រហារដែនអាកាស ក្នុងប្រទេសយេម៉ែន appeared first on Kampuchea Thmey Daily.

ទាហានជើងទឹកហ្វីលីពីន ១១នាក់ រស់ជីវិតពីការវាយប្រហារដោយក្រុម Houthi ពេលនេះបានទៅដល់ប្រទេសកំណើតវិញហើយ

Kosal Apple — Tue, 12 Mar 2024 16:37:55 +0000

ទាហានជើងទឹកហ្វីលីពីន ១១នាក់ បានមកដល់ប្រទេសហ្វីលីពីន កាលពីថ្ងៃអង្គារ ទី១២ មីនា ពោលគឺជិតមួយសប្តាហ៍ បន្ទាប់ពីពួកគេបានរស់ជីវិតពីការវាយប្រហារដោយមីស៊ីលរបស់ក្រុម Houthi ចេញពីប្រទេសយេម៉ែន។ នេះបើយោងតាមការផ្សាយរបស់ទីភ្នាក់ងារសារព័ត៌មាន Reuter ថ្ងៃទី១២ ខែមីនា ឆ្នាំ ២០២៤ ។

រូបថតដោយ÷ Rueters

ប្រភពបានឱ្យដឹងថា ទាហានជើងទឹកហ្វីលីពីន ១១នាក់ខាងលើនេះ ជាសមាជិកនាវិកនៃកប៉ាល់ពាណិជ្ជករ True Confidence ដែលមានទង់ជាតិ Barbados ត្រូវបានរងការប្រហារពីសំណាក់ក្រុម Houthi កាលពីសប្តាហ៍មុន ដោយកាលនោះបានសម្លាប់នាវិក៣នាក់ រួមទាំងជនជាតិហ្វីលីពីន២នាក់ផងដែរ(របួស)។

ក្រសួងពលករចំណាកស្រុកបាននិយាយនៅក្នុងសេចក្តីថ្លែងការណ៍មួយថា អ្នកនៅរស់រានមានជីវិតទាំង ១១នាក់នេះ នឹងទទួលបានជំនួយពីរដ្ឋាភិបាលនៅពេលមកដល់ទីក្រុងម៉ានីល។

លោក Mark Anthony Dagohoy សមាជិកនាវិកនៅលើ True Confidence បាននិយាយថា វាពិបាកក្នុងការរំលឹកពីអ្វីដែលពួកគេបានឆ្លងកាត់ ប៉ុន្តែគាត់អរគុណសម្រាប់បុគ្គលិកយោធាដែលបានជួយសង្គ្រោះពួកគាត់ពីសេចក្ដីស្លាប់។

ក្រុមមន្ត្រីបាននិយាយថា ជនជាតិហ្វីលីពីន២នាក់ផ្សេងទៀតដែលរងរបួសធ្ងន់ធ្ងរ ពេលនេះកំពុងសម្រាកព្យាបាលនៅក្នុងមន្ទីរពេទ្យ Djibouti ។ ពេលបានព្យាបាលរួចហើយ ពួកគេនឹងត្រូវបញ្ជូនត្រឡប់ទៅក្រុងម៉ានីលវិញ។

រូបថត៖ ទីបញ្ជាការកណ្តាលអាមេរិក

ជាមួយគ្នានេះ អនុរដ្ឋលេខាធិការក្រសួងការបរទេស លោក Eduardo de Vega បាននិយាយនៅថ្ងៃអង្គារថា រដ្ឋាភិបាលហ្វីលីពីនក៏បានឈានដល់កិច្ចព្រមព្រៀងជាមួយសហព័ន្ធកម្មករដឹកជញ្ជូនអន្តរជាតិសម្រាប់អ្នកដំណើរតាមសមុទ្រហ្វីលីពីន ដើម្បីមានសិទ្ធិបដិសេធការដាក់ពង្រាយនៅក្នុងតំបន់ដែលមានហានិភ័យខ្ពស់។

សូមជម្រាបថា ពួក Houthis បាននិងកំពុងវាយលុកកប៉ាល់នៅសមុទ្រក្រហមតាំងពីខែវិច្ឆិកា ហើយពួកគេនិយាយថានេះជាយុទ្ធនាការសាមគ្គីភាពជាមួយប៉ាឡេស្ទីនក្នុង សង្គ្រាមដែលកំពុងបន្តនៅតំបន់ហ្គាហ្សា ។ការវាយប្រហារនេះបានរំខានដល់ការដឹកជញ្ជូនទូទាំងពិភពលោក ដោយបង្កើនការចំណាយ ដោយសារតែក្រុមហ៊ុននានាត្រូវបានបង្ខំឱ្យធ្វើដំណើរតាមផ្លូវទឹកវាងដ៏វែង នៅជុំវិញអាហ្វ្រិកខាងត្បូង ៕

ដោយ÷ ប៉ោ កុសល

The post ទាហានជើងទឹកហ្វីលីពីន ១១នាក់ រស់ជីវិតពីការវាយប្រហារដោយក្រុម Houthi ពេលនេះបានទៅដល់ប្រទេសកំណើតវិញហើយ appeared first on Kampuchea Thmey Daily.

តម្លៃប្រេងពិភពលោកឡើងថ្លៃ ក្រោយក្រុមហ៊ុនប្រេង អង់គ្លេស ផ្អាកដឹកជញ្ជូនឆ្លងកាត់សមុទ្រក្រហម

ratanak neang — Tue, 19 Dec 2023 07:59:40 +0000

ក្រុមហ៊ុនប្រេងយក្សរបស់អង់គ្លេស BP បានប្រកាសផ្អាកដឹកជញ្ជូនប្រេងឆ្លងកាត់សមុទ្រក្រហមជាបណ្តោះអាសន្ន បន្ទាប់ពីមានការវាយប្រហារថ្មីៗពីសំណាក់ក្រុមឧទ្ទាមហ៊ូធីនៅក្នុងប្រទេសយេម៉ែន ដោយក៏បានជំរុញតម្លៃប្រេងកើនឡើងខ្ពស់ផងដែរ ។

ក្រុមហ៊ុនបញ្ជាក់ថា ការសម្រេចចិត្តផ្អាកដឹកជញ្ជូនឆ្លងកាត់សមុទ្រក្រហម គឺដោយសារតែមើលឃើញពីស្ថានភាពសន្តិសុខកាន់តែយ៉ាប់យ៉ឺនសម្រាប់ផ្លូវដឹកជញ្ជូន ។ ដូចនេះ ក្រុមហ៊ុនត្រូវតែធ្វើការសម្រេចដោយប្រុងប្រយ័ត្ន ហើយកំពុងស្ថិតក្រោមការត្រួតពិនិត្យជាបន្តបន្ទាប់លើបញ្ហាប្រែប្រួលនៅក្នុងតំបន់ផងដែរ ។

សម្រាប់ការផ្អាកនេះដែរ បានជំរុញឲ្យតម្លៃប្រេងពិភពលោក ដូចជាក្រុមហ៊ុនប្រេងឆៅ Brent ឡើងថ្លៃជិត ៣ ភាគរយ ដោយដាក់លក់ក្នុងតម្លៃ ៧៣.៤៩ ដុល្លារក្នុងមួយបារ៉ែល ខណៈក្រុមហ៊ុនប្រេងអាមេរិក West Texas Intermediate (WTI) ឡើងថ្លៃដល់ ៧៨.៦៨ ដុល្លារក្នុងមួយបារ៉ែល ។

សមុទ្រក្រហមគឺជាផ្លូវសមុទ្រដែលប្រើញឹកញាប់បំផុតរបស់ពិភពលោកសម្រាប់ការដឹកជញ្ជូនប្រេង និងឥន្ធនៈ ខណៈក្រុមហ៊ុនដឹកជញ្ជូនធំៗ បានចាប់ផ្តើមឈប់ប្រើប្រាស់ផ្លូវនៅសមុទ្រក្រហម ក្រោយការវាយប្រហារដោយក្រុមឧទ្ទាមហ៊ូធីដែលគាំទ្រដោយអ៊ីរ៉ង់ ។

គួរបញ្ជាក់ថា ការវាយប្រហារជាហូរហែនេះកើតមានឡើង បន្ទាប់ពីលោក Yahya Seri អ្នកនាំពាក្យយោធានៃក្រុមហ៊ូធីបានប្រកាសនៅលើបណ្តាញ X កាលពីខែវិច្ឆិកាថា នឹងកំណត់គោលដៅលើនាវាដែលមានទង់ជាតិអ៊ីស្រាអែល ដើម្បីឆ្លើយតបទៅនឹងការវាយប្រហារសងសឹករបស់អ៊ីស្រាអែលលើតំបន់ហ្គាហ្សាស្ទ្រីប ៕

ប្រែសម្រួល៖ នាង រតនៈ

ប្រភព៖ Anadolu

The post តម្លៃប្រេងពិភពលោកឡើងថ្លៃ ក្រោយក្រុមហ៊ុនប្រេង អង់គ្លេស ផ្អាកដឹកជញ្ជូនឆ្លងកាត់សមុទ្រក្រហម appeared first on Kampuchea Thmey Daily.

ក្រុម Houthi Archives - Kampuchea Thmey Daily

ក្រុមហ៊ូធី​​ត្រៀម​ចេញ​ប្រយុទ្ធ​រួច​ហើយ បើមានភាគី​​ណា​ផ្សេង​ចូលជួយ​អាមេរិក​និង​អ៊ីស្រាអែល​

ស្លាប់១២​នាក់ និង​របួស​៣០នាក់ ក្រោយ​អាមេរិក​វាយប្រហារ​ទីផ្សារ​មួយ​កន្លែង​នៅ​យេម៉ែន

អ៊ីរ៉ង់ កំពុង​លួច​ចរចា​ស្ងាត់ៗ​ជាមួយ​រុស្ស៊ី​ឲ្យ​បញ្ជូន​មីស៊ីល​ដល់​ក្រុម​ហ៊ូធី

អាមេរិក បាញ់​កម្ទេច​នាវា​២គ្រឿង​របស់​ក្រុម​ហ៊ូធី​លើ​សមុទ្រ​ក្រហម

អាមេរិក អង់គ្លេស បើក​ការ​វាយ​ប្រហារ​ដែន​អាកាស​ ​ក្នុង​ប្រទេស​យេម៉ែន

ទាហានជើងទឹកហ្វីលីពីន ១១នាក់ រស់ជីវិតពីការវាយប្រហារដោយក្រុម Houthi ពេលនេះបានទៅដល់ប្រទេសកំណើតវិញហើយ

តម្លៃប្រេងពិភពលោកឡើងថ្លៃ ក្រោយក្រុមហ៊ុនប្រេង អង់គ្លេស ផ្អាកដឹកជញ្ជូនឆ្លងកាត់សមុទ្រក្រហម

ក្រុមហ៊ូធីត្រៀមចេញប្រយុទ្ធរួចហើយ បើមានភាគីណាផ្សេងចូលជួយអាមេរិកនិងអ៊ីស្រាអែល

ស្លាប់១២នាក់ និងរបួស៣០នាក់ ក្រោយអាមេរិកវាយប្រហារទីផ្សារមួយកន្លែងនៅយេម៉ែន

អ៊ីរ៉ង់ កំពុងលួចចរចាស្ងាត់ៗជាមួយរុស្ស៊ីឲ្យបញ្ជូនមីស៊ីលដល់ក្រុមហ៊ូធី

អាមេរិក បាញ់កម្ទេចនាវា២គ្រឿងរបស់ក្រុមហ៊ូធីលើសមុទ្រក្រហម

អាមេរិក អង់គ្លេស បើកការវាយប្រហារដែនអាកាស ក្នុងប្រទេសយេម៉ែន