លោក Cooper នឹងត្រូវដឹកនាំក្រុម វិសាខា ប្រកួតតទល់នឹងក្រុម ព្រះខ័នរាជស្វាយរៀង នៅក្នុងវគ្គផ្តាច់ព្រ័ត្រពានសម្តេចតេជោ នៅពហុកីឡដ្ឋានជាតិមរតកតេជោ ថ្ងៃ អាទិត្យ ទី ២៤ ខែ ឧសភា ឆ្នាំ ២០២៦។ មុនជំនួបដ៏ធំនេះមកដល់ គ្រូបង្វឹកសញ្ជាតិ អៀរឡង់ វ័យ ៥៥ ឆ្នាំ បានសារភាពដោយត្រង់ ថា លទ្ធផលដ៏ល្អរបស់ក្រុមលោក ជាពិសេសការឡើងមកកាន់វគ្គផ្តាច់ព្រ័ត្រនេះ គឺភាគច្រើនជួបសុទ្ធតែក្រុមកម្រិតទាបប៉ុណ្ណោះ។

ផ្ទុយពីក្រុម ព្រះខ័នរាជស្វាយរៀង ដែលបានឆ្លងកាត់នូវផ្លូវពិបាកៗជាច្រើន ដោយត្រូវប្រកួតក្នុងកាលវិភាគដ៏មមារញឹក ហើយការប្រកួតនៅក្នុងលីគ ត្រូវជួបក្រុមក្នុងលំដាប់កំពូលទាំង ៦។ ជាមួយគ្នានេះ ពួកគេទើបប្រកួតវគ្គផ្តាច់ព្រ័ត្រពាន AFC Challenge League ហើយមុនឡើងមកដល់វគ្គផ្តាច់ព្រ័ត្រពានសម្តេចតេជោនេះទៀតសោត បានឆ្លងកាត់ការប្រកួតដ៏ពិបាកជាមួយនឹងក្រុម បឹងកេត ថែមទៀត។

ថ្លែងនៅក្នុងសន្និសីទសារព័ត៌មាននាព្រឹកថ្ងៃ សៅរិ៍ ទី ២៣ ខែ ឧសភា ឆ្នាំ ២០២៦ លោក Cooper បានមានប្រសាសន៍ ថា៖ «យើងត្រូវនិយាយដោយស្មោះត្រង់ អំពីទិន្ន័យជាក់ស្តែង។ វិសាខា ស្ថិតនៅលេខ ៧ ក្នុងលីគ។ យើងឈ្នះច្រើន ដោយសារយើងលេងតែជាមួយក្រុមនៅលំដាប់ខាងក្រោម។ យើងមិនដូច ព្រះខ័នរាជស្វាយរៀង ទេ ដែលបានលេងជាមួយក្រុមលំដាប់កំពូលទាំង ៦ សុទ្ធតែក្រុមខ្លាំងៗ»។

លោក Cooper បានបន្តទៀត ថា៖ «[…] មុនឡើងមកដល់វគ្គផ្តាច់ព្រ័ត្រពានសម្តេចតេជោនេះ គឺ ពួកគេបានឈ្នះក្រុម បឹងកេត ដែលដឹកនាំដោយលោក Conor Nestor ជាគ្រូបង្វឹកពោរពេញដោយទេពកោលស្យម្នាក់។ មានន័យ ថា មុនមកដល់វគ្គផ្តាច់ព្រ័ត្រនេះ គឺផ្លូវធ្វើដំណើររបស់ពួកគេខុសពីយើងដាច់តែម្តង។ ពួកគេជួបសុទ្ធតែក្រុមកំពូលៗ ហើយប៊ិះនឹងឈ្នះពាន AFC Challenge League ទៀត»។

ទោះបីជាយ៉ាងណា លោក Cooper បានសង្កត់ធ្ងន់ ថា លោកមិនបានខ្លាចទៅលើក្រុម ព្រះខ័នរាជស្វាយរៀង នោះទេ ដោយការលើកឡើងខាងលើ គឺជាការគោរពរបស់លោកទៅលើក្រុមម្ចាស់ជើងឯកលីគកំពូល កម្ពុជា។ លោកប្តេជ្ញា ថា ការប្រកួតស្អែក ក្រុមលោកនឹងប្រឹងប្រយុទ្ធឱ្យអស់ពីសមត្ថភាពពេញ ៩០ នាទី ដើម្បីយកជ័យជម្នះ និងពានឱ្យបាន៕

អត្ថបទ៖ សេម កុសល

The post លោក Cooper ថា ព្រះខ័នរាជស្វាយរៀង ពិបាកជាង វិសាខា ដាច់ មុនឡើងដល់វគ្គផ្តាច់​ព្រ័ត្រ​ពានសម្តេចតេជោ appeared first on Kampuchea Thmey Daily.

ការប្រកួតវគ្គផ្តាច់ព្រ័ត្រពានសម្តេចតេជោនៅចុងសប្តាហ៍នេះ ត្រូវបានគេរំពឹង ថា នឹងក្លាយជាការប្រកួតដ៏កក្រើក ដោយសារជាការជួបគ្នារវាងក្រុមខ្លាំង ២ ប្រចាំប្រទេស កម្ពុជា គឺ ព្រះខ័នរាជស្វាយរៀង និង វិសាខា។ ជំនួបនេះ ក៏ជាការសងសឹករបស់ ព្រះខ័នរាជស្វាយរៀង ផងដែរ បន្ទាប់ពីពួកគេធ្លាប់បរាជ័យក្រោមថ្វីជើងក្រុម វិសាខា នៅវគ្គផ្តាច់ព្រ័ត្រពានសម្តេចតេជោម្តង កាលពីឆ្នាំ ២០២១។

ព្រះខ័នរាជស្វាយរៀង ជាក្រុមជោគជ័យជាងគេ ដោយធ្លាប់ឈ្នះពានសម្តេចតេជោដល់ទៅ ៥ លើក ខណៈ វិសាខា មិនដែលចាញ់នៅវគ្គផ្តាច់ព្រ័ត្រសោះ ក្នុងការឡើងបាន ៣ លើក។ ដូច្នេះការប្រកួតនេះធានា ថា នឹងរំភើបសម្រាប់អ្នកគាំទ្រទៅទស្សនាផ្ទាល់។

ដូចបានបញ្ជាក់ពីខាងដើម ក្រៅពីការប្រកួត នៅមានការសម្តែងពិសេសៗជាច្រើនទៀត ដើម្បីកំដរអ្នកទស្សនា ដូចជានៅពេលបញ្ចប់វគ្គទី ១ នឹងមានការសម្តែងការលេងបាល់ទាត់ហ្វ្រីស្ទាយ៍ ដោយក្រុមហ្វ្រីស្ទាយ៍កម្ពុជា ដែលដឹកនាំដោយលោក ឡុង គឹមហេង និងក្រុមសិល្បៈហ៊ិបហប (Sela Pak HipHop)។ ក្រៅពីនេះ អ្នកគាំទ្រក៏នឹងសប្បាយរីករាយជាមួយការចាក់ចង្វាក់ EDM ដោយ DJ FII YAA ផងដែរ។

កុំ​ភ្លេច ចូល​រួម​គាំទ្រ និង​ទស្សនា​ឲ្យ​បាន​ច្រើន​កុះករ នាល្ងាច ថ្ងៃអាទិត្យ ទី​២៤ ខែ​ឧសភា នេះ​នៅ​ពហុកីឡដ្ឋាន​ជាតិ​មរតក​តេជោ ដែល​មាន​អ្វី​ពិសេស​ច្រើន​លើស​ពី​ការ​ប្រកូត​បាល់ទាត់​ថែម​ទៀត៕

អត្ថបទ៖ សេម កុសល

The post វគ្គផ្តាច់ព្រ័ត្រពានសម្តេចតេជោ ថ្ងៃអាទិត្យនេះ ទទួល​បាន​ភាព​រីក​រាយ លើស​ពី​បាល់ទាត់ appeared first on Kampuchea Thmey Daily.

ការប្រកួតពានរង្វាន់ពានសម្តេចតេជោថ្នាក់ជាតិ បានរៀបចំឡើងចំនួន ១៨ លើកហើយ ខណៈនៅរដូវកាល ២០២៥-២០២៦ គឺជាលើកទី ១៩។ បើក្រឡេកមើលអំពីក្រុម ធ្លាប់ឡើងដល់វគ្គផ្តាច់ព្រ័ត្រពាននេះ មានចំនួន ៩ ក្រុម ក្នុងនោះមាន ព្រះខ័នរាជស្វាយរៀង ភ្នំពេញក្រោន កងយោធពលខេមរភូមិន្ទ វិសាខា ណាហ្គាវើលដ៍ អឹមអូអាយ កំពង់ដេវ៉ា បឹងកេត ខេមរាកីឡា និង បៀលប្រាយ យូណាយធីត។

ក្នុងចំណោមក្រុមធ្លាប់ឡើងដល់វគ្គផ្តាច់ព្រ័ត្រខាងលើ គឺមានតែក្រុម វិសខា មួយប៉ុណ្ណោះ ដែលជាក្រុមកំពុងស្ថិតក្នុងលីគកំពូល កម្ពុជា មិន​ធ្លាប់​ចាញ់សោះនៅវគ្គផ្តាច់ព្រ័ត្រ។ ពួកគេធ្លាប់ឡើងបានចំនួន ៣ លើក ក្នុងនោះបានឈ្នះជើងឯកទាំង ៣ លើក នៅឆ្នាំ ២០២០ ២០២១ និង ២០២២។ ចំណែកនៅរដូវកាល ២០២៥-២០២៦ ពួកគេបានឡើងដល់វគ្គផ្តាច់ព្រ័ត្រជាថ្មី ដែលកំពុងរង់ចាំគូប្រកួតរវាង ព្រះខ័នរាជស្វាយរៀង និង បឹងកេត។

គួរបញ្ជាក់ ថា អតីតក្រុមខេមរាកីឡា ក៏មានកំណត់ត្រាមិនដែលចាញ់នៅវគ្គផ្តាច់ព្រ័ត្រពានសម្តេចតេជោនេះដែរ ដោយឡើងបាន ១ លើកនៅឆ្នាំ ២០០៧ ហើយក៏បានឈ្នះជើងឯកលើកដំបូងនៅពេលនោះ។ ទោះបីជាយ៉ាងណា ពួកគេមិនត្រូវបានរាប់បញ្ចូលនៅក្នុងកំណត់ត្រាខាងលើនោះទេ ដោយសារក្រុមនេះបានរំសាយក្រុមតាំងពីឆ្នាំ ២០១១៕

អត្ថបទ៖ សេម កុសល

The post វិសាខា ជាក្រុមកំពុងលេងតែ ១ គត់ មិនធ្លាប់​ចាញ់​វគ្គផ្តាច់ព្រ័ត្រពានសម្តេចតេជោ ហ៊ុន សែន appeared first on Kampuchea Thmey Daily.

នេះជាលើកដំបូងសម្រាប់ វិសាខា និង អាយអេសអាយ ដង្កោរសែនជ័យ ដែលត្រូវជួបគ្នា ក្នុងពានរង្វាន់សម្តេចតេជោ ខណៈកន្លងមកពួកគេធ្លាប់ជួបគ្នាតែក្នុងក្របខណ្ឌលីគកំពូល កម្ពុជា Cambodian Premier League ប៉ុណ្ណោះ។ ជាលទ្ធផលជួបគ្នាសរុប ៨ លើក គឺ វិសាខា ឈ្នះ ៥ លើក ចាញ់ ២ លើក និងស្មើ ១ លើក។

ថ្វីដ្បិតលទ្ធផលជួបគ្នាកន្លងមក វិសាខា ធ្វើបានល្អជាង ប៉ុន្តែនៅក្នុងពានសម្តេចតេជោ គឺមិនអាចប្រហែសលើក្រុម អាយអេសអាយ ដង្កោរសែនជ័យ បាននោះទេ។ មុនឡើងមកដល់វគ្គពាក់កណ្តាលផ្តាច់ព្រ័ត្រនេះ ក្រុម អាយអេសអាយ បានទម្លាក់ក្រុម អឹមអូអាយ កំពង់ដេវ៉ា បន្ទាប់ពីឈ្នះសរុបលទ្ធផលទាំង ២ ជើង ៣-២។ ចំណែកនៅវគ្គ ៨ ក្រុម បានទម្លាក់ក្រុម ភ្នំពេញក្រោន បន្ទាប់ពីឈ្នះសរុបទាំង ២ ជើង ក្នុងលទ្ធផល​ ៤-២។

ក្រឡេកមកកាន់ក្រុម វិសាខា វិញ បានទម្លាក់ក្រុម ភ្នំពេញហ្គាឡាក់ស៊ី នៅវគ្គ ១៦ ក្រុមចុងក្រោយ បន្ទាប់ពីឈ្នះសរុបលទ្ធផលទាំង ២ ជើង ២២-០។ ចំណែកនៅវគ្គ ៨ ក្រុមចុងក្រោយ បានទម្លាក់ក្រុម ណាហ្គាវើលដ៍ បន្ទាប់ពីយកឈ្នះសរុបលទ្ធផលទាំង ២ ជើង ៦-២។

គួរឱ្យដឹង ថា បន្ទាប់ពីការប្រកួតនេះ ក្រុមទាំង ២ ត្រូវជួបគ្នាជើងទី ២ មួយជើងទៀត ដើម្បីកាត់សេចក្តីរក ១ ក្រុមឡើងទៅវគ្គផ្តាច់ព្រ័ត្រ គឺនៅថ្ងៃ ពុធ ទី ២៩ ខែ មេសា ឆ្នាំ ២០២៦៕

អត្ថបទ៖ សេម កុសល

The post ល្ងាចនេះ វិសាខា មិនអាចប្រហែសជា​មួយ​ ISI ដង្កោសែន​ជ័យ បានទេ appeared first on Kampuchea Thmey Daily.

បច្ចុប្បន្នមាន វិសាខា មានមជ្ឍមណ្ឌលហ្វឹកហាត់ដ៏ធំមួយ ដែលមានទំហំសរុប ៤ ហិកតា នៅតាមបណ្តោយផ្លូវឈ្នះៗ ក្នុងខណ្ឌពោធិ៍សែនជ័យ រាជធានីភ្នំពេញ។ មជ្ឈមណ្ឌលហ្វឹកហាត់នេះ បានបម្រើការដល់ការហ្វឹកហាត់របស់ក្រុមយុវជន ៣ កម្រិតមាន U14, U16 និង U18 និងក្រុមយុវនារី ១ កម្រិត រួមជាមួយក្រុមធំផងដែរ។

មជ្ឍមណ្ឌលហ្វឹកហាត់ វិសខា មានទីលានហ្វឹកហាត់ចំនួន ៤ រួមមានទីលានស្មៅធម្មជាតិ ៣ និងស្មៅសិប្បនិម្មិត ១។ ក្រៅពីទីលានហ្វឹកហាត់ គឺនៅទីនេះមានទាំងកន្លែងហាត់ប្រាណពង្រឹងកាយសម្បទា កន្លែងអាហារដ្ឋាន បន្ទប់ប្រជុំ បន្ទប់គ្រូបង្វឹកធ្វើការ បន្ទប់របស់កីឡាករកម្សាន្ត​ បន្ទប់រៀនសូត្រ បន្ទប់សមាធិ និងថ្វាយបង្គុំសម្រាប់​អ្នក​កាន់សាសនាឥស្លាមផ្សេង​ៗ។

លោក ហុក សុចិត្រា អគ្គលេខាធិការក្លិប​បាល់ទាត់​ វិសាខា បានប្រាប់ «កម្ពុជាថ្មី» ថា យុវជនរបស់ក្លិប វិសាខា គ្រប់កម្រិត គឺទទួលបានការមើលថែទាំដោយក្លិប ទាំង​អាហារ​ហូបចុក ស្នាក់នៅ និងរៀនសូត្រ។ ក្លិបបានរៀបចំឱ្យយុវជនស្នាក់ជុំគ្នានៅកីឡដ្ឋាន វិសខា ហើយនៅពេលហ្វឹកហាត់ គឺត្រូវមកហ្វឹកហាត់នៅមជ្ឈមណ្ឌលហ្វឹកហាត់នេះ។

លោកបានបន្ថែម ថា ក្រៅពីការហ្វឹកហាត់របស់យុវជនក្លិបផ្ទាល់​ក្លិប វិសាខា ក៏មានសាលាបាល់ទាត់ ដើម្បីបង្វឹកដល់កុមារ ដែលស្រឡាញ់បាល់ទាត់ចាប់ពីអាយុ ៦ ឆ្នាំឡើងទៅផងដែរ ដោយការហ្វឹកហាត់តម្រូវឱ្យបង់លុយសម្រាប់អ្នកមានលទ្ធភាព។ ការហ្វឹកហាត់ គឺត្រូវបង្វឹកដោយគ្រូជំនាញ ដែលជាអតីតកីឡាករជម្រើសជាតិ។

អតីតខ្សែប្រយុទ្ធជម្រើសជាតិ កម្ពុជា រូបនេះ​បានបន្ត​ថា ក្លិប​វិសាខា គ្រោងនឹងធ្វើមជ្ឍមណ្ឌលហ្វឹកហាត់មួយទៀតក្នុងពេលឆាប់ៗខាងមុខ ដែលមានទីតាំងនៅស្រុកកំចាយមារ ខេត្ត​ព្រៃវែង។

តាមរយៈការបណ្តុះបណ្តាលយុវជន ដែលមានភាពស្តង់ដា​បែបនេះ អ្នកគាំទ្រច្បាស់ជាដឹងហើយ ថា នៅឆ្នាំ ២០២៦ នេះ វិសខា បានឈ្នះពានយុវជនគ្រប់កម្រិត ដែលបានរៀបចំដោយសហព័ន្ធ CPL រួមមាន ពាន​យុវជន​អាយុក្រោម ១៤ ឆ្នាំ ពានលីគ​យុវជន​អាយុក្រោម ១៦ ​ឆ្នាំ លីគ​យុវជន​អាយុក្រោម ១៨ ឆ្នាំ និង ពានលីគ​អភិវឌ្ឍ។

អត្ថបទ៖ សេម កុសល

The post វិសាខា អភិវឌ្ឍ ថ្នាល​​យុវជនស្តង់ដាដូចនៅ អឺរ៉ុប ទើប​ក្រុម​ពួកគេខ្លាំងគ្រប់កម្រិត appeared first on Kampuchea Thmey Daily.

ការប្រកួតពានសម្តេចតេជោថ្នាក់ជាតិ បានរៀបចំឡើងចំនួន ១៨ លើកហើយ ខណៈនៅរដូវកាល ២០២៥-២០២៦ គឺជាលើកទី ១៩។ ចាប់តាំងពីពានលំដាប់ទី ២ នេះបង្កើតឡើង គឺពុំធ្លាប់មានកីឡាករបរទេសណាមានប្រវត្តិឈ្នះស្បែកជើងមាសឡើយ ក្រៅតែអំពីកីឡាករ Jonata។

មូលហេតុចម្បង គឺដោយសារពានសម្តេចតេជោ មុនរដូវកាល ២០២៣-២០២៤ ពុំអនុញ្ញាតឱ្យប្រើកីឡាករបរទេសឡើយ។ រហូតមកដល់រដូវកាល ២០២៣-២០២៤ ទើបគណៈកម្មការរៀបចំការប្រកួតសម្រេចអនុញ្ញាតឱ្យក្រុមនីមួយៗ ប្រើប្រាស់កីឡាករបរទេសជាលើកដំបូង និងរហូតមកដល់បច្ចុប្បន្ន។

ទោះបីជាពាននេះអនុញ្ញាតឱ្យប្រើកីឡាករបរទេស ២ រដូវកាលរួចមកហើយ ប៉ុន្តែមានតែ Jonata ម្នាក់គត់ ដែលត្រូវបានចារជាកីឡាករបរទេសធ្លាប់ឈ្នះស្បែកជើងមាសក្នុងពានសម្តេចតេជោ។ កីឡាករប្រេស៊ីលវ័យ ២៨ ឆ្នាំ បានឈ្នះនៅរដូវកាល ២០២៣-២០២៤ ជាមួយ វិសាខា ដោយពេលនោះរូបគេរកបាន ៦ គ្រាប់។

គួរឱ្យដឹង ថា ក្នុងពានសម្តេចតេជោបច្ចុប្បន្ន អតីតខ្សែប្រយុទ្ធក្រុម ព្រះខ័នរាជស្វាយរៀង និងបឹងកេត លោកឃួន ឡាបូរ៉ាវី កំពុងកាន់កាប់តំណែងជាកីឡាករឈ្នះស្បែកមាសច្រើនជាងគេក្នុងពានសម្តេចតេជោ ដោយបានឈ្នះសរុបចំនួន ៤ លើក៕

អត្ថបទ៖ សេម កុសល

The post ខ្សែប្រយុទ្ធ Jonata ជាកីឡាករបរទេសម្នាក់គត់ ធ្លាប់ឈ្នះស្បែកជើងមាសក្នុងពានសម្តេចតេជោ appeared first on Kampuchea Thmey Daily.

គិតត្រឹមពេលនេះ ការប្រកួតលីគជុំទី ១ បានបញ្ចប់ហើយ ខណៈ វិសខា ដែលជាក្រុមចាយលុយធំមួយ ហាក់មិនទទួលបានលទ្ធផលល្អតាមការគ្រោងទុកនោះទេ។ បច្ចុប្បន្ន ពួកគេកំពុងឈរនៅលេខរៀងទី ៦ ក្រោយឆ្លងកាត់ ១២ ប្រកួត ឈ្នះ ៣ ស្មើ ៦ និងចាញ់ ៣ មាន ១៥ ពិន្ទុ។

តាមរយៈលទ្ធផលមិនទទួលបានគួរជាទីគាប់ប្រសើរដូចនេះ បានធ្វើឱ្យពួកគេរុះរើក្រុមលក្ខណៈទ្រង់ទ្រាយធំនៅទីផ្សារដោះដូរកីឡាករខែ ធ្នូ នេះ។ និយាយអំពីគ្រូបង្វឹក គឺពួកគេបានបញ្ចប់តំណែងគ្រូបង្វឹកសញ្ជាតិ អង់គ្លេស លោក Gerard Jones បន្ទាប់ពីដឹកនាំបានជិតកន្លះរដូវកាល។ នៅថ្ងៃទី ៣ ខែ ធ្នូ ឆ្នាំ ២០២៥ វិសាខា បានប្រកាសតែងតាំងបុរសសញ្ជាតិ អង់គ្លេស លោក Scott Cooper ជាគ្រូបង្វឹកថ្មី ដើម្បីជំនួសតំណែងលោក Gerard Jones។

ក្រឡេកមកមើលកីឡាករវិញ គិតត្រឹមពេលនេះ វិសាខា បានបញ្ចេញកីឡាករបរទេស ២ នាក់ហើយ រួមមានកីឡាករសញ្ជាតិ កេនយ៉ា Benson Ochieng និងខ្សែប្រយុទ្ធស្លាបសញ្ជាតិ ប្រេស៊ីល Breninho ផ្លាស់ទៅកាន់ក្លិប ភ្នំពេញក្រោន ក្នុងលក្ខខណ្ឌខ្ចីជើងកន្លះរដូវកាល។ ជាមួយគ្នានេះ មានកីឡាករសំខាន់ៗប៉ុន្មានរូបទៀត ដែលពួកគេបានបញ្ចេញផងដែរ រួមមានខ្សែបម្រើជនជាតិ អ៊ុយបេគីស្ថាន សញ្ជាតិ ខ្មែរ Alisher Mirzaev ផ្លាស់ទៅ អឹមអូអាយ កំពង់ដេវ៉ា ក្នុងលក្ខខណ្ឌខ្ចីជើង និង គី រីណា ផ្លាស់ទៅកាន់ ណាហ្គាវើលដ៍ ក្នុងលក្ខខណ្ឌខ្ចីជើង ព្រម​ទាំង​កីឡាករ​វ័យ​ក្មេង​មួយ​ចំនួន​ត្រូវបាន​ខ្ចី​ជើង​ទៅ​ក្លិប​ផ្សេង។

ដោយឡែកកីឡាករចំណូលថ្មី ដែល វិសខា ទើបនាំចូលវិញ មានកីឡាករបរទេស ៣ រូបគួរឱ្យចាប់អារម្មណ៍បំផុត រួមមានខ្សែប្រយុទ្ធកណ្តាលសញ្ជាតិ ស៊ែប៉ី Pavle Ivelja ផ្លាស់មកពីក្លិប Cheonan City នៃលីគទី ២ កូរ៉េខាងត្បូង។ ខ្សែបម្រើសញ្ជាតិ ស្កុតលែនដ៍ Scott Allardice ផ្លាស់មកពីក្លិប Ratchaburi FC នៃលីគកំពូលថៃ និងចុងក្រោយនេះខ្សែប្រយុទ្ធស្លាបសញ្ជាតិ ប្រេស៊ីល Lucas Dias ផ្លាស់មកពីក្លិប PSM Makassar នៃលីគកំពូល ឥណ្ឌូណេស៊ី៕

អត្ថបទ៖ សេម កុសល

The post លីគចូលជុំទី ២ វិសាខា បានរុះរើក្រុមទ្រង់​ទ្រាយ​ធំ ទាំងគ្រូបង្វឹក និង កីឡាករ appeared first on Kampuchea Thmey Daily.

ការប្រកាសនេះ បានធ្វើឡើងរំលង ១ ថ្ងៃ បន្ទាប់ពីពួកគេប្រកាសចែកផ្លូវគ្នាជាមួយខ្សែប្រយុទ្ធសញ្ជាតិ កេនយ៉ា Benson Ochieng កាលពីថ្ងៃទី ១៦ ខែ ធ្នូ ។ ដូច្នេះការមកដល់របស់កីឡាករ Pavle Ivelja នឹងក្លាយជាអ្នកជំនួសតំណែងរបស់ Benson Ochieng ដែលទើបចាកចេញ។

កីឡាករ Pavle Ivelja បច្ចុប្បន្នមានវ័យ ២៧ ឆ្នាំ លេងតួនាទីជាខ្សែប្រយុទ្ធប្រអប់ជួរ​មុខ។ ខ្សែប្រយុទ្ធកម្ពស់ ១.៩៣ ម៉ែត្ររូបនេះ មានបទពិសោធច្រើនលេងនៅលីគកំពូល ស៊ែប៉ី ដែលស្ថិតក្នុងប្រទេសរបស់ខ្លួន ដូចជានៅក្លិប Javor-Matis, Radnicki Nis និង Radnicki 1923។ ចុងក្រោយ រូបគេបានទៅចូលរួមជាមួយក្លិប Cheonan City នៃលីគទី ២ កូរ៉េខាងត្បូង បានកន្លះរដូវកាល មុនពេលផ្លាស់មកចូលរួមជាមួយ វិសាខា ។

ក្រឡេកទៅមើលស្ថិតិផ្ទាល់ខ្លួនវិញ Pavle Ivelja បង្ហាញខ្លួននៅលើទីលានគ្រប់ក្លិបទាំងអស់ចំនួន ១២៣ ប្រកួត ក្នុងនោះរូបគេរកបានគ្រាប់បាល់បានចំនួន ៣៣ គ្រាប់ និង ៦ បញ្ជូន (assist)៕

អត្ថបទ៖ សេម កុសល

The post វិសាខា នាំចូលខ្សែប្រយុទ្ធកម្ពស់ខ្ពស់ ជាអតីតកីឡាករលេងនៅលីគកំពូល ស៊ែប៉ី appeared first on Kampuchea Thmey Daily.