នាព្រឹកថ្ងៃទី ៣ ខែ កក្កដា ឆ្នាំ ២០២៦ នេះ ក្រុម ព្រះខ័នរាជស្វាយរៀង បានប្រកាសអំពីការបន្តកិច្ចសន្យាថ្មីជាមួយនឹងខ្សែប្រយុទ្ធឆ្នើម Kwame Peprah រយៈពេល ២ រដូវកាលទៀត ពោលគឺដល់ឆ្នាំ ២០២៨។

នេះជាកីឡាករបរទេសទី ២ ហើយ បន្ទាប់ពីខ្សែបម្រើប្រយុទ្ធសញ្ជាតិស្កុតលែនដ៍ Conor Shields ដែលក្រុម ព្រះខ័នរាជស្វាយរៀង សម្រេចបន្តកិច្ចសន្យាដល់ឆ្នាំ ២០២៨។ កីឡាករទាំង ២ សុទ្ធតែជាកម្លាំងស្នូល ដែលនឹងអាចជួយក្រុមព្រះខ័នរាជ​ស្វាយរៀង សម្រាប់ការប្រកួតប្រជែងពានក្នុងស្រុក និងពានអន្តរជាតិផ្សេងៗ។

នៅ​រដូវកាលដំបូង Kwame Peprah ពិតជាបង្ហាញសមត្ថភាពលេចធ្លោមែនទែនជាមួយ ព្រះខ័នរាជស្វាយរៀង ដោយលេងបានសរុប ៤២ ប្រកួត រកបាន ៣៥ គ្រាប់ និង ១១ បញ្ជូន (មិនគិតក្នុងពានសម្តេចតេជោ)។

អតីតជម្រើសជាតិ ហ្គាណា U23 រូបនេះ បានជួយក្រុម ព្រះខ័ន​រាជ​ស្វាយរៀង ឈ្នះពាន ៣ ក្នុងមួយរដូវកាល រួមមានពានបើក​រដូវ​កាល​ Cambodian Super Cup, ពាន​លីគកំពូលកម្ពុជា Cambodian Premier League និងពានសម្តេចតេជោ ព្រម​ទាំង​ទទួល​បាន​ចំណាត់​ថ្នាក់​លេខ ២ ពាន​រង្វាន់អាស៊ី​ AFC Challenge League ។ មិន​ត្រឹម​តែ​ប៉ុណ្ណោះ រូប​គេ​បាន​ឈ្នះ​ពាន​ឯកត្តជន ៣ ផ្សេង​​ទៀតគឺ ពាន​ស្បែក​ជើង​មាស និង​ពាន​កីឡាករ​ល្អ​បំផុត​ប្រចាំ​លីគ​កំពូល​កម្ពុជា និង​ពាន​ស្បែក​ជើងមាស​ ​ពាន​ទ្វីប​អាស៊ី AFC Challenge League។

អត្ថបទ៖ សេម កុសល

The post ម៉ាស៊ីនរកគ្រាប់បាល់ Kwame ជាកីឡាករបរទេសទី ២ ត្រូវ ព្រះខ័នរាជស្វាយរៀង បន្តកុងត្រាដល់ឆ្នាំ ២០២៨ appeared first on Kampuchea Thmey Daily.

ដើមឡើយ សហព័ន្ធបាល់ទាត់ទ្វីប អាស៊ី (AFC) បានកំណត់កៅអីឱ្យ កម្ពុជា តែ ១ កៅអីកន្លះប៉ុណ្ណោះក្នុងពាន AFC2 ដែលមានន័យ ថា ក្រុមជើងឯកលីគទទួលបាន ១ កៅអីនៅវគ្គចែកពូល និងក្រុមលេខ ២ ក្នុងលីគត្រូវប្រកួតជម្រុះ playoff។

ទោះបីជាយ៉ាងណា ព័ត៌មានចុងក្រោយ គឺ ភ្នំពេញក្រោន ដែលជាក្រុមលេខ ២ ក្នុងលីគកំពូលកម្ពុជា ទទួលបានកៅអីចូលលេងវគ្គចែកពូលដោយស្វ័យប្រវត្តិដូចក្រុមជើងឯកលីគ ព្រះខ័នរាជស្វាយរៀង ដែរ។

ប្រការនេះ បានជះសមិទ្ធផល​វិជ្ជមានជាច្រើនសម្រាប់ក្រុមបាល់ទាត់ទាំង ២ ក៏ដូចជាបាល់ទាត់កម្ពុជាទាំងមូល។ ថ្ងៃនេះសារព័ត៌មាន «កម្ពុជាថ្មី» សូមលើកយករឿងរ៉ាវ ៣ ចំណុច ដែលអ្នកគាំទ្រគួរដឹងអំពីក្រុម ព្រះខ័នរាជស្វាយរៀង និង ភ្នំពេញក្រោន បានលេងវគ្គចែកពូលពាន AFC2 រដូវកាល ២០២៦-២០២៧ ខាងមុខ៖

ទី១. នេះគឺជាលើកដំបូងហើយនៅក្នុងប្រវត្តិសាស្ត្របាល់ទាត់ កម្ពុជា ដែលមានក្លិបចំនួន ២ បានចូលលេងវគ្គចែកពូលពាន AFC Champions League Two។ កន្លងមក កម្ពុជា ធ្លាប់មានតែក្លិប ២ បានលេងនៅក្នុងពានកម្រិតទី ៣ AFC Challenge League ប៉ុណ្ណោះ ខណៈនៅក្នុងពាន AFC2 ពុំធ្លាប់មាននោះទេ។

កាលពីឆ្នាំ ២០២១ មានក្លិប កម្ពុជា ២ គឺបឹងកេត និងវិសាខា ធ្លាប់ទទួលបានកៅអីចូលវគ្គ​ចែក​ពូល​ពាន AFC2 នេះដែរ ដែលពេលនោះប្រើឈ្មោះ AFC Cup ប៉ុន្តែត្រូវបានរំសាយទៅវិញ ដោយសារវិបត្តិជម្ងឺកូវីដ១៩។

ទី ២. ការឈានចូលមកដល់វគ្គចែកពូលទាំង ២ ក្លិបបែបនេះ បានផ្តល់នូវរឿងល្អមួយទៀត គឺប្រាក់រង្វាន់។ ប្រាក់រង្វាន់នៅក្នុងពាន AFC2 គឺច្រើនជាងប្រាក់រង្វាន់នៅក្នុងពាន AFC3។ គ្រាន់តែគិតនៅវគ្គចែកពូលនេះ ក្នុងមួយក្រុមទទួលបានទឹកប្រាក់ចំនួន ៣០ ម៉ឺនដុល្លារអាមេរិក។ ដូច្នេះ បើបូកក្លិបកម្ពុជាទាំង ២ ចូលគ្នា គឺទទួលបានសរុបចំនួន ៦០ ម៉ឺនដុល្លារទៅហើយ។

ទី ៣. លីគបាល់ទាត់ កម្ពុជា នឹងទទួលបានចំណាត់ថ្នាក់កាន់តែល្អប្រសើរនៅក្នុងចំណាត់ថ្នាក់ក្លិប AFC។ ការគិតចំណាត់ថ្នាក់ក្លិបនៅក្នុង AFC គឺបានបែងចែកច្បាស់លាស់ទៅតាមកម្រិតពាន និងកម្រិតវគ្គនីមួយៗនៅក្នុងការប្រកួត។ ប្រការនេះ មានន័យ ថា លីគកម្ពុជានឹងទទួលបានពិន្ទុកាន់តែច្រើនជាងឆ្នាំមុនៗ ប្រសិនបើក្លិប ព្រះខ័នរាជស្វាយរៀង និង ភ្នំពេញក្រោន រកជ័យជម្នះបានច្រើននៅក្នុងវគ្គចែកពូល។

តាមបទបញ្ញត្តិរបស់ AFC បានឱ្យដឹង ថា ក្រុម ដែលឈ្នះនៅក្នុងវគ្គចែកពូលពាន AFC 2 នឹងទទួលបាន ៣ ពិន្ទុ ហើយបើស្មើនឹងទទួលបាន ០.៦៦៦ ពិន្ទុ។ ក្រឡេកទៅមើលពាន AFC3 ដែលក្លិប កម្ពុជា បានលេងកាលពីរដូវកាលមុនវិញ គឺបានពិន្ទុតិចជាង។ ក្នុងករណីឈ្នះ ទទួលបាន ១.៥ ពិន្ទុ ហើយបើស្មើទទួលបាន ០.៥ ពិន្ទុ។

បច្ចុប្បន្នលីគ កម្ពុជា កំពុងស្ថិតនៅចំណាត់ថ្នាក់លេខ ៩ ក្នុងតំបន់ អាស៊ីខាងកើត។ នេះជាចំណាត់ថ្នាក់មួយដ៏ល្អ បន្ទាប់ពីក្លិប​ ព្រះខ័នរាជស្វាយរៀង និង ភ្នំពេញក្រោន រួមចំណែកធ្វើបានល្អនៅក្នុងពាន AFC3 នា ២ រដូវកាលកន្លងមក។ ដូច្នេះ ប្រសើបើរដូវកាលខាងមុខ ក្រុមទាំង ២ បន្តធ្វើបានល្អទៀត នឹងធ្វើឱ្យចំណាត់ថ្នាក់លីគកម្ពុជាកាន់តែឡើងខ្ពស់ជាងនេះបន្ថែមទៀត៕

អត្ថបទ៖ សេម កុសល

The post ៣ ចំណុចគួរដឹង ពី ព្រះខ័នរាជស្វាយរៀង និង ភ្នំពេញក្រោន បានលេងវគ្គចែកពូលពា​ន AFC2 appeared first on Kampuchea Thmey Daily.

នៅព្រឹកថ្ងៃ សុក្រ ទី ១២ ខែ មិថុនា ឆ្នាំ ២០២៦ ក្លិបព្រះខ័នរាជស្វាយរៀង បានប្រកាសជាផ្លូវការ ក្នុងការនាំចូលខ្សែការពារ Takaki មកចូលរួមជាមួយក្លិបនៅរដូវកាលថ្មី។ នេះជាក្លិបកម្ពុជាទី ៣ ហើយ ដែលខ្សែការពារវ័យ ៣០ ឆ្នាំបានលេង បន្ទាប់ពី ២ ក្លិបដំបូងរូបគេលេងនៅ អង្គរថាយហ្គឺរ និង ភ្នំពេញក្រោន។

បន្ទាប់ពីចូលរួមជាមួយក្លិប ព្រះខ័នរាជស្វាយរៀង Takaki បានទម្លាយ ថា រូបគេត្រូវបានក្លិបមួយចំនួនទាក់ទងមកផងដែរ ក្រោយចែកផ្លូវជាមួយក្លិប BG Pathum ប៉ុន្តែចុងក្រោយ កីឡាករបានសម្រេចចិត្តចូលរួមជាមួយក្រុមជើងឯកលីគកំពូល កម្ពុជា ដោយសារមើលឃើញ ថា ទីនេះជាក្លិបធំមួយនៅ កម្ពុជា ហើយមានប្រព័ន្ធលេងត្រូវនឹងការលេងរបស់រូបគេផ្ទាល់។

ថ្លែងនៅក្នុងកិច្ចសម្ភាសជាមួយក្លិប កីឡាករជម្រើសជាតិ កម្ពុជា បាននិយាយដូច្នេះ ថា៖ «ជាដំបូង ខ្ញុំសប្បាយចិត្ត ដែលបានមកទីនេះ។ ទីនេះជាក្រុមធំមួយនៅក្នុងប្រទេស កម្ពុជា។ ដូច្នេះ ខ្ញុំទន្ទឹងរង់ចាំរដូវកាលថ្មីខាងមុខនេះ ដែលយើងនឹងត្រូវលេងពានរង្វាន់អន្តរជាតិ ដូចជាពាន Shopee Cup និងពាន AFC Champions League Two»។

កីឡាករបានបន្ថែមទៀត ថា៖ «នៅពេលខ្ញុំចាកចេញពីលីគប្រទេស ថៃ។ មានក្រុមមួយចំនួនបានទាក់ទងមកខ្ញុំ។ ហើយខ្ញុំក៏បានសម្រេចចិត្តចូលរួមជាមួយក្រុម ព្រះខ័នរាជស្វាយរៀង ពីព្រោះដូចអ្វីដែលខ្ញុំបានលើកឡើងអ៊ីចឹង ជាក្រុមដ៏ធំមួយនៅក្នុងប្រទេស កម្ពុជា។ ក្រុមមានទម្រង់លេងមួយ ដែលខ្ញុំគិតថា ខ្ញុំអាចសម្របខ្លួនបានច្រើនជាងមុន។ ខ្ញុំអាចបង្ហាញអ្វី ដែលខ្ញុំមាន។ ដូច្នេះបានជាខ្ញុំសម្រេចចិត្តចូលរួមជាមួយក្លិបបាល់ទាត់ ព្រះខ័នរាជស្វាយរៀង»។

គួរបញ្ជាក់ផងដែរ ថា នេះជាកីឡាករចំណូលថ្មីទី ១ ដែល ព្រះខ័នរាជស្វាយរៀង ចុះកុងត្រានៅរដូវកាលនេះ ដើម្បីត្រៀមខ្លួនក្នុងការប្រជែងពានក្នុងស្រុក ក៏ដូចជាពានរង្វាន់អន្តរជាតិ ASEAN Club Championship Shopee Cup និងពាន AFC Champions League Two៕

អត្ថបទ៖ សេម កុសល

The post Takaki ទម្លាយ ថា បានបដិសេធក្លិបមួយចំនួន មុន​ចូលរួមជាមួយ ព្រះខ័នរាជស្វាយរៀង ​ដោយ​កត្តាធំ ២ appeared first on Kampuchea Thmey Daily.

ដើមឡើយ សហព័ន្ធបាល់ទាត់ទ្វីប អាស៊ី (AFC) បានកំណត់កៅអីឱ្យ កម្ពុជា តែ ១ កៅអីកន្លះប៉ុណ្ណោះក្នុងពាន AFC2 ដែលមានន័យ ថា ក្រុមជើងឯកលីគទទួលបាន ១ កៅអីនៅវគ្គចែកពូល និងក្រុមលេខ ២ ក្នុងលីគត្រូវប្រកួតជម្រុះ playoff។

ទោះបីជាយ៉ាងណា កាលពីថ្ងៃ ពុធ ទី ១០ ខែ មិថុនា ឆ្នាំ ២០២៦ ក្លិប ភ្នំពេញក្រោន បានប្រកាសជាផ្លូវការ ថា ពួកគេទទួលបានកៅអីឡើងទៅវគ្គចែកពូលដោយស្វ័យប្រវត្តិ ពោលគឺពុំមានការប្រកួតជម្រុះឡើយ។ ដូច្នេះ ក្រុមតំណាង កម្ពុជា នឹងមាន ២ ក្រុម ដើម្បីចូលប្រកួតនៅ​វគ្គ​សន្សំពិន្ទុ​ក្នុង​ពូល​ពាន AFC2 រដូវកាលថ្មី ២០២៦-២០២៧។

ងាកទៅមើលការប្រកួតជម្រុះ playoff វិញ គឺគិតត្រឹមពេលនេះ នៅសល់ត្រឹមតែ ២ ក្រុមប៉ុណ្ណោះ ក្នុងនោះមានក្រុមជើងឯកលីគ ឥណ្ឌូណេស៊ី Persib Bandung និងក្រុមជើងឯកលីគ ហ្វីលីពីន Manila Digger។ ការប្រកួតជម្រុះ playoff រវាងក្រុមទាំង ២ នឹងធ្វើឡើងចំនួន ១ ជើង ដែលនឹងធ្វើនៅថ្ងៃទី ១២ ខែ សីហា ឆ្នាំ ២០២៦។

គួរបញ្ជាក់ ថា ការប្រកួតពាន AFC2 រដូវកាល ២០២៦-២០២៧ នេះ នឹងចាប់ផ្តើមពីខែ កញ្ញា ឆ្នាំ ២០២៦ រហូតដល់ខែ ឧសភា ឆ្នាំ ២០២៧៕

អត្ថបទ៖ សេម កុសល

The post ក្រុមហ្វីលីពីន និងឥណ្ឌូណេស៊ី ត្រូវជម្រុះ ខណៈ ភ្នំពេញក្រោន ឡើងវគ្គចែកពូល ដូចព្រះខ័នរាជស្វាយរៀង ពាន AFC2 appeared first on Kampuchea Thmey Daily.

លោក Matthew McConkey ត្រូវ​បាន​ក្លិប​ព្រះ​ខ័ន​រាជ​ស្វាយរៀង តែង​តាំង​ជា​គ្រូ​បង្គោល​កាល​ពី​ថ្ងៃ​ទី​ ៣ ខែ​មិថុនា ឆ្នាំ ២០២៥ បន្ត​ពី​លោក Pep Munoz ដែល​បាន​ចាក​ចេញ។ បុរសសញ្ជាតិ​អៀរឡង់​រូប​នេះ​​​មាន​ភារកិច្ច​សំខាន់​ចំនួន ៥ ក្នុង​ការ​ដឹក​នាំ​ក្លិប ព្រះ​ខ័ន​រាជ​ស្វាយរៀង រដូវ​កាល​ដំបូង​ គឺ ពាន​បើក​រដូវ​កាល ខេមបូឌានស៊ុបភើខាប់, ពាន​លីគ​បាល់ទាត់​កំពូល​កម្ពុជា និង​ពាន​រង្វាន់​សម្តេច​អគ្គមហាសេនាបតី​តេជោ ហ៊ុន សែន ព្រម​ទាំង​ពាន​អន្តរជាតិ​ AFC Challenge League និង​ពាន​ក្លិប​អាស៊ាន ASEAN Club Championship។

ជា​លទ្ធផល លោក​បាន​ដឹក​នាំ ព្រះ​ខ័ន​រាជ​ស្វាយរៀង បាន​ឈ្នះ​ជើងឯក​ក្នុង​ស្រុក​ទាំង ៣ តែ​ម្តង​គឺ ខេមបូឌានស៊ុបភើខាប់ ពាន​លីគ​បាល់ទាត់​កំពូល​កម្ពុជា និង​ពាន​រង្វាន់​សម្តេច​អគ្គមហាសេនាបតី​តេជោ ហ៊ុន សែន និង​ទទួល​បាន​ចំណាត់​ថ្នាក់​លេខ ២ ពានអាស៊ី​ AFC Challenge League ខណៈ​ពានក្លិប​អាស៊ាន ASEAN Club Championship ស្ថិត​នៅ​ចំណាត់​ថ្នាក់​លេខ ៣ ក្នុង​ពូល។

សម្រាប់​ខ្លួន​លោក​ផ្ទាល់ McConkey បាន​ឈ្នះ​ពាន​រង្វាន់​គ្រូ​បង្វឹក​ល្អ​បំផុត ២ ​ក្នុង​ពាន​រង្វាន់​សម្តេច​តេជោ ហ៊ុន សែន និង លីគ​បាល់ទាត់​កំពូល​កម្ពុជា។

ពេល​នេះ លោក​​ទទួល​បាន​ការ​ផ្តល់​ទំនុក​ចិត្ត​រយៈ​ពេល ២ ឆ្នាំ​ទៀត​ ស្រប​ពេល​រដូវ​កាល​ថ្មី ២០២៦-២៧ ក្លិប ព្រះ​ខ័ន​រាជ​ស្វាយរៀង រឹត​តែ​ធ្វើ​ការងារ​ធ្ងន់​តាមរយៈ​ពាន​​រង្វាន់​ក្នុង​ស្រុក​ទាំង ៣ និង​ពាន​រង្វាន់​អន្តរជាតិ ២ គឺ AFC Champions League Two និង ASEAN Club Championship៕

អត្ថបទ៖ វិរបុត្រ

The post ក្រោយ​ឈ្នះ​ពាន ៣ ក្លិប​ព្រះ​ខ័ន​រាជ​ស្វាយរៀង បន្ត​កុងត្រាលោក​គ្រូ McConkey ដល់​ឆ្នាំ ២០២៨ appeared first on Kampuchea Thmey Daily.

ប្រាក់រង្វាន់ពាន Shopee Cup រដូវកាល ២០២៦-២០២៧ គឺមានការប្រែប្រួលច្រើនតាំងពីវគ្គជម្រុះ playoffs រហូតដល់វគ្គផ្តាច់ព្រ័ត្រ។ វគ្គជម្រុះ playoffs គឺក្រុមចាញ់នឹងទទួលបាន ២៧,០០០ ដុល្លារអាមេរិកក្នុងមួយប្រកួត។ ឈានចូលវគ្គចែកពូល ក្រុមនីមួយៗនឹងទទួលបានលុយសរុបចំនួន ១៦២,០០០ ដុល្លារអាមេរិក។

សម្រាប់វគ្គ ៨ ក្រុមចុងក្រោយ គឺក្រុមចាញ់នឹងទទួលបានចំនួន ២៧,០០០ ដុល្លារអាមេរិកក្នុងមួយប្រកួត។ ចំណែកនៅវគ្គពាក់កណ្តាលផ្តាច់ព្រ័ត្រវិញ ក្រុមចាញ់នឹងទទួលបាន ៦ ម៉ឺនដុល្លារអាមេរិកក្នុងមួយប្រកួត។

នៅវគ្គផ្តាច់ព្រ័ត្រ ក្រុមដែលបានឈ្នះជើងឯកនឹងទទួលបានប្រាក់រង្វាន់ចំនួន ៤៥០,០០០ ដុល្លារអាមេរិក។ ដោយឡែកក្រុមចំណាត់ថ្នាក់លេខ ២ គឺទទួលបានចំនួន ២៣០,០០០ ដុល្លារអាមេរិក។

ប្រាក់រង្វាន់នៅរដូវកាល ២០២៦-២០២៧ គឺមានការកើនឡើងជាងរដូវកាល ២០២៥-២០២៦។ ប្រាក់រង្វាន់ក្រុមជើងឯកកាលពីរដូវកាលមុន គឺទទួលបានចំនួន ៤២៥,០០០ ដុល្លារអាមេរិក ខណៈក្រុមជើងឯករង ទទួលបាន ២១៥,០០០ ដុល្លារអាមេរិក។

គួរបញ្ជាក់ ថា ការចាប់ឆ្នោតបែងចែកពូលបានធ្វើឡើងរួចរាល់ហើយ ក្នុងនោះក្រុម ព្រះខ័នរាជស្វាយរៀង របស់ កម្ពុជា ស្ថិតនៅពូល B ជាមួយក្រុមខ្លាំង ៦ ទៀត ដូចជា Johor Darul Tazim, Lion City Sailors, Cong An Ha Noi, Persib Bandung, ក្រុម Port FC​ និងក្រុមជម្រុះ ១ ទៀត រវាងក្រុម​ Ezra FC និង​ក្រុម​ Shan United។

ដោយឡែកនៅពូល A ឯណោះវិញ មានក្រុម  Buriram United, Ratchaburi FC​, Tampines Rover, Kuching City, ក្រុម ជើងឯក​ពាន Vietnam Cup, Borneo FC និងក្រុមជម្រុះ ១ ទៀតរវាងក្រុម Manila Digger និងក្រុម Indera SC៕

អត្ថបទ៖ សេម កុសល

The post ប្រាក់រង្វាន់ក្រុមជើងឯកពាន Shopee Cup រដូវកាលនេះ កើនឡើងជាងរដូវកាលមុន appeared first on Kampuchea Thmey Daily.

បន្ទាប់ពីការចាប់ឆ្នោតបែងចែកពូល ដែលបានធ្វើឡើងនៅទីក្រុង ចាកាតា ប្រទេស ឥណ្ឌូណេស៊ី កាលពីថ្ងៃ សុក្រ ទី ៥ ខែ មិថុនា ឆ្នាំ ២០២៦ គឺក្រុម ព្រះខ័នរាជស្វាយរៀង ស្ថិតនៅពូល B ជាមួយក្រុមខ្លាំងៗដូចជា ជើង​ឯកលីគ​ម៉ាឡេស៊ី Johor Darul Tazim, ក្រុមជើង​ឯកលីគ​សិង្ហបុរី Lion City Sailors។

ក្រុមជើងឯកលីគវៀតណាម Cong An Ha Noi, ក្រុមជើង​ឯក​លីគឥណ្ឌូណេស៊ី Persib Bandung, ក្រុម Port FC ​របស់ថៃ​ និងក្រុមជម្រុះ ១ ទៀត រវាងក្រុម​ Ezra FC ជើងឯកលីគ​​ឡាវ និង​ក្រុម​ Shan United ជើង​​ឯកលីគ​មីយ៉ាន់ម៉ា។

ដោយឡែកនៅពូល A វិញមាន ក្រុម ថៃ Buriram United, ក្រុម ថៃ Ratchaburi FC​, ក្រុមសិង្ហបុរី Tampines Rover, ក្រុមម៉ាឡេស៊ី Kuching City, ក្រុម ជើងឯក​ពាន Vietnam Cup, ក្រុមឥណ្ឌូណេស៊ី Borneo FC និងក្រុមជម្រុះ ១ ទៀតរវាងក្រុមហ្វីលីពីន Manila Digger និងក្រុម ព្រុយណេ Indera SC។

ចំណុចគួរឱ្យចាប់អារម្មណ៍ពីពាន Shopee Cup រដូវកាលថ្មីនេះ គឺបានបង្កើនក្រុមចូលរួមពី ១២ ក្រុម មកដល់ ១៤ ក្រុម។ ក្រឡេកទៅមើលទម្រង់ប្រកួត គឺបានការរក្សាការបែងចែកពូលជា ២ ពូលដដែល ដោយមួយពូលមាន ៧ ក្រុម។

ប៉ុន្តែអ្វីដែលខុសប្លែកពីរដូវកាលមុន គឺនៅរដូវកាលថ្មីនេះ បានកំណត់យកមួយពូលមាន ៤ ក្រុម ដើម្បីឡើងទៅកាន់វគ្គខ្វែង។ ប្រការនេះមានន័យ ថា ក្រុមពីលេខ ១ ដល់លេខ ៤ នៃពូលនីមួយៗ គឺទទួលបានកៅអីឡើងទៅកាន់វគ្គ ៨ ក្រុម។ ចំណែកក្រុមពីលេខ ៥ ដល់លេខ ៧ ត្រូវបញ្ចប់បេសកកម្មរបស់ខ្លួនត្រឹមនេះ។

ផ្ទុយពីរដូវកាលមុនៗ ដែលបានរៀបចំ ១ ពូលមាន ៦ ក្រុម។ ការប្រកួតមិនមានវគ្គ ៨ ក្រុមនោះទេ ដោយមួយពូល មានតែ ២ ក្រុមប៉ុណ្ណោះ ត្រូវឡើងទៅវគ្គបន្ត។ ប្រការនេះមានន័យ ថា ក្រុមលេខ ១ និង ២ នៃពូលនីមួយៗ គឺទទួលបានកៅអីឡើងទៅកាន់វគ្គពាក់កណ្តាលផ្តាច់ព្រ័ត្រតែម្តង។

តាមរយៈទម្រង់ថ្មីនេះ បានក្លាយជាផលវិជ្ជមានមួយសម្រាប់ក្រុម ព្រះខ័នរាជស្វយរៀង ដើម្បីមានឱកាស ឆ្លងផុតវគ្គចែកពូលជាលើកដំបូងនៅក្នុងពាន Shopee Cup។ នា ២ រដូវកាលមុន ក្រុមជើងឯកលីគកំពូល កម្ពុជា បានចូលរួមប្រកួតពាននេះ ២ លើកជាប់គ្នា ប៉ុន្តែបានត្រឹមខកចិត្តហាលអាវត្រឹមវគ្គចែកពូល បន្ទាប់ពីទទួលបានចំណាត់ថ្នាក់លេខ ៣ ពីររដូវកាលជាប់គ្នា៕

អត្ថបទ៖ សេម កុសល

The post ទម្រង់ប្រកួតថ្មីក្នុងពាន Shopee Cup ធ្វើឱ្យ ព្រះខ័នរាជស្វាយរៀង មានភាគរយអាចឡើងដល់វគ្គខ្វែង appeared first on Kampuchea Thmey Daily.

នៅ​ពូល B មាន​ដូច​ជា ក្រុម Johor Darul Tazim ជើង​ឯកលីគ​ម៉ាឡេស៊ី ក្រុម Lion City Sailors ជើង​ឯកលីគ​សិង្ហបុរី ក្រុម Cong An Ha Noi ជើងឯកលីគវៀតណាម ក្រុម Persib Bandung ជើង​ឯក​លីគឥណ្ឌូណេស៊ី ក្រុមព្រះ​ខ័ន​រាជ​ស្វាយរៀង ជើងឯក​លីគ​កម្ពុជា​ និង​ក្រុម Port FC ​របស់ថៃ​ ព្រម​ទាំងមួយ​ក្រុម​ទៀត​ដែល​ការ​ជម្រុះ​រវាងក្រុម​ Ezra FC ជើងឯកលីគ​​ឡាវ និង​ក្រុម​ Shan United ជើង​​ឯកលីគ​មីយ៉ាន់ម៉ា។

ក្រុម Johor Darul Tazim និង ក្រុម Lion City Sailors ធ្លាប់​បាន​ស្ថិត​នៅ​​ពូល ជា​មួយ ព្រះ​ខ័ន​រាជ​ស្វាយរៀង ម្តង​ហើយ​កាល​ពី​រដូវ​កាល​មុន។

ក្រោយ​ចប់​វគ្គ​សន្សំពិន្ទុ​ក្នុង​ពូល ក្រុម​ ៤ នៃ​ពូល​ទាំង​ពីរ​បាន​ឡើង​វគ្គខ្វែង ៨ ក្រុម​ចុង​ក្រោយ៕

ពូល A

1. ក្រុម Buriram United (​ថៃ)
2. ក្រុម Ratchaburi FC (ថៃ)
3. ក្រុម Tampines Rover (សិង្ហបុរី)
4. ក្រុម Kuching City (ម៉ាឡេស៊ី)
5. ក្រុម ជើងឯក​ពាន Vietnam Cup
6. ក្រុម Borneo FC (ឥណ្ឌូណេស៊ី)
7. ក្រុម Manila Digger (​ហ្វីលីពីន) vs Indera SC (​ព្រុយណេ)

ពូល B

• ក្រុម Johor Darul Tazim (ម៉ាឡេស៊ី)
• ក្រុម Lion City Sailors (សិង្ហបុរី)
• ក្រុម Cong An Ha Noi (វៀតណាម)
• ក្រុម Persib Bandung (​ឥណ្ឌូណេស៊ី)
• ក្រុម ព្រះ​ខ័ន​រាជ​ស្វាយរៀង (​កម្ពុជា)​
• ក្រុម Port FC (ថៃ)
• ក្រុម​ជម្រុះ រវាង Ezra FC (​ឡាវ) vs Shan United (​មីយ៉ាន់ម៉ា)

អត្ថបទ៖ វិរបុត្រ

The post ញាក់សាច់! ព្រះ​ខ័ន​រាជ​ស្វាយរៀង ស្ថិត​នៅ​ពូល B សុទ្ធ​តែ​ក្រុម​ជើង​ឯក​លីគ​ ​ក្នុង​ពាន Shopee Cup appeared first on Kampuchea Thmey Daily.