ព័ត៌មានអន្ដរជាតិ

អាមេរិក បាញ់កម្ទេចនាវា២គ្រឿងរបស់ក្រុមហ៊ូធីលើសមុទ្រក្រហម

បានផុស

៨ ខែ មុន

នៅ

ថ្ងៃពុធ ១៤ សីហា ២០២៤

ដោយ

Chheang

ទីបញ្ជាការកណ្តាលរបស់សហរដ្ឋអាមេរិក (CENTCOM) បាននិយាយកាលពីថ្ងៃទី១៣ខែសីហាថា ខ្លួនបានកម្ទេចនាវាក្រុមសកម្មប្រយុទ្ធហ៊ូធីចំនួនពីរគ្រឿងនៅលើសមុទ្រក្រហម ដោយចាត់ទុកនាវាទាំងពីរនោះគឺជា «ការគំរាមកំហែងជាក់ស្ដែង និងអាសន្ន» ចំពោះសហរដ្ឋអាមេរិក និងកងកម្លាំងចម្រុះនៅក្នុងតំបន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

CENTCOM បានបង្ហោះនៅលើបណ្ដាញសង្គម X ថា៖ «អាកប្បកិរិយាព្រហើន និងគ្រោះថ្នាក់នេះដោយក្រុមហ៊ូធី ដែលមានការគាំទ្រដោយអ៊ីរ៉ង់ នៅតែបន្តគំរាមកំហែងដល់ស្ថិរភាព និងសន្តិសុខក្នុងតំបន់»។

ក្រុមហ៊ូធីនៅប្រទេសយេម៉ែន បាននិងកំពុងវាយប្រហារលើកប៉ាល់ដឹកទំនិញដែលមានទំនាក់ទំនងជាមួយអ៊ីស្រាអែលនៅលើសមុទ្រក្រហម និងឈូងសមុទ្រ Aden។ សកម្មភាពរបស់ក្រុមហ៊ូធី បានបង្ហាញពីការគាំទ្ររបស់ពួកគេ ចំពោះក្រុមសកម្មប្រយុទ្ធហាម៉ាសនៅក្នុងតំបន់ហ្គាហ្សា បន្ទាប់ពីផ្ទុះសង្គ្រាមថ្ងៃទី៧ខែតុលាឆ្នាំមុន។

សមុទ្រក្រហម គឺជាផ្លូវទឹកដែលប្រើញឹកញាប់បំផុតលើពិភពលោកសម្រាប់ការដឹកជញ្ជូនប្រេង និងឥន្ធនៈ។

ភាពតានតឹងកំពុងកើនឡើងខ្ពស់នៅមជ្ឈិមបូព៌ា បន្ទាប់ពីការធ្វើឃាតមេដឹកនាំកំពូលក្រុមហាម៉ាសគឺលោក Ismail Haniyeh កាលពីថ្ងៃទី៣១ខែកក្កដា នៅរដ្ឋធានីតេហេរ៉ង នៃប្រទេសអ៊ីរ៉ង់ និងការសម្លាប់របស់មេបញ្ជាការជាន់ខ្ពស់ក្រុមហេសបូឡា លោក Fuad Shukr នៅក្នុងការវាយប្រហារតាមអាកាសលើតំបន់ជាយក្រុងភាគខាងត្បូងនៃទីក្រុង Beirut ប្រទេសលីបង់ កាលពីថ្ងៃទី៣០ខែកក្កដា៕

ដោយ៖ ឈាង