វឿន វាសនា ឈ្នះពានឯកត្តជន ២ ម្នាក់ឯងក្នុងលីគបាល់ទះអាជីពតៃវ៉ាន់រដូវកាលនេះ

កីឡាករ វឿន វាសនា របស់ក្រុមបាល់ទះ Win Streak បានបង្ហាញភាពលេចធ្លោមិនគួរឱ្យជឿ ដោយបានឈ្នះពានឯកត្តជនដល់ទៅ ២ ម្នាក់ឯង បន្ទាប់ពីលីគបាល់អាជីពតៃវ៉ាន់ (TPVL) បញ្ចប់លីគវគ្គរដូវកាលដំបូង (Regular Season) ជាស្ថាពរ។

ការប្រកួតលីគបាល់ទះអាជីព តៃវ៉ាន់ បានបញ្ចប់លីគវគ្គវិល​ជុំ​សន្សំពិន្ទុ រដូវកាល ២០២៥-២០២៦ រួចរាល់ហើយ កាលពីសប្តាហ៍មុនត្រូវនឹងថ្ងៃ អាទិត្យ ទី ១៧ ខែ ឧសភា ឆ្នាំ ២០២៦។ កីឡាករជម្រើសជាតិ​ កម្ពុជា វ័យ ២៥ ឆ្នាំ នៅតែបង្ហាញគុណផលយ៉ាងអស្ចារ្យ ដោយបានរួមចំណែករកបាន ១,០២៨ ពិន្ទុ ជួយឱ្យក្រុម Win Streak ឈរនៅកំពូលតារាង បន្ទាប់ពីឆ្លងកាត់ ៤៨ ប្រកួត ឈ្នះ ៤៣ និងចាញ់ ៥។

រឿងដ៏ពិសេសបំផុត គឺ វឿន វាសនា បានបំបែកកំណត់ត្រាក្លាយជាកីឡាករដំបូងគេនៅក្នុងលីគអាជីព តៃវ៉ាន់ ដែលរកពិន្ទុបានច្រើនជាង ១,០០០ គ្រាប់។ តាមរយៈស្នាដៃដ៏ល្អបែបនេះ បានធ្វើឱ្យកូនខ្មែរអ្នកខេត្ត បាត់ដំបង ឈ្នះពានឯកត្តជន ២ ពីលីគ TPVL រួមមានពាន «កីឡាករលេងតួនាទីស្មាត់ស្តាំល្អបំផុត» និង «កីឡាកររកបានពិន្ទុច្រើនជាងគេបំផុត»។

ទោះបីជាយ៉ាងណា កាលពីថ្ងៃទី ២១ ខែ ឧសភា ឆ្នាំ ២០២៦ ក្លិប Win Streak បានប្រកាសរឿងដ៏សោកស្តាយមួយ ថា កីឡាករវឿន វាសនា រួមជាមួយកីឡាករ ៣ នាក់ទៀត នឹងមិនអាចចូលរួមលេងជាមួយក្រុមនៅវគ្គជម្រុះ Playoffs ជុំផ្តាច់ព្រ័ត្របានទេ ដោយសារជាបទបញ្ញត្តិរបស់សហព័ន្ធបាល់ទះអន្តរជាតិ (FIVB) បានចែង ថា កីឡាករ ដែលជាប់ជម្រើសជាតិ គឺមិនអាចបន្តលេងជាមួយក្លិបអាជីពក្នុងអំឡុងពេលនេះបានទេ។

គួរបញ្ជាក់ ថា ការប្រកួតជុំផ្តាច់ព្រ័ត្រ ដើម្បីរកក្រុមជើងឯកលីគរដូវកាលនេះ នឹងចាប់ផ្តើមពីថ្ងៃទី ២២ ដល់ថ្ងៃទី ២៥ ខែ ឧសភា ឆ្នាំ ២០២៦៕

អត្ថបទ៖ សេម កុសល