ហេតុការណ៍នេះបង្កការភ្ញាក់ផ្អើលកាលពីវេលាម៉ោង ១២ ថ្ងៃត្រង់ ថ្ងៃទី ០៣ ខែកក្កដា ឆ្នាំ ២០២៦ ស្ថិតនៅចំណុចផ្លូវទន្លេសាប សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។

តាមការបញ្ជាក់ពីប្រជាពលរដ្ឋជាអ្នកនេសាទ បានឲ្យដឹងថា មុនមានការផ្អើលឆោឡោថាមានសពអណ្តែតនៅកណ្តាលទន្លេ ក្បែរស្ពាន ក្នុងមូលដ្ឋានសង្កាត់ជ្រោយចង្វារ ភ្លាមៗ គាត់បានរាយការណ៍ជូនសមត្ថកិច្ច ដើម្បីអូសសពយកមកច្រាំងទន្លេ។ ខណៈពេលកំពុងអូសសពបានបន្តិច ក៏មានគេឃើញសាកសពម្នាក់ទៀត អណ្តែតក្បែរច្រាំងទន្លេ ជិតអូតែលសុខា ដែលមានចម្ងាយពីគ្នា ប្រមាណជា ៤០០ ម៉ែត្រ។ ស្របពេលនោះ ប្រជានេសាទ ក៏បានអូសសពយកឡើងមកលើគោកទាំង ០២ តែម្តង។

បច្ចុប្បន្ន សមត្ថកិច្ចជំនាញកោសល្យវិច័យ នៃស្នងការដ្ឋាននគរបាលរាជធានីភ្នំពេញ និង មន្រ្តីមូលដ្ឋាន ចុះមកត្រួតពិនិត្យសពទាំង ០២ នាក់ ខាងលើ រួចធ្វើកំណត់ហេតុ ដើម្បីយកទៅតម្កល់នៅវត្ត រង់ចាំសាច់ញាតិមកទទួលទៅធ្វើបុណ្យតាមប្រពៃណី៕
អត្ថបទ ៖ រដ្ឋា

The post ប្រទះឃើញសពមនុស្សប្រុស ០២ នាក់ អណ្តែតទឹកបន្តបន្ទាប់គ្នា ក្បែរស្ពានជ្រោយចង្វារ ចម្ងាយពីគ្នាប្រមាណ ៤០០ ម៉ែត្រ appeared first on Kampuchea Thmey Daily.

តាមប្រភពព័ត៍មានពីប្រជាពលរដ្ឋបានអោយដឹងថា ជនរងគ្រោះតែងតែជិះម៉ូតូមួយគ្រឿង ម៉ាក ស៊ុយសូគី ឡេត ពណ៍ស ពាក់ស្លាកលេខ ភ្នំពេញ 1CW-3948 ខាងលើមករាយម៉ងដាក់យកត្រី នៅក្រោយវត្តព្រែកលាបជាប្រចាំ ខណៈនាវេលាកើតហេតុ សង្ស័យបុរសខាងលើរអិលជើងស្រាប់តែលង់ទឹកលិចបាត់តែម្តង ។ ភ្លាមៗប្រជាពលរដ្ឋនៅក្បែរ នោះបានឃើញហើយនាំគ្នាទៅជួយសង្រ្គោះនិងជួយរាវរកឃើញតែបុរសរូបនោះបានស្លាប់បាត់ទៅហើយ។

បច្ចុប្បន្ន សមត្ថកិច្ចកោសល្យវិច័យ នៃស្នងការដ្ឋាននគរបាលរាជធានីភ្នំពេញ បានត្រួតពិនិត្យសាកសពខាងលើ រួចប្រគល់កំណត់ជូនមន្រ្តីមូលដ្ឋាន និងតម្កល់សពនៅវត្តព្រែកលាប រងចាំសាច់ញ្ញាត្តិយកទៅធ្វើបុណ្យ ៕ អត្ថបទ ៖ រដ្ឋា

The post បុរសវ័យជាង៤០ឆ្នាំ ចុះដាក់ម៉ងយកត្រីចិញ្ចឹមក្រពះ សង្ស័យរអិលជើងធ្លាក់ចូលទឹកទន្លេលង់ស្លាប់ appeared first on Kampuchea Thmey Daily.

ហេតុការណ៍នេះបានកើតឡើងកាលពីវេលាម៉ោង ១០ និង ១៥ នាទីព្រឹក ថ្ងៃទី ២៦ ខែមិថុនា ឆ្នាំ ២០២៦ នៅតាមមហាវិថីឈ្នះឈ្ន មុខវិមានឈ្នះឈ្នះ ក្នុងក្រុមទី ១ ភូមិព្រែករាំង សង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ។

តាមប្រភពព័ត៍មានពីពលរដ្ឋ បានឲ្យដឹងថា មុនពេលកើតហេតុ គេឃើញរថយន្ត ១ គ្រឿង ម៉ាក Toyota Alphard ផលិតឆ្នាំ ២០១២ ពណ៌ខ្មៅ ពាក់ស្លាកលេខ ភ្នំពេញ 2CK-3832 ខាងលើ បានធ្វើដំណើរតាមមហាវិថីឈ្នះឈ្នះ ក្នុងទិសដៅពីលិចទៅកើត។ លុះពេលធ្វើដំណើរដល់មុខវិមានឈ្នះឈ្នះ ស្រាប់តែផ្សែងហុយចេញពីម៉ាស៊ីនរថយន្ត បង្កជាអណ្តាតភ្លើងតែម្តង។ ចំណែកម្ចាស់ បានរត់ចុះពីរថយន្តទាក់ទងទៅសមត្ថកិច្ចជំនាញអគ្គិភ័យ ដើម្បីអន្តរាគមន៍ពន្លត់។

អគ្គិភ័យនេះបង្កការខូចខាតរថយន្ត ១ គ្រឿង ទាំងស្រុង ប៉ុន្តែមិនបង្កឲ្យនរណារបួសនោះឡើយ និង ប្រើប្រាស់រថយន្តពន្លត់អគ្គិភ័យចំនួន ២ គ្រឿង បាញ់ឲ្យរលត់ជាស្ថាពរ។ ចំពោះមូលហេតុដែលបណ្តាលឲ្យឆាបឆេះដោយសារឆ្លងចរន្តភ្លើងក្នុងកាប៊ីនបង្កជាអគ្គិភ័យតែម្តង៕
អត្ថបទ ៖ រដ្ឋា

The post ឆេះរថយន្ត ១ គ្រឿង ខូចខាតទាំងស្រុង នៅមុខវិមានឈ្នះឈ្នះ appeared first on Kampuchea Thmey Daily.

គ្រោះថ្នាក់ចរាចរណ៍នេះបង្កការភ្ញាក់ផ្អើលកាលពីវេលាម៉ោង ៨ ព្រឹក ថ្ងៃទី ១៩ ខែមិថុនា ឆ្នាំ ២០២៦ នេះ ស្ថិតនៅតាមបណ្តោយផ្លូវអូស៊ីអាយស៊ី សង្កាត់ព្រែកលាប ខណ្ឌជ្រោយចង្វារ រាជធានីភ្នំពេញ។

តាមប្រភពពីប្រជាពលរដ្ឋ បានឲ្យដឹងថា មុនកើតហេតុ គេឃើញម៉ូតូ ១ គ្រឿង ម៉ាក Zoomer x ពាក់ស្លាកលេខ ភ្នំពេញ 1GK-1159 ទិសដៅពីកើតទៅលិច បើកបរដោយយុវជនម្នាក់។ លុះពេលមកដល់ចំណុចផ្លូវបំបែកជាបួន ម៉ូតូខាងលើបានបត់ឆ្វេង គោលបំណងដើម្បីឆ្លងទៅផ្លូវមួយចំហៀងទៀត។ ភ្លាមៗ ក៏ស្រាប់តែមានរថយន្ត ១ គ្រឿង ម៉ាកឡង់គ្រឺស័រ ពណ៌ខ្មៅ ពាក់ស្លាកលេខ CD47 2-002 ធ្វើដំណើរក្នុងល្បឿនលឿន ទិសដៅពីលិចទៅកើត ខណៈមកដល់ចំណុចកើតហេតុ បានជ្រុលទៅបុកម៉ូតូយ៉ាងពេញទំហឹងប្លោងជាច្រើនម៉ែត្រ។ រីឯរថយន្តបានបន្តបុកខឿនពុះចែកទ្រូងផ្លូវ ក្រឡាប់ផ្ងារជើង។ ចំណែកយុវជនដែលជិះម៉ូតូរងរបួសធ្ងន់ ត្រូវបានបញ្ជូនទៅកាន់មន្ទីរពេទ្យ។ ភ្លាមៗ ប្រជាពលរដ្ឋបានធ្វើការឃាត់បុរសជាម្ចាស់រថយន្តនៅទីតាំងខាងលើ ដើម្បីរង់ចាំប្រគល់ ឲ្យសមត្ថកិច្ចផងដែរ។

ក្រោយកើតហេតុ សមត្ថកិច្ចមូលដ្ឋាន បានទំនាក់ទំនងទៅកាន់ការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីវាស់វែងយករថយន្ត និង ម៉ូតូ ទៅរក្សាទុក រង់ចាំដោះស្រាយពេលក្រោយ៕
អត្ថបទ ៖ រដ្ឋា

The post រថយន្ត ១ គ្រឿង ក្រឡាប់ផ្ងារជើង ក្រោយបើកលឿនជ្រុលបុកម៉ូតូ របួសធ្ងន់ម្នាក់ appeared first on Kampuchea Thmey Daily.

អនុវត្តតាមបទបញ្ជា និងការចង្អុលបង្ហាញដោយផ្ទាល់ពី លោក ឃួង ស្រេង អភិបាល នៃគណៈអភិបាលរាជធានីភ្នំពេញ នៅថ្ងៃទី៣ ខែមិថុនា ឆ្នាំ២០២៦ គណៈបញ្ជាការឯកភាពខណ្ឌជ្រោយចង្វារ ដឹកនាំដោយលោក លីម សុភា អភិបាលខណ្ឌជ្រោយចង្វារ រួមជាមួយលោកអធិការខណ្ឌ មេបញ្ជាការកងរាជអាវុធហត្ថខណ្ឌ និងមន្ត្រីពាក់ព័ន្ធ បានចុះត្រួតពិនិត្យរដ្ឋបាល និង អនុវត្តប្រតិបត្តិការបោសសម្អាតទីតាំងសង្ស័យពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យា (Online Scams) នៅទីតាំងអាគារខុនដូ Galaxy ស្ថិតនៅភូមិ៣ សង្កាត់ជ្រោយចង្វារ ខណ្ឌជ្រោយចង្វារ។

ប្រតិបត្តិការនេះ ក្រុមការងារបានចុះត្រួតពិនិត្យទីតាំង ខុនដូ Galaxy  ដោយកម្លាំងអាជ្ញាធរចម្រុះបានធើ្វការចុះត្រួតពិនិត្យសរុបចំនួន ៥៨ បន្ទប់ និងពិនិត្យឯកសាររបស់ជនបរទេសស្នាក់នៅចំនួន ១៨ នាក់ ដែលមានឯកសារត្រឹមត្រូវតាមច្បាប់។ ក្នុងនោះការចុះរដ្ឋបាលពិនិត្យតាមទីតាំងអាគារស្នាក់នៅខាងលើនេះ អាជ្ញាធរពុំបានរកឃើញសម្ភារៈ ឬសកម្មភាពណាមួយដែលគួរឱ្យសង្ស័យ ពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យា (Online Scams) ឬបទល្មើសផ្សេងៗឡើយ។

ជាមួយគ្នាផងដែរ រដ្ឋបាលខណ្ឌជ្រោយចង្វារ នឹងបន្តពង្រឹងការត្រួតពិនិត្យ និងអនុវត្តវិធានការច្បាប់ជាបន្តបន្ទាប់ ដើម្បីធានាសន្តិសុខ សុវត្ថិភាព និងសណ្តាប់ធ្នាប់សាធារណៈ និង បោសសម្អាតទីតាំងសង្ស័យពាក់ព័ន្ធបទល្មើសឆបោកតាមប្រព័ន្ធបច្ចេកវិទ្យា Online Scams អោយអស់ពីមូលដ្ឋានខណ្ឌ៕អត្ថបទ ៖ អុឹងម៉េង

The post អាជ្ញាធរខណ្ឌជ្រោយចង្វារ បន្តចុះពិនិត្យកន្លែងស្នាក់នៅ ជនបរទេស ដើម្បីបោសសម្អាតបទល្មើសឆបោកតាមប្រព័ន្ធបច្ចេកវិទ្យា appeared first on Kampuchea Thmey Daily.

ហេតុការណ៍នេះបានកើតឡើងកាលពីវេលាម៉ោង ៩ និង ២០ នាទីព្រឹក ថ្ងៃទី ១១ ខែឧសភា ឆ្នាំ ២០២៦ ស្ថិតនៅតាមបណ្តោយផ្លូវជាតិលេខ ៦ អា សង្កាត់បាក់ខែង ខណ្ឌជ្រោយចង្វារ រាជធានីភ្នំពេញ។

ប្រជាពលរដ្ឋ បានឲ្យដឹងថា គាត់បានឃើញរថយន្តដឹកឥដ្ឋ ១ គ្រឿង ម៉ាកហ៊ីយ៉ាន់ដាយ ពណ៌ស ពាក់ស្លាកលេខ កំពង់ចាម 3A-3839 បានធ្វើដំណើរក្នុងទិសដៅពីត្បូងមកជើង ខណៈពេលបើកមកដល់ចំណុចខាងលើ រថយន្តបានបត់ឆ្វេងដៃ។ ស្របពេលនោះ ក៏មានរថយន្តបែនដឹកខ្សាច់ ១ គ្រឿង បានបើកមកបត់ឆ្វេងដៃដូចគ្នា។ ពេលនោះ អ្នកបើករថយន្តដឹកឥដ្ឋ បានបួងចង្កូតរថយន្តជ្រុល ក៏ក្រឡាប់ចំរថយន្ត ១ គ្រឿងទៀត ម៉ាក Lexus 570 ពណ៌ខ្មៅ ពាក់ផ្លាកលេខ ភ្នំពេញ 2J-6199 ដោយបើកបរក្នុងទិសដៅពីជើងមកត្បូង។ ស្របពេលនោះ ក៏ត្រូវអ្នកជិះម៉ូតូ ១ គ្រឿង ម៉ាក ហុងដាឌ្រីសង់ សេ១២៥ ពណ៌ខ្មៅ ពាក់ស្លាកលេខ ភ្នំពេញ 1GO-6547 បណ្តាលឲ្យរងរបួសធ្ងន់-ស្រាល ចំនួន ៤ នាក់ ផងដែរ។

ក្រោយកើតហេតុ​ សមត្ថកិច្ចជំនាញការិយាល័យនគរបាលចរាចរណ៍ផ្លូវគោក ចុះមកធ្វើការវាស់វែងយករថយន្តបង្ក រថយន្តរងគ្រោះ និង ម៉ូតូរងគ្រោះ ទៅរក្សាទុក រង់ចាំដោះស្រាយគ្នាពេលក្រោយ ៕
អត្ថបទ ៖ រដ្ឋា

The post ក្រឡាប់រថយន្តដឹកឥដ្ឋ របួសធ្ងន់-ស្រាល ៤ នាក់ នៅលើផ្លូវជាតិលេខ ៦ អា appeared first on Kampuchea Thmey Daily.

ការ​បង្ក្រាប​នេះ ធ្វើឡើង​តបតាម​បទ​បញ្ជា​របស់ លោក ឃួង ស្រេង អភិបាល​រាជធានី​ភ្នំពេញ , លោក​ឧត្ដមសេនីយ៍ឯក ជួន ណារិន្ទ អគ្គស្នងការ​រង និង​ជា​ស្នងការ​នគរបាល​រាជធានី​ភ្នំពេញ រួមមាន​ការ​សម្របសម្រួល​នីតិវិធី​ច្បាប់​ពី​តំណាង​ព្រះរាជអាជ្ញា នៃ​អយ្យការ​អម​សាលាដំបូង​រាជធានី​ភ្នំពេញ គណ:បញ្ជាការ​ឯកភាព​ខណ្ឌ​ជ្រោយចង្វារ និង​គណៈ​បញ្ជាការ​ឯកភាព​ខណ្ឌ​ដូនពេញ បាន​ចុះ​ត្រួតពិនិត្យ​រដ្ឋបាល​ទីតាំង​ប្រមូលផ្តុំ​ជនបរទេស​សង្ស័យ​លួចលាក់​ប្រព្រឹត្ត​បទល្មើស​ឆបោក​តាម​ប្រព័ន្ធ​បច្ចេកវិទ្យា(Online Scams) ចំនួន ០២ ទីតាំង ផ្សេងៗ គ្នា ក្នុង​ភូមិសាស្ត្រ​រាជធានី​ភ្នំពេញ។

ក្នុង​រង្វង់​ការ​ចុះ​ត្រួតពិនិត្យ​ជា​លទ្ធផល ៖ ទីតាំងទី ០១-នៅក្នុងខុនដូ Yellow Tower ជាន់ទី ០៥ បន្ទប់C ស្ថិតនៅផ្លូវទន្លេសាប ភូមិ ០១ សង្កាត់ជ្រោយចង្វារ ខណ្ឌជ្រោយចង្វារ រាជធានី​ភ្នំពេញ រកឃើញ​បុគ្គលិក​ចំនួន ១៥ នាក់ (ស្រី ០៨ នាក់)។ ក្នុងនោះ មាន​ជនបរទេស​ចំនួន ០៦ នាក់ ស្រី ០៤ នាក់ មាន ០១ សញ្ជាតិ (ឥណ្ឌូនេស៊ី) មាន​លិខិត​ឆ្លងដែន និង​ទិដ្ឋាការ​ស្នាក់នៅ​ត្រឹមត្រូវ រួម​ជាមួយ​សម្ភារៈ វត្ថុតាង​សង្ស័យ​រួមមាន ទូរស័ព្ទ​ដៃ​ផ្ទាល់ខ្លួន​ចំនួន ១៦ គ្រឿង , ម៉ូនីទ័រ ១២ គ្រឿង , CPU ១៧ គ្រឿង។ យោង​តាម​ការ​កោសល្យវិច័យ​សន្និដ្ឋាន​បាន​ឲ្យ​ដឹង​ថា ទីតាំងខាងលើ​ជា​ភ្នាក់ងារ​បម្រើ​សេវាកម្ម​ដាក់​ប្រាក់ ដកប្រាក់ និង​ផ្ទៀងផ្ទាត់​ព័ត៌មាន​ជូន​អតិថិជន​ដែល​ចូល​លេង​ហ្គេម​អនឡាញ ទិសដៅ​ភាគ​ច្រើន​ទៅកាន់​ប្រទេស​ឥណ្ឌូនេស៊ី។

ចំណែក​ទីតាំង​ទី ០២ នៅ​ចំណុច​អគារ​ស្នាក់នៅ គ្មាន​ឈ្មោះ កម្ពស់ ០៨ ជាន់ មាន ៦៤ បន្ទប់។ ក្នុង​នោះ ​រកឃើញ​ជនបរទេស​ស្នាក់នៅ​ជា​លក្ខណៈ​ប្រមូលផ្ដុំ សរុប ៩៣ នាក់ ស្រី ០៤ នាក់ មាន ០២ សញ្ជាតិ រួមមាន ៖ សញ្ជាតិ​ប៉ាគីស្ថាន មាន ៩២ នាក់ (ស្រី ០៤ នាក់) , សញ្ជាតិ​ឥណ្ឌា មាន ០១ នាក់ មាន​លិខិត​ឆ្លងដែន​ត្រឹមត្រូវ ៦២ នាក់ ស្រី ០២ នាក់ , លិខិតឆ្លងដែន(ផុត​ទិដ្ឋាការ) ២៦ នាក់ ស្រី ០១ នាក់ , គ្មាន​លិខិត​ឆ្លងដែន ០៥ នាក់ ស្រី ០១ នាក់។ បច្ចុប្បន្ន សមត្ថកិច្ច​ បាន​បញ្ជូន​ខ្លួន​ជនជាតិ​បរទេស​ទាំងអស់​ ទៅកាន់​ស្នងការដ្ឋាន​នគរបាល​រាជធានី​ភ្នំពេញ ដើម្បី​បន្ត​នីតិវិធី៕

អត្ថបទ ៖ សុភា

The post សមត្ថកិច្ចរាជធានី ចុះពិនិត្យរដ្ឋបាលរកឃើញជនបរទេស ៩៩ នាក់ ស្នាក់នៅខុសច្បាប់ និងពាក់ព័ន្ធបទល្មើសអនឡាញ appeared first on Kampuchea Thmey Daily.

ហេតុការណ៍​នេះ​បង្ក​ការ​ភ្ញាក់ផ្អើល​កាលពី​វេលា​ម៉ោង ៤ រសៀល ថ្ងៃ​ទី ១៦ ខែ​មករា ឆ្នាំ ២០២៦ នៅ​ចំណុច​មាត់​អូរ តាម​បណ្តោយ​ផ្លូវជាតិ​លេខ ៦ អា ភូមិ​បាក់​ខែង ក្នុង​សង្កាត់​ព្រែកលាប ខណ្ឌ​ជ្រោយ​ចង្វារ រាជធានី​ភ្នំពេញ។

តាម​ប្រភព​ព័ត៌មាន​ពី​ប្រជាពលរដ្ឋ​បាន​ឲ្យ​ដឹង​ថា ពួកគាត់​ជា​អ្នក​រស់នៅ​ក្បែរ​តំបន់​ខាងលើ ដោយ​នៅ​វេលា​ម៉ោង​ជាង ៣ គាត់​បាន​ដើរ​មក​ខាងក្រៅ​ផ្ទះ ក៏​ស្រាប់តែ​ធុំក្លិន​ស្អុយ​ចេញពី​ចំណុច​មាត់​អូរ។ ភ្លាមៗ នោះ ស្មានថា​ជា​ក្លិន​កណ្តុរ​ដែល​ងាប់ ទើប​មិន​ចាប់អារម្មណ៍។ លុះ​មួយសន្ទុះ​ក្រោយ ក្លិន​ស្អុយ​កាន់តែ​ខ្លាំង​ទៅៗ ទើប​សម្រេចចិត្ត​ដើរ​មក​មើល បែរជា​ប្រទះឃើញ​សាកសព​កុមារា​វ័យ​ប្រហែល ២ ខួប ម្នាក់ សភាព​ហើម ​រុយ​រោម នៅ​មាត់​អូរ​ខាង​លើ​នេះ។ ខណៈ​នោះ ប្រជាពលរដ្ឋ បាន​ប្រញាប់ប្រញាល់​រាយការណ៍​ជូន​សមត្ថកិច្ច​មូលដ្ឋាន ដើម្បី​ចុះ​ទៅ​កាន់​ទីតាំង​កើតហេតុ ដើម្បី​ហ៊ុមព័ទ្ធ និង​ត្រួតពិនិត្យ​តែម្ដង។

ក្រោយ​កើតហេតុ សមត្ថកិច្ច​ជំនាញ​ចក្ខុ​កោសល្យវិច័យ បាន​ដឹក​សព​យក​ទៅ​ត្រួតពិនិត្យ​នៅ​វត្ត ​ស្វែងរក​មូលហេតុ នៃ​ការ​ស្លាប់ ដើម្បី​រក​ជនល្មើស​ផង​ដែរ៕

អត្ថបទ ៖ រដ្ឋា

The post ប្រទះឃើញសពកុមារាអាយុប្រមាណ ២ ខួប មានសភាពហើមស្អុយ នៅមាត់អូរ លើផ្លូវជាតិលេខ ៦ អា appeared first on Kampuchea Thmey Daily.