កាលពីថ្ងៃ អង្គារ៍ ទី ២១ ខែ កក្កដា ក្រុម Win Streak បានប្រកាសជាផ្លូវការ ក្នុងការនាំចូលកីឡាករថ្មីសញ្ជាតិ រុស្ស៊ី Mikhail Nikkel មកជំនួសស្មាត់សញ្ជាតិ ម៉ុងហ្គោលី Khangal Tamiraa ដែលបានចាកចេញទៅក្លិបគូប្រជែង TSG SkyHawks។

Mikhail Nikkel បច្ចុប្បន្នមានវ័យ ២៨ ឆ្នាំ ហើយរូបគេមានកម្ពស់ដល់ទៅ ២.០១ ម៉ែត្រឯណោះ។ ចំណុចពិសេសរបស់ Mikhail គឺអាចលេងបានច្រើនតួនាទីទាំងវាយផ្តាច់ក្នុងនាមជាស្មាត់ឆ្វេង និង ស្តាំ និងលេងជាអ្នកបាំងបាល់កណ្តាលក៏បាន។

កីឡាករពហុជំនាញរូបនេះ ធ្លាប់មានបទពិសោធលេងនៅក្លិបធំៗជាច្រើន ដូចជានៅរុស្ស៊ីជាមួយក្រុម Lokomotiv Novosibirsk, “Lokomotiv”-CIVS, Dinamo Chelyabinsk, Lokomotiv Novosibirsk, Avtomobilist Saint Petersburg, Yugra-Samotlor Nizhnevartovsk។

ក្រៅពីនេះ Mikhail ក៏ធ្លាប់លេងនៅក្រៅប្រទេសជាមួយក្លិបជាច្រើនផងដែរ មុនពេលផ្លាស់មក តៃវ៉ាន់ ដូចជាលេងនៅក្លិប Hebar Pazardzhik ក្នុងប្រទេស ប៊ុលហ្គារី។ បន្ទាប់មកទៀត បានទៅលេងនៅក្លិប Baniyas VC ក្នុងប្រទេស អារ៉ាប់រួម, ក្លិប Zamalek SC ក្នុងប្រទេស អេហ្ស៊ីប, ក្លិប Liaoning Fengcheng Fenghuangshan ក្នុងប្រទេស ចិន, ក្លិប Gas Al Janoob ក្នុងប្រទេស អ៊ីរ៉ាក់ និងចុងក្រោយក្លិប AOP Kifisias ក្នុងប្រទេស ក្រិក។

បើនិយាយអំពីសមិទ្ធផលរួមវិញ Mikhail ក៏ធ្លាប់បានជួយក្រុម ដែលគេធ្លាប់បានលេងយ៉ាងច្រើនផងដែរ ក្នុងនោះធ្លាប់លើកពានលីគប្រទេស អេហ្ស៊ីប ១ លើក, ពាន Egyptian Cup ១ លើក និង លើកពាន Bulgarian Cup ១ លើក។ ក្រៅពីនេះ រូបគេធ្លាប់បានជើងឯករង ២ លើក ក្នុងលីគបាល់ទះ រុស្ស៊ី Russian Superleague និងសមិទ្ធផលមួយចំនួនទៀត។

ការមកដល់របស់ Mikhail ត្រូវបានគេរំពឹង ថា នឹងក្លាយជាដៃគូនៅលើទីលានជាមួយវឿន វាសនា ដោយរូបគេនឹងលេងនៅស្មាត់ឆ្វេង ខណៈកូនខ្មែរអ្នកខេត្តបាត់ដំបងត្រូវលេងនៅស្មាត់ស្តាំ។ អ្នកទាំង ២ នឹងត្រូវចាប់ដៃគ្នា ដើម្បីជួយក្លិបបាល់ទះ Win Streak ប្រជែងជើងឯកលីគបាល់ទះតៃវ៉ាន់ (TPVL) នៅរដូវកាល ២០២៦-២០២៧ បន្ទាប់ពីខកខានលើកពាននេះកាលពីរដូវកាលមុន៕

អត្ថបទ៖ សេម កុសល

The post ក្លិប Win Streak យកស្មាត់ជនជាតិ រុស្ស៊ី កម្ពស់ជាង ២ ម៉ែត្រ មកចាប់ដៃគូជាមួយ វឿន វាសនា appeared first on Kampuchea Thmey Daily.

កាលពីថ្ងៃទី ២០ ខែ មិថុនា ឆ្នាំ ២០២៦ ក្លិបបាល់ទះ Win Streak បានប្រកាសជាផ្លូវការអំពីការបន្តកិច្ចសន្យាថ្មីជាមួយស្មាត់ស្តាំ វឿន វាសនា នៅរដូវកាល ២០២៦-២០២៧ ខាងមុខមួយរដូវកាលទៀត បន្ទាប់ពីស្មាត់ស្តាំវ័យ ២៥ ឆ្នាំ កម្ពុជា ១.៩៦ ម៉ែត្ររូបនេះ បានលេងនៅទីនោះ ៣ រដូវកាលរួចមកហើយ។

នៅថ្ងៃទី ២៣ ខែ មិថុនា នេះ លោក អាំង សេរីពិសិដ្ឋ អគ្គលេខាធិការ​សហព័ន្ធ​កីឡា​បាល់ទះកម្ពុជា បានទម្លាយច្បាស់ៗ ថា ការបន្តកិច្ចសន្យាថ្មីនេះ វឿន វាសនា នឹងទទួលបានថ្លៃពលកម្មជាង ១០ ម៉ឺនដុល្លារអាមេរិកក្នុងមួយឆ្នាំ។

គួរបញ្ជាក់ ថា វឿន វាសនា បានលេងនៅក្លិប Win Streak ៣ រដូវកាលហើយ ពោលគឺនៅរដូវកាល ២០២៣-២០២៤, ២០២៤-២០២៥ និង ២០២៥-២០២៦ ខណៈនៅរដូវកាល ២០២៦-២០២៧ ខាងមុខមួយទៀត គឺជារដូវកាលទី ៤។

អំឡុងពេលលេងនៅ តៃវ៉ាន់ ៣ រដូវកាលកន្លងមក ស្មាត់វ័យ ២៥ ឆ្នាំកម្ពស់ ១.៩៦ ម៉ែត្រ បានបង្ហាញគុណផលយ៉ាងអស្ចារ្យ ដោយបានជួយឱ្យក្លិប Win Streak ឈ្នះពានលីគ ២ រដូវកាលជាប់គ្នា នៅរដូវកាល ២០២៣-២០២៤ និង ២០២៤-២០២៥។

រដូវកាលមុន ២០២៥-២០២៦ រូបគេបានជួយឱ្យក្រុមឈ្នះពានលីគវគ្គរដូវកាលដំបូង ប៉ុន្តែឈានចូលការប្រកួតជុំផ្តាច់ព្រ័ត្រដណ្តើមជើងឯក កីឡាករមិនបានលេងនោះទេ ដោយសារបទបញ្ញត្តិរបស់ FIVB បានកំណត់មិនឱ្យកីឡាករជាប់ជម្រើសជាតិលេង។

ទោះបីជាយ៉ាងណា នៅរដូវកាល ២០២៥-២០២៦ វឿន វាសនា បានធ្វើឱ្យអ្នកគាំទ្រមានការភ្ញាក់ផ្អើលជាខ្លាំង បន្ទាប់ពីរូបគេបំបែកកំណត់ត្រាក្លាយជាកីឡាករក្នុងលីគបាល់ទះតៃវ៉ាន់ដំបូងគេ ដែលអាចរកបានលើស ១ ពាន់ពិន្ទុក្នុងមួយរដូវកាល ពោលគឺចំនួន ១,០២៨ ពិន្ទុ។ ជាមួយគ្នានេះ កីឡាករបានឈ្នះពានឯត្តជន ២ គឺពានកីឡាកររកបានពិន្ទុច្រើនបំផុត និងអ្នកលេងស្មាត់ស្តាំល្អបំផុត៕

អត្ថបទ៖ សេម កុសល

The post តម្លៃ​ពលកម្ម​របស់ វឿន វាសនា បន្ត​កុងត្រា​ថ្មី​នៅ​តៃវ៉ាន់ ជាង ១០​ម៉ឺន​ដុល្លារ​ក្នុង​មួយ​រដូវ​កាល appeared first on Kampuchea Thmey Daily.

នៅថ្ងៃទី ២០ ខែ មិថុនា ឆ្នាំ ២០២៦ នេះ ក្លិបបាល់ទះ Win Streak បានប្រកាសជាផ្លូវការអំពីការបន្តកិច្ចសន្យាថ្មីជាមួយស្មាត់ស្តាំ វឿន វាសនា នៅរដូវកាល ២០២៦-២០២៧ ខាងមុខមួយរដូវកាលទៀត ដើម្បីចូលរួមការប្រកួតលីគបាល់ទះអាជីពតៃវ៉ាន់ (TPVL)។

ក្រោយការបន្តកិច្ចសន្យានេះ កីឡាករវឿន វាសនា បាននិយាយដូច្នេះ ថា៖ « ខ្ញុំមិនអាចរង់ចាំបានទៀតទេ​ ក្នុងការវិលត្រឡប់មកប្រកួតនៅចំពោះមុខអ្នកទាំងអស់គ្នាម្តងទៀត…។ […] គោលដៅរបស់ខ្ញុំសម្រាប់រដូវកាលក្រោយគឺនឹងប្រឹងប្រែងឱ្យអស់ពីសមត្ថភាព ដើម្បីជួយក្រុមឈ្នះជើងឯក និងបន្តអភិវឌ្ឍជាមួយមិត្តរួមក្រុមគ្រប់ការប្រកួតនៅលើទីលាន»។

ដោយឡែក អ្នកគាំទ្រ តៃវ៉ាន់ វិញ ក៏បានបង្ហាញការអបអរសាទរ និងបង្ហាញក្តីរំភើបផងដែរនៅលើបណ្តាញសង្គម IG របស់ក្លិប បន្ទាប់ពីក្លិប Win Streak ដែលជាក្លិបពួកគេគាំទ្រ បានប្រកាសបន្តកិច្ចសន្យាថ្មីជាមួយកីឡាករឆ្នើមរបស់ កម្ពុជា វឿន វាសនា។

គួរបញ្ជាក់ ថា វឿន វាសនា បានលេងនៅក្លិប Win Streak ៣ រដូវកាលហើយ ពោលគឺនៅរដូវកាល ២០២៣-២០២៤, ២០២៤-២០២៥ និង ២០២៥-២០២៦ ខណៈនៅរដូវកាល ២០២៦-២០២៧ ខាងមុខមួយទៀត គឺជារដូវកាលទី ៤។

អំឡុងពេលលេងនៅ តៃវ៉ាន់ ៣ រដូវកាលកន្លងមក ស្មាត់វ័យ ២៥ ឆ្នាំកម្ពស់ ១.៩៦ ម៉ែត្រ បានបង្ហាញគុណផលយ៉ាងអស្ចារ្យ ដោយបានជួយឱ្យក្លិប Win Streak ឈ្នះពានលីគ ២ រដូវកាលជាប់គ្នា នៅរដូវកាល ២០២៣-២០២៤ និង ២០២៤-២០២៥។

ដោយឡែក រដូវកាលមុន ២០២៥-២០២៦ រូបគេបានជួយឱ្យក្រុមឈ្នះពានលីគវគ្គរដូវកាលដំបូង ប៉ុន្តែឈានចូលការប្រកួតជុំផ្តាច់ព្រ័ត្រដណ្តើមជើងឯក កីឡាករមិនបានលេងនោះទេ ដោយសារបទបញ្ញត្តិរបស់ FIVB បានកំណត់មិនឱ្យកីឡាករជាប់ជម្រើសជាតិលេង។

ទោះបីជាយ៉ាងណា នៅរដូវកាល ២០២៥-២០២៦ នោះ វឿន វាសនា បានធ្វើឱ្យអ្នកគាំទ្រមានការភ្ញាក់ផ្អើលមែនទែន បន្ទាប់ពីរូបគេបំបែកកំណត់ត្រាក្លាយជាកីឡាករក្នុងលីគបាល់ទះតៃវ៉ាន់ដំបូងគេ ដែលអាចរកបានលើស ១ ពាន់ពិន្ទុក្នុងមួយរដូវកាល ពោលគឺចំនួន ១,០២៨ ពិន្ទុ។ ជាមួយគ្នានេះ កីឡាករបានឈ្នះពានឯត្តជន ២ គឺពានកីឡាកររកបានពិន្ទុច្រើនបំផុត និងអ្នកលេងស្មាត់ស្តាំល្អបំផុត៕

អត្ថបទ៖ សេម កុសល

The post ស្មាត់ឆ្នើម វឿន វាសនា បន្តកុងត្រាថ្មីជាមួយក្លិប Win Streak ត្រូវអ្នកគាំទ្រ តៃវ៉ាន់ សាទរខ្លាំង appeared first on Kampuchea Thmey Daily.

ការប្រកួតលីគបាល់ទះអាជីព តៃវ៉ាន់ បានបញ្ចប់លីគវគ្គវិល​ជុំ​សន្សំពិន្ទុ រដូវកាល ២០២៥-២០២៦ រួចរាល់ហើយ កាលពីសប្តាហ៍មុនត្រូវនឹងថ្ងៃ អាទិត្យ ទី ១៧ ខែ ឧសភា ឆ្នាំ ២០២៦។ កីឡាករជម្រើសជាតិ​ កម្ពុជា វ័យ ២៥ ឆ្នាំ នៅតែបង្ហាញគុណផលយ៉ាងអស្ចារ្យ ដោយបានរួមចំណែករកបាន ១,០២៨ ពិន្ទុ ជួយឱ្យក្រុម Win Streak ឈរនៅកំពូលតារាង បន្ទាប់ពីឆ្លងកាត់ ៤៨ ប្រកួត ឈ្នះ ៤៣ និងចាញ់ ៥។

រឿងដ៏ពិសេសបំផុត គឺ វឿន វាសនា បានបំបែកកំណត់ត្រាក្លាយជាកីឡាករដំបូងគេនៅក្នុងលីគអាជីព តៃវ៉ាន់ ដែលរកពិន្ទុបានច្រើនជាង ១,០០០ គ្រាប់។ តាមរយៈស្នាដៃដ៏ល្អបែបនេះ បានធ្វើឱ្យកូនខ្មែរអ្នកខេត្ត បាត់ដំបង ឈ្នះពានឯកត្តជន ២ ពីលីគ TPVL រួមមានពាន «កីឡាករលេងតួនាទីស្មាត់ស្តាំល្អបំផុត» និង «កីឡាកររកបានពិន្ទុច្រើនជាងគេបំផុត»។

ទោះបីជាយ៉ាងណា កាលពីថ្ងៃទី ២១ ខែ ឧសភា ឆ្នាំ ២០២៦ ក្លិប Win Streak បានប្រកាសរឿងដ៏សោកស្តាយមួយ ថា កីឡាករវឿន វាសនា រួមជាមួយកីឡាករ ៣ នាក់ទៀត នឹងមិនអាចចូលរួមលេងជាមួយក្រុមនៅវគ្គជម្រុះ Playoffs ជុំផ្តាច់ព្រ័ត្របានទេ ដោយសារជាបទបញ្ញត្តិរបស់សហព័ន្ធបាល់ទះអន្តរជាតិ (FIVB) បានចែង ថា កីឡាករ ដែលជាប់ជម្រើសជាតិ គឺមិនអាចបន្តលេងជាមួយក្លិបអាជីពក្នុងអំឡុងពេលនេះបានទេ។

គួរបញ្ជាក់ ថា ការប្រកួតជុំផ្តាច់ព្រ័ត្រ ដើម្បីរកក្រុមជើងឯកលីគរដូវកាលនេះ នឹងចាប់ផ្តើមពីថ្ងៃទី ២២ ដល់ថ្ងៃទី ២៥ ខែ ឧសភា ឆ្នាំ ២០២៦៕

អត្ថបទ៖ សេម កុសល

The post វឿន វាសនា ឈ្នះពានឯកត្តជន ២ ម្នាក់ឯងក្នុងលីគបាល់ទះអាជីពតៃវ៉ាន់រដូវកាលនេះ appeared first on Kampuchea Thmey Daily.

កូនខ្មែរអ្នកខេត្តបាត់ដំបងវ័យ ២៥ ឆ្នាំ រកបានពិន្ទុចំនួន ១,០២៨ ពិន្ទុនៅរដូវកាល ២០២៥-២០២៦ នេះ បន្ទាប់ពីជួយឱ្យក្រុម Win Streak ឈ្នះ ២ ប្រកួតជាប់គ្នានៅក្នុងសប្តាហ៍ទី ២៦ នេះ ដោយការប្រកួតទល់នឹងក្រុម TSG Skyhawks រកបាន ៣១ ពិន្ទុ និងការប្រកួតទល់នឹងក្រុម Taoyuan Cloud Leopard រកបាន ២៤ ពិន្ទុ។

យ៉ាងណាមិញ សម្រាប់ការប្រកួតសប្តាហ៍ទី ២៦ ដែលជាសប្តាហ៍ចុងក្រោយនៃវគ្គលីគដំណាក់កាលដំបូង (Regular Season) គឺក្រុម Win Streak បានឈ្នះ ២ ប្រកួតជាប់គ្នា។ ការប្រកួតទល់នឹងក្រុម Win Streak កាលពីថ្ងៃ សៅរ៍ ទី ១៦ ខែ ឧសភា បានយកឈ្នះក្នុងលទ្ធផល ៣ សិតទល់ ២ និងការប្រកួតទល់ក្រុម Taoyuan Cloud Leopard កាលពីថ្ងៃ អាទិត្យ ទី ១៧ ខែ ឧសភា បានយកឈ្នះក្នុងលទ្ធផល ៣ សិតទល់ ១។

វឿន វាសនា បានដើរតួសំខាន់មែនទែន ក្នុងការជួយក្រុម Win Streak នៅក្នុងលីគបាល់ទះអាជីព តៃវ៉ាន់ រដូវកាលនេះ បន្ទាប់ពីបញ្ចប់លីគដំណាក់កាលដំបូង កីឡាកររកបានពិន្ទុច្រើនជាងគេបង្អស់ និងជួយឱ្យក្រុមឈរនៅតំណែងកំពូលតារាង ក្រោយឆ្លងកាត់ ៤៨ ប្រកួត ឈ្នះ ៤៣ និងចាញ់ ៥។

គួរបញ្ជាក់ ថា ការប្រកួតជុំផ្តាច់ព្រ័ត្រ ដើម្បីរកក្រុមជើងឯកលីគរដូវកាលនេះ នឹងចាប់ផ្តើមនៅសប្តាហ៍ក្រោយ ដែលធ្វើឡើងរយៈពេល ៤ ថ្ងៃ នៅថ្ងៃទី ២២ ដល់ថ្ងៃទី ២៥ ខែ ឧសភា ឆ្នាំ ២០២៦៕

អត្ថបទ៖ សេម កុសល

The post វឿន វាសនា បំបែកកំណត់ត្រាជាកីឡាករដំបូងគេរកបានជាង ១,០០០ពិន្ទុនៅលីគបាល់ទះ តៃវ៉ាន់ appeared first on Kampuchea Thmey Daily.

កាលពីថ្ងៃ សៅរិ៍ ទី ៩ ខែ ឧសភា ឆ្នាំ ២០២៦ ក្រុម Win Streak បានឈ្នះក្រុម Taoyuan Clouded Leopard ក្នុងលទ្ធផល ៣ សិតទល់នឹង ១។ ចំណែកថ្ងៃ អាទិត្យ ទី ១០ ខែ ឧសភា ពួកគេបន្តរកបានជ័យជម្នះជាថ្មី ដោយបានយកឈ្នះលើក្រុម Taipei East Power ក្នុងលទ្ធផល ៣ សិតទល់នឹង ១។

វឿន វាសនា នៅតែជាស្មាត់ដ៏សំខាន់របស់ក្រុម Win Streak ដោយប្រកួតទល់ក្រុម Taoyuan Clouded Leopard ស្មាត់ជម្រើសជាតិ កម្ពុជា វ័យ ២៤ ឆ្នាំរកបាន ២០ ពិន្ទុ ខណៈការប្រកួតទី ២ ទល់ក្រុម Taipei East Power រកបាន ១៨ ពិន្ទុ ឈរនៅលំដាប់លេខ ២ ក្នុងក្រុម។

បន្ទាប់ពីបន្ថែម ៣៨ ពិន្ទុនេះទៀត បានធ្វើឱ្យ វឿន វាសនា បន្តកាប់តំណែងជាកីឡាកររកបានពិន្ទុច្រើនជាងគេប្រចាំលីគបាល់ទះអាចជីព តៃវ៉ាន់ ដោយរកបានសរុប ៩៧៣ ពិន្ទុ។ ជាមួយគ្នានេះ កីឡាករកំពុងវ៉ាដាច់ពិន្ទុអ្នកឈរលេខ ២ គឺមិត្តរួមក្រុមកីឡាករ Tsung-Hsuau Wu ដល់ទៅ ២០៧ ពិន្ទុឯណោះ ដែលបច្ចុប្បន្នរូបគេរកបាន ៧៦៦ ពិន្ទុ។

ជុំវិញស្ថិតិដ៏ល្អបែបនេះ កំពុងធ្វើឱ្យ វឿន វាសនា ឆ្ពោះទៅរកការឈ្នះពានឯកត្តជន ៣ ម្នាក់ឯងជាថ្មីនៅរដូវកាលនេះ រួមមាន ពាន​កីឡាករ​ល្អ​បំផុត​ប្រចាំ​ព្រឹត្តិការណ៍ ពាន​កីឡាករ​រក​បាន​ពិន្ទុ​ច្រើន​ជាង​គេ និងពានស្មាត់ស្តាំវាយផ្តាច់ល្អបំផុត។

គួរបញ្ជាក់ ថា ការប្រកួតលីគជុំដំបូង គឺនៅសល់ ២ ប្រកួតទៀតនៅសប្តាហ៍ក្រោយ មុនឈានចូលដល់ការប្រកួតវគ្គ playoff ជុំផ្តាច់ព្រ័ត្រ នាសប្តាហ៍បន្ទាប់៕

អត្ថបទ៖ សេម កុសល

The post វឿន វាសនា បន្តវ៉ាដាច់ពិន្ទុគេជាង ២០០ ពិន្ទុ ក្រោយជួយឱ្យ Win Streak ឈ្នះ ២ ប្រកួតជាប់គ្នា appeared first on Kampuchea Thmey Daily.

ថ្ងៃទី ២៥ ខែ ឧសភា ឆ្នាំ ២០២៦ នេះ ជាថ្ងៃខួបកំណើតរបស់កីឡាករជម្រើស​ជាតិ​កម្ពុជា វឿន វាសនា ឈានចូលវ័យ ២៥ ឆ្នាំ។ ក្លិប Win Streak បានចូលរួមបង្ហោះសារជូនពរកូនខ្មែរអ្នកខេត្តបាត់ដំបងដូច្នេះ ថា៖ «រីករាយថ្ងៃកំណើត។ ថ្ងៃទី ៥ ខែ ៥ ជាថ្ងៃកំណើតរបស់មេទ័ពធំ ដែលគេស្គាល់ ថាជា ព្រះនៃសង្គ្រាមរបស់យើង សឺឡាង»។

ក្លិបបានបន្តទៀត ថា៖ «សឺឡាង បានប្រយុទ្ធជាមួយក្រុម Win Streak ឈានចូលរដូវកាលទី ៣ ហើយ។ នៅក្នុងឆ្នាំដំបូងនៃលីគអាជីព គាត់ក៏បានឈរលេខ ១ លើតារាងពិន្ទុជាប់រហូត។ នៅពេលក្រុមកំពុងត្រៀមខ្លួនសម្រាប់ដំណាក់កាលចុងក្រោយមុនប្រកួតជុំ Playoffs យើងទាំងអស់គ្នាសូមចូលរួមជូនពរ សឺឡាង រីករាយថ្ងៃកំណើត»។

តាមរយៈសារខាងលើ ក្លិប Win Streak បានបង្ហាញយ៉ាងច្បាស់ ថា ពួកគេបានចាត់ទុក វឿន វាសនា ជាកីឡាករជួរមុខដ៏សំខាន់បំផុតម្នាក់របស់ក្រុម បន្ទាប់ពីពួកគេបានឱ្យរហស្សនាមកីឡាករជម្រើសជាតិ កម្ពុជា នេះ ជាព្រះនៃសង្គ្រាម ឬ God of war។ ពាក្យ ព្រះនៃសង្គ្រាម គឺនៅប្រទេស ចិន តែងតែប្រើសម្តៅលើមេទ័ពកំពូលៗក្នុងប្រវត្តិសាស្ត្ររបស់ពួកគេ ដូចជាលោកមេទ័ព គួនអ៉ី ក្នុងសម័យសាមកុកជាដើម។

គួរបញ្ជាក់ ថា វឿន វាសនា បានលេងជាមួយក្រុម Win Streak ចំនួន ៣ រដូវកាលមកហើយ ដោយគិតទាំងរដូវកាល ២០២៥-២០២៦ ។ ជាមួយគ្នានេះ កីឡាករខ្មែរវ័យ ២៥ ឆ្នាំ បានរួមចំណែកយ៉ាងធំធេង ក្នុងការជួយឱ្យ Win Streak ឈ្នះពានលីគ ២ រដូវកាលជាប់ៗគ្នា។ ដោយឡែកនៅរដូវកាលនេះវិញ ពួកគេក៏ស្ថិតជាបេក្ខភាពធំ ដើម្បីឈ្នះពានលីគបាល់ទះអាជីព តៃវ៉ាន់ ជាថ្មីម្តងទៀតផងដែរ៕

អត្ថបទ៖ សេម កុសល

The post ក្លិប Win Streak ជូនពរខួបកំណើត វឿន វាសនា ដោយឱ្យរហស្សនាម ថា«មេទ័ពធំ ព្រះនៃសង្គ្រាម» appeared first on Kampuchea Thmey Daily.

ក្រុម Win Streak បានធ្វើការប្រកួតចំនួន ២ ប្រកួត សម្រាប់សប្តាហ៍ទី ២៤ នៃលីគបាល់ទះអាជីព តៃវ៉ាន់។ កាលពីថ្ងៃ សៅរិ៍ ទី ១១ ខែ មេសា ពួកគេបានចាញ់ក្រុម Taoyuan Clouded Leopard ក្នុងលទ្ធផល ២ សិតទល់នឹង ៣។ ចំណែកថ្ងៃ អាទិត្យ ទី ១២ ខែ មេសា ពួកគេរកបានជ័យជម្នះមកវិញ ដោយវាយបកយកឈ្នះលើក្រុម TSG SkyHawks ក្នុងលទ្ធផល ៣ សិតទល់នឹង ២។

ថ្វីដ្បិតការប្រកួតទាំង ២ ប្រកួតនោះ មានឈ្នះ ១ និងចាញ់ ១ ក៏ពិតមែន ប៉ុន្តែ វឿន វាសនា នៅតែជាស្មាត់ដ៏សំខាន់របស់ក្រុម Win Streak ដោយប្រកួតទល់ក្រុម Taoyuan Clouded Leopard ស្មាត់ជម្រើសជាតិ កម្ពុជា វ័យ ២៤ ឆ្នាំរកបាន ១៧ ពិន្ទុ ឈរនៅលំដាប់លេខ ២ ជាកីឡាកររកបានពិន្ទុច្រើនជាងគេក្នុងក្រុម និងប្រកួតទី ២ ទល់ក្រុម TSG SkyHawks រកបាន ២៩ ពិន្ទុ ដែលជាចំនួនច្រើនជាងគេក្នុងក្រុម។ សម្រាប់ការប្រកួតចុងក្រោយនេះទៀតសោត វាសនា ក៏ត្រូវបានលីគ TPVL ជ្រើសរើសជាកីឡាករល្អបំផុតប្រចាំការប្រកួតផងដែរ។

វឿន វាសនា បច្ចុប្បន្នកំពុងកាន់កាប់តំណែងជាកីឡាកររកបានពិន្ទុច្រើនជាងគេប្រចាំលីគបាល់ទះ តៃវ៉ាន់ ដោយរកបានសរុប ៩៣៥ ពិន្ទុ។ ជាមួយគ្នានេះ កីឡាករកំពុងវ៉ាដាច់ពិន្ទុអ្នកឈរលេខ ២ កីឡាករ Stijn van Schie របស់ក្រុម TSG SkyHawks ដល់ទៅ ២០២ ពិន្ទុឯណោះ ដែលបច្ចុប្បន្នរូបគេរកបាន ៧៣៣ ពិន្ទុ។

ជុំវិញស្ថិតិដ៏ល្អបែបនេះ កំពុងធ្វើឱ្យ វឿន វាសនា ឆ្ពោះទៅរកការឈ្នះពានឯកត្តជន ៣ ម្នាក់ឯងជាថ្មីរួមមាន ពាន​កីឡាករ​ល្អ​បំផុត​ប្រចាំ​ព្រឹត្តិការណ៍ ពាន​កីឡាករ​រក​បាន​ពិន្ទុ​ច្រើន​ជាង​គេ និងពានស្មាត់ស្តាំវាយផ្តាច់ល្អបំផុត៕

អត្ថបទ៖ សេម កុសល

The post វឿន វាសនា រកពិន្ទុដាច់អ្នកលេខពីរជាង ២០០ ពិន្ទុ ក្រោយជួយ Win Streak ឈ្នះម្សិលមិញ appeared first on Kampuchea Thmey Daily.