វឿន វាសនា បំបែកកំណត់ត្រាជាកីឡាករដំបូងគេរកបានជាង ១,០០០ពិន្ទុនៅលីគបាល់ទះ តៃវ៉ាន់

កីឡាករ វឿន វាសនា របស់ក្រុមបាល់ទះ Win Streak បានសាងនូវកំណត់ត្រាថ្មីក្នុងលីគបាល់ទះអាជីព តៃវ៉ាន់ (TPVL) ដោយក្លាយជាកីឡាករដំបូងគេ ដែលរកបានពិន្ទុច្រើនជាងគេរហូតដល់ទៅជាង ១,០០០ ពិន្ទុក្នុងមួយរដូវកាល។

កូនខ្មែរអ្នកខេត្តបាត់ដំបងវ័យ ២៥ ឆ្នាំ រកបានពិន្ទុចំនួន ១,០២៨ ពិន្ទុនៅរដូវកាល ២០២៥-២០២៦ នេះ បន្ទាប់ពីជួយឱ្យក្រុម Win Streak ឈ្នះ ២ ប្រកួតជាប់គ្នានៅក្នុងសប្តាហ៍ទី ២៦ នេះ ដោយការប្រកួតទល់នឹងក្រុម TSG Skyhawks រកបាន ៣១ ពិន្ទុ និងការប្រកួតទល់នឹងក្រុម Taoyuan Cloud Leopard រកបាន ២៤ ពិន្ទុ។

យ៉ាងណាមិញ សម្រាប់ការប្រកួតសប្តាហ៍ទី ២៦ ដែលជាសប្តាហ៍ចុងក្រោយនៃវគ្គលីគដំណាក់កាលដំបូង (Regular Season) គឺក្រុម Win Streak បានឈ្នះ ២ ប្រកួតជាប់គ្នា។ ការប្រកួតទល់នឹងក្រុម Win Streak កាលពីថ្ងៃ សៅរ៍ ទី ១៦ ខែ ឧសភា បានយកឈ្នះក្នុងលទ្ធផល ៣ សិតទល់ ២ និងការប្រកួតទល់ក្រុម Taoyuan Cloud Leopard កាលពីថ្ងៃ អាទិត្យ ទី ១៧ ខែ ឧសភា បានយកឈ្នះក្នុងលទ្ធផល ៣ សិតទល់ ១។

វឿន វាសនា បានដើរតួសំខាន់មែនទែន ក្នុងការជួយក្រុម Win Streak នៅក្នុងលីគបាល់ទះអាជីព តៃវ៉ាន់ រដូវកាលនេះ បន្ទាប់ពីបញ្ចប់លីគដំណាក់កាលដំបូង កីឡាកររកបានពិន្ទុច្រើនជាងគេបង្អស់ និងជួយឱ្យក្រុមឈរនៅតំណែងកំពូលតារាង ក្រោយឆ្លងកាត់ ៤៨ ប្រកួត ឈ្នះ ៤៣ និងចាញ់ ៥។

គួរបញ្ជាក់ ថា ការប្រកួតជុំផ្តាច់ព្រ័ត្រ ដើម្បីរកក្រុមជើងឯកលីគរដូវកាលនេះ នឹងចាប់ផ្តើមនៅសប្តាហ៍ក្រោយ ដែលធ្វើឡើងរយៈពេល ៤ ថ្ងៃ នៅថ្ងៃទី ២២ ដល់ថ្ងៃទី ២៥ ខែ ឧសភា ឆ្នាំ ២០២៦៕

អត្ថបទ៖ សេម កុសល